Nchaꞌtz oꞌ ja wiꞌt jal kabalajil swutz Ryos tan tuꞌ yi kꞌuklij kacꞌuꞌl teꞌj
5
1 I bin jaluꞌ, ja wiꞌt jal kabalajil swutz Ryos tan tuꞌ yi kꞌuklij kacꞌuꞌl te yi yol iꞌ yi alijt taꞌn. Nchaꞌtz ja wiꞌt jal tzatzin paz skaxoꞌl tu Ryos tan tuꞌ yi mbi banak Kajcaw Jesucristo. 2 Nchaꞌtz tan tuꞌ yi kꞌuklij kacꞌuꞌl te Ryos, nin tan tuꞌ yi mbi cuꞌn banak Jesucristo, nternin na keꞌl na koꞌc tu Ryos. Nin quinin na kacabej kacꞌuꞌl te yi jun kabalajilaꞌtz yi akꞌij sketz tan Ryos. Ej nin nternin na katzatzin yi na koꞌc tan xtxumleꞌn yi sjalok kakꞌej yil kopon te iꞌ. 3 Nchaꞌtz wiꞌnin na katzatzin te yi eꞌchk qꞌuixcꞌuj yi na bajij skeꞌj jaluꞌ. Na tan yi eꞌchk qꞌuixcꞌujaꞌtz yi na ul, na kaxcyeꞌ tan mucꞌleꞌn mas qꞌuixcꞌuj. 4 Ej nin kol kaxcyeꞌ tan mucꞌleꞌn, at tzun kachꞌiwtz te kutzꞌajbil. 5 Jun cuꞌn tzꞌakꞌlok yi at kachꞌiw teꞌj. Nkꞌeꞌtz kꞌubaj cꞌuꞌlal tuꞌ na ban Ryos, na wiꞌnin na pekꞌ iꞌ skeꞌj. Ej nin clar cunin na el katxum tetz yi tzꞌakꞌlok sketz, na ja wiꞌt takꞌ iꞌ yi Espíritu Sant sketz.6 Na te yi tiemp yi quiꞌc Ryos te kalmaꞌ nin yi quiꞌt njal puntil kaꞌn yi ẍeꞌnk kaclax, noj quen cuꞌntz te yi tiemp yi bixbaꞌnt tan Ryos tan quimeꞌn Cristo tetz kaxel. 7 Poro nkꞌeꞌtz alchok scyetz tuꞌ ltakꞌ tib tetz xel yi tuchꞌ, mpe chumbalaj wunak nink iꞌ. Poro qui cunin batz, at loꞌ eꞌ yi yaꞌtz cyulej tan colcheꞌn jun yaj yi chumbalaj nin ẍchiwutz. Poro cyaꞌl jun ltakꞌ tib tetz xel jun yaj yi quiꞌc muꞌẍ xac. 8 Poro yi Kataj Ryos el kꞌajab skeꞌj. Wech oꞌ len cuꞌn juchul il, nin quiꞌc muꞌẍ tal kaxac yi quimeꞌn Cristo taꞌn tetz kaxel. 9 Na tan tuꞌ yi teleꞌn kojxuj yi ẍchꞌel Cristo ja wiꞌt jal kabalajil swutz Ryos. Ej nin ko yaꞌtz, ¿qui ptzun tzꞌoc Cristo tan kacolcheꞌn tkꞌab yi caws yi at tulbil tan Ryos squib cyakil wunak? Tzꞌocopon. 10 Sajleꞌn oꞌ cuꞌn contr tu Ryos. Poro tan tuꞌ yi quimeꞌn yi tetz Cyꞌajl tetz kaxel, ja xit yi oyintziꞌ tuchꞌ. I bin jaluꞌ, yi ko xitnak yi oyintziꞌ yi at skaxoꞌl tuchꞌ, quiꞌct bin kabembil tkꞌab yi kacaws yi txꞌaklij skawutz na at nin Cristo tan kacolcheꞌn. 11 Nkꞌeꞌtz ntinaꞌtz yi xtxolbilaꞌseꞌj, ma na nchaꞌtz tul yi tiemp jaluꞌ, wiꞌnin na katzatzin tu Ryos na ja kamiwi kib tuchꞌ tan tu yi mbi cuꞌn banak Kajcaw Jesucristo.
