Baꞌn atit yi na oc Ryos tan chicawseꞌn yi eꞌ juchul il
2
1 I bin jaluꞌ, eꞌuꞌ aj maꞌlanl ajtzaꞌkl, quiꞌt jal puntil cyaꞌnuꞌ tan chicolol quibuꞌ. Quiꞌc na ban yi mbi jilwutz wunakil eꞌuꞌ, na yi na choꞌcuꞌ tan maꞌleꞌn tajtzaꞌkl junt, iteꞌn nin cyeruꞌ chipaltiluꞌ na chitzanuꞌ tan maꞌleꞌn, na niꞌcuꞌn cyajtzaꞌkluꞌ tu yi jun yi na chitzanuꞌ tan yolcheꞌn. 2 Ej nin nchaꞌtz na el katxum tetz yi baꞌn atit yi tajtzaꞌkl Ryos yi na oc tan chicawseꞌn yi eꞌ yi na chiban yi eꞌchk takleꞌn cachiꞌ. 3 Chaꞌstzun te eꞌuꞌ aj maꞌlanl ajtzaꞌkl, eꞌ oquiꞌchuꞌ tan xtxumleꞌn yi at cyelbiluꞌ swutz yi chicawsuꞌ, na nchaꞌtz eꞌuꞌ, eꞌuꞌ juchul il. 4 ¿Nxac qui na cyakꞌuꞌ kꞌej yi banl talmaꞌ Ryos? ¿Nxac qui na el chitxumuꞌ tetz yi chumam nin pasens iꞌ skeꞌj? ¿Qui peꞌ na el chitxumuꞌ tetz, yi na tzan Ryos tan ẍchajleꞌn yi banl talmaꞌ bantz chitxꞌixpuluꞌ cyajtzaꞌkluꞌ? 5 Poro chin tzeꞌtzuj nin te cyalmaꞌuꞌ, na qui na cyajuꞌ chitxꞌixpujuꞌ cyajtzaꞌkluꞌ. Ntin na chitzanuꞌ tan jalseꞌn mas chiꞌch cꞌuꞌlal tetz Ryos. Ntin na chitzanuꞌ tan joyleꞌn mas quiluꞌ swutz iꞌ. Poro stzꞌakꞌlok mas chicawsuꞌ yil tzꞌul yi kꞌejlal yil tzꞌoc Ryos tan pujleꞌn xtisyaꞌ. 6 Na ẍchijunalenuꞌ ẍchichojeꞌuꞌ chipajuꞌ. Tul xomcyen tuꞌ te yi mbi cuꞌn mbaj chibnoluꞌ. 7 Inti yi eꞌ yi na cyaj quil yi kꞌej Kataj, yi eꞌ yi na cyaj chicambaj yi jun itzꞌajbilaꞌtz yi quinin bajsbeꞌn tetz, tzꞌakꞌlok yi jun itzꞌajbilaꞌtz scyetz tan tuꞌ yi na chitzan tan banleꞌn taneꞌn yi eꞌchk takleꞌn balaj. 8 Ma yi eꞌ yi xomcheꞌ te yi cyetz cyajbil, nin tan banleꞌn yi eꞌchk takleꞌn cachiꞌ, yi eꞌ yi qui na cyaj chixom te yi bintzi, tzꞌakꞌlok cyetz chicaws tan Ryos, na wiꞌnin na chiꞌch cꞌuꞌl iꞌ scyeꞌj. 9 Na cyakil yi eꞌ yi na chiban eꞌchk takleꞌn cachiꞌ, ẍchitijeꞌ wiꞌnin qꞌuixcꞌuj, wiꞌnin bis, nin wiꞌnin oꞌkl. Yi xtxolbilaꞌseꞌj bajx na jop yi eꞌ judiy, xomt cheꞌ nin yi eꞌ yi nkꞌeꞌtz eꞌ judiy. 10 Poro cyakil yi eꞌ yi na chiban yi eꞌchk takleꞌn balaj stkꞌeꞌ Ryos amaꞌl scyetz tan quilol yi tetz kꞌej. Sjalok jun chin tzatzin paz cyaꞌn. Nchaꞌtz yi xtxolbileꞌj bajx na jop yi eꞌ judiy, caꞌp yi eꞌ yi nkꞌeꞌtz eꞌ judiy.11 Na quil jeꞌ kꞌab Ryos tib jun jilwutz wunak, 12 na cyakil yi eꞌ yi na chijuch quil, sotzel chiwutz sbneꞌ. Quiꞌc na ban yi ko elnak chitxum tetz yi caꞌwl yi akꞌijt tetz Moisés nka quiꞌ, na ilenin tzꞌakꞌlok chicaws. 13 Na ko na chijuch quil yi eꞌ yi na quibit yi caꞌwl Kataj, iteꞌn nin caꞌwlaꞌtz xconk tan ẍchajleꞌn chipaltil. Na quil jal kabalajil swutz Ryos tan tuꞌ yi na kubit yi caꞌwl iꞌ, ma na ntin kol kaban taneꞌn. 14 Nchaꞌtz yi eꞌ yi nkꞌeꞌtz eꞌ judiy, kol chijuch quil tzꞌakꞌlok cyetz chicaws. Quiꞌc yi ley yi akꞌlij tetz Moisés ẍchikꞌab. 15 Poro ilenin na chinachon teꞌj yi naꞌ scyetz yi eꞌchk takleꞌn balaj yi baꞌn chiban, nin na el chitxum tetz naꞌ scyetz yi eꞌchk takleꞌn yi xan chiban. 16 Poro yil jepon tamp yi tiemp yil tzꞌoc Ryos tan maꞌleꞌn cyajtzaꞌkl cyakil wunak yi ewaꞌn cyaꞌn jaluꞌ, xconk Jesucristo taꞌn tan maꞌleꞌn yi eꞌchk ajtzaꞌklaꞌtz. Yaꞌstzun yi xtxolbil yi na chintzan wetz tan xtxoleꞌn.
