YI CART YI BEN STZꞌIBAL PAWL SCYETZ YI Eꞌ AJ COLOSAS
Xeꞌtzbil yol Pawl
1
1 Yi in wetz, yi in Pawl, in apostl tetz Jesucristo, na yaꞌstzun tajbil Ryos. 2 Nin kacabil tu kajwutz Timoteo, na katzan tan stzꞌibeꞌn nin yi carteꞌj tetz cyeruꞌ, yi eꞌuꞌ aj Colosas, yi eꞌuꞌ yi xansaꞌncheꞌtuꞌ, yi eꞌuꞌ yi jun cuꞌn kajwutz kib scyuchꞌuꞌ tkꞌab Jesucristo. Takꞌ tzaj Kataj Ryos yi banl tu tzatzin paz squibuꞌ.Yi toqueꞌn Pawl tan nachleꞌn Kataj squibaj yi eꞌ creyent
3 Ma jaluꞌ eꞌuꞌ kajwutz, yi na koꞌc tan nachleꞌn Kataj squibuꞌ, ilenin na katyoẍin tetz Ryos, yi Taj Kajcaw Jesucristo, 4 na na kubit yi jun cuꞌn choꞌn kꞌuklij chicꞌuꞌluꞌ te Cristo Jesús, nin yi wiꞌnin na chipekꞌuꞌ scyeꞌj cyakil yi eꞌ creyent yi ateꞌ tkꞌab Ryos. 5 Yaꞌstzun quitaneꞌnuꞌ, na choꞌn ajlij chicꞌuꞌluꞌ te yi herens yi colij tetz cyeruꞌ jalen tziꞌn tcyaꞌj. Na yi quibitaluꞌ yi balaj stziblal tetz colbil ibaj, ja el chitxumuꞌ tetz yi iꞌtz yi mero bintzi, nin jetzaꞌtz tzaj ja kꞌukeꞌ chicꞌuꞌluꞌ teꞌj. 6 Ej nin iteꞌn nin balaj stziblalaꞌtz yi na tzan xtxoleꞌn beneꞌn tziꞌn wi munt. Ej nin at wiꞌnin wunak yi ja kꞌukeꞌ chicꞌuꞌl teꞌj chi banakeꞌ cyeruꞌ. 7 Ej nin cyakil yi eꞌchk xtxolbilaꞌtz yi na cyocsajuꞌ, kajwutz Epafras eꞌ chusunuꞌ teꞌj. Nin iꞌ jun balaj kajwutz na ja akꞌuj cyen skeꞌj. Chaꞌstzun te baꞌn kꞌukeꞌ chicꞌuꞌluꞌ teꞌj na iꞌ jun balaj xconsbeꞌtz Ryos. 8 Ej nin iꞌ micyꞌan tzaj chitziblaluꞌ yi ẍeꞌn cuꞌn tkꞌol yi Espíritu Sant yi lokꞌ ib yi at ẍchixoꞌluꞌ.
9 Chaꞌstzun te yi nkubit chitziblaluꞌ, ja koꞌc tan nachleꞌn Kataj squibuꞌ, nin tan cꞌucheꞌn tetz yi clar cunink tzꞌel chitxumuꞌ te yi tajbil iꞌ. Nin yi nink chixomuꞌ te eꞌchk ajtzaꞌkl tu eꞌchk txumuꞌn yi na takꞌ yi Espíritu Sant. 10 Na kol chixomuꞌ teꞌj, chixcyekuꞌ tan banleꞌn taneꞌn yi tajbil Ryos, yi na tzatzin iꞌ teꞌj, nin ẍchibneꞌuꞌ eꞌchk takleꞌn balaj, nin tzꞌelepon mas chitxumuꞌn tetz yi ẍeꞌn taneꞌn iꞌ.
11 Ej nin na katzan tan cꞌucheꞌn tetz Kataj yil chiquiwixuꞌ tan yi tetz porer yi chumbalaj nin, na kol chiquiwixuꞌ, ẍchitzatzinkuꞌ, nin sjalok chipasensuꞌ tan mucꞌleꞌn cyakil eꞌchk jilwutz qꞌuixcꞌuj. 12 Nin kol chiquiwixuꞌ ẍchityoẍinkuꞌ tetz Kataj, na iꞌ ntxꞌixpuneꞌn cyajtzaꞌkluꞌ bantz cyetzaluꞌ yi herens yi suknak iꞌ scyetz yi eꞌ tetz. 13 Na iꞌ nkeꞌlsan tzaj tkꞌab yi tzꞌoꞌtz wutzil tan koqueꞌn jakꞌ caꞌwl yi tetz Cyꞌajl yi wiꞌnin okꞌleꞌn wutz taꞌn, 14 Nin yi tetz Cyꞌajlaꞌtz, iꞌ nkeꞌlsan liwr tkꞌab kil, nin iꞌ ncuyun kapaj.
