At eꞌ aj Israel yi ẍchiclaxok
11
1 Ma jaluꞌ katxumeꞌ, ¿ja pe tzun cyaj cyen tilol Ryos yi eꞌ tetz tanum yi eꞌ aj Israel? Quiꞌc rmeril na at eꞌ yi ateꞌ tetz tajal. Lmal yi eꞌ yi ateꞌ tetz tajal Ryos, na yi in wetz, in mero aj Israel. In xonl Abraham, na in xonl yi mam Abraham yi na biꞌaj Benjamín, nin atin wetz tetz tajal Ryos. 2 Quinin cyaj cyen tilol Ryos yi tetz tanum, na txumij cheꞌ taꞌn tentz, yi ntaxk tzaj cuꞌ xeꞌtzbil intanum. Txumijcheꞌ tan Ryos tan chixconeꞌn tetz.a Chaꞌstzun te quiꞌc rmeril tan cyeleꞌn te cꞌuꞌl iꞌ jaluꞌ. Chinachonkuꞌ te yi mbi talnak yi elsanl stziꞌ Ryos tentz yi na biꞌaj Elías. Je yol iꞌeꞌj yi xcon taꞌn yi toqueꞌn tan chixochleꞌn yi eꞌ tetz tanum, yi eꞌ aj Israel, swutz Ryos: 3 “Wajcaw, ja cheꞌl cuꞌn swutz yi eꞌ elsanl stziꞌuꞌ cyaꞌn, nin nchaꞌtz ja cuꞌ chixitul yi eꞌchk patbil katxꞌixwatz. Jalt nin in, atin cyen. Nin yi cyetz cyajbil iꞌtz tan imbiyleꞌn cuꞌn Taꞌ,”b stzun Elías tetz Ryos.4 Stzaꞌwel tzun Ryostz yi yol iꞌ, itzun taltz: “Txaꞌij cheꞌt juk mil yaj waꞌn yi nternin ateꞌ tetz wajal. Nin cyaꞌl jun yi jak mejeꞌ swutz yi teblal Baal, yi chiryosil yi eꞌ mas,” stzun Ryos bantz.c 5 Iteꞌn nin kutaneꞌnaꞌs jaluꞌ, ilenin at eꞌ weri intanum yi txaꞌij cheꞌt tan tuꞌ banl talmaꞌ Ryos. 6 Poro txaꞌij cheꞌt tan tuꞌ banl talmaꞌ Ryos, nkꞌeꞌtz txaꞌij cheꞌt tan paj yi eꞌchk takleꞌn yi na chiban. Na yi yaꞌtzk nkꞌeꞌtz tzun kloꞌ oy, ma na txꞌaquij tzun kloꞌ na cyulej yi quitzꞌajbiltz.
7 ¿Mbi na ẍchaj yi xtxolbilaꞌseꞌj sketz? Na ẍchaj sketz yi quinin jal chibalajil yi eꞌ intanum aj Israel. Ocnakeꞌ il tan joyleꞌn poro quinin jal cyaꞌn. Ntin yi eꞌ yi txaꞌij cheꞌt tan Ryos, ja jal chibalajil, ma yi eꞌ mas jopxeꞌn ban wutz cyajtzaꞌkl, 8 chi tzꞌibaꞌnt cyen tul tuꞌj Kataj:
“Ryos npoysan cuꞌn cyajtzaꞌkl,
na jopxnak wutz cyajtzaꞌkl taꞌn.
Nchaꞌtz Ryos jopon chiẍchin,
bantz qui pujxeꞌn yi xtxolbil cyaꞌn.
Iẍnin quitaneꞌntz sajleꞌn tunintz.”d
9 Nchaꞌtz, at junt xtxolbil yi tzꞌibaꞌnt cyen tan kꞌajtzun Rey Luwiy:
“Lok xcon yi eꞌchk tzatzin yi na chitxum tan chisubleꞌn.
Lok xcon tan Ryos tan chibenseꞌn tul il, bantz tkꞌol iꞌ chicaws.
