YI CART YI BEN STZꞌIBAL PAWL SCYETZ YI Eꞌ AJ FILIPOS
Yi xeꞌtzbil yol Pawl
1
1 Yi in wetz, in Pawl tu kajwutz Timoteo. Oꞌ ẍchakum Kajcaw Jesucristo. Na katzan tan stzꞌibeꞌn nin yi carteꞌj tetz cyeruꞌ yi eꞌuꞌ yi najlcheꞌuꞌ le tnum Filipos, yi eꞌuꞌ yi xansaꞌn cheꞌtuꞌ, yi eꞌuꞌ yi ateꞌuꞌ tkꞌab Cristo, yi Jesús. Yi xtxolbileꞌj iꞌtz tetz cyeruꞌ wajwutz, nin nchaꞌtz iꞌtz tetz cyeruꞌ yi eꞌuꞌ wiꞌ banl wiꞌ, nin yi eꞌuꞌ diácono. 2 Takꞌ tzaj Kataj Ryos tu Kajcaw Jesucristo yi banl tu yi tzatzin paz squibuꞌ.Yi bisuneꞌn Pawl scyeꞌj yi eꞌ aj Filipo
3 Yi na chuꞌluꞌ txꞌakx tincꞌuꞌl, ilenin na chintyoẍin tetz Kataj yi ten cyocsajuꞌ yi yol iꞌ. 4 Ej nin yi na noꞌc tan nachleꞌn Kataj, tzatzin cuꞌn na injak yi ẍchꞌeybil cyeruꞌ tetz, 5 na junit kutaneꞌn te yi balaj stziblal yi na kocsaj. Ej nin jetz yi kocsal i nin kutaneꞌnaꞌs jaluꞌ. 6 Ej nin jun cuꞌn yol na wal nin scyeruꞌ: Ryos ntxꞌixpun kajtzaꞌkl tan koqueꞌn tetz balaj, nin ilenin tzꞌocopon tan kuchꞌeyeꞌn jalen cuꞌn yil tzꞌul tzaj Jesucristo. 7 At banl Kataj swibaj tan wuchꞌeyeꞌn yi na noꞌc xetzeꞌ, nin at banl iꞌ swibaj yi na noꞌc tan xtxꞌolcheꞌn xoꞌl yi balaj stziblal. Nin yi na noꞌc tan colcheꞌn, nin tan ẍchajleꞌn scyetz yi yaꞌstzun yi mero bintzi. Ej nin yi banl Katajaꞌtz yi at swibaj, iteꞌn nin banl Katajaꞌtz yi at squibuꞌ. Chaꞌstzun te wiꞌnin na chintzatzin scyeꞌjuꞌ. 8 Sak swutz Ryos yi ẍeꞌn cunin na el walmaꞌ tan wilol chiwutzuꞌ. Na nternin na chimpekꞌ scyeꞌjuꞌ, tan banl talmaꞌ Cristo yi at skeꞌj. 9 Ej nin na chintzan tan cꞌucheꞌn tetz Kataj tan jaleꞌn mas lokꞌ ib ẍchixoꞌluꞌ, bantz jaleꞌn mas cyajtzaꞌkluꞌ, nin yi toqueꞌn cuꞌn sban chitxumuꞌnuꞌ. 10 Na kol jal lokꞌ ib ẍchixoꞌluꞌ chixcyekuꞌ tan xtxaꞌleꞌn yi ajtzaꞌkl mas balaj. Ko yaꞌtz cyulejuꞌ qui tzun ljal quiluꞌ-tz yil tzꞌul tzaj Cristo. 11 Ej nin kol jal lokꞌ ib ẍchixoꞌluꞌ tzꞌocopon Jesucristo tan quichꞌeyeꞌnuꞌ tan chibnoluꞌ yi balaj. Ej nin yi eꞌchk takleꞌn balajaꞌtz yil chibanuꞌ tzꞌocopon chi jun balaj cosech swutz Ryos. Nin sjalok kꞌej iꞌ tu kꞌajsbil taꞌn.
Ja ben loꞌon yi balaj stziblal tan yi qꞌuixcꞌuj yi icyꞌpon tan Pawl
12 I bin jaluꞌ eꞌuꞌ wajwutz, na waj lwal jun xtxolbil scyeruꞌ. Cyakil yi eꞌchk contriꞌn yi na bajij sweꞌj na chꞌeyan sweꞌj tan xtxoleꞌn mas yi balaj stziblal yi na xcyeꞌ tan kaclaxeꞌn. 13 Na cyakil yi eꞌ sanlar yi ateꞌ tzoneꞌj tpiltaꞌ, scyuchꞌ cyakil yi eꞌ mas wunak yi ateꞌ tzoneꞌj, ja el chitxum tetz yi atin xetzeꞌ tan tuꞌ yi na wocsaj Cristo. 14 Nchaꞌtz tan tuꞌ yi qui na chinxob tan xtxoleꞌn yi yol Kataj te yi atin tzoneꞌj xetzeꞌ, at wiꞌnin kajwutz yi ja quiwix cyetz chicꞌuꞌl tan xtxoleꞌn yi yol Kataj. Quiꞌt na chixob, nin ja kꞌukeꞌ mas chicꞌuꞌl te Kajcaw.
