Romanos 10

1 Eꞌuꞌ jun cꞌoloj wajwutz, yi wajbil yi na icyꞌ tincꞌuꞌl, iꞌtz tan chiclaxeꞌn kloꞌ yi eꞌ intanum aj Israel. Yaꞌstzun na chintzan tan cꞌucheꞌn tetz Kataj. 2 Na el intxum tetz yi bintzinin na el cyalmaꞌ tan jaleꞌn chibalajil swutz Ryos, poro nkꞌeraꞌtz puntil na cyulej. 3 Na qui na pujx yi puntil cyaꞌn yi txumijt cyen tan Ryos tan jaleꞌn chibalajil. Qui na pujx cyaꞌn, na eꞌ tuꞌ eꞌ joyon eꞌchk xtxolbil tan jaleꞌn kloꞌ yi cyetz chibalajil. Quinin chixom te yi xtxolbil yi txumijt cyen tan Ryos. 4 Yi quimeꞌn Cristo swutz pasyon, yaꞌstzun yi jeꞌn poneꞌn tamp yi munl yi ley yi akꞌij cyen tetz Moisés, na ntin sjalok chibalajil yi eꞌ yil kꞌukeꞌ chicꞌuꞌl te Cristo.

5 Tzꞌibaꞌnt cyen tan Moisés yi sjalok balajil jun yaj swutz Ryos yi nink xcyeꞌ tan banleꞌn taneꞌn yi ley. Na je yol iꞌeꞌj: “Alchok scyetz yil jepon tan banleꞌn taneꞌn cyakil yi eꞌchk caꞌwl, sjalok tzun yi stzꞌajbiltz.” 6 Yaꞌstzun xtxolbil yi tzꞌibaꞌnt cyen tan Moisés, poro yi jaluꞌ apart puntil, na ntin na taj yil kꞌukeꞌ kacꞌuꞌl te Ryos. Qui na taj wiꞌnin txꞌujteꞌn. Eꞌ oquiꞌchuꞌ tan xtxumleꞌn yi ateꞌ ponchankuꞌ tcyaꞌj tan jaleꞌn chibalajiluꞌ, na ulnak aj Cristo tan takꞌleꞌn kabalajil. 7 Ej nin, nchaꞌtz, eꞌ oquiꞌchuꞌ tan xtxumleꞌn yi atoꞌ ponk ẍchixoꞌl almaꞌ tan jeꞌseꞌn tzaj Cristo, na jeꞌnak tzaj iꞌ. 8 Poro chin sensiy nin yi puntil tan jaleꞌn kabalajil swutz Ryos. Qui na taj yil kaben joylaj tan joyleꞌn. Nakaꞌj at, na sjalok kaꞌn ntaꞌsteꞌn le katziꞌ, ntaꞌsteꞌn te kalmaꞌ. Iꞌtz yil kocsaj yi yol iꞌ yi na tzan xtxoleꞌn. 9 Na kol kal len scyetz wunak: “Jesús, yaꞌstzun yi wetz Wajcaw,” nin kol kocsaj cunin yi Ryos jeꞌsan tzaj ẍchixoꞌl almaꞌ, skaclaxok tzuntz. 10 Poro tajweꞌn yi tetz cuꞌn kalmaꞌ yil kocsaj yi yol iꞌ, bantz jaleꞌn kabalajil swutz Ryos. Ej nin ko na kaj kaclax, tajweꞌn yil kal yi Jesucristo iꞌ Kajcaw.

