Yi eꞌchk xtxolbil yi tajweꞌn tan jeꞌn poneꞌn jun bajxom teꞌj
3
1 Cyakil yi yoleꞌj yi swaleꞌ tzatz iꞌtz yi mero bintzi: Alchok scyetz yi na taj tzꞌoc tetz bajxom na pekꞌ te jun balaj ipisyoꞌ. 2 Poro ko na ajwij yil tzꞌoc jun yaj tetz wiꞌ banl wiꞌ, chin tajweꞌn cunin yi cyaꞌl na juchwit til. Tajweꞌn yi jun ntziꞌ txkel, nin chin tajweꞌn cunin yi toqueꞌn cuꞌn sban yi tajtzaꞌkl, nin yi at kꞌej iꞌ ẍchiwutz wunak. Tajweꞌn yi akꞌol posar iꞌ, nin yi at tajtzaꞌkl tan txumuꞌn, nin tan chichusleꞌn yi cmon. 3 Qui na taj jun yaj yi na oc aꞌ twiꞌ. Qui na taj jun yaj yi ntin na tzan tan joyleꞌn oyintziꞌ. Nin qui na taj jun yaj yi na tzan tan chisubleꞌn wunak tan jaleꞌn tetz puꞌk. Ma na, na taj jun yaj yi list tan banleꞌn pawor tetz junt. Nin na taj jun yaj yi qui na jeꞌ lajpuj wiꞌ tan oyintziꞌ. Ej nin na taj jun yaj yi qui na el talmaꞌ te pwok. 4 Nchaꞌtz ko na ajwij yil tzꞌoc jun yaj tetz wiꞌ banl wiꞌ, chin tajweꞌn cunin yi baꞌn na cheꞌ caw yi tetz najal. Chin tajweꞌn cunin yi choꞌn ateꞌ yi eꞌ nitxajil jakꞌ caꞌwl iꞌ, nin chin cꞌulutxum nin eꞌ. 5 Na ko qui na xcyeꞌ iꞌ tan chicaweꞌn yi eꞌ tetz najal, ¿ẍeꞌn xcyeꞌ iꞌ tan chicaweꞌn yi cmon creyent yi ateꞌ tkꞌab Ryos? 6 Qui na taj jun acꞌaj creyent, na ko tzun tocsaj tib nim tu tajtzaꞌkl, nin sjucheꞌ til chi banak yi Baybaꞌn. 7 Nchaꞌtz, chin tajweꞌn cunin yi at kꞌej iꞌ ẍchiwutz yi eꞌ wunak yi nkꞌeꞌtz eꞌ creyent, na ko quiꞌ, tzꞌelepon xtxꞌix yi akꞌun yi at yaj sjuꞌ, nin qui cunin batz xcyek Baybaꞌn tan poꞌtzajeꞌn.Yi eꞌchk xtxolbil yi tajweꞌn tan jeꞌn poneꞌn jun diácono teꞌj
8 Nchaꞌtz yi eꞌ diácono, chin tajweꞌn cunin yi at chikꞌej ẍchiwutz wunak. Nin na taj jun yaj yi baꞌn kꞌukeꞌ kacꞌuꞌl teꞌj, nin yi qui na oc aꞌ twiꞌ. Qui na taj jun yaj yi na tzan tan chisubleꞌn wunak tan cambal mas pwok. 9 Nin na taj jun yaj yi na el xtxum te yi mbiꞌtz yi xeꞌ yi chusuꞌn yi na kocsaj, yi ewaꞌn cuntuꞌ ẍchiwutz cyakil wunak, nin na taj jun yaj yi na ban taneꞌn yi chusuꞌnaꞌtz nin yi na nachon teꞌj yi quiꞌc tetz til. 10 Nin kol lajluchax yi quiꞌc til yaj, baꞌn tzun tzꞌoc cyentz tetz diácono.
11 Poro nchaꞌtz yi quixkel yi eꞌ diácono chin tajweꞌn cunin yi at chikꞌej ẍchiwutz wunak. Na qui na yub yi ko eꞌ tuꞌ chacꞌl yol. Nin tajweꞌn yi baꞌn kꞌukeꞌ kacꞌuꞌl scyeꞌj.
12 Ma yi eꞌ diácono, chin tajweꞌn cunin yi jun ntziꞌ quixkel. Nin chin tajweꞌn cunin yi baꞌn na chicaw yi chinajal. 13 Nin kol cheꞌl cuꞌn yi eꞌ diáconojaꞌtz te yi quipisyoꞌ, tzꞌakꞌlok chikꞌej, nin sjalok chiwalor tan xtxꞌolcheꞌn xoꞌl yi mbi tzuntz yi choꞌn kꞌuklij chicꞌuꞌl te Cristo Jesús.
Yi mero kachusuꞌn
14-15 Na kloꞌ waj nopon tan axajseꞌn Timoteo, poro qui cunin batz qui chan nopon. Chaꞌstzun te na chintzan tan stzꞌibeꞌn nin yi xtxolbileꞌj tzatz, bantz teleꞌn atxum tetz yi mbiꞌtz yi tajweꞌn tan abnol taneꞌn te yi cmon cwent yi Ryos yi itzꞌ nin tetz, yi eꞌ yi txaꞌijcheꞌt taꞌn. Na yi ketz kamunl iꞌtz tan ẍchajleꞌn yi mero bintzi scyetz wunak, nin tan qꞌuicyꞌleꞌn yi chusuꞌn yi na kocsaj bantz cyaꞌl tzꞌoc tan xiteꞌn. 16 Na jun cuꞌn yol wiꞌnin kꞌej nin wiꞌnin xanil yi xeꞌ yi chusuꞌn yi na kocsaj.
Na, na kocsaj:
yi ja jal wankil Ryos chi taneꞌn kawankil.
Nin na kocsaj yi ja lajluchax yi balajil iꞌ tan porer yi Espíritu Sant.
Nin na kocsaj yi ja aj iꞌ tziꞌn tcyaꞌj.
Nin na kocsaj yi cyakil yi xtxolbilaꞌseꞌj ilijt cyakꞌun yi eꞌ ángel.
Nin txoliꞌnt yi stziblaleꞌj beneꞌn tziꞌn wi munt.
Nin at eꞌ yi ja cyocsaj.