Txaꞌij cheꞌ yi eꞌ aj Israel tan Ryos
9
1 I bin jaluꞌ swaleꞌ coboxt xtxolbil scyeruꞌ. Nin iꞌtz yi mero bintzi, na yi Espíritu Sant mmaꞌlon swetz. Nkꞌeꞌtz wi wakꞌ tuꞌ, na in tetz Cristo. 2-3 At jun chin bis tetz walmaꞌ tan paj yi qui na cyocsaj yi Jesús iꞌ yi Cristo. Nternin na okꞌ incꞌuꞌl scyeꞌj, nin yi wajbil iꞌtz tan chiclaxeꞌn. List in tan imbeneꞌn joꞌliꞌn tqꞌuixcꞌuj, nin list in tan injatxol wib tu Cristo yi ntinaꞌtzk na taj tan chiclaxeꞌn. Na katanum cuꞌn kib, kaxonl kib, nin junit kamam kateꞌ scyuchꞌ. 4 Eꞌ len cuꞌn xonl kꞌajtzun kamam Israel. Nin Ryos eꞌ ocsan tetz meꞌl cyꞌajl iꞌ. Xomnak yi pakꞌpuchal Ryos scyeꞌj sajleꞌn. Ej nin yi eꞌchk takleꞌn yi sukiꞌnt tan Ryos tetz ketz, choꞌn taꞌlcheꞌn scyetz. Ej nin nchaꞌtz yi lajuj caꞌwl, choꞌn takꞌleꞌn scyetz. Nchaꞌtz yi eꞌchk xtxolbil yi ẍeꞌn kaban tan cꞌuꞌlajeꞌn Ryos, choꞌn nin taꞌlcheꞌn scyetz, nchaꞌtz yi xtxolbil yi at tulbil jun aj colpinl, choꞌn taꞌlcheꞌn scyetz. 5 Eꞌ len cuꞌn xonl kꞌajtzun Abraham, Isaac tu Jacow. Ej nin choꞌn titzꞌeꞌn Cristo ẍchixoꞌl, yi wiꞌtz Ajcaw tibaj cyakil yi at. Kakꞌeꞌ bin kakꞌajsbil tetz, na yi tetz kꞌej quil sotz tetz ben kꞌej ben sak. Amén.6 Poro tan yi qui na cyocsaj yi eꞌ wetz intanum, quil choꞌcuꞌ tan xtxumleꞌn yi quiꞌk tzꞌel kꞌab Ryos te yi eꞌchk xtxolbil yi alijt cyen takꞌun scyetz. Nkꞌeraꞌtz puntil. Tzꞌelepon kꞌab teꞌj. Na nkꞌeꞌtz eꞌ cuꞌn mero meꞌl cyꞌajl Ryos cyakil eꞌ xonl Israel. 7 Na swutz Ryos ntin Isaac yi mero cyꞌajl Abraham. At mas cyꞌajl Abraham, poro quibeꞌ tajlal yi eꞌ xonl Abraham. Na alijt cyen tan Ryos: “Ntin chocopon yi eꞌ xonl Isaac tetz tajlal axonl.” 8 Yi xtxolbilaꞌs, na elepont yi nkꞌeꞌtz yi tan tuꞌk yi eꞌ nitxajil Abraham, eꞌ tzunk nitxajil Ryos. Quiꞌ. Ma na ntin yi eꞌ yi suknak Ryos tetz Abraham. Yaꞌstzun yi eꞌ mero nitxajil Ryos. 9 Na je yol Ryoseꞌj yi sukil jun chinitxaꞌ Abraham: “Chwaꞌnin le junt yob nuꞌlt, nin yil nuꞌl nsken jal tal Sara.” Yaꞌstzun talnak Ryos.
10 Ej nin je junt xtxolbileꞌj yi aꞌlchij tetz Rebeca yi ekaneꞌt pwokil yi cob cyꞌajl kꞌajtzun Isaac taꞌn. 11-13 Yi ntaxk nin chitzꞌij, ej nin yi ntaxk nin lajluchax yi ko eꞌ balaj wunak nka quiꞌ, jiloneꞌn chan tzun Ryos tetz Rebeca, itzun taltz: “Yi bajxnak tzꞌocopon tetz ẍchakum yi caꞌpnak,” chij Ryos banak tetz Rebeca. Ej nin je junt xtxolbil yi alijt cyen tan Ryos yi niꞌcuꞌn na tokꞌbej tib: “Ja chimpekꞌ te Jacow, ma Esaú quinin chimpekꞌ teꞌj.” Ej nin yaꞌstzun bajij. Ma jaluꞌ yi eꞌchk xtxolbilaꞌtz na ẍchaj sketz yi ntin na ban Ryos yi tetz tajbil. Ntin na xtxaꞌeꞌn yi eꞌ yi na taj. Nin qui na xtxum yi ẍeꞌn quitaneꞌn.
