YI CART YI BEN STZꞌIBAL PAWL SCYETZ YI Eꞌ AJ ROMA
Xeꞌtzbil yol Pawl
1
1 I bin jaluꞌ yi in wetz yi in Pawl, in esclawa Jesucristo, na bixbaꞌnchint tetz jun apostl. Nin txaꞌij chint tan xtxoleꞌn yi balaj stziblal tetz Ryos, yi alijt cyen takꞌun tentz. 2 Na tzꞌibaꞌnt cyen cyakꞌun eꞌ elsanl stziꞌ iꞌ tulak eꞌchk liwr yi chin xan nin.3 Ej nin yi balaj stziblalaꞌtz yi na chintzan tan xtxoleꞌn, iꞌtz yi balaj stziblal tetz Kajcaw Jesucristo, yi Cyꞌajl Ryos, yi choꞌn itzꞌnak ẍchixoꞌl yi eꞌ xonl kꞌajtzun rey Luwiy. 4 Na ja lajluchax yi bintzinin iꞌ Cyꞌajl Ryos tan tuꞌ yi chin xan nin iꞌ, nin tan tuꞌ yi titzꞌeꞌn junt tir ẍchixoꞌl almaꞌ.
5 Ej nin tan iꞌ takꞌwit Ryos yi banl swibaj tan woqueꞌn tetz jun apostl tan xtxoleꞌn yi tetz kꞌej tu tetz porer, bantz cyocsaj wiꞌnin jilwutz wunak beneꞌn tziꞌn wi munt.
6 Ma yi eꞌ cyeruꞌ, yi eꞌuꞌ aj Roma, ateꞌuꞌ tajlal yi eꞌ yi txaꞌij cheꞌt tan Ryos, na oꞌ len tetz Jesucristo. 7 Nin yi carteꞌj yi na chintzan tan stzꞌibeꞌn nin, iꞌtz tetz cyeruꞌ yi eꞌuꞌ yi choꞌn najlcheꞌuꞌ Roma. Wiꞌnin na pekꞌ Kataj Ryos scyeꞌjuꞌ na txaꞌij cheꞌtuꞌ taꞌn. Takꞌ tzaj bin Kataj Ryos tu Kajcaw Jesucristo yi banl tu tzatzin paz squibuꞌ.
Yi talol Pawl yi at tajbil iꞌ tan chixajseꞌn yi eꞌ aj Roma
8 I bin jaluꞌ, yi bajx xtxolbil yi na waj wal scyeruꞌ iꞌtz: Na cheꞌ intyoẍijuꞌ tetz Kataj tan biꞌ Jesucristo, na ja ben loꞌon chitziblaluꞌ beneꞌn tziꞌn wi munt. Na bitaꞌnt cyakꞌun cyakil wunak yi ja wiꞌt cyocsajuꞌ. 9 Nchaꞌtz sak swutz Kataj Ryos, yi na noꞌc tan nachleꞌn iꞌ, ilenin na cheꞌ innawsajuꞌ. Na iꞌ yi jun yi wakꞌoꞌnt wib tkꞌab tan inxconeꞌn tetz, tan xtxoleꞌn yi balaj stziblal tetz yi Cyꞌajl yi iꞌtz Jesucristo.
10 Nchaꞌtz na chintzan tan cꞌucheꞌn tetz Ryos yi ẍeꞌnk jal puntil waꞌn tan chixajseꞌnuꞌ. 11 Na yi wetz wajbil iꞌtz tan woponeꞌn scyeꞌjuꞌ, na na waj wil chiwutzuꞌ, nin na waj noꞌc tan chiquiwseꞌnuꞌ mas tkꞌab Kataj. 12 Poro nkꞌeꞌtz ntin eꞌuꞌ ẍchiquiwixkuꞌ ma na tajweꞌn kaquiwsaj kib skibil kib te yi na kocsaj.