11 Na tzꞌibaꞌnt cyen le tuꞌj Kataj: “Alchok scyetz yi na tocsaj, nkꞌeꞌtz xubseꞌn na ban.” 12 Na, baꞌn cyocsaj alchok jilwutz wunak. Quiꞌc na ban yi ko oꞌ judiy, nka quiꞌ. Na jun ntziꞌ Ryos at skibaj kacyakil cuꞌn, nin tzatzin cuꞌn na takꞌ iꞌ yi tajweꞌn sketz, yi oꞌ yi na cuꞌ katziꞌ tan jakleꞌn ẍchꞌeybil ketz tetz. 13 Na je junt xtxolbil yi tzꞌibaꞌnt cyen: “Ẍchiclaxok cyakil yi eꞌ yil choꞌc tan naꞌwseꞌn biꞌ iꞌ.” 14 Poro, ko qui kꞌuklij chicꞌuꞌl te Cristo ¿ẍeꞌn lcuꞌ chitziꞌ tan jakleꞌn cuybil chipaj? Ej nin ¿ẍeꞌn lkꞌukeꞌ chicꞌuꞌl teꞌj, yi ko txeꞌn nin quibit yi mbi ekaꞌn taꞌn? Quiꞌc rmeril. Ej nin ¿ẍeꞌn lquibit yi mbi ekaꞌn tan Cristo yi ko cyaꞌl na txꞌolon xoꞌl yi puntil scyetz? 15 Ej nin ¿ẍeꞌn lben jun tan xtxꞌolcheꞌn xoꞌl scyetz yi ko cyaꞌl tzꞌoc il tan ẍchakleꞌn nin? Na na tal tul tuꞌj Kataj: “Chumbalaj nin yi eꞌ yi na chitxol yi balaj stziblal yi at rmeril tan jaleꞌn tzatzin paz kaꞌn tu Ryos.” Yaꞌstzun yi xtxolbil yi tzꞌibaꞌnt cyen le tuꞌj Kataj.

16 Poro nkꞌeꞌtz cyakil wunak na cyocsaj yi jun balaj stziblalaꞌtz. Ej nin elnak cyen xtxum Isaías tetz. Chaꞌstzun te cyajeꞌn cyen stzꞌibal yi junt xtxolbileꞌj: “Taꞌ, ja katxol yi balaj xtxolbil, poro cyaꞌl jun ntocsaj.” 17 Yi xtxolbilaꞌseꞌj na ẍchaj sketz yi ntin lcyocsaj yi eꞌ wunak kol cyakꞌ amaꞌl tan tbiteꞌn yi balaj stziblal tetz Cristo.

18 Ma jaluꞌ: ¿Txeꞌn nin poloꞌ quibit yi eꞌ intanum judiy yi tajbil Ryos? Quibitnak, na elnak cyen yi xtxolbilaꞌseꞌj le stziꞌ jun elsanl stziꞌ Ryos tentz. Je xtxolbileꞌj yi tzꞌibaꞌnt cyen taꞌn:

“Ja wiꞌt bitij yi xtxolbil beneꞌn tziꞌn wi munt.

Quiꞌc nin jun amaꞌl wi munt kale txeꞌnk bitij chiyol yi eꞌ aj txolinl.”

19 Poro tzinjakeꞌ junt tir scyeruꞌ: ¿Pujxnak peꞌ cyakꞌun yi eꞌ intanum aj Israel yi sjalok chibalajil yi eꞌ awer nak? Pujxnak cyaꞌn, na katxumeꞌ bajx yi yol Ryos yi tzꞌibaꞌn cyen tan Moisés tentz:

“Chixcyꞌaklink yi eꞌ yi na chimpekꞌ scyeꞌj jaluꞌ, yil quil yi na chimpekꞌ scyeꞌj junt txꞌakaj wunak yi quiꞌc chixac ẍchiwutz. Nchaꞌtz, sjalok chiꞌch cꞌuꞌlal scyetz yil quil yil wakꞌ imbanl squibaj junt txꞌakaj wunak yi eꞌ yab quitaneꞌn ẍchiwutz cyetz.”

20 Nchaꞌtz quinin xob Isaías tan talcheꞌn yi xtxolbileꞌj:

“Ja chin jal cyakꞌun yi eꞌ

yi qui ocnakeꞌ il tan injoyleꞌn.

Nin ja inchaj wib scyetz yi eꞌ

yi quinin nchoꞌc il tan jakleꞌn wukanil,” stzun Ryos banak cyen.

21 Ej nin at junt xtxolbil yi alijt cyen tan Ryos scyetz yi eꞌ aj Israel: “In sajleꞌn cuntunintz tan chimoxeꞌn tzaj yi eꞌ wunakeꞌj, yi chin pajol caꞌwl nin eꞌ, yi quinin pakbeꞌn tetz chitxumuꞌn.’ Yaꞌstzun yol Ryos yi alijt cyen taꞌn scyetz yi eꞌ intanum, aj Israel,” chij Isaías banak cyen.