Yi eꞌ yi na chixom te tajbil yi Espíritu Sant
8
1 Chaꞌstzun te, yi oꞌ ketz yi kokꞌbeꞌn kib tu Cristo, yi oꞌ yi quiꞌt na kakꞌ amaꞌl tetz yi kajtzaꞌkl cachiꞌ, yi oꞌ yi atoꞌ jakꞌ caꞌwl yi Espíritu Sant, quiꞌct ketz kacaws txꞌaklij. 2 Na tan tuꞌ yi kokꞌbeꞌn kib tu Cristo ja wiꞌt keꞌl liwr jakꞌ caꞌwl yi ilcꞌol, nin ja wiꞌt keꞌl liwr tkꞌab quimichil tan porer yi Espíritu Sant. 3 Quinin xcyeꞌ yi eꞌchk caꞌwl yi akꞌijt tetz Moisés tan kelseꞌn liwr, na quiꞌc rmeril yi nink kajepon tan banleꞌn taneꞌn yi eꞌchk caꞌwlaꞌtz tan paj yi ketz kajtzaꞌkl cachiꞌ. Quinin xcyeꞌ eꞌchk caꞌwlaꞌtz tan kelseꞌn liwr poro Ryos nkeꞌlsan liwr, na nin saj ẍchakol yi tetz Cyꞌajl tan kaclaxeꞌn. Na ja tocsaj tib iꞌ chi kutaneꞌn ketz, yi oꞌ wunak, yi oꞌ juchul il, nin ja quim tetz katxꞌixwatz. Nin tan yi quimichil yi ban iꞌ, ja xcyeꞌ tan xiteꞌn yi ẍchamil yi ilcꞌol yi cawnak cyen skeꞌj. 4 Yaꞌstzun tulej Kataj Ryos, bantz kajeꞌn poneꞌn ketz tan banleꞌn taneꞌn eꞌchk caꞌwl yi tzꞌibaꞌnt cyen, yi oꞌ ketz yi quiꞌt na kaban yi ketz kajbil ma na i yi tajbil yi Espíritu Sant.5 Poro yi eꞌ yi na cyakꞌ amaꞌl tetz yi cyajtzaꞌkl cachiꞌ, i tajbil yi cyajtzaꞌkl cachiꞌ na chiban. Poro yi eꞌ yi na cyakꞌ amaꞌl tetz yi Espíritu Sant, i tajbil yi Espíritu Sant na chiban. 6 Na kol kaxom te yi ketz kajtzaꞌkl cachiꞌ, sjalok quimichil kaꞌn. Poro kol kaxom te yi tajbil yi Espíritu Sant, sjalok kutzꞌajbil tu tzatzin paz. 7 Na yi ajtzaꞌkl cachiꞌ yi cyꞌaꞌn kaꞌn, contr te Ryos. Na quiꞌc rmeril yi nink xcyeꞌ tan banleꞌn taneꞌn yi tajbil Ryos. 8 Qui tzun na tzatzin Ryos scyeꞌj yi eꞌ yi na cyakꞌ amaꞌl tetz yi cyajtzaꞌkl cachiꞌ.
9 Poro yi eꞌ cyeruꞌ ko bintzinin at yi Espíritu Sant te cyalmaꞌuꞌ qui bin lcyakꞌuꞌ amaꞌl tetz yi cyeruꞌ cyajbiluꞌ, ma na cyakꞌuꞌ amaꞌl tetz yi Espíritu Sant. Na ko quiꞌc Espíritu Sant tetz cyalmaꞌuꞌ, nkꞌeꞌtz eꞌuꞌ tetz Cristo. 10 Poro ko at Cristo tetz cyalmaꞌuꞌ, quiꞌt lquim yi cyalmaꞌuꞌ, na ja wiꞌt jal chibalajiluꞌ swutz Ryos. Poro yi chiwankiluꞌ ilenin squimok tan paj yi ilcꞌol yi at teꞌj. 11 Poro yi ko najlij yi mero Espíritu Sant tetz cyalmaꞌuꞌ, iꞌ ljeꞌsan tzaj chiwankiluꞌ ẍchixoꞌl almaꞌ chi banak iꞌ tan jeꞌseꞌn tzaj Cristo Jesús. Na tzꞌitzꞌok junt tir yi kawankileꞌj, yi txꞌaklij quimichil swutz. Yaꞌstzun sbajoktz tan tuꞌ yi najlij yi Espíritu Sant tetz kalmaꞌ.
