3
1 Poro yi oꞌ ketz niꞌcuꞌntz chi jak kitzꞌij junt tir ẍchixoꞌl almaꞌ yi titzꞌeꞌnt Cristo, nin yaꞌstzun kaxomeꞌn te jun acꞌaj kajtzaꞌkl. Ko yaꞌtz kutaneꞌn, kaxomok bin te eꞌchk ajtzaꞌkl yi choꞌn na saj tcyaꞌj, na choꞌn at Cristo tcyaꞌj. Cꞌolchij iꞌ xlaj Kataj Ryos.a 2 Choꞌkuꞌ bin tan xtxumleꞌn yi ajtzaꞌkl yi choꞌn na saj tcyaꞌj. Quil choꞌcuꞌ tan xtxumleꞌn yi ajtzaꞌkl tetz tzoneꞌj wuxtxꞌotxꞌ. 3 Na quimnakt yi biꞌẍt cyajtzaꞌkluꞌ nin colijcheꞌuꞌ tan Cristo tkꞌab Ryos. 4 Na tan Cristo, at quitzꞌajbiluꞌ. Nin yil tzꞌul tzaj iꞌ slajluchaxk yi eꞌuꞌ tetz, nin stkꞌeꞌ iꞌ cyeruꞌ chikꞌejuꞌ.Yi acꞌaj ajtzaꞌkl tu yi biꞌẍ ajtzaꞌkl
5 Chin tajweꞌn cunin yil quil cyenuꞌ yi eꞌchk cyajtzaꞌkluꞌ cachiꞌ, yi cyꞌaꞌneꞌt nin cyanuꞌ, chi taneꞌn yi yajiꞌn tu xnaꞌniꞌn. Quil chibanuꞌ yi eꞌchk takleꞌnaꞌtz yi chin xaꞌbil nin. Chicyajscyenuꞌ cyakil eꞌchk yab ajtzaꞌkl yi na el nin cyalmaꞌuꞌ teꞌj.
Nin nchaꞌtz chicyajscyenuꞌ yi ajtzaꞌkl yi xkantzaj nink na cyajuꞌ. Na niꞌcuꞌn teꞌtz yi najk chitzanuꞌ tan lokꞌeꞌn junt chiryosiluꞌ yi apart. 6 Poro tzꞌul jun chin caws tan Kataj squibaj yi eꞌ yi na chiban yi eꞌchk takleꞌnaꞌtz. 7 Nchaꞌtz yi eꞌ cyeruꞌ, xomnakeꞌuꞌ te eꞌchk ajtzaꞌklaꞌtz sajleꞌn. 8 Poro jaluꞌ, quil cyenuꞌ yi eꞌchk ajtzaꞌkleꞌj: Quil cyenuꞌ yi chiꞌch cꞌuꞌlal tu cyakal makꞌmal. Quil cyenuꞌ yi jisoꞌn nin eꞌchk jilwutz yol yi chꞌon teꞌj. 9 Quil chijal cunuꞌ jun wi cyakꞌuꞌ squibil quibuꞌ, na elnakeꞌ tzajuꞌ liwr jakꞌ caꞌwl yi eꞌchk ajtzaꞌklaꞌtz. 10 Na yi eꞌ cyeruꞌ ja choꞌcuꞌ tetz acꞌaj wunak taneꞌn, nin tzan xtxꞌixpeꞌn cyajtzaꞌkluꞌ bantz cyoqueꞌnuꞌ chi taneꞌn Kataj Ryos, yi bnol ketz, nin tan teleꞌn chitxumuꞌ tetz, yi xeꞌn taneꞌn iꞌ. 11 Nin quiꞌc na ban yi ko eꞌuꞌ judiy nka quiꞌ. Quiꞌc na ban yi ko banijcheꞌuꞌ circuncidar nka quiꞌ. Nin quiꞌc na ban ko eꞌuꞌ awer nak nka quiꞌ. Nin quiꞌc na ban ko eꞌuꞌ esclaw, nka quiꞌ. Na quiꞌc na ban cyakil yi eꞌchk takleꞌnaꞌtz. Na ntinaꞌtz na taj yi ko junit eꞌuꞌ tu Cristo. Yaꞌstzun yi mas tajweꞌn.