14 I bin jaluꞌ, tan yi xtxolbileꞌj, ¿na peꞌ lajluchax yi qui na yub yi tajtzaꞌkl Ryos? Nkꞌeraꞌtz puntil. ¡Quiꞌc rmeril tan kalol yi quiꞌc xac yi tajtzaꞌkl Ryos! 15 Na talnak Ryos tetz Moisés: “Swakꞌeꞌ imbanl squib yi eꞌ kale na wajwit lwakꞌ, nin tzꞌelepon inkꞌajab scyeꞌj yi eꞌ kale na wajwit.” 16 Yi xtxolbilaꞌs na ẍchaj sketz yi qui na cambaj jun yaj yi banl talmaꞌ Ryos tan tuꞌ yi na el talmaꞌ teꞌj, nka tan tuꞌ yi na buch tib teꞌj, ma na choꞌn na xom te yi naꞌ na eleꞌt kꞌajab Ryos. 17 Nin je yol Ryoseꞌj yi alijt cyen taꞌn tetz Faraón, yi chibajxom yi eꞌ aj Egipto: “Ja cẍjeꞌ intxaꞌol tan awoqueꞌn tetz chibajxom yi eꞌ atanum, poro ntin tan achajol yi inchamil tu inkꞌej ẍchiwutz cyakil yi eꞌ wunak beneꞌn tziꞌn wi munt,” stzun Ryos banak. 18 Ma jaluꞌ, yi xtxolbilaꞌtz na elepont yi choꞌn cunin at swutz Ryos yi naꞌ scyetz eꞌ kale na tajwit iꞌ tzꞌeleꞌt kꞌajab. Ej nin nchaꞌtz, choꞌn at swutz iꞌ yi naꞌ scyetz eꞌ yi tzeꞌtzaxeꞌn na ban yi cyalmaꞌ taꞌn.
19 I bin jaluꞌ, at loꞌ eꞌ yil cyal: “Ko yaꞌtz taneꞌn, quiꞌc ketz tuchꞌ. ¿Nxac na jal kapaj swutz iꞌ?” 20 Poro quiꞌc rmeril yi nink koꞌc ketz tan maꞌleꞌn tajtzaꞌkl Ryos. Na ¿at peꞌ kꞌej jun tal ẍwokꞌ yi quiꞌc mas yubil, tan toqueꞌn tan yajleꞌn yi bnol tetz? Ej nin baꞌn peꞌ yi nink tal jun ẍwokꞌ tetz yi bnol tetz: “¿Nxac nchincuꞌ bnoluꞌ chi wutaneꞌneꞌj?” 21 Quiꞌc rmeril yi yaꞌtzk tal, na choꞌn at swutz yi bnol ẍwokꞌ yi mbiꞌtz na taj sban te yi xkꞌol. Na ko na taj sban jun ẍwokꞌ yi chin yubeꞌn nin, choꞌn at swutz iꞌ. Ej nin ko na taj sban jun ẍwokꞌ yi sensiy te yi iteꞌn xkꞌol, baꞌn nin sban iꞌ-tz, na iꞌ na cawun teꞌj.
22 Ten kloꞌ takꞌ Ryos chicaws wunak, poro quiꞌ. Ja kloꞌ takꞌ chicaws yi eꞌ yi nternin chiꞌch chicꞌuꞌl teꞌj, poro mucꞌnak iꞌ chipaj. 23 Mucꞌnak iꞌ chipaj bantz lajluchaxeꞌn yi tetz ẍchamil tu yi tetz kꞌej skawutz ketz jaluꞌ, na wiꞌnin na el kꞌajab skeꞌj. Na yi tajbil iꞌ iꞌtz tan tkꞌol yi tetz kꞌej sketz, yi oꞌ yi txumijchoꞌ taꞌn tiemp tzaj. 24 Na wutzileꞌn cuꞌn Kataj Ryos oꞌ moxon tzaj tan koqueꞌn tkꞌab iꞌ. Yaꞌstzun oꞌ tulej yi oꞌ yi oꞌ judiy, nin nchaꞌtz scyeꞌjuꞌ yi eꞌuꞌ yi nkꞌeꞌtz eꞌuꞌ judiy. 25 Bintzi yi xtxolbilaꞌtz, na tzꞌibaꞌnt cyen jun xtxolbil tan Oseas yi Ryos aꞌlon tetz:
“Yi eꞌ yi quibeꞌ tetz wajal, chocopon tetz wajal.