13 Eꞌuꞌ wajwutz, jatix nin loꞌ tir noꞌc tan xtxumleꞌn yi chumbalaj nin, yi nink jal puntil waꞌn tan chixajseꞌnuꞌ. Poro, txeꞌn jal puntil waꞌn, na wiꞌnin takleꞌn na cuꞌ tcꞌuꞌl. Yi wetz wajbil iꞌtz yi nink chinxconsaj Kataj ẍchixoꞌluꞌ chi mimban tzoneꞌj. Na wiꞌnin jilwutz wunak yi nkꞌeꞌtz eꞌ judiy yi ja cyocsaj tan inyol. 14 Na chin tajweꞌn cunin tan intxolil scyetz cyakil jilwutz wunak. Tajweꞌn tan intxolil scyetz yi eꞌ yi na cyocsaj quib balaj. Nin nchaꞌtz tajweꞌn tan intxolil scyetz yi eꞌ yi quiꞌc chixac ẍchiwutz yi eꞌ mas. Nin tajweꞌn tan intxolil scyetz yi eꞌ yi chusij cheꞌ, nin nchaꞌtz tajweꞌn tan intxolil scyetz yi eꞌ yi qui chusij cheꞌ. 15 Na list in tan xtxoleꞌn scyetz cyakil jilwutz wunak. Chaꞌstzun te na el walmaꞌ tan xtxoleꞌn yi balaj stziblal scyeruꞌ yi eꞌuꞌ yi najlcheꞌuꞌ Roma.
Yi porer yi balaj stziblal
16 Qui na chintxꞌixwij tan xtxoleꞌn yi balaj stziblal, na iꞌtz yi ẍchamil Ryos, yi na xcyeꞌ tan chiclaxeꞌn cyakil yi eꞌ yi na cyocsaj. Na na xcyeꞌ yi jun balaj stziblalaꞌtz tan kaclaxeꞌn ketz yi oꞌ judiy, nin nchaꞌtz na xcyeꞌ tan chiclaxeꞌn yi eꞌ yi nkꞌeꞌtz eꞌ judiy. 17 Yi jun balaj stziblalaꞌtz na ẍchaj sketz yi na jal kabalajil swutz Ryos tan tuꞌ yi na kꞌukeꞌ kacꞌuꞌl teꞌj. Ntinaꞌtz na taj, yil kꞌukeꞌ kacꞌuꞌl, na yaꞌstzun tzꞌibaꞌnt cyen. Je xtxolbileꞌj: “Yi eꞌ yi na jal chibalajil swutz Ryos iꞌtz tan tuꞌ yi na kꞌukeꞌ chicꞌuꞌl, nin ẍchicambok cyeraꞌtz te yi quitzꞌajbil.”
Cyakil jilwutz wunak at len chipaj
18 Poro nchaꞌtz at jun xtxolbil yi Ryos nchajon sketz, iꞌtz yi iꞌ tzꞌakꞌon chicaws yi eꞌ yi qui na cyek ẍchiꞌ iꞌ, yi eꞌ yi cachiꞌ na chiban, yi eꞌ yi qui na cyakꞌ kꞌej yi yol iꞌ, yi bintzinin tetz. 19 Poro lastum eꞌ, na elnak chitxum te yi balajil tu yi porer Ryos, na Ryos teꞌn nchajon scyetz. 20 Na jetz yi cweꞌnleꞌn wuxtxꞌotxꞌ ja lajluchax yi porer Ryos tan yi eꞌchk takleꞌn yi bnixnak taꞌn. Tan yi xtxolbilaꞌtz na lajluchax yi iꞌ Ryos. Chaꞌstzun te quil chixcyeꞌ tan chicolol quib swutz iꞌ. 21 Elnak chitxum tetz yi at jun Ryos poro qui na cyakꞌ kꞌej iꞌ, nin qui na chityoẍin tetz. Chaꞌstzun te quiꞌc xtxolbil yi cyetz chitxumuꞌn yi xomcheꞌ teꞌj, na jopij wutz cyajtzaꞌkl. 22 Na cyal yi chin tzꞌaknak cuꞌn eꞌ tu cyajtzaꞌkl, poro chin yab nin eꞌ. 23 Na ja cyaj cyen quilol yi Ryos yi itzꞌ nin tetz. Nin ntin na chimejeꞌ swutz teblal tuꞌ wunak, nin swutz yi eꞌchk teblal txuc yi at chiquimbil.
