Tan tuꞌ banl Ryos na jal kabalajil
3
1 Nchaꞌtz tajweꞌn tan anaꞌwsal scyetz yi eꞌ creyent tan cyoqueꞌn cꞌulutxum jakꞌ caꞌwl yi gobierum, scyuchꞌ yi eꞌ ajcaw tetz tnum. Na tajweꞌn yi list eꞌ tan chibnol yi eꞌchk takleꞌn balaj yil tzꞌalchij scyetz. 2 Nchaꞌtz tajweꞌn tan anaꞌwsal scyetz yi qui na yub kol choꞌc tan telseꞌn kꞌej jun, nka tan oyintziꞌ, ma na tajweꞌn tan xconeꞌn putzpuj yol cyaꞌn. Ej nin tajweꞌn tan chichajol chicꞌulutxumil ẍchiwutz cyakil wunak.3 Nin tajweꞌn tan anaꞌwsal scyetz tan chibnol yi eꞌchk xtxolbilaꞌseꞌj. Na nchaꞌtz oꞌ, oꞌ len cuꞌn yab tenẍchan. Oꞌ pajol caꞌwl. Subij choꞌt. Atoꞌ jakꞌ caꞌwl tajbil kawankil tan banleꞌn yi eꞌchk takleꞌn cachiꞌ. Chin cachiꞌ nin oꞌ. Ilenin ja el cyen kalmaꞌ te eꞌchk takleꞌn. Chin juntlen nin oꞌ, chaꞌstzun te ja chiꞌch chicꞌuꞌl wunak skeꞌj. Nin nchaꞌtz oꞌ ja chiꞌch kacꞌuꞌl scyeꞌj. 4 Poro yi lajluchaxeꞌn yi at banl talmaꞌ Ryos skeꞌj, yi colpinl ketz, nin yi teleꞌn katxum tetz yi na pekꞌ iꞌ scyeꞌj cyakil jilwutz wunak, ja keꞌl tzaj tcyꞌal tkꞌab yi jun yab ajtzaꞌklaꞌtz. 5 Quinin nkacolpij tan eꞌchk takleꞌn balaj yi nkaban cyen. Ma na jalen cuꞌn yi mmeꞌl kꞌajab Ryos skeꞌj, ja txꞌajxij yi kil nin ja cuy kapaj. Nin tan yi porer yi Espíritu Sant ja koꞌ xansaj, nin ja koꞌc tetz acꞌaj wunak. 6 Nin tan tuꞌ yi mbi banak Kajcaw Jesucristo yi colol ketz ja saj ẍchakol yi Espíritu Sant skeꞌj. 7 Ja bin koꞌc balaj tan tuꞌ banl talmaꞌ iꞌ. Ej nin jaluꞌ at te kajal yi sketzaj yi itzꞌajbil yi quinin bajsbeꞌn tetz, yi sukiꞌnt taꞌn sketz.
8 Yi xtxolbilaꞌseꞌj yi na wal nin tzatz, iꞌtz yi mero bintzi. Ilenin txolaj, bantz cyoqueꞌn yi eꞌ yi ja wiꞌt cyocsaj tan banleꞌn eꞌchk pawor tu eꞌchk takleꞌn balaj scyetz wunak. Yi chusuꞌneꞌj chumbalaj nin. Ej nin na akꞌon baꞌn scyetz wunak. 9 Il cyen yi eꞌchk wakꞌ ib te yi eꞌchk takleꞌn yi quiꞌc xeꞌ. Il cyen yi eꞌchk wakꞌ ib te chicstumbr kamam kateꞌ tu yi eꞌchk chicaꞌwl yi txumij cuntuꞌ cyaꞌn, na quiꞌc na takꞌ sketz.
10 Ko at jun yaj yi na tzan tan xiteꞌn yi cmon, baꞌn cẍben cob nka ox tir tan makleꞌn wutz nin tan xtxꞌolcheꞌn xoꞌl yi puntil tetz. Poro ko quil scꞌul, baꞌn tzalajlen.a \v 11 Na ja wiꞌt je txalpuj tajtzaꞌkl. Nin iꞌ teꞌn nin iꞌ na tzan tan juchleꞌn til.
Akꞌij caꞌwl tetz Tito
12 I bin jaluꞌ Tito, yil tzinchak nin kajwutz Artémas nka Tíquico tzaweꞌj, baꞌn tzawojkel tzaj tan awoponeꞌn le tnum Nicópolis, na ja wiꞌt intxum yi yaꞌstzun tzꞌicyꞌponeꞌt yi kꞌalaj waꞌn. 13 Chꞌeyweꞌ nin kajwutz Zenas yi abogado tu kajwutz Apolos te chipyaj. 14 Ej nin alaj scyetz cyakil kajwutz tan chibnol eꞌchk balaj pawor. Tajweꞌn cuꞌn tan chibnol yi eꞌchk paworaꞌtz tan chiwutzineꞌn swutz Kataj.
Stzajsbil wiꞌ yol
15 Cyakil yi eꞌ kajwutz yi ateꞌ tzoneꞌj na cyal nin jun yos tzawetz. Nchaꞌtz aẍ al cyen jun yos scyetz cyakil yi eꞌ kajwutz yi ateꞌ le amaꞌlaꞌtz na na chipekꞌ skeꞌj tan tuꞌ yi junit oꞌ scyuchꞌ tkꞌab Cristo. Takꞌ tzaj bin Kataj banl tzawibaj scyuchꞌ cyakil kajwutzaꞌtz yi atiẍ ẍchixoꞌl. Amén.