Yi beneꞌn tlol Pawl jun yos scyetz cmon creyent
16
1 I bin jaluꞌ eꞌuꞌ wajwutz, quil cabej chicꞌuꞌluꞌ tan takꞌleꞌn amaꞌl tetz kajwutz Febe, na iꞌ jun diaconisa cwent yi cmon creyent le tnum Cencrea. 2 Baꞌn cyakꞌuꞌ posar nin baꞌn choꞌcuꞌ tan ẍchꞌeyeꞌn iꞌ te cyakil yi tajweꞌn tetz. Chichꞌeyajuꞌ bin na yaꞌstzun na ban iꞌ tetz. Na na oc iꞌ tan quichꞌeyeꞌn yi eꞌ kajwutz. Nchaꞌtz ocnak iꞌ tan wuchꞌeyeꞌn wetz.3 Cyal cyenuꞌ jun yos scyetz kajwutz Priscila tu Aquila, na junit oꞌ akꞌujeꞌt scyuchꞌ te takꞌun Cristo Jesús. 4 Nin txant qui eꞌ quim tan incolcheꞌn. Chaꞌstzun te na cheꞌ intyoẍi. Nin nkꞌeꞌtz ntin in, poro nchaꞌtz cyakil yi eꞌ cmon creyent yi nkꞌeꞌtz eꞌ judiy. 5 Nchaꞌtz, cyal cyenuꞌ jun yos scyetz cyakil yi eꞌ kajwutz yi na chicham quib xe chicaꞌl yi eꞌ kajwutzaꞌtz. Cyal cyenuꞌ jun yos tetz kajwutz Epeneto, na yaꞌstzun yi bajx creyent yi tocsaj Cristo tzoneꞌj cwent Acaya. 6 Nchaꞌtz cyal cyenuꞌ jun yos tetz kajwutz Luꞌch yi nimix tiemp taꞌn tan akꞌun ẍchixoꞌluꞌ. 7 Cyaleꞌuꞌ jun yos scyetz eꞌ wetz intanum yi Andrónico nin Junias, na niꞌcuꞌn koqueꞌn xetzeꞌ scyuchꞌ. Wiꞌnin okꞌleꞌn chiwutz cyakꞌun eꞌ apostl, na bajx cyocsal cyetz Cristo tzinwutz wetz.
8 Cyaleꞌuꞌ jun yos tetz Ampliato, na chin kamiw nin kib tuchꞌ iꞌ tkꞌab Kajcaw Jesucristo. 9 Cyaleꞌuꞌ jun yos tetz kajwutz Urbano, na junit oꞌ te takꞌun Cristo Jesús. Nchaꞌtz cyal cyenuꞌ jun yos tetz wamiw Estaquis. 10 Nin cyaleꞌuꞌ jun yos tetz Apeles, na tech cuꞌn tib na tocsaj Cristo. Nchaꞌtz yi eꞌ najal Aristóbulo, cyaleꞌuꞌ jun yos scyetz. 11 Cyaleꞌuꞌ jun yos tetz Herodión, na katanum kib tuchꞌ. Nchaꞌtz cyaleꞌuꞌ jun yos scyetz yi eꞌ najal Narciso, na jun cuꞌn na cyocsaj Kajcaw Jesucristo. 12 Ej nin cyaleꞌuꞌ jun yos scyetz Trifena tu Trifosa yi na chakꞌuj te takꞌun Kataj, tu kajwutz Pérsida yi wiꞌnin na akꞌuj. 13 Cyaleꞌuꞌ jun yos tetz kajwutz Rufo na chumbalaj creyent iꞌ. Nchaꞌtz cyaleꞌuꞌ jun yos tetz yi xtxuꞌ iꞌ, na i cuꞌn intxuꞌ taneꞌn. 14 Nchaꞌtz cyaleꞌuꞌ jun yos scyetz yi eꞌ kajwutzeꞌj: Asíncrito, Flegonte, Hermes, Patrobas, Hermas, scyuchꞌ yi eꞌ mas kajwutz yi ateꞌ-tz scyuchꞌ. 15 Nchaꞌtz tetz Filólogo, tu Julia, nin Nereo, tu yi tetz tanub. Nchaꞌtz cyaleꞌuꞌ jun yos tetz Olimpas, scyuchꞌ yi eꞌ mas kajwutz yi ateꞌ scyuchꞌ.
16 Chikꞌajlaj quibuꞌ squibil quibuꞌ kajwutz. Ej nin nchaꞌtz yi eꞌ cmon creyent yi ateꞌ tzoneꞌj, na chitzan nin tan talcheꞌn jun yos scyeruꞌ.
