Yi ofrent yi tajweꞌn tan jeꞌn tan xconeꞌn scyetz yi eꞌ creyent yi najlcheꞌ le tnum Jerusalén
16
1 I bin jaluꞌ katxumeꞌ muꞌẍ tal te yi ofrent scyetz yi eꞌ xansaꞌncheꞌt yi najlcheꞌ Jerusalén. Baꞌn yi nink chixomuꞌ te yi cyajnak incawul scyetz yi eꞌ mas cmon creyent yi ateꞌ lakak tnum cwent Galacia. 2 Je yi puntileꞌj: Lakak bajx kꞌej te sman, baꞌn cyakꞌuꞌ noc te yi na chitxꞌacuꞌ. Tajweꞌn cyakꞌuꞌ muꞌẍ ẍchijunalenuꞌ. Nin choꞌn xomok te yi nicyꞌnaꞌ na chitxꞌacuꞌ. Baꞌn bin chicoluꞌ yi jun ofrentaꞌtz, bantz list atit yil nopon. 3 Ej nin yil nopon ẍchixoꞌluꞌ baꞌn tzun lkatzꞌib nin jun cart tan beneꞌn ẍchikꞌab yi eꞌ yil chibixeꞌ cyanuꞌ tan chibeneꞌn tan takꞌleꞌn yi cyoyuꞌ scyetz yi eꞌ kajwutz yi najlcheꞌ Jerusalén. 4 Ej nin yi ko tajweꞌn tan imbeneꞌn westz, baꞌn tzun chinxom nintz scyeꞌj.Yi tlol Pawl yi at tpombil ẍchixoꞌl yi eꞌ creyent aj Corint
5 Ma jaluꞌ at nin bin wupombil scyeꞌjuꞌ, poro bajx nicyꞌak le amaꞌl cwent Macedonia, na tajweꞌn tan wicyꞌakeꞌn le jun amaꞌlaꞌtz. 6 Poro yil nopon ẍchixoꞌluꞌ, qui cunin batz naꞌtok cobox kꞌej. Poro txeꞌn wil yi ko choꞌn tzꞌicyꞌ kꞌalajtz waꞌn ẍchixoꞌluꞌ. Ej nin kol naꞌtij cobox kꞌej ẍchixoꞌluꞌ baꞌn tzun chin quichꞌeyajuꞌ tan imbenseꞌn kale atit imbembil. 7 Qui na waj yi tuꞌk nicyꞌ ajlok scyeꞌjuꞌ, ma na na waj chincyaj cobox kꞌej ẍchixoꞌluꞌ yi ko yaꞌtz tajbil Kajcaw. 8 Poro choꞌn chincyaj tzoneꞌj Efeso jalen cuꞌn tzꞌucuꞌl yi kꞌej Pentecostés, 9 na at amaꞌl tan katxolil yi yol Kataj tzoneꞌj. Poro ilenin ateꞌ kacontr tzoneꞌj.
10 Nchaꞌtz kol tzꞌopon Timoteo scyeꞌjuꞌ, chijoyeꞌuꞌ puntil tan stzatzineꞌn iꞌ, na nchaꞌtz iꞌ, iꞌ jun akꞌunsom te takꞌun Kataj chi wutaneꞌn wetz. 11 Cyakꞌeꞌuꞌ bin kꞌej iꞌ. Ej nin yil tzꞌicyꞌ cobox kꞌej taꞌn ẍchixoꞌluꞌ baꞌn tzun chichak tzajuꞌ sweꞌj, na na chintzan tan ẍchꞌiweꞌn iꞌ, scyuchꞌ yi eꞌ kajwutz yi chuꞌl xomok teꞌj.
12 Ma yi kajwutz Apolos, nternin na cuꞌ inwutz tetz tan beneꞌn tan chixajseꞌnuꞌ. Poro qui na cujij iꞌ tan tponeꞌn chan. Poro yil tzꞌamaꞌlix wutz tzꞌopon tan chixajseꞌnuꞌ.
Stzajsbil wiꞌ yol Pawl
13 I bin jaluꞌ eꞌuꞌ kajwutz, elk chiwatluꞌ. Quiwit te yi na cyocsajuꞌ. Choꞌkuꞌ tzꞌaknak cuꞌn. Lok quiwix chicꞌuꞌluꞌ. 14 Ej nin chin nuqꞌuij tzij cuꞌn cyulejuꞌ cyakil yi na chibanuꞌ.
15 Ma yi eꞌ najal Estéfanas, elnak chitxumuꞌ tetz yi eꞌ yi bajx creyent ban le amaꞌl cwent Acaya. Nin na quiluꞌ yi cyakꞌoꞌnt quib tan chixconeꞌn scyetz cyakil kajwutz. 16 Choꞌkuꞌ bin cꞌulutxum te cyetz chichusuꞌn, tu chichusuꞌn cyakil yi eꞌ mas kajwutz yi na chakꞌuj te yi takꞌun Kataj.
17 Bintzi quibeꞌuꞌ sweꞌj, poro yi cyuleꞌn Estéfanas tu Fortunat tu Acaico sweꞌj ja takꞌ jun chin tzatzin swetz. Na niꞌcuꞌntz chi ik eꞌuꞌaꞌtz eꞌ uluꞌ tan inxajseꞌn. 18 Na tan tuꞌ yi nchuꞌl Estéfanas, ja jal jun chin tzatzin te walmaꞌ, chi mbajij te yi atin tzaj ẍchixoꞌluꞌ. Baꞌn bin cyakꞌuꞌ chikꞌej cyakil yi eꞌ kajwutz yi niꞌcuꞌn eꞌ tu yi jun najalaꞌtz.
19 Nchaꞌtz cyakil yi cmon creyent yi ateꞌ tzoneꞌj cwent Asia, na cyal nin jun yos scyeruꞌ. Nchaꞌtz Aquila tu Priscila scyuchꞌ yi cmon creyent yi na chicham quib xe chicaꞌl, na cyal nin jun yos scyeruꞌ tan biꞌ Kajcaw. 20 Nin cyakil cuꞌn kajwutz yi ateꞌ tzoneꞌj le tnum Efeso, na cyal nin jun yos scyeruꞌ. Chin skꞌil cunin bin chikꞌajlaj quibuꞌ squibil quibuꞌ.
21 Ma jaluꞌ, in Pawl, nin tan inkꞌab na chintzan tan stzꞌibeꞌn nin yi jun yoseꞌj tetz cyeruꞌ. 22 Tzꞌakꞌlok chicaws yi eꞌ yi qui na chipekꞌ te Kajcaw. Chinach cuꞌnuꞌ yi txant tan tuleꞌn iꞌ. 23 Takꞌ tzaj bin Kajcaw Jesucristo yi banl talmaꞌ squibuꞌ. 24 Na wiꞌnin okꞌleꞌn chiwutzuꞌ waꞌn, na junit oꞌ tkꞌab Jesucristo. Amén.