10 Lok cuꞌ jopx wutz cyajtzaꞌkl.
Lok cuꞌ cyeꞌj tzakꞌ yi ilcꞌol yi cyꞌaꞌn cyaꞌn.
Yaꞌtzk chiban sbneꞌ opon tunintz.”e
Poro at eꞌ yi nkꞌeꞌtz eꞌ judiy yi ẍchiclaxok
11 I bin jaluꞌ, ¿mbi na chitxum cyeruꞌ tetz yi xtxolbileꞌj yi tzinjakeꞌ scyeruꞌ? ¿Tan paj yi xubsnakeꞌ eꞌ intanum judiy, junawes peꞌ elnakeꞌt tetz tajal Ryos le chiwutz cyeruꞌ? Nkꞌeraꞌtz puntil, na tzꞌul jun kꞌej yil choctpon tetz tajal Ryos. Poro tan tuꞌ yi chipajol yi caꞌwl Ryos, ja akꞌlij amaꞌl scyetz yi eꞌ yi nkꞌeꞌtz eꞌ judiy tan chiclaxeꞌn. Poro yaꞌstzun tulej Ryos bantz cyoqueꞌn il yi eꞌ intanum judiy tan joyleꞌn puntil tan chiclaxeꞌn cyetz.
12 I bin jaluꞌ, yi quil yi nchijuch, ja akꞌon baꞌn scyetz cyakil wunak beneꞌn tziꞌn wi munt. Na tan tuꞌ yi nchijuch quil, ja el majol Ryos yi banl scyetz, nin ja takꞌ scyetz yi eꞌuꞌ yi nkꞌeꞌtz eꞌuꞌ judiy. Poro tzantzaj, yil choꞌct cyakil yi eꞌ intanum judiy tetz tajal Ryos, sjalok mas kabanl kacyakil cuꞌn.
13 Ma jaluꞌ, yi eꞌuꞌ yi nkꞌeꞌtz eꞌuꞌ judiy, na waj lwal jun xtxolbil scyeruꞌ. Elnak chitxumuꞌ tetz yi chakij chin tan Ryos tan xtxꞌolcheꞌn xoꞌl yi balaj stziblal scyeruꞌ, nin na wakꞌ kꞌej yi inmunlaꞌtz yi atin sjuꞌ. 14 Na ko wiꞌnin eꞌuꞌ yil cyocsajuꞌ, squileꞌ yi eꞌ intanum, nin qui cunin batz lcyocsaj cyetz, nin ẍchiclaxok.
15 Ej nin sjalok jun chin tzatzin yil choꞌc junt tir tkꞌab Ryos. Na yi teleꞌn chikꞌej tan Ryos, ja jal tzatzin cyakꞌunuꞌ, yi eꞌuꞌ yi nkꞌeꞌtz eꞌuꞌ judiy. Poro yil chibansaj quib sjalok mas tzatzin. Nin niꞌcuꞌn sbneꞌ yi jun chin tzatzinaꞌtz, chi nink tzꞌitzꞌij jun almaꞌ. 16 Je jun xtxolbileꞌj, tan lajluchaxeꞌn yi quil cheꞌl junawes te tajal Ryos. Na ko jeꞌnak xtxaꞌol Ryos yi kamam Abraham scyuchꞌ yi eꞌ elsanl stziꞌ Ryos, nchaꞌtz yi eꞌ chixonl, ateꞌ cwent Ryos. Na ko xansaꞌnt yi xeꞌ jun tzeꞌ yi na cuꞌ awij, xansaꞌnt tzun cyakil yi eꞌchk kꞌab yi na jal teꞌj. 17 Ej nin je junt elsawutzileꞌj yi na ẍchaj yi choꞌn na saj chibanluꞌ scyeꞌj yi eꞌ intanum. Niꞌcuꞌn eꞌ chi taneꞌn jun wiꞌ olivo yi balaj. Ma yi eꞌ cyeruꞌ yi nkꞌeꞌtz eꞌuꞌ judiy, niꞌcuꞌn eꞌuꞌ chi taneꞌn jun wiꞌ olivo yi ploj. Ej nin ja choꞌcuꞌ lacꞌbaꞌn tetz xel cobox kꞌab balaj olivo yi elnakeꞌt tamij. Nin choꞌn na saj chiwaloruꞌ te yi mero xmilil yi balaj wiꞌ olivo. 18 Chaꞌstzun te yi ko ocnakeꞌ tuwuꞌ lacꞌbaꞌn, baꞌn tcuꞌn yi quil cyocsaj quibuꞌ mas balaj ẍchiwutz yi eꞌ intanum yi eꞌ judiy, na yi oꞌ ketz oꞌ yi mero xeꞌ, ma yi eꞌ cyeruꞌ, ocnakeꞌ tuwuꞌ lacꞌbaꞌn taneꞌn.
