YI BAJX CART YI BEN STZꞌIBAL PAWL SCYETZ YI Eꞌ AJ CORINT
Xeꞌtzbil yol Pawl
1
1 I inaꞌtz in Pawl tu kajwutz Sóstenes. Txaꞌij chint tan Ryos tetz jun apostl tetz Jesucristo, na yaꞌstzun tajbil iꞌ swetz. 2 Na waj wal jun xtxolbil scyeruꞌ, yi eꞌuꞌ cmon yi ateꞌuꞌ tkꞌab Ryos, yi najlcheꞌuꞌ le tnum Corint. Na yi eꞌ cyeruꞌ xansaꞌn cheꞌtuꞌ tkꞌab Cristo Jesús. Na Ryos nchimoxon tzajuꞌ tan cyoqueꞌnuꞌ tkꞌab iꞌ, scyuchꞌ cyakil yi eꞌ yi ateꞌ beneꞌn tziꞌn wi munt yi na chitzan tan naꞌwseꞌn yi tetz biꞌ, na iꞌ Ajcaw skeꞌj, nin iteꞌn nin iꞌ Ajcaw scyeꞌj. 3 Takꞌ tzaj bin Kataj Ryos tu Jesucristo, yi banl tu yi tzatzin paz squibuꞌ, na iꞌ Ajcaw skeꞌj.Na tyoẍin Pawl tan yi banl Ryos yi at squibaj
4 Ilenin na cheꞌ intyoẍijuꞌ tetz Kataj Ryos tan yi banl iꞌ yi akꞌij scyeruꞌ tan Cristo Jesús. 5 Ntyoẍ tetz Kataj yi iꞌ mmakꞌon wiꞌnin chibanluꞌ, na baꞌn na chixcyeꞌuꞌ tan txoliꞌn nin na el chitxumuꞌ te yi xtxolbil yi na kocsaj. 6 Na tech cuꞌn tib yi nchitxꞌixpujuꞌ cyajtzaꞌkluꞌ yi nquibituꞌ yi xtxolbil te yi mbi ekaꞌn tan Cristo. 7 Chaꞌstzun te at wiꞌnin banl Kataj squibuꞌ te yi na chitzanuꞌ tan ẍchꞌiweꞌn yi tulbil yi Ajcaw skeꞌj, yi Jesucristo. 8 Ej nin ẍchiquiwixkuꞌ taꞌn sbneꞌ opon tunintz, bantz quil jal quiluꞌ yil tzꞌul tzaj Kajcaw Jesucristo tan pujleꞌn xtisyaꞌ. 9 Na Ryos teꞌn eꞌ moxon tzajuꞌ tan cyokꞌbel quibuꞌ tu yi tetz Cyꞌajl, yi Jesucristo, yi kajcawil scyuchꞌuꞌ. Nin tzꞌelepon kꞌab iꞌ te yi sukiꞌnt taꞌn sketz.
Quiꞌc rmeril yi txꞌakajiꞌn kaban tkꞌab Cristo
10 I bin jaluꞌ, eꞌuꞌ wajwutz na cuꞌ inwutz scyeruꞌ tan biꞌ Kajcaw Jesucristo tan chixomeꞌnuꞌ te yi xtxolbileꞌj: Qui na yub ko na jal wakꞌ ib ẍchixoꞌluꞌ, nka kol jal jatxoꞌn ib ẍchixoꞌluꞌ. Ma na chijutzꞌeꞌ quibuꞌ nin junit sban chitxumuꞌnuꞌ. 11 Na ja wit scyetz eꞌ tu Cloé yi at oyintziꞌ ẍchixoꞌluꞌ.
12 Chaꞌstzun te na chintzan tan talcheꞌn nin yi xtxolbileꞌj scyeruꞌ, na at eꞌ ẍchixoꞌluꞌ yi na cyal: “Choꞌn xomij ketz kawiꞌ te Pawl.” Nin at eꞌ na cyal: “Choꞌn xomij ketz kawiꞌ te Apolos.” Nin at eꞌ yi na cyal: “Choꞌn xomij ketz kawiꞌ te Luꞌ.” Ej nin at eꞌ yi na cyal: “Choꞌn xomij ketz kawiꞌ te Cristo.”
13 ¿Poro ja ptzun cuꞌ chijatxoluꞌ yi cmon Cristo? Quiꞌc rmeril. Na quiꞌc rmeril yi nink kapiẍ cuꞌn yi wankil Cristo skawutz. Na nkꞌeꞌtz in nchinquim swutz pasyon tetz chixeluꞌ. Nin quinin xcon weri imbiꞌ yi jeꞌn aꞌ ẍchiwiꞌuꞌ. 14 Nin ntyoẍ tetz Kataj yi quiꞌc nin jun scyeruꞌ yi jak jeꞌ aꞌ waꞌn twiꞌ. Ntinaꞌtz eꞌ yi jeꞌnak aꞌ waꞌn ẍchiwiꞌ iꞌtz Crispo tu Gayo. 15 Poro cyaꞌl nin jun yi nink tal yi jak jeꞌ aꞌ twiꞌ tan imbiꞌ. 16 Ntin loꞌ yi eꞌ najal Estéfanas, jeꞌ aꞌ waꞌn ẍchiwiꞌ. Poro tzinwutz wetz cyaꞌl nin loꞌ junt yi jak jeꞌ aꞌ waꞌn twiꞌ. 17 Na nkꞌeꞌtz chakij chint tan Cristo tan jeꞌseꞌn aꞌ ẍchiwiꞌ wunak, ma na chakij chint tan xtxoleꞌn yi balaj stziblal.
