Ẍeꞌn kaban tan chibanleꞌn taneꞌn yi eꞌ creyent
5
1 Ayajch jun tijlcꞌuꞌlal. Nin yil cẍoꞌc tan talcheꞌn jun tajtzaꞌkl, joyaj puntil tan xconeꞌn putzpuj yol awaꞌn. Baꞌn tzaxconsaj putzpuj yol chi na kaban yi na kajilon scyetz kataj.Ma yi eꞌ xicy, banweꞌ taneꞌn chi na kaban taneꞌn eꞌ kitzꞌun. 2 Ma yi eꞌ xnaꞌn tijlcꞌuꞌlal, banweꞌ taneꞌn chi na cheꞌ kaban taneꞌn katxuꞌ. Nchaꞌtz eꞌ xun, banweꞌ taneꞌn chi na cheꞌ kaban taneꞌn eꞌ kanub. Qui tzatxum quen jun takleꞌn scyeꞌj.
3 Ma yi eꞌ xnaꞌn biẍuꞌ, yi eꞌ xmaꞌlcaꞌn yi bintzinin at tajweꞌn scyetz, chꞌeyweꞌ yi eꞌaꞌtz. 4 Poro yi ko at xmaꞌlcaꞌn yi at tal nka yi at chimam, baꞌn choꞌc cyeꞌtz tan quichꞌeyeꞌn chitxuꞌ tuml chitxuqꞌueꞌx, na yaꞌstzun chimunl swutz Ryos. Chumbalaj ko yaꞌtz cyulej len, na stzatzink Ryos teꞌj. 5 Yi eꞌ mero xmaꞌlcaꞌn iꞌtz yi eꞌ yi cyaꞌl jun at tan quichꞌeyeꞌn nin yi choꞌn kꞌuklij chicꞌuꞌl cyeꞌtz te Kataj. 6 Ma yi eꞌ xmaꞌlcaꞌn yi nternin na quicyꞌsaj chicꞌuꞌl te eꞌchk takleꞌn cachiꞌ, eꞌ teꞌn cyeꞌtz na chipoꞌtzaj quib. Quimnakeꞌt cyeꞌtz taneꞌn swutz Ryos. 7 Na chin tzan tan talcheꞌn yi xtxolbileꞌj tzatz bantz xconeꞌn awaꞌn tan chicaweꞌn yi eꞌ xmaꞌlcaꞌn. Na kol chixom te eꞌchk caꞌwlaꞌtz quil jal chipaltil swutz Ryos. 8 Poro ko at eꞌ yi qui na choꞌc il tan quichꞌeyeꞌn chixonl, cachiꞌ na chiban. Pyor tcuꞌn ko qui na choꞌc il tan quichꞌeyeꞌn yi cyetz chinajal. Na ko yaꞌtz na ban jun yaj na tzun tzan tan telseꞌn kꞌej yi yol Kataj. Nin pyor tcuꞌn iꞌ swutz jun yi quiꞌc na tocsaj.
9 Ma yi eꞌ xmaꞌlcaꞌn yi baꞌn choꞌc tetz tajlal yi eꞌ yi chocoponuꞌ tan quichꞌeyeꞌn iꞌtz yi eꞌ yi ja tzꞌak oxcꞌal yob cyaꞌn, nin jun ntziꞌ yaj nquichmili. 10 Nin baꞌn choꞌc tajlal ko baꞌn nchiban sajleꞌn tunintz, chi taneꞌn qꞌuicyꞌleꞌn yi cyal, nka eꞌ akꞌol posar banak. Nchaꞌtz baꞌn choꞌc tajlal xmaꞌlcaꞌn ko tzatzin cuꞌn ja chakꞌuj te akꞌun tetz cmon. Nin ko ja chichꞌeyan cyen scyeꞌj yi eꞌ yi nchitij qꞌuixcꞌuj, nin ko ja bnix cyen alchok scyetz jilwutz baꞌn cyaꞌn, baꞌn tzun choꞌc yi eꞌaꞌtz tetz tajlal yi eꞌ xmaꞌlcaꞌn. 11 Poro ko at jun xnaꞌn yi txeꞌn tijin cꞌuꞌl, qui na waj yil tzꞌoc tajlal xmaꞌlcaꞌn, na qui cunin batz ltakꞌ amaꞌl tetz tajbil yi wankil, nin xajslen tibtz te Cristo. Tzꞌocopon tan xtxumleꞌn junt yaj. 12 Nin sjalok til tan paj yi quil tzꞌel cuꞌn te yol. 13 Yi jun jilwutz xmaꞌlcaꞌnaꞌtz ntin na chiyutꞌcaꞌp tziꞌak caꞌl. Nin tan paj yi yaꞌtz na chiban na chicyꞌajix. Nkꞌeꞌtz ntin na chicyꞌajix, poro na choꞌc tan ẍchaqꞌueꞌn yol. Nin nkꞌeꞌtz ntin ẍchaqꞌueꞌn yol, poro na choꞌc tan jaleꞌn cuꞌn eꞌchk laꞌjil, nin na choꞌc tan yolcheꞌn eꞌchk yol yi quiꞌc cyocleꞌn teꞌj. 14 Chaꞌstzun te na chintzan tan talcheꞌn nin: Baꞌn tzꞌoc quichmil yi eꞌ xmaꞌlcaꞌn yi eꞌ acꞌajeꞌt, yi txeꞌn tijin chicꞌuꞌl. Baꞌn tcuꞌn kol jal cyal. Baꞌn tcuꞌn chakꞌuj xeꞌak chicaꞌl, na qui na yub yi na choꞌc yi eꞌ xmaꞌlcaꞌnaꞌtz, tan telseꞌn xtxꞌix yi cmon creyent. 15 Na at eꞌ xmaꞌlcaꞌn yi ten chipakxij, nin na chixom te tajbil yi Baybaꞌn.