19 Poro at loꞌ jujun eꞌ ẍchixoꞌluꞌ yi na aꞌlon tetz: “Elnakeꞌt tamij yi eꞌ judiy tan Ryos, bantz koqueꞌn lacꞌbaꞌn ketz.” 20 Bintzi, elnakeꞌ tamij tan Ryos poro tan tuꞌ yi quinin kꞌukeꞌ chicꞌuꞌl te iꞌ. Or bin quiluꞌ, quil cyocsaj quibuꞌ nim tu cyajtzaꞌkluꞌ, na ocnakeꞌ tuwuꞌ lacꞌbaꞌn tan tuꞌ yi kꞌukeweꞌn chicꞌuꞌluꞌ te Ryos. 21 Na ko quinin cuy Ryos chipaj yi eꞌ yi elnakeꞌ tamij, pyor tzun eꞌuꞌ yi ocnakeꞌtuwuꞌ lacꞌbaꞌn. 22 Tan yi xtxolbilaꞌseꞌj, na kil yi nkꞌeꞌtz alcaweꞌt Ryos. Ej nin nchaꞌtz na kil yi banl talmaꞌ iꞌ, na ja choꞌcuꞌ lacꞌbaꞌn tetz chixel yi eꞌ yi eꞌ el tamij. Poro cheleponuꞌ kꞌokij kol quil chixomuꞌ te tajbil, nin ko quil kꞌukeꞌ chicꞌuꞌluꞌ te iꞌ. 23 Ma yi eꞌ wetz intanum, kol kꞌukeꞌ chicꞌuꞌl junt tir te Ryos, pontzaj nin choꞌc lacꞌbaꞌn junt tir. Nin chin sensiy nin xcyeꞌ Ryos tan chilacꞌbajeꞌn quen junt tir. 24 Na yi eꞌ cyeruꞌ, choꞌn elnakeꞌ tzajuꞌ te jun wiꞌ olivo yi ploj. Poro ja xcyeꞌ Ryos tan chilacꞌbajeꞌn quenuꞌ te jun wiꞌ olivo yi balaj. Nin ko ja xcyeꞌ Ryos teꞌj, ¿quiꞌct poloꞌ rmeril tan xcyeweꞌn iꞌ tan lacꞌbajeꞌn quen yi eꞌchk kꞌab yi elnakeꞌt tamij te yi balaj olivo? At rmeril. Nin yaꞌstzun sbajok scyeꞌj yi wetz intanum.
Tzantzaj scyocseꞌ wiꞌnin judiy
25 I bin jaluꞌ eꞌuꞌ wajwutz, at junt xtxolbil yi na waj tzꞌel chitxumuꞌ tetz, na qui na waj yil cyocsaj quibuꞌ nim tu cyajtzaꞌkluꞌ. At jun xtxolbil yi ewaꞌn cuntuꞌ sajleꞌnix, poro yi jaluꞌ ja wiꞌt skojan skawutz. Iꞌtz yi at wiꞌnin eꞌ intanum yi eꞌ judiy yi ja wiꞌt tzeꞌtzax cyajtzaꞌkl, poro tzantzaj wiꞌnin eꞌ scyocsajeꞌ yil tzꞌak cyajlal yi eꞌ yi nkꞌeꞌtz eꞌ judiy, yi eꞌ yi at cyocbil tkꞌab Ryos. 26 Na yil tzꞌak cyajlal yi eꞌaꞌs, kalenaꞌs tzun lcyocsaj cyakil eꞌ intanum. Na je xtxolbileꞌj yi tzꞌibaꞌnt cyen tul tuꞌj Kataj:
“Choꞌn lsaj yi aj colpinl ẍchixoꞌl yi eꞌ aj Sión, yi eꞌ xonl Jacow.