Yi eꞌ judiy na cyocsaj quib tzꞌaknak cuꞌn tan tuꞌ yi at yi ley Moisés ẍchikꞌab
17 Ma jaluꞌ je jun xtxolbil tetz cyeruꞌ yi eꞌuꞌ judiy, yi eꞌuꞌ yi choꞌn kꞌuklij chicꞌuꞌluꞌ te yi ley Moisés, yi eꞌuꞌ yi na cyaluꞌ yi eꞌuꞌ tetz Ryos.a 18 Na na cyal cyeruꞌ yi na el chitxumuꞌ te yi tajbil Ryos. Ej nin tan yi ley yi xomcheꞌuꞌ teꞌj na cyaluꞌ: “Yi oꞌ ketz na el katxum tetz naꞌ scyetz yi eꞌchk takleꞌn yi baꞌn lkaban nin naꞌ scyetz yi quiꞌ.” 19 Le wutz cyeruꞌ cyajtzaꞌkluꞌ chin tzꞌaknak cunin eꞌuꞌ tan chichusleꞌn cyakil yi eꞌ yi ateꞌ tul tzꞌoꞌtz wutzil. 20 Le wutz cyeruꞌ cyajtzaꞌkluꞌ yi chin tzꞌaknak cunin eꞌuꞌ tan chichusleꞌn yi eꞌ yi qui na pujx cyaꞌn, yi eꞌ yi quiꞌc cyajtzaꞌkl. Na cyaluꞌ yi xtxolbilaꞌseꞌj na at yi ley ẍchikꞌabuꞌ, yi jun leyaꞌtz yi bintzi nin tetz. 21 I bin jaluꞌ yi eꞌuꞌ aj chusunl, ¿nxac yi qui na chixomuꞌ te cyeruꞌ chichusuꞌnuꞌ? Yi eꞌuꞌ yi na chitzanuꞌ tan xtxoleꞌn yi qui na yub yi alakꞌ, ¿nxac tzun na chalkꞌijuꞌ? 22 Nchaꞌtz yi eꞌuꞌ yi na cyaluꞌ yi qui na yub yi jopol wutzajiꞌn, ¿nxac yi eꞌ teꞌnuꞌ jopol wutzaj? Nchaꞌtz yi eꞌuꞌ yi na chilabuꞌ wutz yi eꞌchk takleꞌn yi banij taneꞌn, ¿nxac na cyalkꞌajuꞌ yi eꞌchk takleꞌn yi at xeꞌak chicaꞌlil yi chiryosil wunak?b 23 Tan tuꞌ yi at yi ley Moisés ẍchikꞌabuꞌ na cyocsaj quibuꞌ tzꞌaknak cuꞌn. Poro na el kꞌej Ryos cyaꞌnuꞌ tan tuꞌ yi qui na chitzanuꞌ tan banleꞌn taneꞌn yi jun leyaꞌtz. 24 Na nkꞌeꞌtz tech tuꞌ yi tzꞌibaꞌnt cyen le tuꞌj Kataj yi na tal: “Ipajwok yi na choꞌqueꞌt yi eꞌ wunak yi qui na cyocsaj yol Kataj tan telseꞌn kꞌej Ryos.”c
25 Bintzi stzꞌakꞌonk baꞌn tetz jun yaj yi ko banij circuncidar, poro ko qui xomij yi jun yajaꞌtz tan banleꞌn taneꞌn yi caꞌwl Ryos, quiꞌc tzun ltakꞌ yi circuncisión yi bajij te iꞌ.d 26 Poro yi eꞌ yi nkꞌeꞌtz banijcheꞌ circuncidar, ko na chitzan tan banleꞌn taneꞌn yi caꞌwl Kataj, niꞌcuꞌntz chi jak chibajij circuncidar, na na chitzan tan banleꞌn taneꞌn yi caꞌwl Kataj. 27 Ej nin yi eꞌaꞌtz scyaleꞌ yi quiꞌc chixacuꞌ tan paj yi qui na chixomuꞌ te caꞌwl Kataj. Wech na cyꞌaꞌn yi yol Kataj cyaꞌnuꞌ, nin bajnakeꞌuꞌ circuncidar, poro qui na chitzanuꞌ tan banleꞌn taneꞌn yi tajbil Kataj. 28 Na nkꞌeꞌtz mero judiy jun yaj yi ko ntin ocnak yi jun techlaꞌtz te wankil, na quiꞌc xtxicbaj yi circuncisión yi na bajij te jun yaj yi ko qui xomij tajtzaꞌkl te tajbil Ryos. 29 Poro yi eꞌ yi ajlij cyalmaꞌ te Ryos, itzun eꞌaꞌs yi eꞌ mero judiy quitaneꞌn swutz Ryos. Na yi mero techl yi na ẍchaj yi xomij jun yaj te Ryos iꞌtz ko ajlij cꞌuꞌl teꞌj. Choꞌn na saj chikꞌej yi jun jilwutz wunakaꞌtz te Ryos, nkꞌeꞌtz scyeꞌj wunak.