16 Ko at eꞌ kajwutz yi at jun chixonl yi xmaꞌlcaꞌn, chin tajweꞌn cunin yil choꞌc tan ẍchꞌeyeꞌn. Na quil scꞌul yi choꞌnk lcyaj chicwent cmon creyent tan qꞌuicyꞌleꞌn. Na chitarey yi cmon creyent iꞌtz tan quichꞌeyeꞌn yi eꞌ xmaꞌlcaꞌn yi bintzinin quiꞌc jun chꞌeyl cyetz.
17 Ma jaluꞌ, yi eꞌ wiꞌ banl wiꞌ yi ateꞌ sjuꞌ takꞌun Kataj, yi eꞌ yi na chicawun, tajweꞌn cuꞌn yil tzꞌakꞌlij muꞌẍt chꞌeybil cyetz. I nin pyor yi eꞌ aj txolinl scyuchꞌ yi eꞌ aj chusunl, 18 na na tal yol Kataj yi tzꞌibaꞌnt cyen: “Quil scꞌul yi nink tzꞌoc sam kaꞌn te chitziꞌ eꞌ wacẍ yi na choꞌc tan bujleꞌn triw.”a Ej nin nchaꞌtz na tal: “Chin tajweꞌn cunin tan ẍchojxeꞌn jun akꞌunwil te takꞌun.”b \p 19 I bin jaluꞌ kajwutz, quil kocsaj kol jal yolbil tetz jun wiꞌ banl wiꞌ. Baꞌn kocsaj, poro ntin kol jal cob nka ox stiw teꞌj. 20 Poro yi eꞌ yi na chijuch quil, tajweꞌn cuꞌn tan makleꞌn chiwutz ẍchiwutz cyakil tan chixobeꞌn yi eꞌ mas.
21 Ma jaluꞌ Timoteo swutz cuꞌn Kataj, nin swutz Jesucristo, scyuchꞌ eꞌ balaj ángel, chincawunk nin tzatz: Cyakil yi eꞌchk xtxolbilaꞌseꞌj yi ja wiꞌt baj intxolil tzatz, yaꞌstzun amunl tan abnol. Nicyꞌ nin tuꞌ sban cawbeꞌn cyetz awakꞌun, na qui na yub kol jeꞌ akꞌab tib jun. Ej nin qui tzaban taneꞌn jun xtxolbil yi ntaxk awit yi xeꞌ. 22 Quiꞌ chan tzꞌoc jun kajwutz awaꞌn tetz wiꞌ banl wiꞌ, na qui cunin batz at tetz til, nin sjalok atz apaltil tan tuꞌ yil bixeꞌ awaꞌn. Or bin tzawil tan qui jaleꞌn atz awil.
23 Ntin tuꞌ swaleꞌ nin jun awajtzaꞌkl tan tuleꞌn yos tu acꞌuꞌl yi ilenin na ẍchaj tib. Baꞌn tcuꞌn nkꞌeꞌtz ntin aꞌ tzawucꞌaj tan tuleꞌn yos tzawuchꞌ, ma na pilaj tan tcꞌajleꞌn muꞌẍ tal tꞌaꞌal uva.
24 Or tzawil tan qui jaleꞌn awil na at eꞌ yi lajluch cuꞌn yi quil yi ntaxk oc banleꞌn taneꞌn, nin at eꞌ yi tzantzaj tlen na lajluchax yi quil. 25 Nchaꞌtz quitaneꞌn yi eꞌ balaj wunak. At eꞌ yi lajluch cuꞌn yi eꞌ balaj, nin at eꞌ yi tzantzaj tlen slajluchaxk yi chibalajil. Na quiꞌc rmeril yi quiꞌk lajluchax yi balajil jun yaj nka yi paltil jun yaj.