12 Chaꞌstzun te eꞌuꞌ wajwutz, nkꞌeꞌtz tajweꞌn tan kaxomeꞌn te kajtzaꞌkl cachiꞌ. 13 Na yi kol kaxom teꞌj, skaquimok. Poro kol kacyajscyen yi jun ajtzaꞌklaꞌtz tan porer yi Espíritu Sant, skitzꞌok tzun junt tir.
14 Cyakil yi eꞌ yi na cyakꞌ quib jakꞌ caꞌwl yi Espíritu Sant, eꞌ tzun meꞌl cyꞌajl Ryos. 15 Chaꞌstzun te quil chixobuꞌ tetz Ryos, na quinin makꞌlij yi Espíritu Sant sketz ik tan kaxobeꞌn tetz, ma na iꞌtz tan koqueꞌn tetz mero nitxajil iꞌ. Chaꞌstzun te baꞌn lkal “Iluꞌ Intaj” tetz, na iꞌ Kataj. 16 Ej nin na el katxum tetz yi oꞌ meꞌl cyꞌajl Ryos, na iteꞌn yi Espíritu Ryos na aꞌlon tetz kalmaꞌ yi oꞌ mero meꞌl cyꞌajl iꞌ. 17 Ej nin tan tuꞌ yi oꞌ nitxajil iꞌ, tzꞌakꞌlok kaherens tan Ryos, na sukiꞌnt taꞌn sketz. Na cyakil oꞌ tu Cristo skacambok te yi jun kaherensaꞌtz. Poro tajweꞌn tan kamucꞌul qꞌuixcꞌuj chi banak Cristo ko na kaj kacambaj kakꞌej xlaj iꞌ.
18 Yi muꞌẍ tal qꞌuixcꞌuj yi na kamucꞌ jaluꞌ, qui tu kꞌusij. Tajweꞌn kamucꞌ, bantz kilol yi kꞌej Kataj yi ẍchajeꞌ sketz tzantzaj. 19 Na cyakil yi bnixnak tan Kataj, na chitzan tan ẍchꞌiweꞌn yi kꞌejlal yil lajluchax yi naꞌ scyetz yi eꞌ mero meꞌl cyꞌajl Ryos. 20 Na poꞌtnak cyakil eꞌchk takleꞌn yi bnixnak tan Ryos. Poro nkꞌeꞌtz cyetz chipaj yi chipoꞌteꞌn, na ja chipoꞌtij tan Ryos tan paj yi chijuchul yi bajx wunak quil. Poro ilenin at chichꞌiw tan chinucꞌxeꞌn junt tir. 21 Na yil tzꞌul yi jun kꞌejlalaꞌtz, xitok cyakil eꞌchk takleꞌn cachiꞌ yi na tzan tan chipoꞌtzeꞌn eꞌchk ujul tu cyakil eꞌchk takleꞌn yi bnixnak tan Ryos. Chelepon liwr tkꞌab eꞌchk takleꞌnaꞌtz yi na tzan tan chipoꞌtzeꞌn jaluꞌ. Niꞌcuꞌn skatzatzink scyuchꞌ, yi oꞌ ketz yi oꞌ nitxajil Ryos. 22 Elnak katxum tetz yi wiꞌnin na chibisun cyakil eꞌchk takleꞌn yi bnixnak tan Ryos. Na na chitzan tan tijleꞌn wiꞌnin qꞌuixcꞌuj chi na ban jun xnaꞌn yi na ul yos tuchꞌ. 23 Poro nkꞌeꞌtz ntin eꞌchk takleꞌnaꞌtz na chibisun jaluꞌ, ma na nchaꞌtz oꞌ, na na kabisun, nin na katxꞌayneꞌ, nin na katij eꞌchk qꞌuixcꞌuj. Poro ntyoẍ tuꞌ yi at yi Espíritu Sant tetz kalmaꞌ tetz jun techl yi kelepon liwr tzantzaj. Na at kachꞌiw yi at tulbil jun kꞌejlalaꞌtz yil keꞌl liwr tkꞌab quimichil nin yil koꞌc tetz mero meꞌl cyꞌajl Ryos. 24 Ej nin yaꞌstzun sbajok skeꞌj ko ilenin lkꞌukeꞌ kacꞌuꞌl teꞌj. Poro yi jak wiꞌt kacambaj, nkꞌeꞌtz tzun kloꞌ tajweꞌn tan kachꞌiwal mas. Ma na quiꞌ. 25 Poro ko bintzinin na kocsaj yi kitzꞌok junt tir, pasens na taj tan ẍchꞌiweꞌn.
