YI CAꞌP CART YI BEN STZꞌIBAL PAWL SCYETZ YI Eꞌ AJ CORINT
Yi tlol Pawl jun yos tetz yi cmon creyent Corint
1
1 I inaꞌtz in Pawl. Ej nin tan tuꞌ banl talmaꞌ Ryos in apostl tetz Jesucristo. At kajwutz Timoteo sweꞌj. Ej nin yi carteꞌj iꞌtz tetz cyeruꞌ, yi eꞌuꞌ cmon creyent yi najlcheꞌuꞌ le tnum Corint. Nchaꞌtz iꞌtz scyetz cyakil yi eꞌ kajwutz yi najlcheꞌ lakak amaꞌl cwent Acaya. 2 Takꞌ tzaj Kataj Ryos tu Kajcaw Jesucristo yi banl tu tzatzin paz squibuꞌ.Ja el kꞌajab Ryos scyeꞌj Pawl
3 Kakꞌeꞌ kakꞌajsbil tetz Kataj Ryos yi Taj Kajcaw Jesucristo, na na el kꞌajab skeꞌj, nin ilenin na tzan tan kamayseꞌn. 4 Yaꞌstzun na ban iꞌ skeꞌj, bantz koqueꞌn ketz tan chimayseꞌn yi eꞌ yi ateꞌ swutz qꞌuixcꞌuj, chi banak Ryos tan kamayseꞌn ketz. 5 Yi oꞌ ketz na katij qꞌuixcꞌuj, chi banak Cristo. Poro ilenin xomij iꞌ skeꞌj tan kamayseꞌn, nin tan kaquiwseꞌn. 6 Chaꞌstzun kutaneꞌn ketz scyeꞌjuꞌ na ko na katij qꞌuixcꞌuj, iꞌtz tan chiclaxeꞌnuꞌ. Ej nin yi na oc Ryos tan kamayseꞌn ketz, iꞌtz tan jaleꞌn puntil kaꞌn ketz tan koqueꞌn tan chimayseꞌnuꞌ, nin tan chiclaxeꞌnuꞌ. Tan tuꞌ yi na bajij yi eꞌchk takleꞌnaꞌtz skeꞌj, quiwixk cyeruꞌ chicꞌuꞌluꞌ tan mucꞌleꞌn yi eꞌchk qꞌuixcꞌuj yi na kamucꞌ ketz. 7 Siquierk muꞌẍ tal yi najk kacabej kacꞌuꞌl scyeꞌjuꞌ, na elnak katxum tetz yi kol chimucꞌuꞌ qꞌuixcꞌuj chi na kaban ketz, tzꞌocopon Ryos tan chimayseꞌnuꞌ chi na ban iꞌ skeꞌj ketz.
8 Eꞌuꞌ kajwutz, na kaj yil quibituꞌ yi jun cꞌoloj qꞌuixcꞌuj yi icyꞌpon kaꞌn le amaꞌl cwent Asia. Chin qꞌuixcꞌuj nin oꞌ ban, nin txant qui oꞌ kꞌeꞌxij tkꞌab. Le wutz ketz kajtzaꞌkl yi skaquimok tkꞌab. 9 Le wutz ketz kajtzaꞌkl yi jaltaꞌtz kaquimbil. Poro ntin xcon yi jun qꞌuixcꞌujaꞌtz tan ẍchajleꞌn sketz yi quiꞌc rmeril tan kacolol kib. Nin xcon tan lajluchaxeꞌn skawutz yi tajweꞌn tan kꞌukeweꞌn mas kacꞌuꞌl te yi Ryos yi na xcyeꞌ tan chijeꞌseꞌn tzaj yi eꞌ almaꞌ. 10 Iꞌ, oꞌ colon tkꞌab yi jun chin qꞌuixcꞌujaꞌtz, nin na nin tzaneꞌt tan kacolcheꞌn tkꞌab quimichil. Ej nin kꞌuklij kacꞌuꞌl teꞌj yi ilenin tzꞌocopon tan kacolcheꞌn sbneꞌ opon tunintz. 11 Nchaꞌtz tan tuꞌ yi na chitzanuꞌ tan nachleꞌn Kataj skibaj, ej nin tan tuꞌ yi at jun cꞌoloj kajwutz yi na chitzan tan nachleꞌn Kataj skibaj, chityoẍinkuꞌ tetz Ryos scyuchꞌ yi eꞌ mas kajwutzaꞌtz yil quiluꞌ yil takꞌ Kataj Ryos yi banl talmaꞌ iꞌ sketz.
