Yi eꞌ yi squileꞌ cyen yi xtxolbil yi na kocsaj
4
1 Poro chin clar cunin na tal yi Espíritu Sant yi xtxolbileꞌj: Yi txant tan tuleꞌn yi wiꞌtzbil kꞌejlal ẍchijalok eꞌ skaxoꞌl yi squileꞌ cyen yi xtxolbil yi na kocsaj. Ẍchixomok te eꞌchk chusuꞌn yi xcyek tan chisubleꞌn, yi eꞌchk chusuꞌn yi choꞌn na saj te Baybaꞌn. 2 Chixomok te chilaꞌjil yi eꞌ wunak yi chiwutz tuꞌ chiplaj tuꞌ na chitzan tan xtxoleꞌn. Nin yi eꞌaꞌtz qui na chinachon te quil, na tzeꞌtzuj yi cyalmaꞌ. 3 Yi jun jilwutz wunakaꞌtz, qui na cyakꞌ amaꞌl tetz okꞌbeꞌn ib. Nchaꞌtz na cyal yi at eꞌchk takleꞌn yi xan yil baj kaꞌn. Poro quiꞌc xtxolbil yi cyajtzaꞌkl, na Ryos akꞌon tetz kawaꞌ. Akꞌij sketz tan Ryos. Nin yi oꞌ yi oꞌ creyent, yi oꞌ yi na el katxum tetz yi mero bintzi, tajweꞌn yil katyoẍin tibaj kawaꞌ yil baj kaꞌn. 4 Na cyakil yi bnixnak cyen tan Ryos, baꞌn baj kaꞌn. Nin qui na yub yil kal yi quiꞌc xac. Baꞌn kabajsaj cyakil yi bnixnak cyen taꞌn, nin katyoẍi tetz. 5 Na tan tuꞌ yi na kanach Kataj tibaj kawaꞌ na takꞌ iꞌ yi banl tibaj, na yaꞌtz alijt cyen taꞌn.Jun balaj ẍchusbeꞌtz Jesucristo
6 Kol cheꞌ achus yi eꞌ kajwutz te yi xtxolbilaꞌseꞌj yi na intxol nin tzatz, cẍocopon tzuntz tetz jun balaj ẍchakum Jesucristo. Nchaꞌtz aẍ, sjalok mas awalor kol cxom te yi xtxolbil yi kꞌuklij acꞌuꞌl teꞌj, yi chusuꞌn yi balaj nin tetz. 7 Poro tinaꞌtz tuꞌ, qui cxom te eꞌchk xtxolbilaꞌtz yi na chitzan cobox tan xtxoleꞌn, na yab ajtzaꞌkl teraꞌtz. Ma yi awetz, quiwit. Joyaj puntil tan stzatzineꞌn Ryos tzaweꞌj. 8 Na yi na ẍchus tib jun yaj tan xtxꞌaconeꞌn te jun ojkeꞌl, baꞌn na ban. Poro mas baꞌn tcuꞌn yi nink kajoy puntil tan stzatzineꞌn Ryos skeꞌj, na yi ko yaꞌtz lkaban tzꞌakꞌonk baꞌn sketz te yi cobox kꞌej yi atoꞌ tzoneꞌj wuxtxꞌotxꞌ, nin tzꞌakꞌonk baꞌn sketz tetz ben kꞌej ben sak. 9 Cyakil yi eꞌchk xtxolbileꞌj yi nwal tzatz, yaꞌstzun yi mero bintzi. Nin tajweꞌn cuꞌn tan kocsal kacyakil cuꞌn. 10 Na ja wiꞌt el katxum tetz yi at kachꞌiw tan koponeꞌn te kaRyosil yi itzꞌ nin tetz, yi Ryos yi colol cyetz cyakil yi eꞌ yi kꞌuklij chicꞌuꞌl te iꞌ. Chaꞌstzun te na kakꞌuj len te yi takꞌun iꞌ, nin na icyꞌpon len yi eꞌchk jisbil ketz kaꞌn.
11 Chin tajweꞌn cuꞌn cẍcawun scyetz wunak tan chibnol taneꞌn, nin tajweꞌn cuꞌn tan chichusleꞌn te yi xtxolbileꞌj. 12 Bintzinin aẍ xicyeꞌt, poro sjalok akꞌej kol cẍbajxij tan ẍchajleꞌn abalajil ẍchiwutz yi eꞌ kajwutz. Toqueꞌn cuꞌn cẍjilon. Qui tuꞌ cẍtzan tuꞌ. Chajaj yi lokꞌ ib scyetz, na yaꞌtz na ban jun yaj yi at jakꞌ caꞌwl yi Espíritu Sant. Chajaj scyetz yi bintzinin kꞌuklij acꞌuꞌl te Ryos, yi nkꞌeꞌtz awutz tuꞌ aplaj tuꞌ. 13 Nin te yi na cẍtzan tan inchꞌiweꞌn, nqueꞌn il tan siꞌleꞌn yol Kataj ẍchiwutz cyakil yi eꞌ kajwutz. Chusweꞌ tan chiquiwixeꞌn. 14 Eliꞌch len cꞌuꞌl yi ajtzaꞌkl, na Ryos akꞌon tzatz yi cyoqueꞌn yi eꞌ wiꞌ banl wiꞌ tan nachleꞌn Kataj tzawibaj, nin yi jeꞌn cyakꞌol chikꞌab tawiꞌ.
15 Nqueꞌn il tan banleꞌn taneꞌn eꞌchk xtxolbilaꞌseꞌj, tzun quileꞌ cyakil wunak yi tzan jaleꞌn mas awajtzaꞌkl. 16 Banaj cwent awib. Txumaj yi mbiꞌtz yi na cẍtzan tan chichusleꞌn wunak teꞌj. Nin nchaꞌtz aẍ, tajweꞌn yil tzaban taneꞌn yi eꞌchk chusuꞌnaꞌtz. Na kol tzaban taneꞌn, sclaxok awalmaꞌ, scyuchꞌ yi eꞌ yil quibit yi achusuꞌn.