YI CAꞌP CART YI BEN STZꞌIBAL PAWL SCYETZ YI Eꞌ AJ TESALONICA
Xeꞌtzbil yol Pawl
1
1 Ma jaluꞌ eꞌuꞌ kajwutz yi in wetz yi in Pawl tu kajwutz Silvano nin Timoteo, na katzan tan stzꞌibeꞌn nin yi carteꞌj tetz cyeruꞌ yi eꞌuꞌ cmon creyent yi najlcheꞌuꞌ le tnum Tesalónica, yi eꞌuꞌ yi ateꞌuꞌ tkꞌab Kataj Ryos tu Kajcaw Jesucristo. 2 Takꞌ tzaj Kataj tu Kajcaw Jesucristo yi banl tu tzatzin paz squibuꞌ.Yil tzꞌul tzaj Jesucristo tzꞌocopon Ryos tan takꞌleꞌn chicaws yi eꞌ mal wunak
3 Ma jaluꞌ eꞌuꞌ wajwutz, yi na kanach Kataj, ilenin na katyoẍin squibuꞌ. Tajweꞌn cuꞌn tan cheꞌ katyoẍiluꞌ tetz na tzan quiwixeꞌn chicꞌuꞌluꞌ. Ej nchaꞌtz tzan jaleꞌn mas lokꞌ ib ẍchixoꞌluꞌ. 4 Yi na kabenak tan chixajseꞌn yi eꞌ mas creyent na kal chitziblaluꞌ yi chumbalaj nin eꞌuꞌ, na nternin kꞌuklij chicꞌuꞌluꞌ te Ryos. Ej nin chin mucꞌul qꞌuixcꞌuj nin eꞌuꞌ yi na oc chibuchleꞌnuꞌ. 5 Tan tuꞌ yi na chimucꞌuꞌ eꞌchk qꞌuixcꞌujaꞌtz na lajluchax yi balajil Ryos. Na tan yi eꞌchk qꞌuixcꞌujaꞌtz yi na chitijuꞌ, na tzan iꞌ tan nucꞌleꞌn cyajtzaꞌkluꞌ tan chibnol list quibuꞌ tan cyocomponeꞌnuꞌ kale na cawuneꞌt iꞌ.
6 Inti yi eꞌ yi na chitzan tan chibuchleꞌnuꞌ, tzꞌul chicaws tan Ryos, na chin tajweꞌn cunin yil takꞌ Ryos chicaws. 7 Ma yi oꞌ ketz, quil katij qꞌuixcꞌuj yil tzꞌult Kajcaw Jesús. Na yil saj iꞌ tziꞌn tcyaꞌj chuꞌl xomok yi eꞌ tetz ángel teꞌj, yi chin cham nin eꞌ. Choꞌn tzꞌul iꞌ tcꞌuꞌl jun chin pakꞌpuchal, yi chi tkan kꞌakꞌ taneꞌn. 8 Tzꞌul iꞌ tan takꞌleꞌn chicaws yi eꞌ yi qui na cyakꞌ kꞌej Ryos, yi eꞌ yi qui na cyocsaj yi balaj stziblal yi ẍeꞌn na kaclax tan Kajcaw Jesús. 9 Yi jun jilwutz wunakaꞌtz tzꞌakꞌlok jun chicaws yi quinin bajsbeꞌn tetz. Kajpeꞌn nin lcheꞌ xajslen Ryos. Nin quiꞌc nin junt tir yi nink quil wutz Kajcaw tu tetz kꞌej tu porer iꞌ. 10 Yaꞌstzun sbajok yil tzꞌul tzaj Kajcaw tan jaleꞌn tetz kꞌej ẍchiwutz yi eꞌ tetz. Na cyakil yi oꞌ creyent kelepon yab teꞌj yil kil nin yi tetz kꞌej yi cyꞌaꞌn taꞌn yil tzꞌul tzaj. Ej nin nchaꞌtz eꞌuꞌ squileꞌuꞌ yi xtxolbileꞌj, na ja cyocsajuꞌ yi nkatxol scyeruꞌ.
11 Chaꞌstzun te ilenin na kanach Kataj squibuꞌ, bantz jaleꞌn chibalajiluꞌ swutz yi junaꞌtz yi nchimoxon tzajuꞌ tan chixomeꞌnuꞌ teꞌj. Ej nin nchaꞌtz na kanach Kataj squibuꞌ tan tkꞌol Ryos cyajtzaꞌkluꞌ tan cyoqueꞌnuꞌ tetz balaj chi na chipekꞌuꞌ teꞌj. Nin nchaꞌtz na chintzan tan cꞌucheꞌn tetz yi ẍeꞌnk kꞌukeꞌ chicꞌuꞌluꞌ teꞌj bantz chibnoluꞌ yi eꞌchk takleꞌn balaj. 12 Ej nin kol chibanuꞌ taneꞌn yi eꞌchk xtxolbilaꞌtz, stzꞌakꞌlok kꞌej Kajcaw Jesús. Ej nin tan banl talmaꞌ Kataj tu Kajcaw Jesucristo, nchaꞌtz yi eꞌ cyeruꞌ tzꞌakꞌlok chikꞌejuꞌ.