Yi mbi cunin batzon Pawl tan qui toponeꞌn chan Corint
12 I bin jaluꞌ at jun xtxolbil yi wiꞌnin na tzatzin incꞌuꞌl teꞌj, iꞌtz yi cyakil yi eꞌchk takleꞌn yi imbanak sajleꞌnix, chin tzꞌaknak cuꞌn. Nin tzinwutz wetz quiꞌc muꞌẍ tal impaltil. Lmal nin yi atin tzaj ẍchixoꞌluꞌ. Poro nkꞌeꞌtz wajtzaꞌkl cuntuꞌ, ma na Ryos nchinchꞌeyan tan imbnol eꞌchk takleꞌn balajaꞌtz. 13 Ej nin tul yi eꞌchk cart yi na opon waꞌn ẍchiwutzuꞌ, clar cunin ja ben intzꞌibal yi mbi cunin na icyꞌ tincꞌuꞌl. Quiꞌc muꞌẍ tal yi apartk na jop. Lok tzꞌel chitxumuꞌ tetz. 14 Nin lok chitzatzinuꞌ sweꞌj chi na chintzatzin wetz scyeꞌjuꞌ. Na ko yaꞌtz chibanuꞌ ẍchitzatzinkuꞌ yil tzꞌul tzaj Kajcaw Jesucristo tan xtisyaꞌiꞌn. Na quil jal wil ẍchiwutzuꞌ, nin nchaꞌtz eꞌuꞌ, quil jal quiluꞌ tzinwutz. Katzatzink bin skibil kib.
15 Ej nin tan tuꞌ yi nternin kꞌuklij incꞌuꞌl scyeꞌjuꞌ yi at lokꞌ ib skaxoꞌl scyuchꞌuꞌ intxum tan wicyꞌakeꞌn tan chixajseꞌnuꞌ cob tir bantz chitzatzineꞌnuꞌ mas. 16 Na txumijt waꞌn yi nin kloꞌ nicyꞌak tan chixajseꞌnuꞌ yi wuleꞌn tzoneꞌj Macedonia. Ej nin txumijt waꞌn tan wicyꞌakeꞌn junt tir yil chimpakxijt. Ja kloꞌ choꞌcuꞌ tan wuchꞌeyeꞌn tan woponeꞌn jalen Judea. 17 Poro tan tuꞌ yi mintxꞌixpuj wajtzaꞌkl, nin quiꞌt nicyꞌak scyeꞌjuꞌ, ¿na peꞌ elepont yi qui txumxnak cunin waꞌn? ¿Na peꞌ elepont yi niꞌcuꞌn wajtzaꞌkl scyuchꞌ yi eꞌ yi ẍchaꞌm wiꞌ chiyol? 18 Poro quiꞌ, na ntyoẍ tetz Kataj yi nkꞌeꞌtz ẍchaꞌm wiꞌ inyol. 19 Na quiꞌc jun tir yi xcon jun yol yi ẍchaꞌm wiꞌ tan Cristo Jesús yi Cyꞌajl Ryos, yi jun yi ocnakoꞌ tu Silvano, tu Timoteo, tan xtxoleꞌn scyeruꞌ. Chin tzꞌaknak cuꞌn iꞌ. 20 Na tan tuꞌ iꞌ ja el cuꞌn te cyakil yi yol yi alijt cyen tan Ryos. 21 Ej nin chumbalaj nin Kataj Ryos skeꞌj, na iꞌ ntxꞌixpuneꞌn kajtzaꞌkl scyuchꞌuꞌ bantz kaxomeꞌn te Cristo. 22 Ej nin ocnak jun kechl taꞌn, nin iꞌtz yi Espíritu Sant yi najlij te kalmaꞌ. Iꞌtz jun senil yi oꞌ tetz.
23 Ma jaluꞌ sak swutz Ryos yi bintzi yi inyol yi swaleꞌ scyeruꞌ: Quinin xnaꞌk tan chixajseꞌnuꞌ Corint, na nkꞌeraꞌtz wajbil tan chibisuneꞌnuꞌ mas. 24 Qui na katzan tan talcheꞌn scyeruꞌ yi mbiꞌtz yi tajweꞌn tan chibnoluꞌ, na ja wiꞌt chiquiwixuꞌ te yi na cyocsajuꞌ. Ntin na kaj koꞌc tan quichꞌeyeꞌnuꞌ tan chitzatzineꞌnuꞌ mas.