YI BAJX CART YI BEN STZꞌIBAL PAWL TETZ TIMOTEO
Xeꞌtzbil yol Pawl
1
1 Yi in wetz, in Pawl, in apostl tetz Jesucristo. Chakij chint tan Ryos yi colol ketz, tu Kajcaw Jesucristo, yi choꞌn at kachꞌiw teꞌj. 2 Na chintzan tan stzꞌibeꞌn nin yi carteꞌj tzawetz Timoteo, yi aẍ incyꞌajl taneꞌn tkꞌab Jesucristo. Takꞌ tzaj Kataj Ryos tu Kajcaw Cristo Jesús yi banl tu tzatzin paz tzawibaj.Yi eꞌchk xtxolbil yi quiꞌc na takꞌ sketz
3 Ma jaluꞌ Timoteo na waj tzinnaꞌwsaj tzatz yi yol yi walnak tzawetz, yi ntaxk nuꞌl tzoneꞌj Macedonia. Injak pawor tzatz tan acyajeꞌn cyen le tnum Efeso tan makleꞌn chiwutz cobox yi na chitzan tan xtxumleꞌn eꞌchk chusuꞌn yi nkꞌeraꞌtz bintzi. 4 Alaj scyetz yi quil choꞌc tan xtxumleꞌn yi eꞌchk xtxolbil yi txoliꞌnt cyen cyakꞌun kamam kateꞌ. Na quinin bajsbeꞌn tetz xtxumleꞌn yi eꞌchk xtxolbilaꞌtz, poro quiꞌc na takꞌ sketz. Na quil xcyeꞌ tan kuchꞌeyeꞌn tan banleꞌn taneꞌn yi tajbil Ryos. Ma na ntin kaxcyek tan banleꞌn taneꞌn yi tajbil Ryos kol kꞌukeꞌ kacꞌuꞌl te Cristo.
5 Ma yi xeꞌ yi ketz kachusuꞌn iꞌtz: Kalokꞌeꞌ kib skibil kib. Nin yi jun jilwutz lokꞌ ibaꞌtz ntin na lajluchax skeꞌj yi ko skoj cuꞌn te kalmaꞌ, nin ko quiꞌc kil na kanach, nin ko nkꞌeꞌtz kawutz tuꞌ kaplaj tuꞌ na kocsaj yi yol Kataj. 6 Poro at eꞌ yi quiꞌt xomcheꞌ te ketz kachusuꞌn. Nin ja poꞌtij cyajtzaꞌkl tan tuꞌ yi na choꞌc tan wakꞌ ib te eꞌchk ajtzaꞌkl cyetz kamam kateꞌ yi quiꞌc na takꞌ sketz. 7 Na cyaj choꞌc tetz aj chusunl te tajbil Ryos poro qui na el chitxum tetz mbi chusuꞌnil na chitzan tan yolcheꞌn. Qui na chicabej chicꞌuꞌl tan xtxoleꞌn, poro qui na pujx cyaꞌn yi mbi ekaꞌn tan chichusuꞌn.
8 Skawutz ketz chumbalaj nin yi ley Kataj yi tzꞌibaꞌnt cyen, nin na el katxum tetz yi at xac kol kaxconsaj chi tajbil Ryos. 9 Nin na el katxum tetz yi eꞌchk leyaꞌtz yi nkꞌeꞌtz banijt tan makleꞌn chiwutz yi eꞌ balaj, ma na banijt tan makleꞌn chiwutz yi eꞌ mal nak, scyuchꞌ eꞌ pajol caꞌwl. Na banijt yi eꞌchk leyaꞌtz scyetz yi eꞌ yi quiꞌc chiryosil, scyuchꞌ yi eꞌ juchul il. Nin banijt scyetz yi eꞌ yi qui na cyek ẍchiꞌ Ryos scyuchꞌ yi eꞌ yi quiꞌc na cyocsaj. Nin banijt eꞌchk leyaꞌtz tan chimakleꞌn yi eꞌ yi na chibiy cuꞌn chitaj chitxuꞌ, scyuchꞌ cyakil jilwutz biyol nak. 10 Nin tan makleꞌn chiwutz yi eꞌ jopol wutzaj, scyuchꞌ yi eꞌ yaj yi na chicxonsaj quib squibil quib chi na xcon jun xnaꞌn. Ej nin na el katxum tetz yi banijt yi eꞌchk leyaꞌtz tan makleꞌn chiwutz yi eꞌ alkꞌom wunak scyuchꞌ yi eꞌ laꞌj, scyuchꞌ yi eꞌ yi na cyocsaj quib stiw poro nkꞌeꞌtz bintzi. Nchaꞌtz na el katxum tetz yi banijt yi eꞌchk ley Kataj tan makleꞌn chiwutz cyakil yi eꞌ yi contr te yi balaj chusuꞌn 11 yi akꞌijt swetz takꞌun kaRyosil, yi Ryos yi chumbalaj nin tetz, nin wiꞌnin kꞌej.
