Qui na taj wakꞌ ib tan tuꞌ jun takleꞌn yi quiꞌc mas xeꞌ
14
1 I bin jaluꞌ, at eꞌ yi txeꞌn chiquiwix tkꞌab Kataj, poro baꞌn cyakꞌuꞌ amaꞌl scyetz tan cyoqueꞌn ẍchixoꞌluꞌ. Poro qui na taj yil jal wakꞌ ib scyuchꞌ tan paj jun takleꞌn yi quiꞌc mas xeꞌ. 2 Na je jun elsawutzileꞌj: At eꞌ yi na cyal yi qui na jal kil tan jun eꞌchk takleꞌn yi na baj kaꞌn. Ej nin at eꞌ yi na cyal yi ntin at cu tan kabajsal itzaj. 3 Qui na yub kol choꞌc yi eꞌ yi baꞌn na baj cyakil cyaꞌn tan maꞌleꞌn cyajtzaꞌkl yi eꞌ yi ntin na baj itzaj cyaꞌn. Nchaꞌtz qui na yub yi kol choꞌc yi eꞌ yi ntin na baj itzaj cyaꞌn tan maꞌleꞌn cyajtzaꞌkl yi eꞌ yi na cyal yi baꞌn na baj cyakil cuꞌn cyaꞌn. Na eꞌ len cuꞌn nitxajil Ryos. 4 Quiꞌc kacwent tuchꞌ tan maꞌleꞌn tajtzaꞌkl junt kajwutz. Choꞌn at swutz yi tetz patrón yi ko baꞌn na ban nka quiꞌ. Poro chinch wetz, yi kol xubsij jun yaj, quil txꞌakxij junawes, na xcyek Ryos tan xtxicbajeꞌn junt tir.5 Nchaꞌtz je junt xtxolbileꞌj: At eꞌ yi na cyal yi at jujun kꞌej yi xan ẍchiwutz cyetz. Ej nin at eꞌ yi na cyal yi quiꞌc jun kꞌej xan ẍchiwutz, ma na nicyꞌ nin tuꞌ tetz kꞌej xan taneꞌn ẍchiwutz. Poro skajunalen cuꞌn te jun xtxolbilaꞌtz. 6 Na yi eꞌ yi na cyal yi at jujun kꞌej xan, ntin na chitzan tan joyleꞌn puntil tan takꞌleꞌn kꞌej Kataj Ryos tan yi jun ajtzaꞌklaꞌtz. Nchaꞌtz yi eꞌ yi na cyocsaj yi nicyꞌ nin tuꞌ tetz kꞌej xan, nchaꞌtz eꞌ na chitzan cyetz tan takꞌleꞌn kꞌej Kataj tan yi jun ajtzaꞌklaꞌtz. Niꞌcuꞌn yi eꞌ yi na baj cyakil eꞌchk takleꞌn cyaꞌn, na chitzan cyetz tan takꞌleꞌn kꞌej Kataj tan jun ajtzaꞌklaꞌtz, na ¿qui peꞌ na chinach Kataj tib chiwaꞌ? Na. Na nchaꞌtz yi eꞌ yi na cyal yi at jujun eꞌchk takleꞌn yi xan kol kabajsaj, ¿qui peꞌ na chitzan cyetz tan takꞌleꞌn kꞌej Kataj yi na chimak quib te eꞌchk takleꞌnaꞌtz? Na. Ej nin nchaꞌtz eꞌ, na chinach Kataj tibaj chiwaꞌ.
7 Cyaꞌl nin jun sketz yi na caw tib ẍchuc, na oꞌ tu xconsbeꞌtz Cristo. Yi kol ben mas katiemp, nka kol kaquim chan, choꞌn at swutz iꞌ. 8 Yi kol ben mas katiemp, iꞌtz tan kaxconeꞌn tetz Cristo. Choꞌn cunin sak swutz iꞌ yi mbi tiempil lkaquim, na oꞌ tuꞌ xconsbeꞌtz iꞌ. 9 Na yi quimeꞌn iꞌ, nin yi titzꞌeꞌn junt tir, iꞌtz tan toqueꞌn tetz Kajcaw. Nin quiꞌc na ban ko quimnakoꞌ, nka yi itzꞌoꞌ, atoꞌ nintz jakꞌ caꞌwl iꞌ.
10 Ej nin yi ko iꞌ yi Kajcaw, ¿nxac na chitzanuꞌ tan maꞌleꞌn tajtzaꞌkl jun kajwutz? ¿Nxac na cyaluꞌ yi quiꞌc xac yi eꞌchk takleꞌn yi na ban junt kajwutz? Na kacyakil cuꞌn oꞌ atoꞌ jakꞌ caꞌwl jun ntziꞌ Kajcaw nin tajweꞌn tan koponeꞌn swutz iꞌ, tan toqueꞌn iꞌ tan kamaꞌleꞌn, 11 na je jun xtxolbileꞌj yi alijt cyen tan Kataj:
“Tech cuꞌn tib yi itzꞌ in.
