Yi okꞌbeꞌn ib na ẍchaj jun chusuꞌn sketz
7
1 I bin jaluꞌ kajwutz, elnak chitxumuꞌ tetz yi na quim jun yaj quiꞌct ltaj cyen yi ley tan caweꞌn, na yi ley ntin na cawun te jun yaj yi itzꞌ. 2 Katxumeꞌ junt xtxolbil: Yi na tokꞌbej tib jun xnaꞌn tu chmil, na oc iꞌ jakꞌ caꞌwl yi chmil. Ej nin tajweꞌn tan cyajeꞌn cyen jakꞌ caꞌwl yi chmil jalen cuꞌn lquim yi yaj. Poro yil quim yaj, ja tzun el yi jun xnaꞌnaꞌtz liwr, na quiꞌct yi ajcaw tan caweꞌn.3 Poro kol tokꞌbej tib jun xnaꞌn tu junt yaj yi ntaxk quim yi chmil, jopol wutzaj tzun iꞌ-tz. Poro ko nsken quim yi chmil, liwr tzun iꞌ-tz. Nin baꞌn ltokꞌbej tib tu junt yaj. Ej nin nkꞌeꞌtz tzun jopol wutzaj iꞌ-tz, na quiꞌct iꞌ jakꞌ caꞌwl yi chmilbeꞌn, na quimnakt.
4 Wajwutz, yi xtxolbilaꞌtzeꞌj iꞌtz jun elsawutzil tetz ketz. Na yi quimeꞌn Cristo, niꞌcuꞌn yi jak quim yi ley. Nin quiꞌct ltajquen tan kacaweꞌn jaluꞌ, na ja wiꞌt quim nin yi oꞌ ketz ja wiꞌt koꞌc jakꞌ caꞌwl junt kajcaw. Elnakoꞌt liwr jakꞌ eꞌchk caꞌwl yi ley Moisés. Quiꞌct cwent skuchꞌ jaluꞌ, na quimnakoꞌ taneꞌn swutz eꞌchk caꞌwlaꞌtz. Ej nin kokꞌbeꞌnt kib tu junt acꞌaj kajcawil, yi iꞌtz yi Cristo, yi jun yi itzꞌnak ẍchixoꞌl almaꞌ. Yaꞌstzun bantz tan kaxconeꞌn tetz Ryos, nin bantz kakꞌoneꞌn baꞌn tetz iꞌ.
5 Sajleꞌn, yi atoꞌ tzaj jakꞌ caꞌwl yi tajbil kawankil, ntin xcyeꞌ yi eꞌchk caꞌwl Moisésaꞌtz tan kapitleꞌn nin mas tul il. Ej nin tan paj kil jal quimichil kaꞌn. 6 Poro yi jaluꞌ, elnakoꞌt liwr tkꞌab yi eꞌchk caꞌwlaꞌtz yi nternin tzꞌamijchoꞌ taꞌn sajleꞌn, na quimnakoꞌ swutz. Poro yi jaluꞌ at jun acꞌaj xtxolbil yi na kaxom teꞌj. Iꞌtz yi tzatzin cuꞌn na kaban kamunl swutz Ryos tan porer yi Espíritu Sant. Nkꞌeꞌtz puers tuꞌ, chi banakoꞌ sajleꞌn yi atoꞌ jakꞌ caꞌwl yi antiw ley yi tzꞌibaꞌnt cyen.
Na xcyeꞌ yi ley tan lajluchaxeꞌn yi ilcꞌol yi cyꞌaꞌn kaꞌn
7 I bin jaluꞌ, eꞌuꞌ kajwutz ¿mbi na elepont cyakil eꞌchk xtxolbilaꞌseꞌj? ¿Na peꞌ elepont yi quiꞌc xac yi antiw ley? Nkꞌeraꞌtz puntil, na tan yi eꞌchk leyaꞌtz ja lajluchax yi at wetz wil. Na qui kloꞌ nmeꞌl intxum tetz yi xan yi na el nin walmaꞌ te jun takleꞌn yi nkꞌeꞌtz wetz, yi quiꞌk jun leyaꞌtz yi na tal: “Quil tzꞌel nin awalmaꞌ te mebiꞌl awisin.” 8 Poro tan tuꞌ yi at yi jun leyaꞌtz, ja chinnachon teꞌj yi at wil yi teleꞌn walmaꞌ te eꞌchk takleꞌn yi nkꞌeꞌtz wetz. Ja tzun xcyeꞌ yi ilcꞌol yi cyꞌaꞌn waꞌn tan impitleꞌn nin tan juchleꞌn wil, na ja el nin walmaꞌ te wiꞌnin eꞌchk takleꞌn yi nkꞌeꞌtz wetz. Poro yi quiꞌk yi jun leyaꞌtz, quiꞌc kloꞌ wil teꞌj. 9 Na yi ntaxk el intxum te yi ley quiꞌc wil taneꞌn tzinwutz. Poro yi wital yi ley, ja tzun el intxum tetz yi in pajol caꞌwl, nin yi txꞌaklij quimichil tzinwutz. 10 Ej nin yi jun leyaꞌtz, yi ja kloꞌ xcon tan takꞌleꞌn wutzꞌajbil, ntin xcon tan impitleꞌn nin tkꞌab quimichil na quinin nchinxom teꞌj. 11 Na ja kloꞌ jal wutzꞌajbil yi nink nchinxom teꞌj. Poro tan yi ilcꞌol yi cyꞌaꞌn waꞌn quinin nchinxcyeꞌ teꞌj. Chaꞌstzun te ja kloꞌ xcon yi jun leyaꞌtz tan impitleꞌn nin tkꞌab quimichil.