Na tyoẍin Pawl tan yi banl talmaꞌ Ryos
12 Chaꞌstzun te na chintyoẍin tetz Kajcaw Jesucristo, na iꞌ mmakꞌon tzaj inchamil tan xtxoleꞌn yi yol iꞌ. Nin na chintyoẍin tetz na ja chinjeꞌ xtxaꞌol tan inxconeꞌn tetz, na ilijt taꞌn yi sneꞌlk cuꞌn te akꞌun yi na taj iꞌ tzimban. 13 Chin cachiꞌ nin in yi ntaxk wocsaj, na ocnakin tan jisleꞌn Ryos, nin tan chibuchleꞌn yi eꞌ cmon creyent nin tan telseꞌn kꞌej iꞌ. Poro nin el kꞌajab iꞌ sweꞌj, nin ja chin jeꞌ xtxaꞌol na quinin npujx waꞌn mbi cuꞌn mimban sajleꞌn, na ntaxk el intxum te yi bintzi. 14 Poro ja takꞌ Kajcaw wiꞌnin banl swibaj. Nin tan tuꞌ yi banl iꞌ yi ntakꞌ swetz, ja kꞌukeꞌ incꞌuꞌl teꞌj, nin ja jal jun lokꞌ ib waꞌn yi ntin na jal kaꞌn ko atoꞌ tkꞌab Cristo.
15 Na je jun xtxolbileꞌj yi bintzinin tetz, yi baꞌn cyocsaj cyakil wunak. Ulak Jesucristo wi munt tan chicolpeꞌn yi eꞌ juchul il. Na yi in wetz, sajleꞌn in jun chin wiꞌtz juchul il. 16 Poro ja el kꞌajab Ryos sweꞌj tan ẍchajleꞌn scyetz cyakil wunak yi at pasens iꞌ tan cuyleꞌn chipaj. Na ja el kꞌajab sweꞌj tan ẍchajleꞌn yi at pasens iꞌ tan cuyleꞌn chipaj cyakil yi eꞌ yi scyocsajeꞌ yol iꞌ sbneꞌ opon tunintz. Na cyakil yi eꞌ yi skꞌukek chicꞌuꞌl te Jesucristo, ẍchicambok te yi itzꞌajbil yi quinin bajsbeꞌn tetz. 17 Cyaꞌl txicleꞌt kaRyosil skawutz, poro iꞌ yi wiꞌtz ajcaw sajleꞌn, nin sbneꞌ opon tunintz. Quiꞌc tetz quimbil, nin qui lajluch iꞌ. Cyaꞌl atit junt Ryos, ntin iꞌ. Chaꞌstzun te kakꞌeꞌ kꞌej iꞌ, nin kakꞌeꞌ kakꞌajsbil tetz sbneꞌ opon tunintz. Amén.
18 Ma jaluꞌ aẍ jun cꞌoloj Timoteo, tajweꞌn tzaban taneꞌn yi eꞌchk caꞌwleꞌj na yaꞌstzun amunl tan abnol taneꞌn, chi cyal yi eꞌ elsanl stziꞌ Ryos tzawetz yi abixeweꞌn sjuꞌ takꞌun Kataj. Chaꞌstzun te oken kbal yi amunlaꞌtz yi akꞌij tzatz. 19 Benk awukan ttxꞌotxꞌ te yi na kocsaj nin banaj taneꞌn yi xtxolbil yi na cẍnachon teꞌj yi yaꞌstzun yi balaj. Na at eꞌ yi quinin eꞌ oc tan banleꞌn taneꞌn yi eꞌchk takleꞌn yi ja chinachon teꞌj yi yaꞌstzun yi balaj. Chaꞌstzun te ja chipoꞌtij, nin ja chiben mulkꞌuj tul il tan paj. 20 Nin yaꞌstzun nchiban Himeneo tu Alejandro. Chaꞌstzun te ja cheꞌl injatxol tkꞌab yi Baybaꞌn bantz teleꞌn chitxum tetz yi ploj cyajtzaꞌkl yi nchoꞌc tan telseꞌn kꞌej Kataj Ryos tan chiyol.