4
1 Je junt elsawutzileꞌj tan lajluchaxeꞌn yi xtxolbilaꞌtz ẍchiwutzuꞌ: Katxumeꞌ jun nitxaꞌ yi suk yi taj jun herens tetz. Poro yi quimeꞌn yi taj nin yi ntaxk jatxlij yi herens tetz, niꞌcuꞌn iꞌ tu jun esclaw yi quiꞌc mebiꞌl, na txeꞌn jatxlij yi mebiꞌl tetz. 2 Na at qꞌuicyꞌlom tetz. Chaꞌstzun te quiꞌc rmeril tan cawuneꞌn iꞌ tibaj yi herens yi sukiꞌnt tetz na apart yi caꞌwl tetz jalen cuꞌn tzꞌopon yi tiemp yi bixbaꞌnt tan yi taj tan jatxol tetz. 3 Niꞌcuꞌn banakoꞌ ketz. Oꞌ esclaw banak jakꞌ caꞌwl eꞌchk kacstumbr. 4 Poro yi jeꞌn pon tampuj yi tiemp yi bixbaꞌnt tan Kataj Ryos, nin saj ẍchakol yi jun tal ẍutuj Cyꞌajl tzoneꞌj wi munt tan kelseꞌn liwr tkꞌab eꞌchk leyaꞌtz. Choꞌn mitzꞌij te jun xun. Nin judiy iꞌ yi titzꞌeꞌn. Nin xom iꞌ te ketz kacstumbr. 5 Yaꞌstzun tulejtz bantz keleꞌn liwr jakꞌ caꞌwl eꞌchk leyaꞌtz, nin tan koqueꞌn taꞌn tetz mero meꞌl cyꞌajl Ryos.6 Tan lajluchaxeꞌn yi bintzinin oꞌ meꞌl cyꞌajl iꞌ, nin saj ẍchakol yi Espíritu yi Cyꞌajl tan najeweꞌn te kalmaꞌ. Ej nin yi jun Espíritujaꞌtz yi at te kalmaꞌ ilenin na tal: “Taꞌ,” tetz Ryos. 7 Tan yi xtxolbilaꞌseꞌj na elepont yi oꞌ mero meꞌl cyꞌajl Ryos. Nkꞌeꞌtz oꞌ esclaw. Nin tan tuꞌ yi oꞌ meꞌl cyꞌajl Ryos, nin tan tuꞌ mbi cuꞌn banak Cristo stkꞌeꞌ Ryos yi jun herensaꞌtz sketz yi sukiꞌnt taꞌn.
Yi bisuneꞌn Pawl scyeꞌj eꞌ creyent
8 Ma jaluꞌ, je junt xtxolbileꞌj yi swaleꞌ nin scyeruꞌ: Yi ntaxk jal Ryos cyanuꞌ, tzꞌamij cheꞌuꞌ cyakꞌun chiryosiluꞌ. Poro iẍkaj itzꞌ tzunk eꞌ. 9 Poro ja wiꞌt cheꞌluꞌ liwr ẍchikꞌab, na ja jal Ryos cyanuꞌ. Poro yi mero puntil iꞌtz yi ja chijaluꞌ tan Ryos. Ej nin ko eꞌuꞌ tetz Ryos jaluꞌ, ¿nxac na cyajuꞌ choꞌcuꞌ junt tir jakꞌ caꞌwl yi eꞌchk xtxolbilaꞌtz yi quiꞌc ekaꞌn taꞌn? 10 Lastum eꞌuꞌ na na chixomuꞌ tan ticyꞌseꞌn eꞌchk kꞌej chi taneꞌn yi na jal yi neꞌẍ xaw tu eꞌchk xeyob, nka alchok kꞌejil yi xan ẍchiwutz yi eꞌ judiy. 11 Chaꞌstzun te wiꞌnin na chimbisun na qui cunin batz quiꞌc jamel wukan yi xnaꞌkeꞌn tan xtxoleꞌn yol Kataj scyeruꞌ.