Nin tzꞌocopon iꞌ tan xiteꞌn yi ilcꞌol yi cyꞌaꞌn cyakꞌun.f
27 Nin yaꞌstzun sbajok scyeꞌj na tzꞌelepon inkꞌab te inyol,
na jun cuꞌn tzincuyeꞌ cyakil chipaj chitxꞌokꞌbeꞌn.”g
28 Poro te yi tiemp jaluꞌ, at wiꞌnin eꞌ intanum yi eꞌ contr te yi balaj stziblal yi baꞌn na kaclax taꞌn. Poro tan tuꞌ yi yaꞌtz quitaneꞌn, ja takꞌ Ryos amaꞌl scyeruꞌ tan chiclaxeꞌnuꞌ. Poro quil cheꞌl junawes yi eꞌ intanum te cꞌuꞌl Ryos, na eꞌ cuꞌn xonl kꞌajtzun Abraham. Nin txaꞌij cheꞌt tan Ryos tan tkꞌol iꞌ yi banl squibaj. 29 Nin quil xtxꞌixpuj yi tajtzaꞌkl scyeꞌj. 30 Ma yi eꞌ cyeruꞌ, yi eꞌuꞌ awer nak, eꞌuꞌ pajol caꞌwl sajleꞌn, poro tan tuꞌ yi quinin cyocsaj yi eꞌ wetz intanum ja el kꞌajab Ryos scyeꞌjuꞌ, nin ja jal chibanluꞌ taꞌn. 31 Niꞌcuꞌn ẍchibneꞌ cyetz chi quitaneꞌn cyeruꞌ. Qui na cyocsaj jaluꞌ poro tzantzaj tzꞌelepon kꞌajab Ryos scyeꞌj, chi meꞌl kꞌajab scyeꞌj cyeruꞌ. 32 Na swutz Ryos oꞌ len cuꞌn pajol caꞌwl, yi oꞌ ketz yi oꞌ judiy nin yi eꞌ cyeruꞌ yi nkꞌeꞌtz eꞌuꞌ judiy, poro nicyꞌ nin tuꞌ na el kꞌajab iꞌ skeꞌj. 33 Chumbalaj nin Kataj Ryos, na qui bajsbeꞌn tetz yi banl talmaꞌ iꞌ. Nin quiꞌc jun takleꞌn yi quiꞌk na pujx taꞌn, na chin tzꞌaknak cuꞌn tajtzaꞌkl iꞌ. Nin cyaꞌl jun yi nink xcyeꞌ tan tilweꞌn yi mbi na icyꞌ tcꞌuꞌl. Cyaꞌl jun yi nink pujx yi tajtzaꞌkl Ryos taꞌn. 34 Na tzꞌibaꞌn cyen: “Cyaꞌl jun na el xtxum tetz yi mbi na icyꞌ tcꞌuꞌl Kataj Ryos. Cyaꞌl jun yi nink xcyeꞌ tan stzꞌakseꞌn cyen yi tetz tajtzaꞌkl.h 35 Cyaꞌl jun yi nink takꞌ jun takleꞌn tetz Ryos tan tkꞌol Ryos xel.” 36 Na iꞌ bnol tetz cyakil eꞌchk takleꞌn yi at. Quiꞌc jun takleꞌn yi nkꞌeꞌtz iꞌ bnol tetz, nin ja bnix taꞌn tan xconeꞌn tetz tetz. Kakꞌeꞌ bin kakꞌajsbil tetz Ryos tetz ben kꞌej ben sak. Amén.