Qui tajweꞌn tan kajuchul kil na ja kokꞌbej kib tu Cristo
6
1 I bin jaluꞌ tan tuꞌ yi na cuy Kataj yi kapaj, ¿baꞌn peꞌ lkajuch mas kil? 2 Quiꞌc rmeril, na yi oꞌ ketz jaluꞌ oꞌ acꞌaj wunak, nin nkꞌeꞌtz tajweꞌn tan kabnol taneꞌn yi caꞌwl yi ilcꞌol, na niꞌcuꞌntz chi quimnakoꞌt swutz yi ilcꞌolaꞌtz. Nkꞌeꞌtz bin tajweꞌn yil kajuch kil, na quiꞌct ltajquen yi ilcꞌol skeꞌj tan kacaweꞌn na oꞌ acꞌaj wunak tkꞌab Cristo.3 ¿Na qui peꞌ na el chitxumuꞌ tetz yi mbi ekaꞌn tan yi bautism yi na bajij skeꞌj yi na kocsaj yi mbi ekaꞌn tan Jesucristo? Na yi na kaben mulij xe aꞌ niꞌcuꞌntz chi i oꞌaꞌtz oꞌ quim yi quimeꞌn Cristo. 4 Ej nin niꞌcuꞌntz chi i oꞌaꞌtz oꞌ mukxij yi mukxeꞌn iꞌ tetz. Na niꞌcuꞌntz chi quimnakoꞌ kutaneꞌn. Ma yi na kajetzaj xe aꞌ, niꞌcuꞌntz yi jajk kitzꞌij junt tir chi banak Jesucristo yi titzꞌeꞌn junt tir tan porer Kataj. Chaꞌstzun te quiꞌct ltajquen ilcꞌol skeꞌj, na oꞌ acꞌaj wunak taneꞌn jaluꞌ.
5 I bin jaluꞌ, junit bin oꞌ tu Cristo. Na yi quimeꞌn iꞌ, niꞌcuꞌntz chi yi yaꞌtzk kaquimeꞌn ketz. Yi ko yaꞌtz, nchaꞌtz yi titzꞌeꞌnt iꞌ, yaꞌstzun yi kitzꞌeꞌn ketz. Kokꞌbeꞌn kib tu Cristo jaluꞌ. 6 Na yi jeꞌn pajij Kajcaw Jesús swutz pasyon, yaꞌstzun yi quimeꞌn yi kajtzaꞌkl cachiꞌ yi xomnakoꞌ teꞌj sajleꞌn. Ej nin nchaꞌtz, yaꞌstzun yi quimeꞌn yi tajbil kawankil bantz quiꞌt kajuchul mas kil. Quiꞌt na cawun yi ilcꞌol skeꞌj jaluꞌ, na quiboꞌt jakꞌ yi caꞌwl iꞌ. 7 Na jun almaꞌ, quiꞌc rmeril tan juchul mas til. 8 Nchaꞌtz oꞌ yi ko quimnak yi kajtzaꞌkl cachiꞌ, yi xomnakoꞌ teꞌj sajleꞌn, ok tetz kajal yi itzꞌoꞌ jaluꞌ te Cristo, nin yi xomij iꞌ skeꞌj tan kuchꞌeyeꞌn. 9 Ej nin nchaꞌtz na el katxum tetz yi quimnak Jesucristo, nin itzꞌnak junt tir, chaꞌstzun te quiꞌc rmeril tan quimeꞌn junt tir. 10 Na jun ntziꞌ tir quimnak iꞌ tan kelseꞌn liwr tkꞌab yi ilcꞌol. Ej nin itzꞌ iꞌ jaluꞌ. Nin nternin na cheꞌl na choꞌc tu Ryos. 11 Chaꞌstzun te ok te cyajaluꞌ yi quimnakeꞌuꞌ swutz yi ẍchamil yi ilcꞌol. Quiꞌc ltajquen yi ilcꞌolaꞌtz scyeꞌjuꞌ, na itzꞌeꞌuꞌ. Ej nin nternin na cheꞌluꞌ na choꞌcuꞌ tu Ryos.
