6
1 I bin jaluꞌ eꞌuꞌ wajwutz, ko at jun kajwutz yi ja xupsij, baꞌn choꞌcuꞌ tan ẍchꞌeyeꞌn. Poro yil choꞌcuꞌ tan takꞌleꞌn tajtzaꞌkl tajweꞌn tan xconeꞌn putzpuj yol cyanuꞌ. Ej nin nchaꞌtz eꞌuꞌ chiqꞌuicyꞌlej quibuꞌ bantz qui chibeneꞌnuꞌ tul il, na qui cunin batz tzꞌul jun pilbil cyeruꞌ tan chipoꞌtzeꞌnuꞌ. 2 Baꞌn chichꞌey quibuꞌ squibil quibuꞌ tan chixomeꞌnuꞌ te Cristo. Ko yaꞌtz cyulejuꞌ, na tzun chitzanuꞌ tan banleꞌn taneꞌn yi caꞌwl Jesucristo.3 Na ko na kocsaj kib nim tu kajtzaꞌkl, na tzun kasub kib skibil kib. 4 Chaꞌstzun te chin tajweꞌn cuꞌn yi oꞌ teꞌn kamaꞌlan ketz kajtzaꞌkl. Nin ko na lajluchax skawutz yi baꞌn atoꞌt, katzatzink bintz. Poro qui na yub kol kayol yi paltil junt, ntin tan ẍchajleꞌn yi ketz kabalajil. 5 Ma na skajunalen cuꞌn tu kapaltil swutz Ryos.
6 I bin jaluꞌ eꞌuꞌ wajwutz: Ko at jun kajwutz yi na tzan tan chichusleꞌnuꞌ te yol Kataj, tajweꞌn yil cyakꞌuꞌ yi ẍchꞌeybil tetz.
7 Eꞌ oquiꞌchuꞌ tan xtxumleꞌn yi at rmeril tan jopleꞌn wutz Ryos. Na je jun elsawutzileꞌj: Yi jilwutz ij yi na oc kaꞌn ttxꞌotxꞌ iteꞌn nin iꞌaꞌtz sjalok yil jal cosech. 8 Nchaꞌtz tzun kutaneꞌn ketz, ko ntin kajbil cachiꞌ na katzan tan banleꞌn, sjalok quimichil kaꞌn. Poro kol kaban yi eꞌchk takleꞌn yi na tzatzin yi Espíritu Sant teꞌj, skacambajeꞌ jun itzꞌajbil yi quinin bajsbeꞌn tetz. 9 Chaꞌstzun te icyꞌiꞌch len kapaj tan banleꞌn yi eꞌchk takleꞌn balaj, na tzꞌul jun tiemp yi skacambajeꞌ yi jun itzꞌajbilaꞌtz. 10 Chaꞌstzun te ko na kil yi at tajweꞌn tetz alchok wunakil, kabneꞌ bin jun baꞌn tetz. Inin pyor ko kajwutz kib tuchꞌ.
Stzajsbil wiꞌ yol Pawl
11 I bin jaluꞌ eꞌuꞌ wajwutz mben intzꞌibal cobox yoleꞌj scyeruꞌ tan inkꞌab. Nin chin lmaklen nin nwulej stzꞌibeꞌn tetz. 12 Yi eꞌ yi na chitzan tan banleꞌn puers scyeruꞌ tan chibnoluꞌ taneꞌn yi circuncisión, ntin na chitzan tan banleꞌn puers scyeruꞌ tan jaleꞌn cyetz chikꞌej ẍchiwutz yi cyetz chicmon, bantz quil chibuchlij cyakꞌun. Na ẍchibuchlok ko ntin lcyal yi ẍchiclaxokuꞌ tan yi quimich yi mban Cristo. 13 Poro yi eꞌaꞌtz yi na chixom tan banleꞌn taneꞌn yi circuncisión, qui na chijepon tan banleꞌn taneꞌn yi ley Moisés. Na ntin na chitzan tan chibanleꞌn circuncidaruꞌ tan jaleꞌn yi cyetz chikꞌej. 14 Poro yi in wetz qui na chintzan tan joyleꞌn wetz inkꞌej. Ntin na waj yil jal kꞌej yi xtxolbil yi at cuybil kapaj tan yi quimichil yi ban Kajcaw Jesucristo swutz pasyon. Na tan tuꞌ yi nquim iꞌ swutz pasyon tan incolpeꞌn quiꞌc wocleꞌn te yi eꞌchk takleꞌn tetz tzoneꞌj wuxtxꞌotxꞌ. 15 Na quiꞌc na takꞌ sketz ko banij choꞌ circuncidar, nka quiꞌ. Poro yi mas tajweꞌn iꞌtz yil jal jun acꞌaj kajtzaꞌkl. 16 Takꞌ tzaj bin Kataj yi banl tu yi tzatzin paz squibuꞌ yi eꞌuꞌ yi xomcheꞌuꞌ te yi ajtzaꞌkleꞌj, yi nwal scyeruꞌ. Nin takꞌ tzaj Kataj yi banl iꞌ squibaj yi eꞌ mero tanum iꞌ. 17 I bin jaluꞌ eꞌuꞌ wajwutz quiꞌt na waj yil chibanuꞌ eꞌchk takleꞌneꞌj yi na takꞌ bis swetz. Cunin peꞌk yi eꞌchk chꞌil yi at te yi inwankil, poro yaꞌstzun techl yi in jun mero ẍchakum Jesucristo.
18 Eꞌuꞌ wajwutz, takꞌ tzaj bin Kajcaw Jesucristo yi banl squibuꞌ. Amén.