Quil kaban ntin yi ketz kajbil
15
1 Yi oꞌ, yi oꞌ quiw tkꞌab Kataj, tajweꞌn tan koqueꞌn tan quichꞌeyeꞌn yi eꞌ cotxcoj. Quil kaban ntin ketz kajbil. 2 Tajweꞌn kajoy puntil tan chitzatzineꞌn yi eꞌ kajwutz, bantz chiquiwixeꞌn tkꞌab Kataj. 3 Na yaꞌstzun banak Cristo, quinin oc tan banleꞌn yi tetz tajbil, ma na ja mucꞌ qꞌuixcꞌuj chi tzꞌibaꞌnt cyen: “Ocnakeꞌ wunak tan chiꞌch cꞌuꞌlal teꞌjuꞌ Taꞌ, poro choꞌn muꞌl bow swibaj.”a 4 Yi jun xtxolbilaꞌtz iꞌtz tetz ketz, na cyakil yi yol yi tzꞌibaꞌnt cyen, iꞌtz jun kachusuꞌn. Ej nin yil koꞌc tan siꞌleꞌn, na lajluchax skawutz yi at eꞌchk takleꞌn balaj yi at kachꞌiw teꞌj. Chaꞌstzun te na jal kapasens nin na jal tzatzin tetz ketz. 5 Yi wetz wajbil iꞌtz yil tzꞌoc Ryos tan quichꞌeyeꞌnuꞌ tan qui jaleꞌn wakꞌ ib ẍchixoꞌluꞌ, na ntin iꞌ na xcyeꞌ tan takꞌleꞌn kapasens nin tan kuchꞌeyeꞌn. Quil chiwakꞌ quibuꞌ squibil quibuꞌ wajwutz, na qui ocnak Cristo tan wakꞌ ib. 6 Yi wetz wajbil iꞌtz yi junit sban cyajtzaꞌkluꞌ, nin junit sban chikꞌajsbiluꞌ yi na cyakꞌuꞌ tetz Kataj Ryos, yi taj Kajcaw Jesucristo.Yi ẍeꞌn cuꞌn ntxolij yi balaj stziblal scyetz yi eꞌ yi nkꞌeꞌtz eꞌ judiy
7 Cyakꞌeꞌuꞌ bin amaꞌl scyetz yi eꞌ mas kajwutz chi mban Cristo scyeꞌjuꞌ, bantz jaleꞌn kꞌej Ryos. 8 Ej nin nchaꞌtz, ocnak iꞌ tetz chixconsbeꞌtz yi eꞌ judiy, Nin tan iꞌ ja lajluchax yi ja el kꞌab Ryos te yi yol yi alijt cyen scyetz eꞌ kamam kateꞌ. 9 Nin nchaꞌtz tan iꞌ ja jal puntil cyakꞌun cyeruꞌ, yi eꞌ cyeruꞌ yi nkꞌeꞌtz eꞌuꞌ judiy, tan cyakꞌoluꞌ chikꞌajsbiluꞌ tetz Ryos, na elnak kꞌajab iꞌ scyeꞌjuꞌ. Nin tzꞌibaꞌnt cyen yi jun xtxolbilaꞌtz. Je na taleꞌj:
“Katyoẍijuꞌ scyuchꞌ yi eꞌ yi nkꞌeꞌtz eꞌ judiy.
Nin kabitzink scyuchꞌ tan takꞌleꞌn kꞌejuꞌ Taꞌ.”b
10 Nchaꞌtz at junt xtxolbil yi na tal:
“Yi eꞌuꞌ yi nkꞌeꞌtz eꞌuꞌ judiy,
chitzatzinkuꞌ scyuchꞌ yi eꞌ yi ateꞌ nin tkꞌab Ryos.”c
11 Ej nin at junt xtxolbil yi na tal:
“Yi eꞌuꞌ yi nkꞌeꞌtz eꞌuꞌ judiy,
yi eꞌuꞌ yi ateꞌuꞌ beneꞌn tziꞌn wi munt,
cyakꞌeꞌuꞌ chikꞌajsbiluꞌ swutz Ryos.”d
12 Nchaꞌtz, tzꞌibaꞌnt cyen jun xtxolbil tan Isaías:
“Sjalok jun scyeri eꞌ xonl Isaí.
