5
1 Ja bin wiꞌt keꞌl liwr tan Cristo tkꞌab eꞌchk caꞌwl yi akꞌij cyen. Quiwit bin kajwutz. Quiꞌt scꞌul yi nink kakꞌ kib tan banleꞌn taneꞌn yi jun cstumbr yi na biꞌaj circuncisión. 2 Baꞌn bin choꞌcuꞌ tan xtxumleꞌn yi inyoleꞌj yi na wal nin scyeruꞌ, yi in Pawl: Ko na cyaluꞌ yi tajweꞌn tan banleꞌn taneꞌn eꞌchk cstumbr chi taneꞌn yi circuncisión, quiꞌc tzun ekaꞌntz tan yi quimichil yi banak Jesucristo tan ẍchojleꞌn kil nin quiꞌc xac iꞌ ẍchiwutzuꞌ. 3 Ej nin swaleꞌ nin junt tir scyeruꞌ: Alchok scyetz yil sban circuncidar tib tan claxeꞌn tajweꞌn tzun tan bnol taneꞌn cyakil yi ley yi tzꞌibaꞌnt cyen tan Moisés, na ko quil jepon tan banleꞌn taneꞌn cyakil yi ley, quil clax. 4 Chaꞌstzun te cyakil yi eꞌuꞌ yi na cyocsajuꞌ yi sjalok chibalajiluꞌ swutz Ryos tan tuꞌ yi na chitzanuꞌ tan banleꞌn taneꞌn yi ley Moisés, qui bin kꞌuklij chicꞌuꞌluꞌ te Cristo. Na ja cyaj chisachkbeluꞌ yi banl talmaꞌ Ryos.5 Ma yi oꞌ ketz ja wiꞌt jal ketz kabalajil swutz Ryos tan tuꞌ yi porer yi Espíritu Sant nin tan tuꞌ yi kꞌuklij kacꞌuꞌl te yi quimich yi ban Cristo swutz pasyon. 6 Nin ko junit taneꞌn kajtzaꞌkl tu Cristo, quiꞌc na takꞌ ko banij choꞌ circuncidar, nka quiꞌ. Yi mas tajweꞌn iꞌtz yil kꞌukeꞌ kacꞌuꞌl te Cristo yi ja quim tetz kaxel, nin yil kachaj yi at lokꞌ ib skuchꞌ.
7 Baꞌn ateꞌtuꞌ sajleꞌn. ¿Naꞌ tzun moꞌcsan chicꞌuꞌluꞌ tan cyajeꞌn cyen quiloluꞌ yi chusuꞌn yi bintzinin tetz? 8 Na yi Ryos yi oc tan chimoxeꞌn tzajuꞌ te Cristo, nkꞌeꞌtz iꞌ taw yi jun ajtzaꞌklaꞌtz. 9 Chinachonkuꞌ teꞌj, yi ntin muꞌẍ tal niꞌ txꞌam na xcyeꞌ tan xtxꞌamixeꞌn cyakil yi kꞌotil pam. 10 Poro tzinwutz wetz quil chitxꞌixpujuꞌ cyajtzaꞌkluꞌ, na at Jesucristo tan quichꞌeyeꞌnuꞌ. Inti yi eꞌ yi na chitzan tan tocseꞌn chicꞌuꞌluꞌ, Ryos tzꞌakꞌon chicaws cyeꞌtz. Nin quil tzꞌoc Ryos tan xtxumleꞌn yi mbi jilwutz wunakil eꞌ.
11 Yi nink chincawun scyeꞌj yi eꞌ kajwutz yi tajweꞌn tan chibnol taneꞌn yi circuncisión, quiꞌt tzun choꞌc eꞌ intanum judiy tan oyintziꞌ sweꞌj. Yi yaꞌtzk tzimban quiꞌct tzun ltakꞌ chiꞌch cꞌuꞌlal scyetz. 12 Tzinwutz wetz, cyakil yi eꞌ yi na chitzan tan chixuxeꞌnuꞌ tan banleꞌn taneꞌn yi circuncisión mas baꞌn tcuꞌn yi nink chijatxlen quib ẍchixoꞌluꞌ.
13 Ma yi eꞌ cyeruꞌ wajwutz, ja wiꞌt cheꞌluꞌ liwr tkꞌab yi eꞌchk cstumbraꞌtz. Poro qui na waj yil cyakꞌuꞌ amaꞌl tetz tajbil chiwankiluꞌ tan chijuchuluꞌ mas quiluꞌ. Yi wetz wajbil iꞌtz yi nink chichajuꞌ chicꞌulutxumiluꞌ tu yi lokꞌ ib squibil quibuꞌ. 14 Na yi xeꞌ cyakil eꞌchk caꞌwlaꞌtz iꞌtz: “Lokꞌweꞌ cyakil wunak chi na alokꞌ awib atz.”a \v 15 Poro ko tunin na chibuch tu quibuꞌ tu cyajtzaꞌkluꞌ chi na chichiꞌ quib eꞌ txuc, xcyek yi jun ajtzaꞌklaꞌtz tan chixiteꞌnuꞌ.
