YI BAJX CART YI BEN STZꞌIBAL PAWL SCYETZ YI Eꞌ AJ TESALONICA
Xeꞌtzbil yol Pawl
1
1 I bin jaluꞌ eꞌuꞌ wajwutz, yi in wetz yi in Pawl tu kajwutz Silvano tu Timoteo, na katzan tan stzꞌibeꞌn nin yi carteꞌj tetz cyeruꞌ, yi eꞌuꞌ cmon creyent yi najlcheꞌuꞌ le tnum Tesalónica, yi eꞌuꞌ yi junit eꞌuꞌ tu Kataj Ryos tu Kajcaw Jesucristo. Takꞌ tzaj Kataj tu Kajcaw Jesucristo yi banl squibuꞌ tu tzatzin paz ẍchixoꞌluꞌ tu iꞌ.Yi ẍeꞌn cuꞌn kꞌuklij chicꞌuꞌl yi eꞌ aj Tesalónica te Ryos
2 Yi na kanach Kataj ilenin na katyoẍin tetz yi baꞌn ateꞌtuꞌ tkꞌab iꞌ. 3 Na na ul txꞌakx tkacꞌuꞌl yi ẍeꞌn cunin kꞌuklij chicꞌuꞌluꞌ te iꞌ, nin yi ẍeꞌn cunin cyakꞌoꞌnt quibuꞌ tan chixconeꞌnuꞌ tetz na at lokꞌ ib scyuchꞌuꞌ. Nin na ul txꞌakx tkacꞌuꞌl yi chin quiw cuntunin quitaneꞌnuꞌ tan tuꞌ yi at te cyajaluꞌ yi at tulbil Kajcaw Jesús. 4 Na na el katxum tetz yi txaꞌij cheꞌtuꞌ taꞌn tan tuꞌ yi banl talmaꞌ iꞌ. 5 Na yi kicyꞌakeꞌn ẍchixoꞌluꞌ tan xtxꞌolcheꞌn xoꞌl yi balaj stziblal, nkꞌeꞌtz ntin yol Kataj quibituꞌ, poro nchaꞌtz quiluꞌ yi eꞌchk milawr Kataj yi bnix kaꞌn tan porer yi Espíritu Sant. Nchaꞌtz sak ẍchiwutzuꞌ yi yol yi nkatxol scyeruꞌ, yaꞌstzun yi mero bintzi. Nin sak ẍchiwutzuꞌ yi ẍeꞌn cuꞌn nkaban yi atoꞌ tzaj ẍchixoꞌluꞌ, tan tuꞌ yi na kapekꞌ scyeꞌjuꞌ.
6 Ma yi eꞌ cyeruꞌ ja chixomuꞌ skeꞌj nin te Kajcaw. Na ja chitzatzinuꞌ yi cyocsaluꞌ yol iꞌ tan porer yi Espíritu Sant. Nin quinin xcyeꞌ yi eꞌchk qꞌuixcꞌuj yi nchitijuꞌ tan chipoꞌtzeꞌnuꞌ. 7 Ej nin tan tuꞌ yi ja chimucꞌuꞌ yi eꞌchk qꞌuixcꞌujaꞌtz ja chixom wiꞌnin aj Macedonia tu aj Acaya te cyajtzaꞌkluꞌ. 8 Ej nin yi yol Kataj, nkꞌeꞌtz ntin ben loꞌon Macedonia tu Acaya cyanuꞌ poro nchaꞌtz ja ben loꞌon tcꞌuꞌl cyakil eꞌchk amaꞌl beneꞌn tziꞌn. Na yi quibital wunak yi ẍeꞌn cuꞌn kꞌuklij chicꞌuꞌluꞌ te Ryos, nchaꞌtz eꞌ ja cyocsaj yi balaj stziblal. Poro choꞌn sajeꞌn xeꞌ scyeꞌjuꞌ. Tan tuꞌ yi yaꞌtz nchibanuꞌ ja cyocsaj wiꞌnin wunak. Quiꞌt tajweꞌn oꞌ ketz bantz tan xtxoleꞌn yi balaj stziblal scyetz. Nin nchaꞌtz jaluꞌ nkꞌeꞌtz tajweꞌn tan katxolil, 9 na na chuꞌl wunak tan talcheꞌn sketz yi mbi cuꞌn bajij ẍchixoꞌluꞌ yi kicyꞌakeꞌn tan xtxoleꞌn yi yol Kataj scyeruꞌ. Nin na cyal sketz yi ẍeꞌn cuꞌn cyajeꞌn cyen quiloluꞌ yi chilokꞌeꞌn yi eꞌchk takleꞌn yi banij cuntuꞌ. Nin na cyal sketz yi ẍeꞌn cyoqueꞌnuꞌ tan lokꞌeꞌn kaRyosil yi bintzinin itzꞌ nin tetz. 10 Nchaꞌtz ja ul cyaleꞌ sketz yi na chitzanuꞌ tan ẍchꞌiweꞌn yi tulbil Kajcaw Jesús, yi Cyꞌajl Ryos, yi choꞌn tzꞌopon tzaj tcyaꞌj. Yi jun yi itzꞌij tan Ryos ẍchixoꞌl almaꞌ, nin iteꞌn nin iꞌaꞌs yil kacolon tkꞌab yi jun chin caws yi at tulbil takꞌun Kataj.