12 Eꞌuꞌ wajwutz, max chicꞌuꞌluꞌ. Pakxok tzaj cyajtzaꞌkluꞌ chi mimban wetz. Chicyajscyenuꞌ eꞌchk cstumbraꞌtz. Nchaꞌtz chinachonkuꞌ teꞌj yi atin tzaj ẍchixoꞌluꞌ quiꞌc nchin cyulejuꞌ poro yi jaluꞌ na chitzanuꞌ tan takꞌleꞌn bis swetz. 13 Sak cuꞌn ẍchiwutzuꞌ yi iꞌtz yi tan paj tuꞌ yabil yi wuponeꞌn tan xtxoleꞌn yol Kataj ẍchixoꞌluꞌ. 14 Nin yi jun yabilaꞌtz chin xoꞌwbil nin ban ẍchiwutzuꞌ, poro ilenin cyakꞌuꞌ amaꞌl swetz. Nin cyakꞌuꞌ weri inkꞌej chi ink jun ángel nka chi ink Jesucristo. 15 ¿Ẍeꞌn tzun nxit yi jun balaj cyajtzaꞌkluꞌaꞌtz? Wech na chumbalaj nin eꞌuꞌ yi xnaꞌkeꞌn scyeꞌjuꞌ. Jalt nink tan teleꞌn tzaj quicyꞌaluꞌ chiwutzuꞌ tan toqueꞌn tetz xel yi wetz inwutz. 16 Ma jaluꞌ, tan tuꞌ yi na chintzan tan xtxoleꞌn yi bintzi scyeruꞌ, in chicontruꞌ taneꞌn ẍchiwutzuꞌ.
17 Yi eꞌ subulnakaꞌtz, nternin na chitzan tan chimoxeꞌnuꞌ, poro nkꞌeꞌtz tan jaleꞌn chibanluꞌ, ma na yi cyetz cyajbil iꞌtz yi nink chijatxlen quibuꞌ skeꞌj tan chixomeꞌnuꞌ scyeꞌj. 18 Baꞌn atit kol choꞌc tan chimoxeꞌnuꞌ, poro ik tan cyakꞌol jun balaj cyajtzaꞌkluꞌ. Chumbalaj nin yi yaꞌtz cunink cyulejtz, nin nkꞌeꞌtz ntin te yi atin ẍchixoꞌluꞌ. 19 Eꞌuꞌ wajwutz, na chimbisun junt tir scyeꞌjuꞌ. Choꞌn cuꞌn wutaneꞌn tan bis chi na ban jun xnaꞌn yi na xeꞌtij tan il tan tuleꞌn yos tuchꞌ. Nin quil tzꞌel yi jun bisaꞌtz te incꞌuꞌl jalen cuꞌn yil wil yil chitzꞌijuꞌ chi eꞌuꞌ mero nitxajil Cristo. 20 Lastum kajwutz yi quibin ẍchixoꞌluꞌ tan talcheꞌn cobox yol scyeruꞌ tan xtxꞌixpeꞌn cyajtzaꞌkluꞌ. Poro qui na pujx waꞌn yi ẍeꞌn loꞌ cheꞌ wulejuꞌ.
