YI CART YI BEN STZꞌIBAL PAWL SCYETZ YI Eꞌ AJ EFESO
Xeꞌtzbil yol Pawl
1
1 I inaꞌtz in Pawl, in apostl tetz Cristo Jesús na yaꞌstzun tajbil Ryos. Yi carteꞌj iꞌtz tetz cyeruꞌ yi eꞌuꞌ aj Efeso, yi eꞌuꞌ yi txaꞌij cheꞌtuꞌ tan chixconeꞌnuꞌ tetz Ryos, yi eꞌuꞌ yi na cheꞌl cunuꞌ te yi na cyocsajuꞌ, yi eꞌuꞌ yi ateꞌuꞌ tkꞌab Cristo. 2 Takꞌ tzaj Kataj Ryos tu Kajcaw Jesucristo yi banl tu yi tzatzin paz squibuꞌ.Ja wiꞌt takꞌ Ryos yi eꞌchk takleꞌn balaj sketz yi choꞌn at jalen tziꞌn tcyaꞌj
3 Baꞌn bin kakꞌ kakꞌajsbil tetz yi Ryosil Kajcaw Jesucristo, yi tetz Taj, na tan tuꞌ yi atoꞌ tkꞌab Jesucristo ja wiꞌt takꞌ iꞌ yi eꞌchk takleꞌn balaj sketz yi choꞌn na saj tcyaꞌj. Iꞌtz cyakil eꞌchk banl yi choꞌn na jal tu Kataj Ryos jalen tziꞌn tcyaꞌj. 4 Na yi ntaxk cuꞌ xeꞌtzbil yi wuxtxꞌotxꞌ, Ryos nkoꞌ txaꞌon tan koqueꞌn tetz balaj, nin tan koqueꞌn tetz tzꞌaknak cuꞌn swutz iꞌ. 5 Na tan tuꞌ yi lokꞌ ib yi at tuchꞌ, txumijt taꞌn tentz tan koqueꞌn tetz meꞌl cyꞌajl iꞌ tan tuꞌ Jesucristo, 6 bantz kukꞌol kakꞌajsbil tetz tan yi banl iꞌ yi at skibaj tan tuꞌ yi junit oꞌ tu yi tetz Cyꞌajl yi wiꞌnin okꞌleꞌn wutz taꞌn, 7 yi tetz Cyꞌajl yi nkoꞌ colpeneꞌl tzaj tkꞌab Baybaꞌn tan tuꞌ yi ẍchꞌel yi el kojxuj. Ej nin tan iꞌ ja jal cuybil kapaj swutz Ryos. 8 Kojij tzaj tunin yi banl Ryos skibaj, na iꞌ mmakꞌon yi kajtzaꞌkl tu katxumuꞌn, tan teleꞌn katxum te yi xtxolbil yi txumijt cyen taꞌn. 9 Na tetz cuꞌn talmaꞌ iꞌ ja takꞌ amaꞌl sketz tan teleꞌn katxum te yi tetz tajbil, yi ewaꞌn cuntuꞌ sajleꞌn. Na ja lajluchax skawutz yi mbiꞌtz yi txumijt cyen takꞌun. 10 Iꞌtz: Yil jepon tamp yi tiempeꞌj yi atoꞌ tcꞌuꞌl, tzꞌelk cuꞌn te yi txumijt cyen takꞌun. Chocopon cyakil yi eꞌ yi ateꞌ tcyaꞌj tu cyakil yi eꞌ yi ateꞌ wuxtxꞌotxꞌ tetz jun ntziꞌ cmon jakꞌ caꞌwl Cristo.
11 Skileꞌ yi tiempaꞌtz yi at tulbil, na txumijt cyen takꞌun Ryos tan kechal wutz yi jun tiempaꞌtz, tan tuꞌ yi kokꞌbeꞌn kib tu Cristo. Jun cuꞌn skileꞌ na tzꞌelepon kꞌab te yi txumijt cyen taꞌn. 12 Yaꞌstzun tulej Ryos, yi Ryos yi wiꞌnin tetz kꞌej, bantz kukꞌol kakꞌajsbil tetz, yi oꞌ ketz yi bajx cunin kꞌukeweꞌn kacꞌuꞌl te Cristo.
