YI CART YI BEN STZꞌIBAL PAWL TETZ FILEMÓN
Xeꞌtzbil yol Pawl
1
1 I inaꞌtz in Pawl. Atin pres tan paj yi xomchin te ẍchusuꞌn Cristo. At kajwutz Timoteo sweꞌj, nin na chintzan tan stzꞌibeꞌn nin yi carteꞌj tzatz Filemón, na aẍ jun tan kuchꞌeyeꞌn te takꞌun Kataj. 2 Yi carteꞌj iꞌtz tetz itetz scyuchꞌ yi eꞌ mas kajwutz yi na chicham quib xe acaꞌl. Nchaꞌtz cyetz kajwutz Apia, tu Arquipo, yi cyakꞌoꞌnt quib tan chixconeꞌn tetz Kataj chi kutaneꞌn ketz. 3 Takꞌ tzaj Kataj Ryos tu Kajcaw Jesucristo yi banl tu tzatzin paz tzitibaj.Yi ẍeꞌn cuꞌn kꞌuklij cꞌuꞌl Filemón
4 I bin jaluꞌ wajwutz Filemón, cyakil tir yi na noꞌc tan nachleꞌn Kataj na cẍintyoẍij tetz iꞌ. 5 Na ja ul atziblal tzoneꞌj yi ẍeꞌn cuꞌn kꞌuklij acꞌuꞌl te Kajcaw Jesús, nin yi ẍeꞌn cuꞌn na cẍpekꞌ teꞌj. Nin ja kubit yi ẍeꞌn cuꞌn na cẍpekꞌ scyeꞌj cyakil yi eꞌ yi ateꞌ tkꞌab Ryos. 6 Nin na cheꞌ intyoẍij yi eꞌ yi ja cyocsaj yol Kajcaw Jesús tan tuꞌ yi quilol yi nternin kꞌuklij aracꞌuꞌl te iꞌ. Nin na incꞌuch tetz Kataj tan teleꞌn chitxum tetz cyakil yi eꞌchk takleꞌn balaj yi baꞌn cyetzaj tan tuꞌ yi ateꞌ tkꞌab Cristo Jesús. 7 Ej nin yi na wit atziblal yi at wiꞌnin lokꞌ ib tzawuchꞌ, mas tcunin na quiwix incꞌuꞌl, nin wiꞌnin na chintzatzin tzaweꞌj, na tan yi jun lokꞌ ibaꞌtz ja cxcyeꞌ tan takꞌleꞌn jun tzatzin scyetz yi eꞌ mas kajwutz.
Yi tabnal Pawl Onésimo tetz Filemón
8 At rmeril tan incawuneꞌn tzaweꞌj na kajwutz kib tkꞌab Cristo. 9 Poro quil tzimban, ma na ntin tzinjakeꞌ jun pawor tzatz. Sak tzawutz Filemón yi ja chintijin nin atin xetzeꞌ tan tuꞌ yi na chinxom te Cristo. 10 Chaꞌstzun te na waj tzinjak jun pawor tzatz. Na kloꞌ waj yil tzaban jun pawor tetz Onésimo,a na chi iꞌ-k jun incyꞌajl taneꞌn tkꞌab Cristo, na ja tocsaj iꞌ yol Kataj sweꞌj tzoneꞌj xetzeꞌ.