Nin iꞌ scawunk squibaj cyakil yi eꞌ yi nkꞌeꞌtz eꞌ judiy.
Nin choꞌn skꞌukek chicꞌuꞌl teꞌj.”e
13 Ma jaluꞌ eꞌuꞌ wajwutz, tan tuꞌ yi na kꞌukeꞌ chicꞌuꞌluꞌ te Kataj Ryos, lok takꞌ iꞌ wiꞌnin tzatzin paz scyeruꞌ. Ej nin lok chiquiwixuꞌ mas te yi at chichꞌiwuꞌ teꞌj tan yi porer yi Espíritu Sant.
14 Poro wajwutz, na el intxum tetz yi baꞌn ateꞌtuꞌ, nin yi at cyajtzaꞌkluꞌ, nin yi baꞌn na chixcyewuꞌ tan nucꞌleꞌn cyajtzaꞌkluꞌ squibil quibuꞌ. 15 Poro tcꞌuꞌl yi uꞌjeꞌj quinin nchinxob tan talcheꞌn yi mero xtxolbil scyeruꞌ. Yaꞌstzun nwulejtz tan cꞌaseꞌn cyajtzaꞌkluꞌ. Na akꞌij inkꞌej tan Kataj 16 tan woqueꞌn tetz jun xconsbeꞌtz Jesucristo tan xtxoleꞌn yi balaj stziblal ẍchixoꞌl yi eꞌuꞌ yi nkꞌeꞌtz eꞌuꞌ judiy. Na yi wetz inmunl iꞌtz tan cyabnajeꞌnuꞌ tkꞌab Ryos. Choꞌn na cheꞌ wulejuꞌ chi na chiban yi eꞌ paleꞌ tan toyeꞌn jun balaj oy tetz Ryos. Ej nin stzatzink Ryos scyeꞌjuꞌ, na xansaꞌncheꞌtuꞌ tan yi Espíritu Sant.
17 Nternin na chintzatzin tan yi inmunl yi na chintzan tan banleꞌn swutz Ryos tan tuꞌ yi na wocsaj Cristo. 18 Poro quil wal jun takleꞌn scyeruꞌ, ma na ntin yi eꞌchk takleꞌn yi ja bnix waꞌn tan porer Jesucristo. Swaleꞌ scyeruꞌ yi ẍeꞌn cyocsaj yi eꞌ yi nkꞌeꞌtz eꞌ judiy tan yi yol yi mintxol scyetz, nin tan yi eꞌchk takleꞌn yi mimban ẍchixoꞌl. 19 Na ja cyocsaj yi quilol yi eꞌchk milawr yi bnix waꞌn. Nin ja cyocsaj tan porer yi Espíritu Sant. Na ja chinxcyeꞌ tan xtxoleꞌn yi balaj stziblal tetz Cristo le tnum Jerusalén jalen le yi amaꞌl cwent Iliria. 20 Na ja injoy puntil tan xtxoleꞌn yi balaj stziblal yi baꞌn na kaclax taꞌn ntin scyetz yi eꞌ yi ntaxk cunin quibit yi naꞌ scyetz iꞌ yi Cristo. Na nkꞌeꞌtz wajbil tan jeꞌn intxicbal jun akꞌun yi ko cuꞌnak xeꞌtzbil tan junt. 21 Ja chinxom te yi xtxolbil yi tzꞌibaꞌnt cyen yi na tal:
“Yi eꞌ yi txeꞌn aꞌlchij scyetz,
yaꞌstzun yi eꞌ yi slajluchaxk yi xtxolbil ẍchiwutz.