15 Na iteꞌn nin iꞌaꞌtz Ryos, yi Ryos yi qui lajluch, yi at nintz le xeꞌtzbil tzaj, yi ntaxk bnix jun takleꞌn. 16 Ej nin iꞌ mbnol tetz cyakil yi mbi cunin at tcyaꞌj tu yi at wuxtxꞌotxꞌ. Na iꞌ bnol tetz cyakil yi eꞌchk takleꞌn yi na kil tuml cyakil yi eꞌchk takleꞌn yi txeꞌn kil. Na iꞌ txumul cyetz yi eꞌ yi ateꞌ tcyaꞌj, yi eꞌ yi qui na kil chiwutz, yi eꞌ yi at caꞌwl ẍchikꞌab, yi eꞌ yi eꞌ bajxom, na iꞌ bnol tetz cyakil tan xconeꞌn tetz. 17 Na at nin iꞌ-tz yi ntaxk bnix jun takleꞌn. Nin iꞌ xicyol tetz cyakil yi mbi cunin at. 18 Nchaꞌtz iꞌ yi wiꞌ banl wiꞌ te yi tetz cmon, yi eꞌ creyent. Nin iꞌ yi bajx yi itzꞌij ẍchixoꞌl almaꞌ, na ilenin iꞌ bajxom te cyakil yi at. 19 Na cyꞌaꞌn cyakil yi porer tu tajtzaꞌkl Ryos taꞌn, na yaꞌstzun yi tajbil Ryos. 20 Nin xcon Cristo taꞌn tan kabansal kib tuchꞌ. Nin nkꞌeꞌtz ntin oꞌ nkabansaj kib tuchꞌ, ma na nchaꞌtz cyakil yi eꞌ txuc tu cyakil yi eꞌchk takleꞌn yi at wi munt, tuml yi eꞌchk takleꞌn yi at tcyaꞌj. Nin cyakil yi eꞌaꞌseꞌj sjalok junt tir yi tzatzin paz cyaꞌn tu Ryos tan tuꞌ yi quimich yi banak Cristo swutz pasyon.
21 Nchaꞌtz yi oꞌ ketz sajleꞌn, oꞌ cuꞌn contr tu Ryos. Oꞌ cuꞌn awer nak taneꞌn swutz iꞌ. Yaꞌstzun kutaneꞌntz tan tuꞌ yi eꞌchk takleꞌn cachiꞌ yi banakoꞌ cyen. 22 Poro yi jaluꞌ, ja jal yi tzatzin paz kaꞌn tu Ryos tan tuꞌ yi qꞌuixcꞌuj yi tijnak Cristo yi quimeꞌn swutz pasyon. Yaꞌstzun banak Cristo na yi tajbil iꞌ iꞌtz tan qui jaleꞌn kil yil kopon taꞌn swutz Ryos. Na yil kopon tziꞌn tcyaꞌj quil jal muꞌẍ ilcꞌol skeꞌj. Nin quil jal jun yi xcyek tan talcheꞌn yi at kapaltil. 23 Chaꞌstzun te eꞌuꞌ kajwutz, ko na kaj yil kopon te Kataj Ryos, ¡quiwit! Na tajweꞌn yil kꞌukeꞌ kacꞌuꞌl teꞌj. Tajweꞌn yil ben kukan ttxꞌotxꞌ, nin kaxajsiꞌch len kib te yi balaj stziblal tetz colbil ibaj, yi bitaꞌnt kaꞌn, na at kachꞌiw teꞌj.
Ej nin yi jun balaj stziblalaꞌtz yi na kocsaj, iteꞌn nin iꞌaꞌtz yi na tzan xtxoleꞌn beneꞌn tziꞌn wi munt. Nin iteꞌn nin iꞌaꞌs yi na chintzan wetz tan xtxoleꞌn.
Txaꞌijt Pawl tan quichꞌeyeꞌn yi eꞌ cmon creyent
24 Ilenin na chintzatzin yi na ul eꞌchk qꞌuixcꞌuj tzinwutz tan tuꞌ yi na chintzan tan xtxoleꞌn yol Kataj scyeruꞌ, na tajweꞌn tan injeꞌn poneꞌn tan mucꞌleꞌn cyakil yi qꞌuixcꞌuj yi talnak Jesús yi tajweꞌn tan inmucꞌul.a 25 Na txaꞌij chint tan Ryos tan inxconeꞌn tan quichꞌeyeꞌn cyakil yi cmon creyent beneꞌn tziꞌn, na txaꞌij chint tan xtxoleꞌn cyakil yi yol Kataj scyetz. 26 Na yi tajbil iꞌ, iꞌtz tan lajluchaxeꞌn yi mero xeꞌ yi tetz ẍchusuꞌn, yi quinin el chitxum wunak tetz sajleꞌn tunintz. Poro yi jaluꞌ ja lajluchax tan iꞌ skawutz, yi oꞌ yi atoꞌ tkꞌab iꞌ. 27 Na yi tajbil Ryos iꞌtz tan lajluchaxeꞌn yi mero xeꞌ yi tetz ẍchusuꞌn ẍchiwutz cyakil jilwutz wunak. Ej nin iꞌtz, yi choꞌn najlij Cristo te cyalmaꞌuꞌ. Ej nin tan tuꞌ yi yaꞌtz, at bin chichꞌiwuꞌ tan chicambaluꞌ chikꞌejuꞌ yil choponuꞌ jalen tziꞌn tcyaꞌj.
28 Chaꞌstzun te na katzan tan xtxoleꞌn yi mbi ekaꞌn tan Cristo, nin skil cunin na kajoy puntil tan makleꞌn chiwutz nin tan chichusleꞌn yi eꞌ kajwutz, bantz teleꞌn mas chitxum tetz yi mbi ekaꞌn tan Cristo. Na yi ketz kajbil iꞌtz yi quil jal paltil jun yil tzꞌopon kaꞌn swutz iꞌ. 29 Chaꞌstzun te na imbuch wib te yi akꞌuneꞌj, nin na inxconsaj cyakil yi porer iꞌ yi akꞌij taꞌn swetz.