4
1 Ma jaluꞌ Timoteo, swutz cuꞌn Ryos nin swutz cuꞌn Cristo Jesús ẍchincawunk nin tzaweꞌj. Na txant tan tuleꞌn Kajcaw tan maꞌleꞌn yi kajtzaꞌkl cyakil yi oꞌ yi itzꞌoꞌ scyuchꞌ cyakil yi eꞌ yi quimnakeꞌ. Txant tan tuleꞌn iꞌ chi jun rey, tan kacaweꞌn. 2 Chaꞌstzun te, joyaj puntil tan xtxoleꞌn yol Kataj alchok scyetz oril yi na noj quen puntil tzawutz. Moxweꞌ yi ẍeꞌn tan cyocsal yi yol Kataj. Makaj chiwutz tan qui chibeneꞌn tul il. Akꞌaj jun balaj cyajtzaꞌkl. Poro toqueꞌn cuꞌn tzawulej yil cẍoꞌc tan chichusleꞌn, 3 na tzantzaj tlen quiꞌt cyakꞌ amaꞌl sketz tan cheꞌ kachusul te yi balaj chusuꞌn, na chocopon tan banleꞌn yi cyetz cyajbil, nin ẍchijoyeꞌ eꞌ aj chusunl yi baꞌn choꞌc tan chichusleꞌn te cyetz cyajbil yi na cyaj quibit. 4 Jalt cun tu loꞌ wutz chicoc chitzejbaj tzaj tan tbiteꞌn yi yol yi bintzi. Ntin chocopon tan tbiteꞌn yi eꞌchk xtxolbil yi txumij cuntuꞌ. 5 Inti aẍatz, quiwit. Mucꞌaj eꞌchk qꞌuixcꞌuj. Nqueꞌn il tan xtxoleꞌn yi xtxolbil yi baꞌn na kaclax taꞌn. Banaj bin taneꞌn yi amunl yi akꞌij tzatz.6 Txant tan tuleꞌn yi kꞌejlal tan inquimeꞌn, nin yi quimichil yi sbajok sweꞌj, yaꞌstzun jopbil wiꞌ yi oy yi na wakꞌ tetz Kataj. 7 Na ja imbuch wib tan banleꞌn taneꞌn yi inmunl yi akꞌij swetz. Nin ja chinxcyeꞌ tan wuponeꞌn tampuj kale atit wupombil. Na choꞌn cuꞌn mimban chi na chiban eꞌ yaj yi na chipil quib tan quilol yi naꞌ scyetz eꞌ chixcyek tan cyoponeꞌn chan kale atit cyopombil. Poro yi in wetz quinin chincyaj nicyꞌal beꞌ, ma na ja nopon tampuj kale atit wupombil. Quinin mincabej incꞌuꞌl te yi na wocsaj. 8 Tan tuꞌ yi puntil cuꞌn wulej wajtzaꞌkl, at inchꞌiw te jun oy. Na yil tzꞌul yi jun kꞌejlalaꞌtz tzꞌakꞌlok swetz. Nin yi Kajcaw, yaꞌstzun tzꞌakꞌon tetz yi jun oyaꞌtz swetz, na iꞌ yi mero balaj pujul xtisyaꞌ. Poro nkꞌeꞌtz ntin in chincambok teꞌj, ma na nchaꞌtz cyakil yi eꞌ yi nternin na cuꞌ chitziꞌ tan tuleꞌn chan Kajcaw, ẍchicambok te yi jun oyaꞌtz.
Yi jakol Pawl pawor tetz Timoteo
9 Joyaj puntil tan awuleꞌn chan tan inxajseꞌn. 10 Na ja chincyaj tilol Demas. Mas na pekꞌ iꞌ te mebiꞌl. Choꞌn at iꞌ le tnum Tesalónica. Nchaꞌtz kajwutz Crescente, ja ben iꞌ le amaꞌl cwent Galacia. Ma Tito choꞌn at iꞌ le amaꞌl Dalmacia. 11 Jalt yi kajwutz Lucas at cyen sweꞌj.
Ma jaluꞌ, banaj pawor tan joyleꞌn kajwutz Marcos tan tuleꞌn tzoneꞌj tan wuchꞌeyeꞌn te takꞌun Kataj, 12 na ten ben inchakol Tíquico le tnum Efeso. 13 Yil cẍaꞌj tzaj, cyꞌaj tzaj incẍeꞌy yi cyaj cyen waꞌn le caꞌl kajwutz Carpo le tnum Troas, Nchaꞌtz na waj eꞌchk uꞌj tu eꞌchk liwr. Poro yi mas tajweꞌn tan sajeꞌn iꞌtz yi eꞌchk liwr.
14 Ma jaluꞌ, or tzawil Alejandro yi txakꞌol chꞌichꞌ. Chin cachiꞌ nin banak iꞌ sweꞌj. Poro Kataj tzꞌakꞌon tetz yi caws. 15 Or tzawil iꞌ, na chin contr nin iꞌ te kachusuꞌn yi na katzan tan xtxoleꞌn.
16 Ma jaluꞌ i mimban wetz yi in colol wib ẍchiwutz yi eꞌ wiꞌ banl wiꞌ tetz tnum. Cyaꞌl nin jun mmoꞌc tan wuchꞌeyeꞌn. Na ja chin cyaj cyen quilol cyakil eꞌ wamiw. Kataj cuꞌn cuyun chipaj. 17 Poro ntyoẍ tetz Kajcaw yi ja oc tan wuchꞌeyeꞌn. Na iꞌ mmakꞌon inwalor tan xtxꞌolcheꞌn xoꞌl yi balaj stziblal, nin ja quibit yi eꞌ yi nkꞌeꞌtz eꞌ katanum. Na Kajcaw nchincolon tkꞌab yi incontr yi i cunin tuchꞌ balum.a \v 18 Ej nin ilenin tzꞌocopon Kajcaw tan incolcheꞌn jalen yil nopon kale na cawuneꞌt iꞌ. Kakꞌeꞌ bin kakꞌajsbil tetz iꞌ tetz ben kꞌej ben sak. Amén.
Stzajsbil wiꞌ yol
19 Al quen jun yos tetz kajwutz Prisca tu kajwutz Aquila, scyuchꞌ eꞌ najal Onesíforo. 20 Ma Erasto, choꞌn cyajeꞌn cyen Corint. Ma Trófimo choꞌn cyajeꞌn waꞌn Mileto, na yabiꞌẍ iꞌ. 21 Joyaj puntil tan awuleꞌn tzoneꞌj yi ntaxk xeꞌtij yi kꞌalaj. Nchaꞌtz kajwutz Eubulo tu Prudente na cyal nin jun yos tzawetz. Nchaꞌtz Lino tu Claudia scyuchꞌ cyakil kajwutz yi ateꞌ tzoneꞌj, na chitzan tan talcheꞌn nin jun yos tzatz.
22 Timoteo lok xom Kajcaw Jesucristo tzaweꞌj. Nin takꞌ tzaj Kataj yi banl iꞌ tzitibaj icyakil cuꞌn. Amén.