12 Wiꞌnin na pekꞌ Ryos scyeꞌjuꞌ, na iꞌ eꞌ txaꞌoneꞌnuꞌ tan cyoqueꞌnuꞌ tcwent iꞌ. Chibneꞌuꞌ bin taneꞌn yi tetz tajbil. Elk chikꞌajabuꞌ te junt. Chibneꞌuꞌ jun baꞌn tetz junt. Cyocsaj quibuꞌ juy. Chichajeꞌuꞌ chiputzpaluꞌ. Quil je lajp chiwiꞌuꞌ, ma na tajweꞌn ljal chipasensuꞌ. 13 Chimuqꞌueꞌuꞌ chipajuꞌ squibil quibuꞌ. Na ko at paj jun ẍchiwutzuꞌ, chicuyeꞌuꞌ paj, chi banak Cristo tan cuyleꞌn cyeruꞌ chipajuꞌ. 14 Na yi mas tajweꞌn tan kabnol taneꞌn iꞌtz yi lokꞌ ib, na na xcyeꞌ yi lokꞌ ib tan xiteꞌn cyakil yi eꞌchk oyintziꞌ. 15 Cyakꞌeꞌuꞌ bin amaꞌl tetz yi tzatzin paz tan najeweꞌn te cyalmaꞌuꞌ nin tan quichꞌeyeꞌnuꞌ tan xiteꞌn eꞌchk oyintziꞌ. Na yi jaluꞌ junit eꞌuꞌ tkꞌab Cristo. Chityoẍink binuꞌ tetz.
16 Tajweꞌn tan cyajeꞌn cyen yi ẍchusuꞌn Cristo le chiwiꞌuꞌ, na chin tzꞌaknak cunin. Ej nin nchaꞌtz chichuseꞌ quibuꞌ squibil quibuꞌ, nin chiquiwsaj quibuꞌ squibil quibuꞌ. Poro puntil cuꞌn cyulejuꞌ. Ej nin tajweꞌn tan chibitziluꞌ eꞌchk balaj salmos tu eꞌchk balaj bitz, yi na tzatzin Kataj teꞌj, nin yi na takꞌ kꞌej iꞌ. Nin chityoẍinkuꞌ tetz, tetz cuꞌn cyalmaꞌuꞌ. 17 Ej nin alchok eꞌchk takleꞌn yi na chibanuꞌ, nka yi na cyaluꞌ, tajweꞌn tan jaleꞌn kꞌej Cristo taꞌn. Nin chityoẍinkuꞌ tetz Kataj Ryos tan biꞌ Kajcaw Jesús na iꞌ elsanl katziꞌ.
Yi eꞌchk takleꞌn yi tajweꞌn tan kabnol
18 Eꞌuꞌ kaxnaꞌnil choꞌkuꞌ cꞌulutxum jakꞌ caꞌwl quichmiluꞌ, na tajweꞌn cuꞌn, na eꞌuꞌ creyent. 19 Eꞌuꞌ yaj, chilokꞌeꞌuꞌ wutz quixkeluꞌ. Quil chiꞌch quen chicꞌuꞌluꞌ scyeꞌj.
20 Nchaꞌtz axwok xicy, tu axwok xun, bitwok yi caꞌwl itaj itxuꞌ na yi ko yaꞌtz tzitulej stzatzink Kajcaw tziteꞌj. 21 Ma eꞌ cyeruꞌ yi eꞌuꞌ chitaj chitxuꞌ, quil cyakꞌuꞌ chiꞌch cꞌuꞌlal scyetz chinitxajiluꞌ bantz quil xit cyajtzaꞌkl.
22 Ej nin nchaꞌtz eꞌ cyeruꞌ, yi eꞌuꞌ mos, chibneꞌuꞌ taneꞌn yi takꞌun yi chipatrónuꞌ. Choꞌkuꞌ il teꞌj. Nkꞌeꞌtz yi jalen cuꞌnk txiclij chipatrónuꞌ tan quilweꞌnuꞌ, ma na choꞌkuꞌ il te cyakꞌunuꞌ tan tuꞌ yi na cyekuꞌ ẍchiꞌ Ryos. 23 Chakꞌujkuꞌ tetz cuꞌn cyalmaꞌuꞌ. Quiꞌc na ban alchok jilwutz akꞌunil. Chitxumeꞌuꞌ chi tetzk Ryos yi akꞌun. 24 Chixomokuꞌ te jun ajtzaꞌklaꞌtz, na elnak chitxumuꞌ tetz yi stkꞌeꞌ Kajcaw jun oy sketz tetz kachojoꞌn, ko yaꞌtz kaban, na oꞌ len cuꞌn takꞌunsom iꞌ. Nin iꞌ yi mero ajcaw skibaj. 25 Poro alchok scyetz yil spaj yi caꞌwl iꞌ, tzꞌakꞌlok caws teraꞌtz, na qui na jeꞌ kꞌab Ryos twiꞌ jun.