11 Poro quiꞌc xac iꞌ tzawutz yi at tzaj iꞌ tan mosiꞌn tzawuchꞌ, na nin el ojk. Poro yi jaluꞌ at xac iꞌ sketz. Na at xac iꞌ tzawetz nin at xac iꞌ swetz. 12 Chaꞌstzun te na chintzan tan ẍchakleꞌn nin junt tir tzaweꞌj. Akꞌaj bin amaꞌl tetz, chi ik i inaꞌtz yi iꞌ. 13 Yi wetz wajbil, i kloꞌ tan cyajeꞌn cyen Onésimo tzoneꞌj tan wuchꞌeyeꞌn. Ja kloꞌ cyaj iꞌ tetz axel, na tzinwutz wetz na lo cẍpekꞌ tan awuleꞌn tan wuchꞌeyeꞌn tzoneꞌj xetzeꞌ, na na el atxum tetz yi atin xetzeꞌ tan tuꞌ yi xomchin te Cristo. 14 Poro qui na waj yil tzincaw cuꞌn wib teꞌj, ma na mas baꞌn tcuꞌn jalen cuꞌn ẍcawun teꞌj, na qui na waj yi puers tuꞌ yil tzaban jun pawor swetz, ma na tajweꞌn yi tetz cuꞌn awalmaꞌ. 15 Ja stzꞌak tib iꞌ cobox kꞌej tzawutz, poro yi jaluꞌ, tzꞌaꞌtok tzaweꞌj tetz cyakil tiemp. Yi at tzaj tzaweꞌj sajleꞌn, pres iꞌ tzawuchꞌ, 16 poro yi jaluꞌ mas baꞌn tcuꞌn, na at lokꞌ ib tzixoꞌl nin ititzꞌun itzicy itib tuchꞌ tkꞌab Kajcaw Jesucristo.
Yi in wetz, wiꞌnin na chimpekꞌ teꞌj, poro yi aẍatz, mas tcuꞌn loꞌ cẍpekꞌok teꞌj jaluꞌ, na nkꞌeꞌtz ntin tzꞌocopon tetz jun balaj amos, ma na itajwutz itib tuchꞌ.
17 Chinch wetz Filemón na cẍpekꞌ sweꞌj. Chaꞌstzun te akꞌaj amaꞌl tetz Onésimo yil tzꞌopon, chi ik inaꞌtz yi iꞌ. 18 Ko at jun til yi juchnak, baꞌn tzinchoj. Nin nchaꞌtz, ko at xtxꞌokꞌbeꞌn tzatz, baꞌn tzinchoj. Jun cuꞌn nelepon cuꞌn te inyol. 19 Na i inaꞌtz in Pawl. Nin tan weri inkꞌab na chintzan tan stzꞌibeꞌn nin yi yoleꞌj.
Poro nchaꞌtz aẍ jun cꞌoloj witzꞌun, ulk txꞌakx tacꞌuꞌl yi at jun chin atxꞌokꞌbeꞌn swetz, na tan tuꞌ in awoqueꞌn tkꞌab Kataj. 20 Nin kajwutz kib tkꞌab Kajcaw. Chaꞌstzun te banaj yi jun chin paworaꞌtz swetz tan intzatzineꞌn.
21 Kꞌuklij incꞌuꞌl tzaweꞌj yi tzabneꞌ taneꞌn yi jun paworaꞌtz yi na chintzan tan jakleꞌn tzatz. Ej nin at inchꞌiw teꞌj yi cẍocopon tan banleꞌn mas pawor swutz yi na chintzan tan cꞌucheꞌn tzatz.
22 Ej nin at junt pawor yi na waj tzincꞌuch tzatz. Na kloꞌ waj yil tzajoy jun amaꞌl kalel naꞌteꞌt yil nopon, na tzinwutz wetz, tan tuꞌ yi na cxtzanwok tan nachleꞌn Kataj swibaj, at inchꞌiw tan woponeꞌn tan ixajseꞌn.
Wiꞌtzbil yol Pawl tetz Filemón
23 At kajwutz Epafras sweꞌj tzoneꞌj xetzeꞌ tan tuꞌ yi xomij te Cristo. Na tzan iꞌ tan talcheꞌn jun yos tzawetz. 24 Nchaꞌtz at coboxt kajwutz yi na chitzan tan wuchꞌeyeꞌn, iꞌtz yi kajwutz Marcos, tu kajwutz Aristarco, tu kajwutz Demas nin Lucas.
25 Takꞌ tzaj Kajcaw Jesucristo yi banl tzitibajwok. Amén.