13
1 Tajweꞌn yil choꞌcuꞌ cꞌulutxum jakꞌ chicaꞌwl yi eꞌ ajcaw tetz tnum, na akꞌij amaꞌl scyetz tan Ryos tan cawuꞌn. 2 Nin cyakil yi eꞌ yi na choꞌc tan contriꞌn scyeꞌj eꞌ ajcaw tetz tnum, eꞌ contr Ryos, na yi eꞌ ajcawaꞌtz akꞌij amaꞌl scyetz tan Ryos tan cyoqueꞌn tan kacaweꞌn. Tzꞌakꞌlok bin chicaws cyakil yi eꞌ yi na choꞌc tan contriꞌn scyeꞌj. 3 Yi ko oꞌ balaj wunak, nkꞌeꞌtz tajweꞌn kaxob scyetz. Ntin yi ko oꞌ mal nak, kaxobok tzuntz scyetz. Chaꞌstzun te yi ko qui na cyajuꞌ chixobuꞌ scyetz yi eꞌ ajcawaꞌtz, chibneꞌuꞌ bin yi eꞌchk takleꞌn balaj bantz jaleꞌn chibalajiluꞌ ẍchiwutz. 4 Na yi eꞌ bajxomaꞌtz eꞌ xconsbeꞌtz Ryos tan chiqꞌuicyꞌleꞌnuꞌ. Poro yi ko cachiꞌ na chibanuꞌ, ẍchixobokuꞌ ẍchiwutz, na at caꞌwl ẍchikꞌab tan takꞌleꞌn chicawsuꞌ. Na yi chimunl yi akꞌij scyetz tan Ryos iꞌtz tan takꞌleꞌn chicaws yi eꞌ mal nak. 5 Chaꞌstzun te tajweꞌn tan cyoqueꞌnuꞌ jakꞌ chicaꞌwl yi eꞌ ajcaw tetz tnum, nin nkꞌeꞌtz ntin tan paj yi tzꞌakꞌlok chicawsuꞌ, ma na tan tuꞌ yi sak skawutz yi yaꞌstzun tajweꞌn tan kabnol. 6 Nchaꞌtz kachojeꞌ yi eꞌchk impuesto yi tajweꞌn tan kachojol, na cyakil yi eꞌ ajcawaꞌtz bixbaꞌn cheꞌt tan Ryos tan chixconeꞌn tetz, nin yaꞌstzun na chitzan tan banleꞌn.7 Cyakꞌeꞌuꞌ bin cyakil yi mbi na chijak scyeruꞌ. Cyakꞌeꞌuꞌ chicutxujuꞌ yi na jaklij. Nin chichojeꞌuꞌ yi eꞌchk alcawal yi na cꞌuchij scyeruꞌ. Nchaꞌtz cyekeꞌuꞌ chichiꞌ yi eꞌ bajxom, na tajweꞌn yi yaꞌtz kaban. Nchaꞌtz, cyakꞌeꞌuꞌ chikꞌej.
8 Na tajweꞌn yil kakꞌ cyakil yi na chijak sketz. Poro at jun xtxolbil yi quil kaxcyeꞌ tan ẍchojleꞌn cyakil, iꞌtz yi lokꞌ ib yi tajweꞌn tan kachajol scyetz cyakil wunak. Na alchok scyetz yi na ẍchaj lokꞌ ib scyetz wunak, na tzun tzantz tan banleꞌn taneꞌn yi eꞌchk caꞌwl Kataj yi tzꞌibaꞌnt cyen, 9 chi taneꞌn: “Quil cẍjopon wutzaj. Quil cẍbiyolnakin. Quil cẍalkꞌij. Quil tzajal cuꞌn jun wi awakꞌ. Quil tzꞌel nin awalmaꞌ te mebiꞌl junt.”a Na yi xeꞌ yi eꞌchk caꞌwlaꞌtz scyuchꞌ cyakil eꞌ mas iꞌtz: “Lokꞌweꞌ cyakil wunak chi na alokꞌ awib atz.”b 10 Na yi eꞌ yi at loꞌk ib scyuchꞌ, qui na chiꞌch cyetz chicꞌuꞌl scyeꞌj wunak. Chaꞌstzun te alchok scyetz yi na ẍchaj loꞌk ib scyetz wunak, ja tzun xcyeꞌ tan banleꞌn taneꞌn yi eꞌchk caꞌwlaꞌtz.
11 I bin jaluꞌ, ja quibituꞌ cyakil yi xtxolbilaꞌtz, poro nchaꞌtz, na kloꞌ waj yil choꞌcuꞌ tan xtxumleꞌn yi ẍeꞌn taneꞌn yi tiemp jaluꞌ, chin xoꞌwbil nin. Chaꞌstzun te tajweꞌn tan cꞌaseꞌn kajtzaꞌkl na qui ampon tiemp tan kaclaxeꞌn, swutz yi sajleꞌnix cuntunintz yi kocsal cuꞌn yi balaj stziblal. 12 Tajweꞌn tan cꞌaseꞌn kajtzaꞌkl na niꞌcuꞌn taneꞌn yi tiemp skawutz chi taneꞌn yi txant tan tuleꞌn skil. Chaꞌstzun te tajweꞌn tan cyajeꞌn cyen kilol cyakil yi eꞌchk takleꞌn yi na chiban yi eꞌ wunak yi ateꞌ tul tzꞌoꞌtz wutzil. Ma na tajweꞌn tan kaxomeꞌn te cyajtzaꞌkl yi eꞌ yi ateꞌ tul tkan skil taneꞌn. 13 Qui bin kaxom te cyajtzaꞌkl yi eꞌ yi ateꞌ tul tzꞌoꞌtz wutzil. Na qui na yub kol tzꞌoc aꞌ tkawiꞌ. Nin qui na yub kol kaẍekneꞌ tuꞌ tbeꞌ. Quil kajoy kil te jun xnaꞌn, nka te jun yaj. Quil koꞌyintzin, nin quil kaxcyꞌaklin, na yaꞌtz na chiban yi eꞌ yi ateꞌ nintz tul tzꞌoꞌtz wutzil. 14 Qui tzun chibanuꞌ yi eꞌchk takleꞌnaꞌtz, ma na chixomokuꞌ te tajtzaꞌkl Cristo, bantz chiclaxeꞌnuꞌ tkꞌab il. Quil cyakꞌuꞌ amaꞌl tetz yi cyajtzaꞌkluꞌ cachiꞌ.