24 Chaꞌstzun te ja cheꞌl tcyꞌal Ryos te cꞌuꞌl bantz chibnol yi cyetz cyajbil yi chin xaꞌbil nin. Na na chiban yi eꞌchk takleꞌn squibil quib yi chin juntlen nin. 25 Na chiban yi eꞌchk takleꞌnaꞌtz tan paj yi quinin na chixom te yi yol Ryos yi bintzinin tetz. Na ntin na chixom te eꞌchk xtxolbil yi nkꞌeꞌtz bintzi. Wech, na choꞌn na chimejeꞌ cyen swutz yi eꞌchk takleꞌn yi Ryos bnon tetz. Quiꞌc kꞌej yi mero Ryos ẍchiwutz, yi Ryos yi bnol tetz cyakil. Poro yi oꞌ ketz, tajweꞌn yil kakꞌ kꞌej iꞌ, tetz ben kꞌej ben sak. Amén.
26 Ma yi eꞌ cyetz, qui na cyakꞌ kꞌej Ryos, chaꞌstzun te ja cheꞌl tcyꞌal Ryos te cꞌuꞌl, bantz chibnol yi cyetz cyajbil yi chin txꞌixwil nin. Na na chiban eꞌchk takleꞌn squibil quib yi chin juntlen nin swutz iꞌ. Na at xnaꞌn, yi quiꞌt na cyaj chiwitbej quib scyuchꞌ yaj, poro na chiwitbej quib cyetz squibil quib. 27 Nchaꞌtz eꞌ yaj, quiꞌt na cyaj chixconsaj eꞌ xnaꞌn, poro na chiwitbej quib squibil quib. Yi eꞌchk takleꞌnaꞌtz yi na chiban, chin txꞌixwil nin, nin chin cachiꞌ nin. Poro tan paj yi cyajtzaꞌklaꞌtz, na chitij wiꞌnin jilwutz yabil yi chin qꞌuixbel nin. Yaꞌstzun chicaws tan Ryos.
28 Qui na cyek ẍchiꞌ Ryos. Chaꞌstzun te ja cheꞌl tcyꞌal Ryos te cꞌuꞌl, bantz chibnol yi cyetz cyajbil yi mbi na icyꞌ chicꞌuꞌl. Tan cyakil eꞌchk takleꞌn cachiꞌaꞌtz yi na chiban, eꞌ pajol caꞌwl swutz Ryos. 29 Nojnak cyajtzaꞌkl tan eꞌchk takleꞌn yi quiꞌc muꞌẍ xac. Eꞌ cuꞌn aj xnaꞌninl, nka aj yajinl. Chin cachiꞌ nin eꞌ. Nin ntin xkan tzaj nink na cyaj. Wiꞌnin na chixcyꞌaklin. Eꞌ cuꞌn biyolnak. Eꞌ joyol juꞌ oyintziꞌ. Eꞌ cuꞌn subul nak. Eꞌ cuꞌn chacꞌl yol. Eꞌ joyol paltil junt. 30 Quiꞌc xac Ryos ẍchiwutz. Eꞌ cuꞌn tzolol yol. Eꞌ priꞌs. Na cyocsaj quib nim tu cyajtzaꞌkl. Eꞌ txumul eꞌchk takleꞌn cachiꞌ. Eꞌ pajol caꞌwl chitaj chitxuꞌ. 31 Qui tocleꞌn jun yol te chiwiꞌ. Qui na cheꞌl cuꞌn te chiyol. Qui na chipekꞌ te junt. Quiꞌc cuybil paj junt ẍchiwutz. Qui na el chikꞌajab te junt. 32 Elnak chitxum tetz yi mbiꞌtz yi tajbil Ryos. Nin elnak chitxum tetz yi cyakil yi eꞌ pajol caꞌwl Ryos, sotzel chiwutz sbneꞌ. Poro qui na chitaneꞌ tan banleꞌn yi eꞌchk takleꞌn cachiꞌaꞌtz, nin wiꞌnin na chitzatzin te junt yi na ban yi cyetz yi na chiban.