Yi ẍeꞌn njal yi balajil Abraham swutz Ryos
4
1 Ma jaluꞌ katxumeꞌ bin yi ẍeꞌn cuꞌn jaleꞌn yi balajil kꞌajtzun kamam Abraham. 2 Yi nink jal yi balajil iꞌ tan yi eꞌchk takleꞌn balaj yi baj bnol, tocsaj kloꞌ tib nim swutz Ryos, poro quinin jal yi balajil iꞌ tan yi eꞌchk takleꞌn yi banak. 3 Na je na tal yi tzꞌibaꞌnt cyen cyakꞌun yi eꞌ elsanl stziꞌ Ryos tentz: “Tocsaj cunin Abraham yol Ryos, nin tan tuꞌ yi tocsal, chaꞌstzun te jaleꞌn yi tetz balajil swutz Ryos.”a4 Ej nin je junt elsawutzileꞌj: Ko na bnix jun akꞌun tan jun yaj, nkꞌeꞌtz oy tuꞌ na bnixeꞌt, ma na iꞌtz xtxꞌokꞌbeꞌnt yi taw akꞌun, na ja tij yi yaj qꞌuixcꞌuj tan xtxꞌacleꞌn. 5 Poro nkꞌeraꞌtz puntil tan jaleꞌn kabalajil swutz Ryos. Nkꞌeꞌtz tajweꞌn tan kabnol jun eꞌchk takleꞌn tan jaleꞌn kabalajil, ma na ntin na taj yil kocsaj cunin yi yol Ryos, yi Ryos yi na choꞌcsan yi eꞌ juchul il tetz balaj. Na tan tuꞌ yi ja kocsaj cunin yi yol Kataj, ja tzun koꞌc tetz balaj taꞌn. 6 Iteꞌn nin xtxolbilaꞌtz talnak kꞌajtzun kamam Luwiy, na yaꞌstzun na elepont yi yol yi talnak iꞌ. 7 Je yol iꞌeꞌj:
“Baꞌn cyeri eꞌ yi ja wiꞌt cuylij chipaj.
Baꞌn cyeri eꞌ yi ja stzajsaj Ryos yi quil.b
8 Baꞌn cyeri eꞌ yi quiꞌt na xtxum Ryos yi quil.”
9 I bin jaluꞌ, yi jun balaj xtxolbilaꞌseꞌj, ¿ntin peꞌ scyetz yi banijcheꞌ circuncidar, nka nchaꞌtz scyetz yi eꞌ yi qui banijcheꞌ circuncidar? Iꞌtz tetz kacyakil cuꞌn, na ja wiꞌt wal scyeruꞌ yi jalnak balajil Abraham tan tuꞌ yi kꞌukeweꞌn cꞌuꞌl te Ryos. 10 ¿Poro ja peꞌ jal yi balajil Abraham yi ntaxk bajij circuncidar, nka yi nsken bajij circuncidar? Ja jal yi tetz balajil swutz Ryos yi ntaxk bajij circuncidar. 11 Nchaꞌtz oc yi jun techlaꞌtz te Abraham poro iꞌtz tan ẍchajleꞌn yi nsken wiꞌt jal yi tetz balajil swutz Ryos. Na yi balajil Abraham ja jal swutz Ryos yi tocsal cuꞌn, nin yi ntaxk oc yi jun techlaꞌtz teꞌj. Tan yi xtxolbilaꞌseꞌj na lajluchax yi cyakil yi eꞌ yi na cyocsaj cuꞌn chi banak Abraham, eꞌ tzun nitxajil Abraham taneꞌn, nin quiꞌc na ban yi ko banijcheꞌ circuncidar nka quiꞌ, na ja wiꞌt jal chibalajil swutz Ryos. 12 Poro nchaꞌtz kꞌajtzun Abraham, iꞌ chibajxom yi eꞌ yi banijcheꞌ circuncidar, yi kol chixom te yi tajbil Ryos, chi banak iꞌ tetz yi ntaxk bajij circuncidar.
Suknak eꞌchk takleꞌn balaj tetz Abraham tan tuꞌ yi nternin kꞌuklij cꞌuꞌl iꞌ te Ryos
13 Poro nchaꞌtz quinin suk Ryos yi eꞌchk amaꞌl beneꞌn tziꞌn wi munt tetz Abraham tuml eꞌ xonl tan tuꞌk yi nskenk jepon iꞌ tan banleꞌn taneꞌn yi eꞌchk leyaꞌtz. Poro ja suk Ryos yi eꞌchk amaꞌlaꞌtz tetz tan tuꞌ yi nternin kꞌuklij cꞌuꞌl iꞌ te Ryos yi tzꞌelepon kꞌab iꞌ te yol. 14 Na yi cyetz cuntuꞌk Abraham scyuchꞌ yi eꞌ xonl tan tuꞌ yi nchiban taneꞌn eꞌchk leyaꞌtz, quiꞌc tzun kloꞌ na takꞌ sketz yi na kꞌukeꞌ kacꞌuꞌl te Cristo jaluꞌ. Ej nin quiꞌc kloꞌ xac yi eꞌchk xtxolbil yi suknak Ryos tetz Abraham.
