2
1 Ej nin na chintzan tan talcheꞌn yi xtxolbilaꞌseꞌj scyeruꞌ na na waj yil tzꞌel chitxumuꞌ tetz yi na imbuch wib tan quichꞌeyeꞌnuꞌ scyuchꞌ yi eꞌ mas kajwutz yi najlcheꞌ le tnum Laodicea, tu yi eꞌ yi txeꞌn cuꞌn cyech inwutz. 2 Na yi wajbil iꞌtz yil chiquiwixuꞌ, nin yil jal lokꞌ ib ẍchixoꞌluꞌ, Nin yil tzꞌel chitxumuꞌ tetz yi mbi ekaꞌn tan Cristo bantz kꞌukeweꞌn mas chicꞌuꞌluꞌ teꞌj, na iꞌ yi mero xeꞌ cyakil yi ẍchusuꞌn Kataj Ryos. 3 Na chin tzꞌaknak cuꞌn yi tajtzaꞌkl Cristo, na choꞌn na jal yi ẍchiꞌal cyakil jilwutz ajtzaꞌkl te iꞌ. 4 Nchaꞌtz na chintzan tan stzꞌibeꞌn nin yi xtxolbileꞌj scyeruꞌ na qui na waj yil tzꞌoc jun tan chisubleꞌnuꞌ te junt jilwutz chusuꞌn, mpe chumbalaj nink. 5 Quibin ẍchixoꞌluꞌ wajwutz, poro na chintzan tan chibiseꞌnuꞌ chi atin nink ẍchixoꞌluꞌ. Chaꞌstzun te wiꞌnin nchintzatzin yi wital yi chitziblaluꞌ, yi chumbalaj nin quitaneꞌnuꞌ, nin yi jun cuꞌn choꞌn kꞌuklij chicꞌuꞌluꞌ te Cristo.6 I bin jaluꞌ eꞌuꞌ wajwutz, quib yi cyocsaluꞌ kajcaw Jesucristo, tajweꞌn yi i nin tunin chibanuꞌaꞌs jaluꞌ. Tajweꞌn yil kꞌukeꞌ chicꞌuꞌluꞌ yi xcyek iꞌ tan quichꞌeyeꞌnuꞌ cyakil kꞌej. 7 Benk quikanuꞌ ttxꞌotxꞌ. Kꞌukek chicꞌuꞌluꞌ teꞌj. Nin chixomokuꞌ te eꞌchk caꞌwl yi ja wiꞌt chichuslijuꞌ teꞌj. Ej nin ilenin chityoẍinkuꞌ tetz Kataj Ryos tan yi eꞌchk xtxolbilaꞌtz.
Yi acꞌaj itzꞌajbil yi njal kaꞌn
8 I bin jaluꞌ eꞌuꞌ wajwutz, or quiluꞌ. Xomninch cyajtzaꞌkluꞌ te eꞌchk ajtzaꞌkl yi quiꞌc xeꞌ, yi wunak tuꞌ txumul tetz, yi nkꞌeraꞌtz bintzi. Na yi eꞌchk ajtzaꞌklaꞌtz, nkꞌeꞌtz choꞌn na saj te Cristo, ma na choꞌn na saj teraꞌtz te Baybaꞌn.
9 Na cyakil yi ẍeꞌn taneꞌn Ryos, na jal kaꞌn te Cristo. 10 Ej nin nchaꞌtz eꞌuꞌ tzꞌaknak cuꞌn cyeruꞌ cyajtzaꞌkluꞌ, tan tuꞌ yi cyokꞌbeꞌnt quibuꞌ tu Cristo. Na iꞌ txumul tetz cyakil jilwutz ajtzaꞌkl, nin iꞌ yi wiꞌtz ajcaw squibaj cyakil jilwutz ajcaw yi at. 11 Ej nin tan tuꞌ yi cweꞌn kokꞌbel kib tu Cristo ja oc jun kechl yi nkꞌeꞌtz wunak mmoꞌcsan. Nin nkꞌeꞌtz choꞌn mmoꞌc te kawankil chi na chiban yi eꞌ yi na chibajij circuncidar. Na yi ketz kechlaꞌtz, iꞌtz yi quiꞌt na katzan tan juchleꞌn kil, na ja xit yi jun ajtzaꞌklaꞌtz tan Cristo. 12 Nin yaꞌstzun na elepont yi bautism yi mbajij scyeꞌjuꞌ. Na na ẍchaj yi ja quim yi cyajtzaꞌkluꞌ cachiꞌ, yi quimeꞌn Cristo swutz pasyon. Nin na ẍchaj yi ja mukxij yi mukxeꞌn iꞌ. Nin na ẍchaj yi ja chitzꞌijuꞌ junt tir chi ban Jesucristo yi titzꞌeꞌn junt tir ẍchixoꞌl almaꞌ. Na yi eꞌ cyeruꞌ eꞌuꞌ acꞌaj wunak jaluꞌ tan tuꞌ yi cyocsaluꞌ yi ja xcyeꞌ Kataj Ryos tan jeꞌseꞌn tzaj Cristo ẍchixoꞌl almaꞌ.