Yi elsawutzil te yi mbi cuꞌn bajij te Agar tu Sara
21 Ma jaluꞌ yi eꞌ cyeruꞌ, yi na choꞌcuꞌ jakꞌ caꞌwl yi ley Moisés, ¿qui peꞌ na choꞌcuꞌ tan xtxumleꞌn yi mbi tzꞌibaꞌnt cyen tan Moisés? 22 Je puntileꞌj yi swaleꞌ scyeruꞌ: Jalnak cob cyꞌajl Abraham. Choꞌn titzꞌeꞌn jun te jun xnaꞌn yi esclaw tuꞌ. Ma yi junt, choꞌn titzꞌeꞌn te yi tetz txkel nin. 23 Yi toqueꞌn lacꞌpuj yi jun niꞌ te yi xnaꞌn yi esclaw tuꞌ, ja oc lacꞌpuj chi alchok jilwutz niꞌ. Ma yi toqueꞌn lacꞌpuj yi niꞌ te yi mero txkel ja oc lacꞌpuj tan teleꞌn cuꞌn te yi yol Ryos yi alijt cyen taꞌn tetz Abraham. 24 Yi jun xtxolbilaꞌtz iꞌtz jun elsawutzil tetz ketz. Na yi cob xnaꞌnaꞌtz na chitzan tan ẍchajleꞌn cob elsawutzil. Yi jun xnaꞌn yi Agar biꞌ, iꞌ elsawutzil yi eꞌ yi ateꞌ jakꞌ caꞌwl yi xtxolbil yi bixbaꞌnt tan Ryos wiꞌwtz Sinaí. Na cyakil yi eꞌ yi na chixom te yi jun caꞌwlaꞌtz, buchij cheꞌ chi taneꞌn jun yaj yi esclaw. 25 Nin yi jun xnaꞌnaꞌtz yi na biꞌaj Agar, iꞌ jun elsawutzil te yi eꞌ yi ateꞌ jakꞌ eꞌchk caꞌwl yi akꞌlij wiꞌwtz Sinaí cwent Arabia. Akꞌlij jun caꞌwlaꞌtz tan chixomeꞌn wunak teꞌj. Niꞌcuꞌn quitaneꞌn yi eꞌ judiy jaluꞌ, na chin buchijcheꞌ nin tkꞌab yi jun caꞌwlaꞌtz. 26 Poro yi eꞌ yi ateꞌ tkꞌab Jesucristo, nkꞌeꞌtz buchij cheꞌ. Na elnakeꞌ liwr jakꞌ yi eꞌchk caꞌwlaꞌtz. Ej nin yi oꞌ ketz atoꞌ tajlal yi jun txꞌakajaꞌtz yi elnakeꞌt liwr. 27 Ulk txꞌakx ẍchicꞌuꞌluꞌ yi xtxolbil yi tzꞌibaꞌnt cyen yi na tal:
“Aẍ jun cꞌoloj xnaꞌn yi quiꞌc awalbil, tzatzin.
Nin yi aẍatz yi txeꞌn cunin awil qꞌuixbel talajeꞌn jun niꞌ, bitzin.
Na sjalok mas atz awal swutz yi xnaꞌn yi esclaw.”a
28 I bin jaluꞌ eꞌuꞌ wajwutz, niꞌcuꞌn kutaneꞌn chi banak kꞌajtzun kamam Isaac. Sukiꞌnt tan Ryos yi at titzꞌbil iꞌ, nin el kꞌab Ryos teꞌj yi tuleꞌn itzꞌok Isaac. Nchaꞌtz oꞌ ketz jaluꞌ, oꞌ yi mero nitxajil Ryos yi sukiꞌnt taꞌn tetz Abraham.b
29 Ej nin je junt elsawutzileꞌj: Yi jun cyꞌajol yi qui itzꞌij tan porer yi Espíritu Sant, ocnak iꞌ tan buchleꞌn yi cyꞌajol yi itzꞌij tan porer yi Espíritu Sant.c Quib yi banakeꞌ cyetz, iteꞌn nin kutaneꞌn ketz jaluꞌ. Buchij choꞌ cyakꞌun yi eꞌ yi nkꞌeꞌtz eꞌ mero nitxajil Ryos.
30 Nchaꞌtz, je junt xtxolbileꞌj yi tzꞌibaꞌnt cyen le tuꞌj Kataj yi na tal: “Cheꞌlken yi eꞌ yi quibeꞌ tajlal najal.”d Chi mbajij te yi xnaꞌn tu tal yi qui ocnakeꞌ tetz tajlal najal Abraham. Quiꞌc muꞌẍ cyocleꞌn te yi mebiꞌl Abraham, na tetz cuntuꞌ yi tal yi mero txkel Abraham.
31 I bin jaluꞌ wajwutz, niꞌcuꞌn oꞌ tu yi tal yi mero txkel Abraham. Na oꞌ meꞌl cyꞌajl Ryos. Nin at kachꞌiw tan kacambal cyakil yi sukiꞌnt tan Kataj tetz. Nkꞌeꞌtz niꞌcuꞌn oꞌ chi tal yi xnaꞌn yi quiꞌc oc tajal te mebiꞌl Abraham.