Tan yi eꞌchk caꞌwl na lajluchax yi at kil
15 Poro ilenin at xac yi eꞌchk caꞌwlaꞌtz, na na xcon tan ẍchajleꞌn yi at tulbil kacaws, tan paj yi qui na kaxcyeꞌ tan banleꞌn taneꞌn. Ntinaꞌtz kloꞌ jun puntil tan qui lajluchaxeꞌn yi at kil, iꞌtz yi quiꞌk takꞌ Ryos yi eꞌchk caꞌwlaꞌtz.
16 I bin jaluꞌ yi na elepont cyakil eꞌchk xtxolbilaꞌseꞌj iꞌtz: Ntin skacambok te eꞌchk oyaꞌtz yi sukiꞌnt tan Ryos kol kocsaj cunin yi yol Ryos. Na kol kocsaj stkꞌeꞌ tzun iꞌ yi eꞌchk oyaꞌtz sketz tan tuꞌ yi banl talmaꞌ iꞌ. Ej nin yi eꞌchk oyaꞌtz, nkꞌeꞌtz ntin scyetz yi eꞌ judiy, poro iꞌtz tetz ketz kacyakil cuꞌn yi oꞌ yi xomchoꞌ te tajtzaꞌkl Abraham yi nternin kꞌukeꞌ cꞌuꞌl te Ryos. Na cyakil yi eꞌ yi xomcheꞌ te tajtzaꞌkl Abraham, eꞌ xonl Abraham quitaneꞌn. 17 Yaꞌstzun ekaꞌn tan yi eꞌchk xtxolbil yi talnak Ryos tetz Abraham tentz yi na tal: “In ncẍoꞌcsan tetz chimam chiteꞌ wiꞌnin jilwutz wunak beneꞌn tziꞌn wi munt,” chij Ryos banak cyen tetz Abraham. Ej nin jun cuꞌn tzꞌelepon kꞌab Ryos te yi tetz yol, na wutzileꞌn cuꞌn iꞌ aꞌlon cyen. Nin jun cuꞌn tzꞌelepon kꞌab teꞌj, na na xcyeꞌ iꞌ tan chijeꞌseꞌn tzaj yi eꞌ almaꞌ, nin tan banleꞌn alchok takleꞌn yi quiꞌc jaluꞌ.
18 Quiꞌc nin rmeril tan jaleꞌn kloꞌ nitxajil Abraham, poro kꞌukeꞌ cꞌuꞌl te yi yol yi ntal Ryos tetz. Ej nin nchaꞌtz tocsaj iꞌ yi at tocbil iꞌ tetz chitacyꞌeꞌx wiꞌnin jilwutz wunak. 19 El xtxum Abraham tetz yi nsken balkꞌij yi tiemp tan jaleꞌn nitxajil, na nsken loꞌ tzꞌak jun cient yob taꞌn. Ej nin nchaꞌtz el xtxum iꞌ yi quiꞌc talbil Sara. Poro quinin tajlaj cyakil yi xtxolbilaꞌtz. Na iẍnin kꞌuklij cꞌuꞌl te yi yol Ryos yi alijt taꞌn tetz, yi sjalok jun chinitxaꞌ. 20 Siquier nink muꞌẍ tal yi nink cabej cꞌuꞌl te cyakil nsuk Ryos tetz. Ma na mas tcunin kꞌukeweꞌn cꞌuꞌl te Ryos. Nin takꞌ iꞌ yi kꞌajsbil tetz. 21 Yaꞌstzun banak, na at tetz tajal yi jun cuꞌn at porer Ryos tan banleꞌn cyakil yi sukiꞌnt taꞌn. 22 Chaꞌstzun te jaleꞌn balajil iꞌ swutz Ryos.
23 Ej nin tzꞌibaꞌnt cyen cyakil yi xtxolbilaꞌseꞌj tul yol Kataj, poro nkꞌeꞌtz ntin tetz Abraham. 24 Ma na nchaꞌtz tzꞌibaꞌnt cyen tan kaxomeꞌn ketz teꞌj, bantz jaleꞌn kabalajil swutz Ryos. Na sjalok kabalajil kol kꞌukeꞌ kacꞌuꞌl te yi jun yi jeꞌsan tzaj Kajcaw Jesús ẍchixoꞌl almaꞌ. 25 Yi jun Jesúsaꞌtz, iꞌtz yi jun yi jatxlij ẍchikꞌab eꞌ mal nak tan quimeꞌn swutz pasyon tan ẍchojleꞌn cyakil yi kil. Ej nin yaꞌstzun yi Jesúsaꞌtz yi itzꞌij junt tir tan jaleꞌn ketz kabalajil swutz Ryos.