13 Poro nchaꞌtz yi eꞌ cyeruꞌ yi cyokꞌbeꞌnt quibuꞌ tu Cristo, squileꞌuꞌ yi tiempaꞌtz yi at tulbil. Na yi quibitaluꞌ yi chusuꞌn yi bintzinin tetz, yi balaj stziblal yi ẍeꞌn kaclax, nin yi kꞌukeweꞌn chicꞌuꞌluꞌ te Cristo, ja oc jun cyechluꞌ. Nin yi jun techlaꞌtz iꞌtz yi Espíritu Sant, yi alij cyen tan Ryos yi at tulbil tan najeweꞌn skeꞌj. 14 Ej nin yi Espíritu Santaꞌtz yi najlij skeꞌj iꞌtz yi senil yi jun cuꞌn sketzajeꞌ yi oy yi sukiꞌnt tan Kataj Ryos sketz. Nin skacambajeꞌ yi jun oyaꞌtz yil keꞌl liwr taꞌn. Nin jun cuꞌn kelepon liwr taꞌn, na oꞌ tetz. Kakꞌeꞌ bin kakꞌajsbil tetz.
Yi toqueꞌn Pawl tan jakleꞌn tetz Kataj tan jaleꞌn cyajtzaꞌkl yi eꞌ creyent
15 Ma jaluꞌ jun cuꞌn cyakil yi eꞌchk xtxolbilaꞌseꞌj yi ja wiꞌt wal scyeruꞌ; ej nin tan tuꞌ yi ja wit yi nternin kꞌuklij chicꞌuꞌluꞌ te Kajcaw Jesús; nin tan tuꞌ yi ja wit yi nternin na chipekꞌuꞌ scyeꞌj cyakil yi eꞌ yi ateꞌ tkꞌab Ryos, 16 chaꞌstzun te, yi na noꞌc tan nachleꞌn Kataj ilenin na cheꞌ intyoẍijuꞌ tetz Kataj Ryos, 17 yi taj Kajcaw Jesucristo, yi jun yi wiꞌnin kꞌej. Nchaꞌtz na injak tetz tan tkꞌol iꞌ cyajtzaꞌkluꞌ, bantz pujxeꞌn cyanuꞌ yi ẍeꞌn taneꞌn iꞌ.
18 Na chintzan tan cꞌucheꞌn tetz tan teleꞌn chitxumuꞌ tetz yi mbiꞌtz yi at kachꞌiw teꞌj, yi oꞌ yi txaꞌij choꞌ taꞌn. Ej nin nchaꞌtz na chintzan tan cꞌucheꞌn tetz Ryos tan teleꞌn chitxumuꞌ tetz yi balajil yi jun oyaꞌtz yi tzꞌakꞌlok sketz tzantzaj, yi oꞌ yi junit oꞌ tkꞌab iꞌ.
19 Nin nchaꞌtz na chintzan tan cꞌucheꞌn tetz, tan jaleꞌn cyajtzaꞌkluꞌ bantz teleꞌn chitxumuꞌ tetz yi quinin bajsbeꞌn tetz yi porer Ryos yi xomij skeꞌj, yi oꞌ yi na kocsaj yol iꞌ. 20 Na yi jun poreraꞌtz yi xomij skeꞌj, iꞌtz yi porer yi jeꞌsan tzaj Cristo ẍchixoꞌl almaꞌ, nin iteꞌn nin poreraꞌtz yi xcyeꞌ tan takꞌleꞌn kꞌej Jesús, tan cꞌoleweꞌn le sbal Kataj jalen tziꞌn tcyaꞌj. 21 Na mas cham Jesucristo swutz alchok jilwutz ajcaw nka alchok jilwutz qꞌuicyꞌlom yi na cyakꞌ wunak chikꞌej. Nin mas cham iꞌ swutz alchok jilwutz taw akꞌbal, nka alchok jilwutz chiryosil wunak. Nin at mas ẍchamil yi biꞌ iꞌ swutz alchok jilwutz biꞌajil yi na chixob wunak tetz. Na at mas ẍchamil iꞌ swutz alchok jilwutz ajcaw yi ateꞌ tul yi tiempeꞌj yi na kaxon tul, nka yi eꞌ yi ẍchijalok tzantzaj. 22 Na iꞌ ajcaw squibaj cyakil yi eꞌ ajcawaꞌtz, nin nchaꞌtz iꞌ ajcaw skibaj ketz yi oꞌ cmon creyent, 23 yi oꞌ yi oꞌ wankil iꞌ taneꞌn. Na niꞌcuꞌn yi ik Cristo yi cmon creyent. Nin niꞌcuꞌn ik iꞌaꞌtz cyakil yi at, na tetz iꞌ cyakil.