6
1 Inti eꞌ kajwutz yi eꞌ esclaw, tajweꞌn cuꞌn tan cyoqueꞌn cꞌulutxum jakꞌ caꞌwl chipatrón tan qui teleꞌn kꞌej kaRyosil, nin tan qui teleꞌn kꞌej kachusuꞌn. 2 Nchaꞌtz mpe creyent yi chipatrón, quil scꞌul yi nink tzꞌel kꞌej cyaꞌn tan tuꞌ yi eꞌ cuꞌn creyent tuchꞌ. Poro na taj yil choꞌc mas il te cyakꞌun, na junit yi na cyocsaj, nin at lokꞌ ib ẍchixoꞌl tu chipatrón. Chusweꞌ, nin txolaj yi xtxolbileꞌj scyetz.Skacambok kol kaban taneꞌn tajbil Ryos
3 Chin yab nin yi eꞌ yi na cyocsaj quib nim tu cyajtzaꞌkl, yi eꞌ yi na chitzan tan xtxoleꞌn yi eꞌchk ajtzaꞌkl yi nkꞌeꞌtz bintzi. Na qui na chixom te ẍchusuꞌn Kajcaw Jesucristo, yi jun yi na kocsaj ketz. 4 Nim cuꞌn txꞌakxnakeꞌ tu cyajtzaꞌkl, na ntin na chiwakꞌ quib te yi mbi na elepont jun yol le wutz cyetz cyajtzaꞌkl. Tan yi xtxolbilaꞌtz na jal oyintziꞌ tu chiꞌch cꞌuꞌlal ẍchixoꞌl, nin na jal wokꞌloꞌn ib. Nin qui na kꞌukeꞌ chicꞌuꞌl squibil quib tan paj. 5 Quinin bajsbeꞌn te yi oyintziꞌ yi na chinucꞌ cuꞌn, na xubsnakt yi cyajtzaꞌkl. Qui na el chitxum tetz yi bintzi. Nin le wutz cyetz cyajtzaꞌkl yi chin tajweꞌn cunin yil chitxꞌac chipuꞌk te yi na cyocsaj. 6 Poro yi oꞌ ketz bintzinin skatxꞌaconk kol kaban taneꞌn yi tajbil Ryos, nin kol katzatzin te noc yil takꞌ sketz. 7 Na yi kuleꞌn itzꞌok, quiꞌc jun eꞌchk takleꞌn cyꞌaꞌn kaꞌn. Nchaꞌtz yil kaꞌj, quiꞌc jun takleꞌn yi baꞌnk kucyꞌaj nin. 8 Ko at beꞌch ketz, nin ko at kawaꞌ, katzatzink bin. 9 Ma yi eꞌ yi na el cyalmaꞌ tan cyoqueꞌn tetz ric, na poꞌtij cyajtzaꞌkl tan xtxumleꞌn chiriquil. Tunin na el tunin cyalmaꞌ-tz te eꞌchk takleꞌn, nin quiꞌc na takꞌ scyetz. Nin na xcyeꞌ tan chimulkꞌeꞌn nin tul il. 10 Kol tzꞌel nin kalmaꞌ te pwok na jal wiꞌnin bis oꞌkl kaꞌn. Na at eꞌ yi elnak cyalmaꞌ te pwok, nin ja chipakxij. Poro eꞌ teꞌn nchoꞌcsan sotzaj cꞌuꞌlal tetz cyalmaꞌ.
Jun xtxolbil tan mucꞌleꞌn qꞌuixcꞌuj
11 Ma jaluꞌ witzꞌun, atiẍ cwent Ryos. Banaj cwent awib te cyakil yi eꞌchk takleꞌn yi ja ben intxolil tzawetz. Nqueꞌn il tan abnol taneꞌn yi eꞌchk takleꞌn balaj, nin tan cꞌuꞌlajeꞌn Ryos, nin tan kꞌukeweꞌn acꞌuꞌl teꞌj. Icyꞌichlen apaj tan banleꞌn taneꞌn lokꞌ ib. Aꞌtok apasens tu aputzpal. 12 Quiwit tan mucꞌleꞌn qꞌuixcꞌuj yil tzꞌul tan apileꞌn tan tuꞌ yi kꞌuklij acꞌuꞌl te Ryos. Quil tzawakꞌ awib tkꞌab eꞌchk pilbil awetz, ma na quiwsaj awib tan acambal yi itzꞌajbil yi quinin bajsbeꞌn tetz, na yaꞌstzun axac yi acẍjeꞌn xtxaꞌol Ryos. Ej nin nach cuꞌn ayol yi alijt awaꞌn ẍchiwutz jun cꞌoloj kajwutz yi cxomok te kachusuꞌn. Eꞌ cuꞌn stiw te ayol.