Ej nin yi eꞌ yi qui na chimpekꞌ scyeꞌj,
yaꞌstzun yi eꞌ yi chimpekꞌok scyeꞌj.
26 Ej nin tcꞌuꞌlak eꞌchk amaꞌl kale walwit:
‘Quibixwok tetz wajal,’ swaleꞌ scyetz:
‘Axwok inmeꞌl incyꞌajl,’
na yi in wetz in yi Ryos yi itzꞌ nin tetz.”a
27 Nchaꞌtz, at junt xtxolbil yi talnak Isaías scyetz eꞌ tanum: “Spucꞌunk kawutz yi oꞌ xonl Israel. Choꞌn cuꞌn sbneꞌ tajlal kaxoneꞌn chi taneꞌn yi samlicyꞌ yi at tzi mar, yi quiꞌc ajlbeꞌn tetz. Poro quiꞌc mas oꞌ yi skaclaxok. 28 Na alijt cyen tan Ryos yi tzꞌakꞌlok chicaws cyakil eꞌ wunak beneꞌn tziꞌn wi munt, nin jun cuꞌn tzꞌelepon kꞌab teꞌj. Nin yil xeꞌtij tan banleꞌn, jalcuꞌn lbnix taꞌn.”b 29 Nin talt Isaías junt xtxolbil:
“Yi oꞌ judiy, ten kloꞌ wiꞌt kasotz chi banakeꞌ yi eꞌ aj Sodoma tu yi eꞌ aj Gomorra,
Yi quiꞌk elnak kꞌajab Ryos scyeꞌj kamam kateꞌ sajleꞌn tunintz, ja kloꞌ kasotz taꞌn.
Na chin cham nin iꞌ, na iꞌ yi wiꞌtz ajcaw squib jun cꞌoloj tetz sanlar.”c
Cyocsajeꞌ yi eꞌ judiy yi balaj stziblal
30 Ma jaluꞌ cyakil yi eꞌchk xtxolbilaꞌseꞌj, na ẍchaj sketz yi ja takꞌ Ryos amaꞌl scyeruꞌ yi eꞌuꞌ yi nkꞌeꞌtz eꞌuꞌ judiy tan jaleꞌn chibalajiluꞌ swutz iꞌ. Wech qui nchoꞌcuꞌ tan joyleꞌn sajleꞌn tunintz. Ej nin ja jal chibalajiluꞌ swutz iꞌ tan tuꞌ yi kꞌukeweꞌn chicꞌuꞌluꞌ teꞌj.
31 Poro yi eꞌ intanum yi eꞌ aj Israel quinin jal chibalajil swutz Ryos. Ja chitxꞌujtij tan chibnol taneꞌn eꞌchk caꞌwl yi akꞌijt cyen scyetz, bantz jaleꞌn kloꞌ chibalajil swutz Ryos. Poro quinin eꞌ xcyeꞌ tan jalseꞌn yi chibalajilaꞌtz. 32 ¿Mbi tzuntz yi quinin jal chibalajil? Quinin jal chibalajil tan paj yi quinin kꞌukeꞌ chicꞌuꞌl te Ryos yi xcyek tan jalseꞌn chibalajil. Ma na ntin ja chibuch quib tan chibnol taneꞌn eꞌchk caꞌwl, bantz jaleꞌn kloꞌ chibalajil. Poro quiꞌc rmeril. Na quinin jal chibalajil, na at jun xtxolbil yi ja chixubsij teꞌj. Nin ja xcyeꞌ tan chitrimpeꞌn cuꞌn chi na je trimp jun yaj te jun cꞌub yi at tbeꞌ. 33 Yi jun xtxolbilaꞌtz tzꞌibaꞌnt cyen tul tuꞌj Kataj:
“Copon wukꞌol jun cꞌub ẍchiwutz yi eꞌ aj Israel,
yi xcyek tan chitrimpeꞌn cuꞌn;
poro cyakil yi eꞌ yil kꞌukeꞌ chicꞌuꞌl te yi junaꞌtz,
quil chitxꞌixwij cyeꞌtz,” stzun Ryos banak cyen.d