12 Tan yi xtxolbilaꞌseꞌj na lajluchax skawutz yi baꞌn atit yi eꞌchk caꞌwlaꞌtz. Chin xan nin. Nin chin tzꞌaknak cuꞌn. Nin baꞌn tetz ketz, bantz lajluchaxeꞌn yi kil.
13 I bin jaluꞌ, ¿akꞌol ptzun quimichil yi eꞌchk leyaꞌtz yi balaj? Nkꞌeraꞌtz puntil. Na yi akꞌol quimichil iꞌtz yi ilcꞌol yi cyꞌaꞌn kaꞌn. Nin tan tuꞌ yi at eꞌchk leyaꞌtz ja xcyeꞌ yi ilcꞌol yi cyꞌaꞌn kaꞌn tan kapitleꞌn nin tul quimichil. Tan cyakil yi xtxolbilaꞌseꞌj na lajluchax yi chin cachiꞌ nin yi ilcꞌol yi cyꞌaꞌn kaꞌn.
14 Na el katxum te eꞌchk caꞌwlaꞌtz yi choꞌn sajnak tu Ryos. Poro yi oꞌ ketz oꞌ tu wunak, nin kakꞌoꞌnt kib tkꞌab yi ilcꞌol. 15 Qui na el katxum tetz yi ẍeꞌn kutaneꞌn, na yi kajbil iꞌtz tan qui kabanol kloꞌ yi eꞌchk takleꞌn cachiꞌ, poro na kaban. 16 Quinin kloꞌ na kaj kaban eꞌchk takleꞌn cachiꞌaꞌtz, poro yaꞌtz na katzan tan banleꞌn. Tan tuꞌ yi qui na kaj kaban yi eꞌchk takleꞌn cachiꞌ, na elepont yi baꞌn atit yi ley. 17 Nchaꞌtz na kaj kaxom te yi balaj. Na tzun elepont yi nkꞌeꞌtz oꞌ ajpaj yi na kajuch kil, ma na i yi ilcꞌol yi cyꞌaꞌn kaꞌn. 18 Poro tan tuꞌ yi na kajuch kil na el katxum tetz yi quiꞌc nin noc kabalajil. Na kloꞌ kaj kaban eꞌchk takleꞌn balaj poro qui na kaxcyeꞌ teꞌj. 19 Qui na kaxcyeꞌ tan banleꞌn yi eꞌchk takleꞌn balaj yi na kaj kaban. Ntin na katzan tan banleꞌn yi eꞌchk takleꞌn cachiꞌ yi qui na kaj lkaban. 20 Ma jaluꞌ, yi ko na kaban yi eꞌchk takleꞌn cachiꞌ yi qui kloꞌ na kaj yil kaban, na elepont yi nkꞌeꞌtz yi balaj ajtzaꞌkl yi cyꞌaꞌn kaꞌn yi ajpaj, ma na i yi ilcꞌol yi cyꞌaꞌn kaꞌn.
21 At bin jun takleꞌn yi ilenin na bajij skeꞌj. Iꞌtz yi cyakil tir yi na kajoy puntil tan kabnol eꞌchk takleꞌn balaj, na xcyeꞌ yi kajtzaꞌkl cachiꞌ tan kapoꞌtzeꞌn. 22 Nternin na pekꞌ yi kajtzaꞌkl balaj tan bnol taneꞌn eꞌchk caꞌwl Ryos, 23 poro ilenin at junt kajtzaꞌkl cachiꞌ yi cyꞌaꞌn kaꞌn. Yi jun yab ajtzaꞌklaꞌtz na xcyeꞌ tan poꞌtzeꞌn yi kajtzaꞌkl balaj, nin na xcyeꞌ tan kocseꞌn pres jakꞌ caꞌwl yi ilcꞌol.
24-25 Nternin na el kalmaꞌ tan kabnol taneꞌn yi caꞌwl Ryos, poro tan yi ajtzaꞌkl cachiꞌ yi cyꞌaꞌn nin kaꞌn, na kajuch kil. Lastum oꞌ. ¿Naꞌ scyetz jun xcyeꞌ tan kaclaxeꞌn tkꞌab yi jun yab ajtzaꞌklaꞌtz yi cyꞌaꞌn kaꞌn, yi jun ajtzaꞌklaꞌtz yi na tzan tan kapitleꞌn tkꞌab quimichil? ¿At peꞌ jun yi xcyek tan kaclaxeꞌn? Ntyoẍ tetz Kataj yi at jun yi na xcyeꞌ tan kaclaxeꞌn, iꞌtz yi Kajcaw Jesucristo.