Chin sensiy nin yi chusuꞌn yi nxcon tan Pawl
Ej nin yi woqueꞌn tan xtxoleꞌn scyeruꞌ, quinin xcon eꞌchk lmak yol waꞌn tan jaleꞌn weri inkꞌej, ma na ja xcon eꞌchk yol waꞌn yi chin sensiy nin, bantz qui teleꞌn walor yi quimichil yi ban Cristo swutz pasyon.
18 Poro ẍchiwutz yi eꞌ yi sotzel chiwutz sbneꞌ, quiꞌc xac yi jun xtxolbilaꞌtz yi mbitzuntz quimeꞌn Cristo swutz pasyon. Ma skawutz ketz, yi ja wiꞌt kaclax, yaꞌstzun yi xtxolbil kale na lajluchaxeꞌt yi porer Ryos. 19 Na tzꞌibaꞌnt cyen:
“Tzinxiteꞌ cyajtzaꞌkl yi eꞌ yi chin tzꞌaknak cuꞌn eꞌ taneꞌn.
Nin tzimpoꞌtzeꞌ chitxumuꞌn yi eꞌ yi wiꞌnin cyajtzaꞌkl taneꞌn.”a
20 Poro ¿naꞌ at cyent jun yi chin tzꞌaknak cuꞌn? ¿Naꞌ at cyent jun yi at tajtzaꞌkl tan xtxumleꞌn eꞌchk takleꞌn? ¿Naꞌ at cyent jun yi chin wiꞌtz yolol? Cyaꞌl atit. Na swutz Kataj Ryos quiꞌc muꞌẍ tal xac yi cyetz cyajtzaꞌkl.
21 Na quiꞌc rmeril tan jaleꞌn Ryos cyakꞌun wunak tan cyajtzaꞌkl cuntuꞌ, na nkꞌeꞌraꞌtz tajbil Ryos yi yaꞌtzk sban. Poro na cheꞌ colpij yi eꞌ yi na kꞌukeꞌ chicꞌuꞌl te yi balaj stziblal yi na katzan tan xtxoleꞌn, yi jun balaj tziblalaꞌtz yi quiꞌc xac ẍchiwutz yi eꞌ yi tzꞌaknak cuꞌn eꞌ taneꞌn ẍchiwutz. 22 Na yi eꞌ judiy, quil cyocsaj jun takleꞌn jalen yil chajlij jun milawr scyetz. Nin yi eꞌ aj Grecia, quil cyocsaj jun xtxolbil yi ko qui na icyꞌ tcyꞌaj yi cyetz chitxumuꞌn. 23 Ma yi oꞌ ketz, yi na katxol iꞌtz yi quimnak Cristo swutz pasyon tetz kaxel. Poro yi na quibit yi eꞌ judiy yi jun xtxolbilaꞌtz, ntin na takꞌ chiꞌch cꞌuꞌlal scyetz. Ej nin yi na quibit yi eꞌ chitanumuꞌ, na cyal cyetz yi quiꞌc xac. 24 Poro skawutz ketz, yi oꞌ yi txaꞌij choꞌt tan Ryos, iꞌtz tan yi quimich yi mban Cristo yi na lajluchaxeꞌt yi porer tu yi tajtzaꞌkl Ryos. Nin quiꞌc na ban yi ko oꞌ judiy, nka oꞌ awer nak. Ntin na taj yil kocsaj cunin yi ja quim Cristo tetz kaxel. 25 Na yi tajtzaꞌkl Ryos mas tzꞌaknak cuꞌn swutz yi cyajtzaꞌkl alchok jilwutz wunak. Nin yi porer iꞌ, iꞌtz mas cham swutz yi cyetz chichamil.
Iꞌtz yi sloj wunak yi na cyocsaj yi yol Ryos
26 Nchaꞌtz wajwutz, choꞌkuꞌ tan xtxumleꞌn yi mbi jilwutz wunakil eꞌuꞌ. Na quiꞌc mas chixoneꞌnuꞌ yi tzꞌaknak cuꞌn cyajtzaꞌkluꞌ taneꞌn ẍchiwutz wunak. Nin quiꞌc mas chixoneꞌnuꞌ yi at chikꞌejuꞌ ẍchiwutz. Nin quiꞌc mas lmak wunak ẍchixoꞌluꞌ. 27 Na Ryos na txaꞌon yi eꞌ sloj wunak tan telseꞌn chitxꞌix yi eꞌ yi na cyocsaj quib nim tu cyajtzaꞌkl. Nin Ryos na txaꞌon yi eꞌ tal sloj wunak bantz teleꞌn chitxꞌix yi eꞌ yi at chikꞌej. 28 Nin Ryos na txaꞌon yi eꞌ yi qui tunin kꞌusij eꞌ, nin yi eꞌ yi quiꞌc chixac ẍchiwutz yi eꞌ mas wunak, tan telseꞌn chikꞌej yi eꞌ yi at chikꞌej. 29 Yaꞌtz na tulej iꞌ tan qui tocomponeꞌn jun swutz iꞌ yi na tocsaj tib nim. 30 Na tan tuꞌ yi banl talmaꞌ Ryos atoꞌ tkꞌab Cristo. Nin tan tuꞌ Cristo ja jal kajtzaꞌkl tu kabalajil. Nin tan tuꞌ Cristo ja kaxansij nin ja kacolpij. 31 Chaꞌstzun te baꞌn kaxom te yi xtxolbil yi tzꞌibaꞌnt cyen yi na tal:
“Ko na itaj tzitocsaj itib nim tu itajtzaꞌkl,
baꞌn tcuꞌn tzitocsaj itib nim tan tuꞌ yi na el itxum tetz yi naꞌ scyetz in,” stzun Ryos banak cyen.b