Cyakil wunak eꞌ len juchul il tan paj Adam
12 I bin jaluꞌ, katxumeꞌ yi junt xtxolbileꞌj: Tan paj jun yaj xeꞌteꞌn yi juchleꞌn il. Ej nin tan paj yi juchleꞌn il jaleꞌn yi quimichil. Chaꞌstzun te txꞌaklij len quimichil skawutz, na cyakil oꞌ, oꞌ len cuꞌn juchul il. 13 Na yi ntaxk takꞌ Ryos yi eꞌchk caꞌwl tetz Moisés nsken xeꞌtij yi juchleꞌn il. Ej nin na el katxum tetz yi quil jal til jun yaj ko quiꞌc caꞌwl at tan makleꞌn wutz. 14 Ko yaꞌtz bintzi, ¿mbi tzuntz yi chiquimleꞌn cyakil yi eꞌ xonl Adam yi ntaxk akꞌlij yi caꞌwl tetz Moisés? Quiꞌc jun yi jajk juch til chi yi il yi njuch Adam. Poro ja chiquim len. ¿Mbi tzuntz? Iꞌtz tan paj yi ja ben kꞌaꞌjal tib yi til Adam ẍchixoꞌl chicyakil cuꞌn. Yi Adam iꞌ xeꞌtzan yi juchleꞌn il, poro yi Cristo, yi jun yi bixbaꞌnt tan tulakeꞌn, iꞌ xeꞌtzan yi itzꞌeꞌn junt tir.
15 Ej nin yi il yi juchnak yi bajx wunak, quiꞌc xtxicbaj sketz. Na tan tuꞌ yi til jun yajaꞌtz yi juchnak, ja chiquim cyakil wunak. Poro mas baꞌn tcuꞌn yi banl talmaꞌ Ryos skibaj, na ja takꞌ iꞌ jun chin oy sketz, na tan tuꞌ yi mbi cuꞌn banak junt yaj, yi Jesucristo, ja jal cuybil chipaj jun chin cꞌoloj wunak taꞌn. 16 Tan tuꞌ yi jun til Adam, akꞌleꞌt chicaws cyakil wunak. Poro tan tuꞌ banl talmaꞌ Ryos, nin tan tuꞌ yi mbi cuꞌn banak Cristo ja cuy iꞌ jun chin cꞌoloj kapaj katxꞌokꞌbeꞌn. Nin ja jal kabalajil taꞌn swutz Ryos. 17 Tan tuꞌ yi juchul til jun ntziꞌ yaj, txꞌaklij quimichil ẍchiwutz cyakil wunak. Poro tan tuꞌ yi mbi cuꞌn banak junt yaj, yi iꞌtz Jesucristo, ja jal kutzꞌajbil nin ja jal kabalajil swutz Ryos. Ej nin oy tuꞌ makꞌleꞌt sketz.
18 Tan tuꞌ yi mbi banak Adam jal len kil. Poro tan tuꞌ yi mbi cuꞌn banak Jesucristo, ja jal puntil tan jaleꞌn kabalajil swutz Ryos. Na wiꞌnin na tzatzin Ryos te yi mbi cuꞌn banak Cristo. 19 Tan tuꞌ yi pajnak jun yaj yi caꞌwl Ryos tentz, oꞌ len cuꞌn juchul il. Poro tan tuꞌ yi cꞌulutxumil junt yaj, akꞌlij puntil sketz tan kabansal kib tu Ryos.
20 Poro at xac yi eꞌchk caꞌwlaꞌtz yi akꞌij cyen tan Ryos na ja xcon tan lajluchaxeꞌn yi kil yi wiꞌnin beneꞌn loꞌon. Poro chumam nin banl talmaꞌ Ryos skibaj, na ja xcyeꞌ tan cuyleꞌn yi jun cꞌoloj kilaꞌtz. 21 Sajleꞌn tunintz cyakil wunak tzꞌamij cheꞌ len tan jun ajtzaꞌkl yi cachiꞌ yi iꞌtz yi juchleꞌn il. Ej nin tan paj yi na kajuch len kil txꞌaklij len quimichil skawutz. Poro yi jaluꞌ, tan tuꞌ yi banl talmaꞌ Ryos, nin tan tuꞌ yi mbi cuꞌn banak Kajcaw Jesucristo, ja jal puntil tan kabansal kib tu Ryos. Nin ja jal puntil tan kacambal jun itzꞌajbil yi quinin bajsbeꞌn tetz.