13 Ma jaluꞌ swutz cuꞌn Ryos chincawunk nin tzatz, swutz yi Ryosaꞌtz yi na akꞌon quitzꞌajbil cyakil eꞌ txuc scyuchꞌ cyakil wunak. Nchaꞌtz swutz cuꞌn Jesucristo chincawunk nin tzatz, yi Jesucristo yi quinin xob tan talcheꞌn yi mero bintzi tetz Poncio Pilato. 14 Banaj taneꞌn cyakil yi eꞌchk takleꞌn yi na chintzan tan xtxoleꞌn nin tzatz. Or tzawil. Quil tzatxꞌixpuj yi xtxolbil bantz qui jaleꞌn awil yil tzꞌul tzaj Kajcaw Jesucristo. 15 Na tzꞌul yi jun kꞌejlalaꞌtz, na tzꞌelepon kꞌab Ryos teꞌj, na ntinaꞌtz jun Ryos yi mero balaj, nin chin cham nin iꞌ. Chin wiꞌtz Rey, nin chin wiꞌtz Ajcaw iꞌ. 16 Na quiꞌc quimbil teraꞌtz. Kaleꞌn nin pakꞌpuchal kale najleꞌt iꞌ. Cyaꞌl nin jun yi nink xtxꞌaj yil tzꞌopon te iꞌ. Quiꞌc nin jun wunak yi jajk til wutz iꞌ. Nin quiꞌc rmeril tan quilol wutz. Na at kꞌej iꞌ, nin at porer tkꞌab tetz ben kꞌej ben sak. Amén.
17 Ma jaluꞌ, je jun caꞌwleꞌj scyetz yi eꞌ yi at chimebiꞌl. Alaj scyetz yi quil chikꞌakꞌax tu chimebiꞌl, nin quil kꞌukeꞌ chicꞌuꞌl teꞌj, na qui cunin batz tzꞌelepon cꞌuꞌl. Baꞌn tcuꞌn kꞌukeꞌ chicꞌuꞌl te Ryos yi itzꞌ nin tetz. Yaꞌstzun yi jun yi na akꞌon cyakil yi tajweꞌn sketz, tan katzatzineꞌn mas teꞌj. 18 Alaj scyetz tan chibanol yi eꞌchk takleꞌn balaj, nin tan chibanol pawor. Alaj scyetz yi tajweꞌn yi list eꞌ tan toyeꞌn chimebiꞌl, nin tan teleꞌn chikꞌajab scyeꞌj yi eꞌ yi at tajweꞌn scyetz. 19 Ko yaꞌtz lcyulej sjalok tzun jun chimebiꞌl tul yi tiemp yil tzꞌul tzaj Jesucristo. Sjalok chimebiꞌl yi quil sotz. Nchaꞌtz ẍchicambajeꞌ jun itzꞌajbil yi quinin bajsbeꞌn tetz.
Wiꞌtzbil caꞌwl yi akꞌlij tetz Timoteo
20 Or tzawil yi xtxolbil yi akꞌij tzatz. Quil katxum yi eꞌchk yol yi na chiyol wunak, na quiꞌc ekaꞌn taꞌn. Nin quil katxum yi eꞌchk yol yi txumij cuntuꞌ cyaꞌn, na na cyal cyetz yi wiꞌnin ajtzaꞌkl at tul, poro quiꞌc ekaꞌn taꞌn. 21 At eꞌ yi ja chixom te jun jilwutz ajtzaꞌklaꞌtz nin ja cyaj quilol yi xtxolbil yi choꞌn kꞌuklij ketz kacꞌuꞌl teꞌj.
Takꞌ tzaj Ryos yi banl tzawibaj. Amén.