12 Chaꞌstzun te quil cyakꞌ quibuꞌ te eꞌchk takleꞌn cachiꞌ. Quil cyakꞌuꞌ amaꞌl tetz tajbil chiwankiluꞌ tan chibnoluꞌ eꞌchk takleꞌn yi qui na yub. 13 Quil cyakꞌuꞌ yi chiwankiluꞌ tetz Baybaꞌn tan xconeꞌn tetz, ma na cyakꞌeꞌuꞌ chiwankiluꞌ tetz Ryos. Quimnakeꞌuꞌ taneꞌn swutz Ryos sajleꞌn, poro jaluꞌ ja chitzꞌijuꞌ. Chaꞌstzun te cyakꞌeꞌ quibuꞌ tetz Ryos tan chibnoluꞌ yi eꞌchk takleꞌn balaj. 14 Na ja wiꞌt keꞌltzaj liwr tkꞌab yi ilcꞌol. Quiboꞌ tkꞌab yi jun jilwutz caꞌwl yi na cawun skeꞌj sajleꞌn, ma na choꞌn atoꞌ jaluꞌ tkꞌab yi banl talmaꞌ Ryos.
Jun elsawutzil te yi ẍeꞌn taneꞌn jun esclaw
15 I bin jaluꞌ, atoꞌ jakꞌ caꞌwl yi banl talmaꞌ Ryos, nin quiꞌt na cawun yi ilcꞌol skeꞌj. ¿Baꞌn peꞌ yil kajuch mas kil? Quiꞌc rmeril. 16 Na je jun elsawutzileꞌj: Ko na takꞌ tib jun tkꞌab jun patrón at iꞌ jakꞌ caꞌwl yi patrónaꞌtz. Nin tajweꞌn tan bnol taneꞌn yi tajbil yi patrón. Iteꞌn nin kutaneꞌn ketz, kol kakꞌ kib tkꞌab ilcꞌol, tajweꞌn tan kabnol taneꞌn yi tajbil yi ilcꞌol. Ej nin sjalok quimichil kaꞌn tan paj. Poro kol kakꞌ kib jakꞌ caꞌwl Ryos kocopon tzun tetz balaj taꞌn.
17 Ntyoẍ tetz Kataj Ryos yi ja wiꞌt txꞌixpuj yi cyajtzaꞌkluꞌ. Sajleꞌn cyakꞌoꞌnt quibuꞌ tkꞌab yi ilcꞌol tan chijuchuluꞌ quiluꞌ. Poro yi jaluꞌ ntyoẍ tuꞌ, yi tetz cuꞌn cyalmaꞌuꞌ ocnakeꞌuꞌ cꞌulutxum tan banleꞌn taneꞌn yi chusuꞌn yi quibitnakuꞌ. 18 Ja bin cheꞌluꞌ liwr tkꞌab yi ilcꞌol. Ej nin choꞌn cyakꞌoꞌnt quibuꞌ jaluꞌ tan banleꞌn yi eꞌchk takleꞌn balaj. 19 Ja xcon yi jun elsawutzilaꞌtz waꞌn tan lajluchaxeꞌn ẍchiwutzuꞌ yi ẍeꞌn quitaneꞌnuꞌ tkꞌab Ryos. Yi sajleꞌn cyakꞌoꞌnt quibuꞌ tkꞌab yi ilcꞌol tan chibnoluꞌ taneꞌn yi eꞌchk takleꞌn cachiꞌ. Yaꞌstzun banakeꞌuꞌ-tz. Poro jaluꞌ cyakꞌeꞌ quibuꞌ tan chibnoluꞌ taneꞌn yi eꞌchk takleꞌn balaj, bantz chixansal quibuꞌ swutz Ryos.
20 Yi sajleꞌn, te yi tzꞌamijcheꞌuꞌ tan yi ilcꞌol, quinin choꞌcuꞌ tan banleꞌn jun takleꞌn balaj. 21 ¿Poro mbi nchicambajuꞌ teꞌj? Ntin nchicambajuꞌ quimichil. Ej nin yi na ul txꞌakx chicꞌuꞌluꞌ jaluꞌ yi mbi eꞌ banakuꞌ, ntin na chitxꞌixwijuꞌ taꞌn. 22 Poro yi jaluꞌ apart, na ja wiꞌt cheꞌluꞌ liwr tkꞌab yi ilcꞌol. Ateꞌuꞌ tkꞌab Ryos jaluꞌ, nin cyakꞌoꞌnt quibuꞌ tan chixconeꞌnuꞌ tetz. Ej nin tan tuꞌ yi ateꞌuꞌ tkꞌab Ryos ja jal chibalajiluꞌ nin ẍchicambokuꞌ te jun itzꞌajbil yi quinin bajsbeꞌn tetz. 23 Na yi chichojoꞌn yi eꞌ juchul il iꞌtz yi quimichil. Poro yi oy yi na tzan Ryos tan toyeꞌn sketz tan Cristo Jesús, yi Kajcaw, iꞌtz jun itzꞌajbil yi quinin bajsbeꞌn tetz.