Baꞌn peꞌ lkaban tajbil kawankil, nka tajbil yi Espíritu Sant
16 I bin jaluꞌ yi wetz wajbil iꞌtz yi nink chixomuꞌ te yi tajbil yi Espíritu Sant. Na yi yaꞌtzk chibanuꞌ, quiꞌt tzun cyakꞌuꞌ amaꞌl tetz yi cyeruꞌ cyajbiluꞌ. 17 Na yi ketz kajbil contr te yi tajbil yi Espíritu Sant. Ej nin yi Espíritu Sant contr iꞌ te tajbil yi ketz kajtzaꞌkl. Na chilab quib squibil quib. Chaꞌstzun te quiꞌc rmeril tan kabnol yi ketz kajbil. 18 Yi ko atoꞌ jakꞌ caꞌwl yi Espíritu Sant, quiboꞌt tzuntz jakꞌ caꞌwl yi ley Moisés. 19 Poro tech cuꞌn tib yi ko na kaxom te yi ketz kajbil, na na kaben tan xnaꞌniꞌn nka yajiꞌn. Nin na kaban eꞌchk takleꞌn yi chin cachiꞌ nin. 20 Nchaꞌtz ko na kaxom te ketz kajbil, na kamejeꞌ ẍchiwutz yi eꞌchk takleꞌn yi banij quitaneꞌn, nin na kajoy puntil tan cꞌaloꞌn. Nchaꞌtz ko na kaxom te ketz kajbil, na jal chiꞌch cꞌuꞌlal skaxoꞌl, nin na jal oyintziꞌ, na jal xcyꞌaklil, na jal cyakal makꞌmal. Nchaꞌtz ko na kaxom te yi ketz kajbil, at na ban cuꞌnt na kaban jun pawor nka jun baꞌn poro tan tuꞌ yi at wutz choꞌ quen teꞌj. Nin ko na kaxom te yi ketz kajbil na kajatxlen kib tan nucꞌleꞌn junt ketz kacmon. 21 Nin ko na kaxom te ketz kajbil ntin na el kalmaꞌ te yi eꞌchk takleꞌn yi at tkꞌab junt. Nin oꞌ biyol nak, oꞌ kbarel, chin xoꞌj nin oꞌ te cyakil eꞌchk takleꞌn. Ej nin na kaban mas eꞌchk takleꞌn yi niꞌcuꞌn tu yi ja wiꞌt wal. Or bin quiluꞌ yi eꞌchk ajtzaꞌklaꞌtz. Benak nin intzꞌibal scyeruꞌ, or quiluꞌ na yi eꞌaꞌtz yi na chiban yi eꞌchk ajtzaꞌklaꞌtz quiꞌc cyopombil cyeraꞌtz kale na cawuneꞌt Ryos.
22 Poro kol kaxom te yi tajbil yi Espíritu Sant, sjalok lokꞌ ib skaxoꞌl nin skatzatzink. Ej nin kol kaxom te yi tajbil yi Espíritu Sant, quil jal oyintziꞌ skaxoꞌl, ma na kamuqꞌueꞌ cyakil eꞌchk ajtzaꞌkl cachiꞌ yi na bajij skeꞌj. Tzꞌelepon kakꞌajab te junt. Kocopon tan ẍchꞌeyeꞌn junt. Tzꞌelepon kakꞌab te kayol. 23 Nchaꞌtz kol kaxom te yi tajbil yi Espíritu Sant, sjalok kacꞌulutxumil. Kamakeꞌ kib te ketz kajbil. Nin kol kaban taneꞌn yi eꞌchk takleꞌnaꞌseꞌj yi na wal nin scyeruꞌ, cyaꞌl jun tzꞌaꞌlon sketz yi na katzan tan pajleꞌn caꞌwl Ryos. 24 Na yi oꞌ, yi oꞌ tetz Cristo, ja cyaj kilol cyakil eꞌchk takleꞌn cachiꞌ yi na pekꞌ kawankil teꞌj. 25 Ja cyaj cyen kilol yi kajtzaꞌkl cachiꞌ. Na ja jal kutzꞌajbil kaꞌn tan porer yi Espíritu Sant. Tajweꞌn bin tan kakꞌol amaꞌl tetz yi Espíritu Sant tan toqueꞌn tan kacaweꞌn. 26 Na qui na yub ko na kocsaj kib nim tu kajtzaꞌkl, na yi ko yaꞌtz kaban ntin na kaxux kib skibil kib, nin na jal chiꞌch cꞌuꞌlal skaxoꞌl.