Yi eꞌ yi quiꞌc cunin muꞌẍ stziblal na quibit,
yaꞌstzun yi eꞌ yi tzꞌelepon chitxum tetz.”f
Yi talol Pawl yi tzꞌicyꞌak iꞌ Roma tan tponeꞌn España
22 Alaꞌix tir noꞌc tan xtxumleꞌn tan wuponeꞌn tan chixajseꞌnuꞌ, poro tan paj yi latzꞌ inwutz quinin na bixeꞌ waꞌn. 23-24 Poro yi jaluꞌ ja wiꞌt chinxcyeꞌ te intarey tcꞌuꞌl cyakil eꞌchk amaꞌl yi at tzoneꞌj. Chaꞌstzun te yil txumxij tan imbeneꞌn España, nicyꞌaktz tan chixajseꞌnuꞌ, na yaꞌstzun wajbil sajleꞌnix tunintz. Yi nsken wiꞌt kil kib scyuchꞌuꞌ, loꞌk choꞌcuꞌ tan wuchꞌeyeꞌn tan wuponeꞌn jalen España. 25 Poro bajx nchimben tzaj Jerusalén tan takꞌleꞌn muꞌẍ tal chꞌeybil cyetz yi eꞌ wajwutz yi ateꞌ-tz. 26 Na yi eꞌ kajwutz yi najlcheꞌ tzoneꞌj Macedonia tu Acaya ja wiꞌt txumxij cyaꞌn tan jeꞌn jun ofrent tetz chꞌeybil cyetz eꞌ kajwutz yi at tajweꞌn scyetz, yi eꞌ yi najlẍcheꞌ Jerusalén. 27 Baꞌn atit yi jun ajtzaꞌklaꞌtz ẍchiwutz cyetz, nin baꞌn tzinwutz wetz, na iꞌtz chitxꞌokꞌbeꞌnt. Na yi eꞌ kajwutz judiy chijatxnak yi cyetz chimebiꞌl scyetz eꞌ yi nkꞌeꞌtz eꞌ judiy. Yi jun mebiꞌlaꞌtz, iꞌtz yi balaj stziblal. Chaꞌstzun te baꞌn atit yil choꞌc yi eꞌ kajwutz tzoneꞌj tan quichꞌeyeꞌn yi eꞌ kajwutz judiy tan cyetz chipuꞌk. 28 Nin yil bnix yi jun inmantaraꞌs, yil wakꞌ cyakil yi pwok scyetz yi smolxok, kalenaꞌs tzun chimben España nin nicyꞌaktz scyeꞌjuꞌ. 29 Ej nin elnak intxum tetz, yil nopon ẍchixoꞌluꞌ xomok yi banl talmaꞌ Cristo sweꞌj.
30 I bin jaluꞌ eꞌuꞌ wajwutz, tan tuꞌ yi at lokꞌ ib skaxoꞌl scyuchꞌuꞌ tan porer yi Espíritu Sant, nin tan tuꞌ yi yaꞌstzun tajbil Kajcaw Jesucristo tan kabnol, na cuꞌ inwutz scyeruꞌ tan cyoqueꞌnuꞌ tan nachleꞌn Kataj swibaj. 31 Chinacheꞌuꞌ Kataj swibaj, bantz quiꞌc tzimban ẍchikꞌab yi eꞌ aj Judea yi qui na cyocsaj Cristo. Ej nin chinacheꞌuꞌ Kataj yi nink chitzatzin yi eꞌ aj Jerusalén te yi muꞌẍ oy yi cyꞌaꞌn waꞌn yil nopon ẍchixoꞌl. 32 Nchaꞌtz chinacheꞌuꞌ Kataj swibaj yi ko yaꞌtz tajbil Ryos tan wuponeꞌn scyeꞌjuꞌ tan katzatzineꞌn scyuchꞌuꞌ, nin tan wujeweꞌn nin noctz scyuchꞌuꞌ. 33 I bin jaluꞌ, jun cuꞌn stzꞌaꞌtok Ryos ẍchixoꞌluꞌ, yi Ryos yi na akꞌon tzatzin paz. Amén.