26 Wiꞌnin bis oꞌkl atoꞌ cuꞌnt tkꞌab yi eꞌchk ilaꞌtz. Nin quiꞌt na jal puntil kaꞌn tan jakleꞌn yi ẍchꞌeybil ketz tetz Ryos. Poro yi Espíritu Sant na tzan tan kuchꞌeyeꞌn tan jakleꞌn. Nternin na okꞌ quen swutz Kataj Ryos tan jakleꞌn ẍchꞌeybil ketz. 27 Nin yi Kataj yi na til yi mbi na icyꞌ tkacꞌuꞌl, na el xtxum tetz yi mbiꞌtz na tokꞌlej yi Espíritu Sant. Na nternin na tzan yi Espíritu Sant tan nachleꞌn Kataj skibaj, yi oꞌ yi xansaꞌn choꞌt. Chaꞌstzun te stkꞌeꞌ tzun Kataj yi mbi na tzan yi Espíritu Sant tan jakleꞌn.
Skatxꞌaconk tan porer Ryos
28 Ej nin nchaꞌtz yi oꞌ yi na kalokꞌ Ryos, yi oꞌ yi txaꞌij choꞌ taꞌn tan kaxconeꞌn tetz, elnak katxum tetz yi quiꞌc jun eꞌchk takleꞌn yi na bajij skeꞌj yi quiꞌk na akꞌon baꞌn sketz. Na yi tajbil Ryos iꞌtz tan tkꞌol yi kabanl. 29 Ajskeꞌnt kawutz tan Ryos le xeꞌtzbil tzaj, nin txaꞌij choꞌt taꞌn tan koqueꞌn chi taneꞌn yi tetz Cyꞌajl. Nin yi tajbil Ryos iꞌtz tan toqueꞌn yi tetz Cyꞌajl tetz bajx nak skawutz bantz jaleꞌn jun cꞌoloj titzꞌun, iꞌtz yi oꞌ ketz yi txaꞌij choꞌt taꞌn. 30 Txumijt cyen tan Ryos tan koqueꞌn tetz nitxajil iꞌ. Ej nin nkꞌeꞌtz ntin txumijt cyen taꞌn, poro nchaꞌtz txaꞌij choꞌt taꞌn. Ej nin nkꞌeꞌtz ntin txaꞌij choꞌt taꞌn, ma na ja wiꞌt jal kabalajil taꞌn. Ej nin nkꞌeꞌtz ntin kabalajil yi njal, poro nchaꞌtz ja wiꞌt jal kakꞌej taꞌn.