17 Nchaꞌtz or quiluꞌ yi eꞌ yi na chixcyeꞌ tan chijatxleꞌn cuꞌn yi eꞌchk cmon, nin tan chipoꞌtzeꞌn yi eꞌ kajwutz. Yi eꞌaꞌtz qui na chixom te yi chusuꞌn yi bitaꞌnt cyaꞌnuꞌ. Eꞌ xomquenchuꞌ scyeꞌj. 18 Na yi jun jilwutz wunakaꞌtz nkꞌeꞌtz choꞌnk na chixcon tetz Kajcaw Jesucristo, ma na chitzan tan joyleꞌn yi cyetz cyajbil. Nin na chixcyeꞌ tan chisubleꞌn yi eꞌ kajwutz yi txeꞌn chiquiwix tan yi eꞌchk putzpuj yol yi na xcon cyaꞌn. Na chin puntil cuꞌn na cyulej tan chisubleꞌn yi eꞌ kajwutz. 19 Ma yi eꞌ cyeruꞌ kajwutz, elnak xit chitziblaluꞌ beneꞌn tziꞌn wi munt, yi eꞌuꞌ cꞌulutxum. Ej nin wiꞌnin na chintzatzin te yi jun xtxolbilaꞌtz. Na yi wajbil scyeꞌjuꞌ iꞌtz yi nink choꞌcuꞌ tzꞌaknak cuꞌn tan chibnoluꞌ yi eꞌchk takleꞌn balaj. Poro qui na waj yi nink choꞌcuꞌ tetz tzꞌaknak cuꞌn tan banleꞌn yi eꞌchk takleꞌn cachiꞌ. 20 Na kol chibanuꞌ yi eꞌchk takleꞌn balaj tzꞌocopon chan tzun Kataj Ryos, tan puchꞌleꞌn cuꞌn yi Baybaꞌn jak kukan. Takꞌ tzaj bin Kajcaw Jesucristo yi banl talmaꞌ squibuꞌ.
21 Nchaꞌtz kajwutz Timoteo, yi na akꞌuj swuchꞌ te takꞌun Kataj, nchaꞌtz iꞌ na tzan tan talcheꞌn nin jun yos scyeruꞌ. Nin at coboxt intanum tzoneꞌj yi na chitzan tan talcheꞌn nin jun yos scyeruꞌ, iꞌtz Lucio, Jasón, nin Sosípater.
22 Ma jaluꞌ, yi in wetz, in Tercio, in tajtzꞌib Pawl tan stzꞌibeꞌn yi carteꞌj. Nchaꞌtz in, na waj wal nin jun yos scyeruꞌ, na junit oꞌ tkꞌab Kajcaw.
23 Nchaꞌtz Gayo, na tzan tan talcheꞌn nin jun yos scyeruꞌ. Iꞌ taw yi caꞌleꞌj kale atineꞌt wetz tan posariꞌn. Nin nchaꞌtz na takꞌ iꞌ chiposar cyakil yi eꞌ creyent yi na chicyꞌak tzoneꞌj. Nchaꞌtz ateꞌ kajwutz Erasto yi tesorero tetz tnum, tu kajwutz Cuarto, nin na chitzan cyetz tan talcheꞌn nin jun yos tetz cyeruꞌ.
24 Takꞌ tzaj bin Kajcaw Jesucristo yi banl talmaꞌ squibuꞌ chicyakiluꞌ. Amén.
Yi tkꞌol Pawl kꞌajsbil tetz Ryos
25 Ma jaluꞌ eꞌuꞌ kajwutz, kakꞌeꞌ kakꞌajsbil tetz Kataj Ryos, yi jun yi baꞌn na xcyeꞌ tan chiquiwseꞌnuꞌ te yi balaj stziblal yi na chintzan tan talcheꞌn nin scyeruꞌ, na iꞌtz yi balaj stziblal tetz Jesucristo, yi quinin clarin ẍchiwutz wunak sajleꞌn tunintz. 26 Poro yi jaluꞌ tzan lajluchaxeꞌn skawutz chi alijt cyen cyakꞌun yi eꞌ elsanl stziꞌ Ryos tentz. Ej nin tzan lajluchaxeꞌn ẍchiwutz cyakil wunak beneꞌn tziꞌn wi munt na yaꞌstzun caꞌwl Kataj Ryos yi Kataj Ryos yi qui na sotz teraꞌtz. Nin yi tajbil iꞌ iꞌtz yi nink cyocsaj cyakil wunak bantz cyoqueꞌn cꞌulutxum jakꞌ caꞌwl iꞌ.
27 Kakꞌeꞌ bin kakꞌajsbil tetz na ntin cuꞌn iꞌ tzꞌaknak cuꞌn tu tajtzaꞌkl. Tan biꞌ Kajcaw Jesucristo kakꞌeꞌ bin kꞌej iꞌ tetz ben kꞌej ben sak. Amén.