13 Na te yi quimnakeꞌuꞌ tkꞌab quiluꞌ nin yi ntaxk chijatx quibuꞌ tu quiluꞌ, ja chitzꞌijuꞌ junt tir tan porer Kataj. Chi mitzꞌij junt tir Jesucristo taꞌn ẍchixoꞌl almaꞌ, yaꞌstzun chiban cyeruꞌ. Nin ja cuy iꞌ chipajuꞌ, nin itzꞌeꞌuꞌ jaluꞌ swutz Ryos. 14 Tan tuꞌ yi quinin nkajepon tan banleꞌn taneꞌn yi eꞌchk caꞌwlaꞌtz sajleꞌn, banijt kacaws. Poro yi jaluꞌ tan tuꞌ yi quimich yi mban Cristo swutz pasyon ja tzaj yi kapaj yi katxꞌokꞌbeꞌn tan Ryos. 15 Na yi quimeꞌn Cristo swutz pasyon yaꞌstzun xcyeweꞌn tan xiteꞌn cyakil tpisyoꞌ Baybaꞌn, nin yaꞌstzun xcyeweꞌn tan xiteꞌn chiporer nin tan telseꞌn chitxꞌix cyakil yi eꞌ ẍchakum Baybaꞌn.
Baꞌn tcuꞌn katxumeꞌ yi ajtzaꞌkl yi choꞌn na saj tcyaꞌj
16 I bin jaluꞌ je junt xtxolbileꞌj: Quil chibisunuꞌ ko na chitzan wunak tan chiyolcheꞌnuꞌ tan yi eꞌchk takleꞌn yi na baj cyanuꞌ. Nchaꞌtz quil chibisunuꞌ ko na chitzan wunak tan chiyolcheꞌnuꞌ tan tuꞌ yi qui na chixomuꞌ te cyetz cyajtzaꞌkl. Na yi eꞌ cyetz na choꞌc tan ticyꞌseꞌn eꞌchk kꞌej, yi na icyꞌ lakak sman, nka lakak xaw, nka lakak yob. Poro cyakil yi eꞌchk cstumbraꞌtz iꞌtz elsawutzil tuꞌ ban. 17 Na yi eꞌchk cstumbraꞌtz ntin xcon sajleꞌn tetz jun elsawutzil te yi mbi cuꞌn mbajij te Cristo. 18 Nchaꞌtz eꞌ xubsiꞌchuꞌ cyakꞌun yi eꞌ yi na cyocsaj quib juy taneꞌn, poro quiꞌ, na yi eꞌaꞌtz, na choꞌc tan chicꞌuꞌlajeꞌn yi eꞌ ángel. Nin na chipit quib tan xtxoleꞌn eꞌchk xtxolbil yi qui na pujx cyaꞌn. Nin na cyocsaj quib nim tu cyajtzaꞌkl. Yi jun jilwutz wunakaꞌtz, chijatxoꞌn quib tu Cristo, yi mero wiꞌ banl ketz kawiꞌ yi oꞌ cmon creyent. 19 Choꞌn quitaneꞌn cyeꞌtz chi taneꞌn jun yaj yi quiꞌk wiꞌ. Na yi wiꞌ jun yaj na xcyeꞌ tan caweꞌn yi wekl yi wankil. Ej nin yi wiꞌ yaꞌstzun yi cꞌaꞌchanl tetz yi wankil. Chaꞌstzun taneꞌn Cristo tan takꞌleꞌn ketz kajtzaꞌkl nin tan takꞌleꞌn kawalor, na iꞌ kawiꞌ.
20 Na yi eꞌ cyeruꞌ, quimnakeꞌuꞌ swutz yi yab ajtzaꞌkl yi nchixomuꞌ teꞌj sajleꞌn. Chaꞌstzun te quibeꞌuꞌ jakꞌ chicaꞌwl yi eꞌ espíritu cwent Baybaꞌn yi ateꞌ wi munt. Ej nin ko yaꞌtz bintzi, ¿nxac tzun na chixomuꞌ te cyajtzaꞌkl tuꞌ wunak? 21 Na je chiyoleꞌj: “Quil chixconsajuꞌ yi eꞌchk takleꞌneꞌj. Quil chibajsajuꞌ yi eꞌchk takleꞌneꞌj. Quil chitzꞌamuꞌ yi eꞌchk takleꞌneꞌj,” cheꞌch. 22 Poro nkꞌeꞌtz xan yi eꞌchk takleꞌnaꞌtz, na wunak tuꞌ txumul tetz yi eꞌchk caꞌwlaꞌtz nin sotzok teraꞌtz. 23 Poro ẍchiwutz cyetz, chumbalaj nin eꞌchk leyaꞌtz, na chin qꞌuixbel nin tan chijeꞌn poneꞌn tan banleꞌn taneꞌn. Na chitij wiꞌnin qꞌuixcꞌuj tan banleꞌn taneꞌn. Poro quiꞌc na takꞌ scyetz, na qui na xcyeꞌ eꞌchk caꞌwlaꞌtz tan xtxꞌixpeꞌn cyajtzaꞌkl cachiꞌ.