31 I bin jaluꞌ yi ko bintzinin cyakil eꞌchk xtxolbilaꞌseꞌj, ¿mbi tzun kabislejtz? Na yi ko xomij wiꞌ Ryos skeꞌj, ¿naꞌ tzun scyetz jun xcyeꞌ-tz tan kaxiteꞌn? Cyaꞌl. 32 Yi ko quinin cabej cꞌuꞌl Ryos tan tkꞌol yi tetz Cyꞌajl tkꞌab quimichil tetz kaxel, ¿qui ptzun loꞌ ltakꞌ iꞌ cyakil yi tajweꞌn sketz? Stkꞌeꞌ, na ja takꞌ iꞌ yi tetz Cyꞌajl. 33 Cyaꞌl jun yi nink xcyeꞌ tan kaxochleꞌn quen swutz Ryos, yi oꞌ yi txaꞌijchoꞌt taꞌn, na Ryos nkoꞌcsan tetz balaj. 34 Cyaꞌl jun yi nink xcyeꞌ tan takꞌleꞌn kil, na quimnak Cristo tetz kaxel, nin itzꞌnak iꞌ ẍchixoꞌl almaꞌ, nin choꞌn cꞌolchij iꞌ jaluꞌ le sbal Kataj. Nin na tzan iꞌ tan cuꞌswutzil tetz Ryos tan jaleꞌn cuybil kapaj. 35 I bin jaluꞌ yi ko yaꞌtz bintzi, ¿naꞌ tzun scyetz jun yil xcyeꞌ tan kajatxleꞌn len tu yi lokꞌ ib yi na ẍchaj Cristo sketz? ¿Xcyek poloꞌ yi eꞌchk qꞌuixcꞌuj yi na kil, nka eꞌchk il yi na bajij skeꞌj? Quiꞌ. ¿Xcyek poloꞌ yi eꞌchk buchuꞌn yi na chiban wunak skeꞌj tan xiteꞌn yi jun lokꞌ ibaꞌtz? Quiꞌ. ¿Xcyek peꞌ weꞌj tan stzajseꞌn yi jun lokꞌ ibaꞌtz? Quiꞌ. Ko quiꞌc beꞌch ketz, ¿xcyek peꞌ jun xtxolbilaꞌtz tan xiteꞌn yi lokꞌ ib? Quiꞌ. Nchaꞌtz, quil xcyeꞌ eꞌchk xtxolbil yi chin xoꞌwbil nin tan xiteꞌn yi jun lokꞌ ibaꞌtz. Ej nin, pe nink tzꞌoc jun tan kabiyleꞌn cuꞌn tan spar, quil xcyeꞌ yi jun xtxolbilaꞌtz tan stzajseꞌn yi lokꞌ ib yi na ẍchaj Cristo sketz. 36 Na tzꞌibaꞌnt cyen yi yaꞌstzun sbajok skeꞌj. Je xtxolbileꞌj:
“Tan tuꞌ yi xomchoꞌ teꞌjuꞌ,
chꞌiwaꞌn cuntunin quimichil kaꞌn cyakil kꞌej.
Choꞌn kuꞌlij ẍchikꞌab wunak,
chi na chuꞌlij eꞌ tal cneruꞌ ẍchikꞌab carniceꞌr.”a Yaꞌstzun yi tzꞌibaꞌn cyen.
37 Poro quiꞌc na ban, mpe nink bajij cyakil yi eꞌchk takleꞌnaꞌseꞌj skeꞌj, na skatxꞌaconk tan porer yi jun yi wiꞌnin na pekꞌ skeꞌj. 38 Jun cuꞌn yol, quiꞌc jun eꞌchk takleꞌn yi nink xcyeꞌ tan kajatxleꞌn cuꞌn tu yi lokꞌ ib yi na ẍchaj Ryos sketz. Mpe nink kaquim, koꞌk quil kaquim, iẍnin na pekꞌ Ryos skeꞌj. Quil chixcyeꞌ yi eꞌ mal ángel tan kajatxleꞌn cuꞌn tu jun lokꞌ ibaꞌtz. Nin quil xcyeꞌ chichamil yi eꞌ wiꞌtz ẍchakum Baybaꞌn tan kajatxleꞌn cuꞌn tu jun lokꞌ ibaꞌtz. Quil xcyeꞌ jun takleꞌn yil bajij jaluꞌ tan kajatxleꞌn tu yi loꞌkl Ryos yi at skeꞌj tan iꞌ. Nin nchaꞌtz, kol bajij jun eꞌchk takleꞌn ek caꞌp, quil xcyeꞌ tan stzajseꞌn yi lokꞌ ibaꞌtz yi na tzan Ryos tan ẍchajleꞌn sketz. 39 Quil xcyeꞌ jun eꞌchk takleꞌn yi at xe cyaꞌj, nka yi at jalen tziꞌn tcyaꞌj, nka alchok eꞌchk takleꞌn yi bnixnak tan Ryos, tan kajatxleꞌn cuꞌn tu yi lokꞌ ib yi at skaxoꞌl tu Ryos, tan tuꞌ Kajcaw Jesucristo.