YI CAꞌP CART YI BEN STZꞌIBAL PAWL TETZ TIMOTEO
Xeꞌtzbil yol Pawl
1
1 Yi in wetz, in Pawl, in apostl tetz Jesucristo. Chakij chint tan Ryos tan xtxoleꞌn scyetz cyakil wunak yi jun cuꞌn stkꞌeꞌ Ryos yi itzꞌajbil yi sukiꞌnt taꞌn. Ej nin skacambajeꞌ yi jun itzꞌajbilaꞌtz ko junit oꞌ tu Cristo. 2 I bin jaluꞌ Timoteo, na chintzan tan stzꞌibeꞌn nin yi carteꞌj tzawetz, na chin okꞌleꞌn nin awutz wakꞌun, na chi aẍk incyꞌajl taneꞌn tkꞌab Jesucristo. Takꞌ tzaj Kataj Ryos tu Kajcaw Cristo Jesús yi banl tu tzatzin paz tzawibaj.Yi toqueꞌn Pawl tan cꞌaseꞌn tajtzaꞌkl Timoteo
3 Quinin na cẍeꞌl te incꞌuꞌl Timoteo, yi na noꞌc tan nachleꞌn Kataj, ilenin na chintyoẍin tzawibaj, na tetz cuꞌn walmaꞌ na chintzan tan banleꞌn inmunl swutz Ryos chi eꞌ banakeꞌ yi eꞌ inmam inteꞌ. 4 Nternin na chimpekꞌ tan wilol junt tir awutz, na na ul txꞌakx tincꞌuꞌl yi wiꞌnin awokꞌeꞌn yi acyajeꞌn cyen le tnumaꞌtz. 5 Nin na ul txꞌakx tincꞌuꞌl yi bintzi nin kꞌuklij acꞌuꞌl te Kataj chi quitaneꞌn atxucyꞌeꞌx Loida tu atxuꞌ Eunice.
6 Ma jaluꞌ Timoteo, na kloꞌ waj yil tzaxconsaj yi awajtzaꞌkl yi takꞌnak Ryos tzatz yi jeꞌn wukꞌol inkꞌab tawiꞌ. 7 Na bintzinin yi ajtzaꞌkl yi akꞌij tan Ryos sketz, nkꞌeꞌtz tan kaxobeꞌn ma na iꞌtz tan jaleꞌn kachamil nin tan kachajol yi lokꞌ ib, nin tan kamakol kib te alchok eꞌchk takleꞌn. 8 Chaꞌstzun te quil cxtxꞌixwij tan atxolil yi balaj stziblal tetz Kajcaw, nin qui cxtxꞌixwij tan paj yi atin xetzeꞌ, na atin xetzeꞌ tan tuꞌ yi na chintzan tan xtxoleꞌn yi biꞌ Jesucristo. Poro nchaꞌtz aẍ, tajweꞌn cuꞌn tan ticyꞌeꞌn poneꞌn noc qꞌuixcꞌuj awaꞌn, na yi jun qꞌuixcꞌujaꞌtz, ilenin tzꞌul tan tuꞌ yi na katzan tan xtxoleꞌn yi balaj stziblal. Poro stkꞌeꞌ Ryos achamil tan ticyꞌeꞌn poneꞌn awaꞌn. 9 Colpiꞌn choꞌt tan Ryos, nin txaꞌij choꞌt taꞌn tan kaxconeꞌn tetz. Poro nkꞌeꞌtz tan tuꞌ yi atk kabalajil yi yaꞌtz nkoꞌ tulejtz, ma na tan tuꞌ yi yaꞌtz tajbil iꞌ. Tan tuꞌ Jesucristo ntakꞌ wit Ryos banl skibaj. Nin txumijt taꞌn le xeꞌtzbil tzaj. 10 Poro jaluꞌ, yi tulakeꞌn Jesucristo yaꞌstzun lajluchaxeꞌn yi tajtzaꞌkl Ryos na ja xcyeꞌ Cristo tan xiteꞌn yi porer yi quimichil, nin tan yi balaj stziblal ja lajluchax skawutz yi at jun itzꞌajbil yi cyaꞌl nin jun xcyeꞌ tan xiteꞌn.
11 Chakij chin tan Ryos tan xtxoleꞌn yi jun balaj stziblalaꞌtz. Na ja noꞌc taꞌn tetz jun apostl tan chichusleꞌn yi eꞌ yi nkꞌeꞌtz eꞌ judiy. 12 Chaꞌstzun te muqꞌuij yi eꞌchk qꞌuixcꞌuj wakꞌun, nin qui na chintxꞌixwij, na elnak intxum tetz naꞌ scyetz iꞌ yi jun yi kꞌuklij incꞌuꞌl teꞌj. Na jun cuꞌn yol na wocsaj yi at porer tu Ryos tan qꞌuicyꞌleꞌn yi tetz takꞌun yi atin sjuꞌ, jalen cuꞌn yil tzꞌul yi wiꞌtzbil kꞌejlal.
13 Chaꞌstzun te Timoteo xomen quen tuꞌ te eꞌchk balaj chusuꞌn yi walnak tzatz. Kꞌukek acꞌuꞌl te Ryos nin chajaj yi lokꞌ ib yi takꞌnak Cristo Jesús tzatz. 14 Na tan porer yi Espíritu Sant yi najlij tzaweꞌj tajweꞌn yil xcon yi balaj ajtzaꞌkl yi at tetz awalmaꞌ, yi ajtzaꞌkl yi Ryos akꞌon tzatz.
15 Bitaꞌnt bin awaꞌn yi ẍeꞌn cunin teleꞌn chijatxol quib yi eꞌ kajwutz sweꞌj, cyakil yi eꞌ yi najlcheꞌ le amaꞌl Asia. Eꞌ jun yi cob yaj yi na chibiꞌaj Figelo tu Hermógenes. 16 Nin nchaꞌtz Onesíforo tu tetz najal. Lok tzꞌel kꞌajab Ryos scyeꞌj, na wiꞌnin pawor ban iꞌ swetz. Ej nin quinin txꞌixwij tan paj yi atin xetzeꞌ. 17 Na yi at tzaj iꞌ tzoneꞌj Roma, quinin kꞌeꞌxij tan injoyleꞌn jalen cuꞌn yi injaleꞌn taꞌn. 18 Ẍeꞌnk tzꞌel kꞌajab Kajcaw teꞌj yil tzꞌul yi wiꞌtzbil kꞌejlal. Ilijt awaꞌn yi wiꞌnin ichꞌeyaꞌn ban iꞌ sweꞌj te yi atin tzaj tzawuchꞌ Efeso.