15 Poro at junt txꞌakajt yi na chitzan tan xtxoleꞌn, poro ntin tan paj xcyꞌaklil, na na chiꞌch chicꞌuꞌl sweꞌj. Nin na chitzan tan xtxoleꞌn ntin tan jaleꞌn cyetz chikꞌej. 16 Yaꞌstzun yi jun txꞌakajaꞌtz yi chiwutz tuꞌ chiplaj tuꞌ na chitzan tan xtxoleꞌn. Na yi cyetz cyajbil iꞌtz tan jaleꞌn mas wil jalen peꞌk yi atin xetzeꞌ. 17 Poro at junt txꞌakajt yi tetz cuꞌn cyalmaꞌ na chitzan tan xtxoleꞌn yi mbi ekaꞌn tan Cristo. Yi eꞌaꞌtz, na chitzan tan xtxoleꞌn tan tuꞌ yi at lokꞌ ib tetz cyalmaꞌ. Na elnak chitxum tetz yi atin xetzeꞌ tan tuꞌ yi ilenin na chintzan tan wakꞌeꞌn chichusuꞌn yi eꞌ contr te yi balaj stziblal. 18 Poro quiꞌc na ban yi ko chiwutz tuꞌ chiplaj tuꞌ nka tetz cuꞌn cyalmaꞌ na chitzan tan xtxoleꞌn, na ilenin na quibit wunak yi mbi ekaꞌn tan Cristo. Nin na chintzatzin tan yi jun xtxolbilaꞌtz. 19 Ej nin na chintzatzin, na na chitzanuꞌ tan nachleꞌn Kataj swibaj. Ej nin na chintzatzin na at yi porer Jesucristo tan wuchꞌeyeꞌn. Chaꞌstzun te qui na chimbisun, na jun cuꞌn ẍchinclaxok tkꞌab yi eꞌchk takleꞌneꞌj. 20 Poro yi wetz wajbil yi nternin na el walmaꞌ teꞌj, iꞌtz yi quil chinkꞌeꞌxij tan xtxoleꞌn yi balaj stziblal. Na na waj yil jal mas inwalor tan xtxoleꞌn, tan takꞌleꞌn mas kꞌej Cristo, chi wutaneꞌn sajleꞌnix tunintz. Quiꞌc na ban ko yaꞌtz chinquimeꞌt nka quiꞌ. 21 Ko ejchij cuntuꞌ muꞌẍ tal, na waj chinxcon tetz Cristo. Poro ko xontzaj chan quimichil sweꞌj, baꞌn tcuꞌn, na yi quimichil iꞌtz jun txꞌacoꞌn tetz wetz. 22 Poro ko yaꞌtz tajbil Kataj tan inxconeꞌn mas tiemp tzoneꞌj wuxtxꞌotxꞌ te takꞌun, baꞌn atit tzinwutz wetz. 23 Poro quinin na el intxum tetz, aloꞌ scyetz mas balaj txoꞌl. Na intxum yi baꞌn tcuꞌn kloꞌ jalcuꞌnk chinquim tan wuponeꞌn chan kale najleꞌt Cristo. 24 Poro yi na noꞌc tan xtxumleꞌn, baꞌn tcuꞌn loꞌ yil naꞌtij ẍchixoꞌluꞌ tan quichꞌeyeꞌnuꞌ. 25 Ej nin yaꞌtz nin tzun sbneꞌ-tz. Chincyajk tzoneꞌj wuxtxꞌotxꞌ tan quichꞌeyeꞌnuꞌ te yi na kocsaj, 26 nin tan jaleꞌn mas tzatzin paz cyanuꞌ tkꞌab Cristo yil nopon junt tir tan chixajseꞌnuꞌ.
Tajweꞌn kaxom te yi ẍeꞌn cuꞌn ban Cristo
27 Chin tajweꞌn cunin lajluchax yi ẍchusuꞌn Cristo skeꞌj, mpe ik na kaxon tbeꞌ nka xeꞌak kacaꞌl. Ko yaꞌtz chibanuꞌ, quiꞌc na ban mpe nink nopon tan chixajseꞌnuꞌ, mpe joylajk atineꞌt wetz yil wit chitziblaluꞌ. Ntin na waj lwit ko baꞌn ateꞌtuꞌ tkꞌab Cristo, nin yi ko junit taneꞌn cyajtzaꞌkluꞌ. Ej nin na waj lwit yi ko na choꞌcuꞌ il tan xtxoleꞌn yi balaj stziblal yi na kocsaj. 28 Nchaꞌtz na waj lwit yi ko qui na chixobuꞌ scyetz yi eꞌ chicontruꞌ. Na ko qui na chixobuꞌ scyetz, yaꞌstzun jun techl tetz cyetz yi at tulbil chicaws. Ej nin nchaꞌtz iꞌtz jun techl tetz cyeruꞌ yi ja wiꞌt chiclaxuꞌ tan Ryos. 29 Tan tuꞌ yi ateꞌuꞌ tkꞌab Cristo, akꞌij amaꞌl scyeruꞌ nkꞌeꞌtz ntin tan cyocsaluꞌ yi yol iꞌ, ma na nchaꞌtz tan tijleꞌn qꞌuixcꞌuj. 30 Nicyꞌ nin tuꞌ na kaqꞌuixpij scyuchꞌuꞌ, na yi atin tzaj ẍchixoꞌluꞌ ilijt cyanuꞌ yi ẍeꞌn cuꞌn ticyꞌeꞌn poneꞌn eꞌchk qꞌuixcꞌuj waꞌn. Poro nchaꞌtz jaluꞌ na quibituꞌ intziblal yi inin wutaneꞌnaꞌs tan mucꞌleꞌn qꞌuixcꞌuj tzoneꞌj.