Tito 2

Xtxꞌolcheꞌn xoꞌl yi balaj chusuꞌn

1 Inti aẍ Tito yi na cẍoꞌc tan xtxoleꞌn yol Kataj, tajweꞌn yil cxom te yi mero chusuꞌn yi quiꞌc paltil. 2 Alaj scyetz yi eꞌ tijlcꞌuꞌlal yi quil tzꞌoc aꞌ ẍchiwiꞌ, ma na toqueꞌn cuꞌn sban yi cyajtzaꞌkl tan cyakꞌol wunak chikꞌej. Nin alaj scyetz yi puntil cuꞌn sban chitxumuꞌn nin yi tajweꞌn tan chixomeꞌn te yi chusuꞌn yi quiꞌc paltil. Nin alaj scyetz yi tajweꞌn tan chichajol yi at lokꞌ ib scyuchꞌ. Nin alaj scyetz yi tajweꞌn yil jal chipasens tan mucꞌleꞌn qꞌuixcꞌuj. 3 Ma yi eꞌ xnaꞌn tijlcꞌuꞌlal, alaj scyetz yi puntil cuꞌn cyulej cyajtzaꞌkl. Nin alaj scyetz yi qui tuꞌ chitzantuꞌ tan ẍchaqꞌueꞌn yol, nin quil cyakꞌ quib tan kbaꞌniꞌn. Ej nin alaj scyetz yi tajweꞌn tan chichusul yi eꞌ xnaꞌn yi eꞌ xuneꞌt te eꞌchk balaj xtxolbil. 4 Je tajweꞌn tan cyalol scyetz: “Chin tajweꞌn cunin tan ilokꞌil wutz ichmil scyuchꞌ eꞌ initxaꞌ. 5 Nin chin tajweꞌn cunin yi toqueꞌn cuꞌn sban itajtzaꞌkl. Ej nin chin tajweꞌn cunin tan iqꞌuicyꞌlel itib. Ej nin chin tajweꞌn cunin yi cꞌascꞌuj tziban xe icaꞌl. Nin chin tajweꞌn cunin tzichajwok yi ibalajil tu iputzpal. Tajweꞌn cuꞌn yil cẍoꞌcwok cꞌulutxum jakꞌ caꞌwl ichmil.” Yaꞌstzun tajweꞌn tan cyalol yi eꞌ tijlcꞌuꞌlal. Nin kol chiban taneꞌn yi eꞌ kajwutz xnaꞌnaꞌtz yi xtxolbilaꞌseꞌj, quiꞌt tzun tzꞌel xtxꞌix yi balaj stziblal cyaꞌn.

6 Ma yi eꞌ xicy, tajweꞌn cunin yil tzawal scyetz yi qui tuꞌ chitzantuꞌ. 7 Banaj taneꞌn yi eꞌchk takleꞌn balaj tan chixomeꞌn yi eꞌ xicy teꞌj. Nin yil cẍoꞌc tan chichusleꞌn te yi mero bintzi, qui na taj xkꞌeꞌl. 8 Toqueꞌn cuꞌn cẍjilon tan qui jaleꞌn yolbil awetz. Nin ko yaꞌtz tzaban, chitxꞌixwok tzun yi eꞌ acontr.

9 Ma yi eꞌ mas yi ateꞌ jakꞌ caꞌwl chipatrón, alaj scyetzak tan cyoqueꞌn cꞌulutxum jakꞌ chicaꞌwl, nin tan cyakꞌol tzatzin scyetz. Nin alaj scyetz yi quil chitzolnin yi yol chipatrón. 10 Ej nin alaj scyetz yi quil chalkꞌij scyeꞌj chipatrón, ma na tajweꞌn tan chichajol chicꞌulutxumil tu chibalajil. Ko yaꞌtz chiban sjalok kꞌej yi ẍchusuꞌn Ryos cyaꞌn.

11 Chin tajweꞌn cunin tan awalol yi xtxolbilaꞌseꞌj scyetz, na ja wiꞌt lajluchax yi banl talmaꞌ Ryos skawutz. Nin iꞌtz yi at rmeril tan chiclaxeꞌn cyakil wunak. 12 Na yi tajbil Ryos iꞌtz tan cyajeꞌn cyen kilol cyakil eꞌchk takleꞌn yi na el kꞌej iꞌ taꞌn; nin tan kaqꞌuicyꞌlel kib te eꞌchk takleꞌn cachiꞌ; nin tan kachajol kabalajil ẍchiwutz cyakil wunak; nin yil kek ẍchiꞌ iꞌ te yi tiemp yi akꞌij sketz tzoneꞌj wi munt. 13 Ej nin te yi na katzan tan banleꞌn taneꞌn yi eꞌchk xtxolbilaꞌseꞌj, baꞌn tzꞌoc te kajal yi skacambok te yi balaj tiemp yi at kachꞌiw teꞌj. Na yil tzꞌul tzaj yi jun tiempaꞌtz slajluchaxk yi kꞌej yi kaRyosil, tu yi kꞌej Cristo Jesús yi colol ketz. 14 Na yi Jesúsaꞌtz, yaꞌstzun yi jun yi takꞌ tib tan kacolpeꞌn tkꞌab kil. Nin ja koꞌ xansaj bantz koqueꞌn tkꞌab iꞌ tan kabnol taneꞌn eꞌchk takleꞌn balaj.

15 I bin jaluꞌ Tito, txolaj bin cyakil yi xtxolbilaꞌseꞌj. Joyaj puntil tan makleꞌn chiwutz yi eꞌ kajwutz. Quil cxob tan chimakleꞌn te eꞌchk takleꞌn cachiꞌ, na akꞌijt caꞌwl tan Ryos takꞌab. Ej nin eliꞌch len bin akꞌej cyaꞌn.