Nin yi ko yaꞌtz bintzi, bintzi yi yoleꞌj yi swaleꞌ nin tzitetz:
Cyaꞌl nin jun yi quiꞌk mejeꞌ tzinwutz tzantzaj,
na cyakil wunak scyaleꞌ yi jun cuꞌn, in Ryos,” stzun Ryos banak cyen.a
12 Yi na elepont yi jun xtxolbilaꞌtz iꞌtz, yi skajunalen cuꞌn skatxoleꞌ tetz Ryos yi mbi cuꞌn mbaj kabnol. ¿Nxac tzun na jal oyintziꞌ skaxoꞌl tan paj jun takleꞌn yi quiꞌc mas xeꞌ?
Quil chipoꞌtzajuꞌ junt kajwutz
13 Chaꞌstzun te eꞌuꞌ kajwutz, qui na yub yi na koꞌc tan telseꞌn kakꞌej skibil kib. Mas baꞌn tcuꞌn yil bixeꞌ kaꞌn yi quil kaban jun takleꞌn yi na xcyeꞌ tan poꞌtzeꞌn junt kajwutz, nka tan pitleꞌn nin tul il. 14 Elnak intxum tetz yi quiꞌc jun eꞌchk takleꞌn xan. Nin bintzi nin yi xtxolbilaꞌtz, na chusij chint tan Kajcaw. Poro ko at jun kajwutz yi le wutz tetz tajtzaꞌkl sjalok til yi nink sban jun takleꞌn, sjalok tzun tiltz teꞌj kol sban. 15 Nchaꞌtz eꞌ cyeruꞌ, ko na cyakꞌuꞌ bis scyetz mas kajwutz tan yi eꞌchk takleꞌn yi na baj cyaꞌnuꞌ, qui na yub. Na na elepont yi qui na chipekꞌuꞌ scyeꞌj, na na chitzanuꞌ tan takꞌleꞌn bis scyetz. Eꞌuꞌ kajwutz, quil chipit ninuꞌ jun kajwutz tul il tan tuꞌ eꞌchk takleꞌn yi na baj cyaꞌnuꞌ. 16 Baꞌn tcuꞌn quil chibanuꞌ eꞌchk takleꞌn yi baꞌn atit le chiwutz cyeruꞌ ko at eꞌ yi na cyal yi at kil teꞌj. 17 Ko atoꞌ tkꞌab Ryos, quiꞌc ekaꞌn tan yi eꞌchk takleꞌn yi na baj kaꞌn, poro at cobox takleꞌn yi at ekaꞌn taꞌn yi tajweꞌn cuꞌn tan kabnol taneꞌn, iꞌtz: Yil jal jun kajtzaꞌkl yi jicyuch teꞌj swutz Ryos nin ẍchiwutz wunak; nin yil jal tzatzin paz skaxoꞌl; nin yil katzatzin tan porer yi Espíritu Sant. 18 Nin kol kaxom te yi eꞌchk balaj ajtzaꞌklaꞌtz yi mas tajweꞌn, na tzun tzatzin Ryos skeꞌj. Nchaꞌtz yi eꞌ mas wunak, chitzatzink yi ko yaꞌtz kaban.
19 Kajoyeꞌ bin puntil tan jaleꞌn tzatzin paz skaxoꞌl. Kajoyeꞌ puntil tan kuchꞌeyal kib skibil kib. 20 Qui na yub kol xit tajtzaꞌkl junt kajwutz tan tuꞌ yi eꞌchk takleꞌn yi na baj kaꞌn. Na el katxum tetz yi quiꞌc kil te jun takleꞌn yi na baj kaꞌn. Poro kale na jaleꞌt yi kil, iꞌtz yi na xit tajtzaꞌkl junt kajwutz tan tuꞌ yi na baj jun takleꞌn kaꞌn yi xan swutz iꞌ tetz. 21 Baꞌn tcuꞌn quil baj chiꞌbaj kaꞌn yi xconak tetz chitxꞌixwatz wunak, kol xcyeꞌ jun ajtzaꞌklaꞌtz tan poꞌtzeꞌn junt kajwutz. Nchaꞌtz yi win, baꞌn tcuꞌn quil baj kaꞌn, kol xcyeꞌ tan poꞌtzeꞌn junt kajwutz. Baꞌn tcuꞌn quil kaban jun takleꞌn yi kol xcyeꞌ tan pitleꞌn junt kajwutz tul il. 22 Nkꞌeꞌtz tajweꞌn tan kayolol scyetz kajwutz yi mbi na kocsaj ketz te eꞌchk takleꞌnaꞌtz, na kachuc tu Ryos yi ko baꞌn na kaban nka quiꞌ. Baꞌn cyeri eꞌ yi qui na chicabej chicꞌuꞌl te yi eꞌchk takleꞌn yi na chiban, nka yi qui na chiban. Baꞌn cyeri eꞌ yi qui na chicabej chicꞌuꞌl te yi eꞌchk takleꞌn yi na baj cyaꞌn, nka yi qui na baj cyaꞌn. 23 Poro ko at jun eꞌchk takleꞌn yi xan swutz jun yaj yil baj taꞌn, ej nin kol baj taꞌn, ja tzun juch tiltz. Ja juch tiltz tan paj yi ja baj taꞌn, wech na le wutz tetz tajtzaꞌkl yi xan. Nchaꞌtz yi ko at jun ajtzaꞌkl yi xan skawutz yil kaban, nin kol bnix kaꞌn, ja tzun kajuch kiltz.