Tajweꞌn tan kakꞌol kib tetz Ryos
12
1 I bin jaluꞌ eꞌuꞌ kajwutz, ja wiꞌt quibituꞌ cyakil eꞌchk xtxolbil tetz yi banl talmaꞌ Ryos skibaj. Chaꞌstzun te na cuꞌ inwutz scyeruꞌ tan cyakꞌol quibuꞌ tetz Ryos. Chijatxeꞌ quibuꞌ tkꞌab Ryos, bantz chixconeꞌnuꞌ tetz. Na yaꞌstzun yi kamunl yi nternin na tzatzin iꞌ teꞌj. Tinaꞌtz jun kamunl yi mas balaj swutz iꞌ. 2 Quiꞌt chixomuꞌ te cyajtzaꞌkl yi eꞌ wunak tzoneꞌj wuxtxꞌotxꞌ, ma na chitxꞌixpeꞌnuꞌ cyajtzaꞌkluꞌ bantz cyoqueꞌnuꞌ tetz mero balaj wunak. Na kol kakꞌ kib tetz Ryos, tzꞌelepon tzun katxum tetz yi mero tajbil iꞌ yi chumbalaj nin. Nin stzatzink iꞌ teꞌj, na chin tzꞌaknak cuꞌn yi jun ajtzaꞌklaꞌtz.3 Ma jaluꞌ tan tuꞌ yi wakꞌoꞌnt wib tan inxconeꞌn tetz Ryos, ja jal wajtzaꞌkl. Chaꞌstzun te na waj lwal jun xtxolbil scyeruꞌ, chicyakiluꞌ: Quil cyocsaj quibuꞌ nim tu cyajtzaꞌkluꞌ. Baꞌn tcuꞌn yi nink choꞌcuꞌ chijunalenuꞌ tan maꞌleꞌn yi cyeruꞌ cyajtzaꞌkluꞌ, bantz teleꞌn chitxumuꞌ tetz yi ko eꞌuꞌ tzꞌaknak cuꞌn nka quiꞌ. Poro ko na lajluchax yi at tajtzaꞌkl jun yaj, iꞌtz tan tuꞌ yi Ryos na akꞌon tetz. 4 Na je jun elsawutzileꞌj: Katxumeꞌ kawankil, iꞌtz junit, poro aparchklen munl yi jujun kawekl. 5 Niꞌcuꞌn tzun kutaneꞌn yi oꞌ cmon creyent tu yi jun elsawutzilaꞌtz. Alaꞌ kaxoneꞌn poro junit oꞌ tu Cristo, nin junit oꞌ skibil kib.
6 Poro aparchklen kamunl yi akꞌij sketz tan Ryos. Baꞌn tzun koꞌc il tan xconeꞌn yi ajtzaꞌklaꞌtz yi akꞌij sketz tan Ryos. Ko iꞌtz tan xtxꞌolcheꞌn xoꞌl yi yol Kataj, baꞌn koꞌc il teꞌj. 7 Poro ko iꞌtz tan kaxconeꞌn tetz chixconsbeꞌtz cmon, baꞌn koꞌc tetz chixconsbeꞌtz, poro na taj yi tetz cun kalmaꞌ. Ma yi ko oꞌ aj chusunl, baꞌn kakꞌ kib tan chichusleꞌn yi eꞌ cmon. 8 Ej nin yi ko oꞌ aj quiwsanl, tajweꞌn kaban taneꞌn yi jun kamunlaꞌtz. Ej nin yi ko at kapuꞌk, baꞌn kuchꞌeyan, poro na taj yi tetz cuꞌn kalmaꞌ yil kakꞌ. Ej nin yi ko oꞌ bajxom, tajweꞌn yi puntil cuꞌn kulej yi kamunl. Ej nin yi ko yaꞌtz kamunl tan quichꞌeyeꞌn yi eꞌ yi at tajweꞌn scyetz, na taj yi tzatzin cuꞌn cheꞌ kuchꞌeyaj.
