YI CART YI BEN STZꞌIBAL PAWL TETZ TITO
Yi xeꞌtzbil yol Pawl
1
1 I inaꞌtz, in Pawl. In ẍchakum Ryos. In apostl tetz Jesucristo. Yi wetz in munl iꞌtz tan chiquiwseꞌn yi eꞌ yi txaꞌij cheꞌt tan Ryos. Nin nchaꞌtz yi wetz inmunl iꞌtz tan xtxꞌolcheꞌn xoꞌl yi bintzi scyetz, bantz teleꞌn mas chitxum tetz yi xeꞌ yi xtxolbil yi na kocsaj. 2 Yaꞌstzun na imban bantz chicambal yi itzꞌajbil yi quinin bajsbeꞌn tetz. Na Kataj Ryos nsukin yi jun itzꞌajbilaꞌtz sketz. Ej nin quiꞌc nin muꞌẍ laꞌjil tuchꞌ. 3 Na yi ntaxk cuꞌ xeꞌtzbil yi wuxtxꞌotxꞌ suk iꞌ yi itzꞌajbilaꞌtz sketz. Poro jaluꞌ te tiempeꞌj tzan lajluchaxeꞌn yi tajbil iꞌ ẍchiwutz wunak tan yi na tzan xtxoleꞌn scyetz. Nin nchaꞌtz in, chakij chin tan Ryos, yi colol ketz, tan xtxoleꞌn yi jun balaj stziblalaꞌtz.4 Yi carteꞌj iꞌtz tetz atz Tito, na chi aẍk incyꞌajl taneꞌn na junit na kocsaj. Takꞌ tzaj Kataj Ryos tu yi Kajcaw Jesucristo yi colol ketz yi banl tu yi tzatzin paz tzawibaj.
Yi eꞌ yi baꞌn choꞌc tetz wiꞌ banl wiꞌ
(1 Tim 3.1)
5 I bin jaluꞌ Tito, ja ẍcyaj cyen wukꞌol le amaꞌl Cret tan awoqueꞌn tan chichusleꞌn yi eꞌ kajwutz te yi chusuꞌn yi txeꞌn chijepon tuchꞌ. Nin tan chibixbajeꞌn yi eꞌ yi baꞌn choꞌc tetz wiꞌ banl wiꞌ lakak tnum. Banaj bin taneꞌn yi eꞌchk caꞌwl yi cyajnak cyen intxolil tzatz. 6 Baꞌn cheꞌ abixbaj yi eꞌ yaj yi quiꞌc yolbil cyetz, yi eꞌ yi junintziꞌ quixkel, yi eꞌ yi ateꞌ nin chinitxaꞌ tkꞌab Kataj, na qui na yub kol cheꞌ abixbaj yi eꞌ yaj yi tu na chipaꞌcaꞌp tuꞌ chinitxaꞌ. 7 Na chin tajweꞌn cunin yi quil jal yolbil tetz jun wiꞌ banl wiꞌ, yi at sjuꞌ takꞌun Kataj. Quiꞌc cu tan cyoqueꞌn yi eꞌ kajwutz yi na cyocsaj quib nim tu cyajtzaꞌkl; nka yi eꞌ yi at chimacleꞌn; nka yi eꞌ yi na oc aꞌ chiwiꞌ; nka yi eꞌ yi chin chigan nin oyintziꞌ; nka yi eꞌ yi xkantzaj nink na cyaj. 8 Ma na baꞌn cheꞌ abixbaj yi eꞌ kajwutz yi eꞌ akꞌol posar; scyuchꞌ yi eꞌ yi na el chikꞌajab scyeꞌj wunak; scyuchꞌ yi eꞌ yi puntil cuꞌn chitxumuꞌn; scyuchꞌ yi eꞌ balaj, yi tzꞌaknak cuꞌn eꞌ; scyuchꞌ yi eꞌ yi qui na cyocsaj quib nim tu cyajtzaꞌkl. 9 Tajweꞌn yi choꞌn ajlij chicꞌuꞌl te yol Kataj yi baꞌn kꞌukeꞌ kacꞌuꞌl teꞌj. Tajweꞌn yi choꞌn ajlij chicꞌuꞌl teꞌj, bantz chixcyeweꞌn tan chichusleꞌn yi eꞌ yi baꞌn ateꞌt, nin tan makleꞌn chiwutz yi eꞌ yi juntlen chitxumuꞌn.
10 Chin tajweꞌn cunin yil chibixeꞌ wiꞌ banl wiꞌ yil chixom te yi xtxolbilaꞌseꞌj, na wiꞌnin pajol caꞌwl ateꞌ. Wiꞌnin eꞌ yi quiꞌc xtxolbil chijilon. Eꞌ cuꞌn subul nak. Ej nin yi jun jilwutz wunakaꞌtz, choꞌn na jal mas ẍchixoꞌl yi eꞌ judiy yi ateꞌ tajlal cmon creyent. 11 Chin tajweꞌn cunin tan makleꞌn chiwutz, na at na ban cuꞌn yi na chixcyeꞌ tan chisubleꞌn jujun najal. Yi cyetz chichusuꞌn quiꞌc xac. Na ntin na chitzan tan xtxoleꞌn tan tuꞌ yi xkantzaj nink na cyaj.
12 Juntlen cyajtzaꞌkl yi eꞌ aj Cret kale atixeꞌt, na je yol talnak jun scyeri cyetz chinachol: “Yi eꞌ weri intanum, eꞌ cuꞌn laꞌj. Chin cachiꞌ nin cyajtzaꞌkl. Chin xoꞌj nin eꞌ tan waꞌaꞌn, nin chin cyꞌaj nin eꞌ,” stzun iꞌ ban cyen. 13 Bintzi yi talnak iꞌ. Chaꞌstzun te makaj chiwutz bantz chixomeꞌn te yi bintzi. 14 Na qui na yub kol chixom kajwutz te eꞌchk ajtzaꞌkl yi txumij cuntuꞌ cyakꞌun yi eꞌ judiyaꞌtz yi ateꞌ tzixoꞌlwok, na yi cyetz na chitzan tan cyajseꞌn cyen yi bintzi.
15 Na skawutz ketz yi txꞌajij cuꞌn te kajtzaꞌkl, na el katxum tetz yi quiꞌc nin jun takleꞌn yi xank yil kabajsaj. Nin quiꞌc nin jun takleꞌn yi xank yil kamac. Poro ẍchiwutz yi eꞌ yi nkꞌeꞌtz txꞌajij cuꞌn te cyajtzaꞌkl, yi eꞌ yi qui kꞌuklij chicꞌuꞌl, quiꞌc nin jun eꞌchk takleꞌn yi nkꞌeꞌtz xan ẍchiwutz, na qui na chinachon teꞌj yi ko baꞌn na chiban nka quiꞌ. 16 Na cyal cyetz yi na cyek ẍchiꞌ Ryos, poro tan yi eꞌchk takleꞌn yi na chiban, na lajluchax yi qui na cyocsaj yi mero xtxolbil. Chin juntlen nin eꞌ tu cyajtzaꞌkl. Quiꞌc chixac, na eꞌ len cuꞌn pajol caꞌwl Ryos.