Yi eꞌchk takleꞌn yi tajweꞌn tan kabnol, yi oꞌ creyent
9 Chilokꞌeꞌ quibuꞌ squibil quibuꞌ, poro bintzi cuꞌn, nkꞌeꞌtz chij tuꞌ. Quil chipekꞌuꞌ te eꞌchk ajtzaꞌkl cachiꞌ, ma na chitzatzinkuꞌ te eꞌchk balaj ajtzaꞌkl. 10 Chilokꞌeꞌ quibuꞌ squibil quibuꞌ, na quitzꞌun quitzicy quibuꞌ tkꞌab Cristo. Cyakꞌeꞌuꞌ chikꞌej yi eꞌ cyajwutzuꞌ. 11 Quil chikꞌeꞌxijuꞌ tan chixconeꞌnuꞌ tetz Ryos. Quil chicyꞌajixuꞌ. Ma na cꞌasok cyajtzaꞌkluꞌ tan chixconeꞌnuꞌ tetz Ryos.
12 Chitzatzinkuꞌ te yi xtxolbil yi at chichꞌiwuꞌ teꞌj. Ko na chitijuꞌ eꞌchk qꞌuixcꞌuj, pasens na taj. Nin quil chitzakplenuꞌ tkanil nachleꞌn Kataj.
13 Tajweꞌn chichꞌeyanuꞌ scyeꞌj yi eꞌ creyent yi at tajweꞌn scyetz. Cyakꞌeꞌuꞌ chiposar yi eꞌ yi na chopon tan chixajseꞌnuꞌ.
14 Ej nin ko at eꞌ yi na chitzan tan jakleꞌn chicawsuꞌ, chijakeꞌuꞌ chibanl tetz Kataj Ryos, na qui na yub yi ko niꞌcuꞌn tzꞌelcuꞌnt cyaꞌnuꞌ scyuchꞌ.
15 Yi ko at eꞌ yi na chitzatzin, chitzatzinkuꞌ scyuchꞌ, poro yi ko at eꞌ yi na chibisun baꞌn chichajuꞌ scyetz yi nchaꞌtz eꞌuꞌ na chibisunuꞌ scyeꞌj.
16 Chijoyeꞌuꞌ puntil tan jaleꞌn yi tzatzin paz ẍchixoꞌluꞌ. Quil cyocsaj quibuꞌ nim tu cyajtzaꞌkluꞌ, ma na cyocseꞌ quibuꞌ juy. Quil chitxumuꞌ yi chin tzꞌaknak cuꞌn eꞌuꞌ tu cyajtzaꞌkluꞌ.
17 Ko at jun yil snucꞌ quen jun eꞌchk takleꞌn cachiꞌ scyeꞌjuꞌ, qui na yub yi ko niꞌcuꞌn tzꞌel cuꞌnt cyaꞌnuꞌ tuchꞌ. Ma na chijoyeꞌuꞌ puntil tan chibnoluꞌ eꞌchk takleꞌn balaj tetz, yi eꞌchk takleꞌn balaj yi na chitzatzin wunak teꞌj. 18 Chibneꞌuꞌ puers tan jaleꞌn tzatzin scyuchꞌ cyakil wunak. 19 Ko at jun chicontruꞌ, quil cyaluꞌ: “Wicyꞌseꞌ incꞌuꞌl teꞌj,” na at cuꞌn Ryos teꞌj. Na alijt cyen tan Kataj: “Atin cuꞌn tan chicawseꞌn yi eꞌ mal wunak. Na in cuꞌn nakꞌon chicaws.”a 20 Chaꞌstzun te ko at jun chicontruꞌ yi na quim tan weꞌj, cyakꞌeꞌuꞌ waꞌ, nin ko na quim tan saktziꞌ, cyakꞌeꞌuꞌ tcꞌaꞌ. Na yi ko yaꞌtz cyulejuꞌ, txꞌixwok tzun yi chicontruꞌ.b 21 Quil cyakꞌuꞌ amaꞌl tetz eꞌchk ajtzaꞌkl cachiꞌ tan chisubleꞌnuꞌ, ma na chijoyeꞌuꞌ puntil tan banleꞌn yi balaj, bantz chitxꞌaconeꞌnuꞌ te yi yab ajtzaꞌkl.