3
1 Poro at loꞌ eꞌ judiy yi scyaleꞌ: “Yi ko yaꞌtz bintzi, ¿mbi tzun ltakꞌ swetz yi in judiy? ¿Mbil takꞌ swetz yi bajnakin circuncidar?” cheꞌch loꞌ cobox sbneꞌ ẍchixoꞌluꞌ. 2 Poro swaleꞌ nin scyeruꞌ yi bintzinin at wiꞌnin chixacuꞌ yi eꞌuꞌ judiy. Na je bajx xtxolbileꞌj tan ẍchajleꞌn yi at chikꞌej yi eꞌ judiy: Kꞌuklij cꞌuꞌl Ryos scyeꞌj, na ja cheꞌ xconsaj tan xeꞌtzajeꞌn yi xtxolbil tan chiclaxeꞌn alchok jilwutz wunak.a 3 Bintzi at jujun ẍchixoꞌl yi quinin eꞌ baj jepon te caꞌwl iꞌ, poro tan tuꞌ tzunk yi eꞌaꞌs, quiꞌt tzunk tzꞌel kꞌab Ryos te yi tetz yol yi alijt cyen taꞌn. 4 Ma na jun cuꞌn tzꞌelepon kꞌab te yol. Mpe nink choꞌc cyakil wunak tetz laꞌj, tzꞌelepon kꞌab te yi yol yi alijt cyen taꞌn. Na tzꞌibaꞌnt cyen tan jun elsanl stziꞌ iꞌ tentz:“Taꞌ, chin tzꞌaknak cuꞌn yoluꞌ.
Quiꞌc muꞌẍ tal laꞌjil tu yoluꞌ.
Mpe nink choꞌc wunak tan maꞌleꞌn yoluꞌ,
cyaꞌl nin jaleꞌt muꞌẍ tal paltil cyaꞌn.”b
5 Poro at loꞌ eꞌ yi na cyal: “Baꞌn kol kajuch kil, na tan yi kil slajluchaxk yi balajil Ryos. Na quil tzꞌoc iꞌ tan kacawseꞌn, na tan kil na lajluchaxeꞌt yi tetz balajil,” cheꞌch loꞌ cobox. 6 Poro quiꞌc xtxolbil chiyol, na yi ko yaꞌtz, ¿Ẍeꞌn tzꞌoc Ryos tan chicawseꞌn wunak? 7 Na yi nink jal mas kꞌej Ryos tan tuꞌ yi inlaꞌjil, ¿mbi tzuntz yi na tal iꞌ yi in juchul il tan paj yi inlaꞌjil? na jaleꞌn na ban kꞌej iꞌ tan impaltil taneꞌn. 8 Na yi yaꞌtzk bintzi, baꞌn tcuꞌn yi nink tzimban mas eꞌchk takleꞌn cachiꞌ bantz jaleꞌn mas kꞌej iꞌ. Quiꞌc xtxolbil yi jun ajtzaꞌklaꞌtz. Poro at wunak yi na cyal yi yaꞌstzun yi xtxolbil yi na chintzan tan xtxoleꞌn. Poro tzꞌakꞌlok cyetz chicawsaꞌtz, na sak cuꞌn swutz Ryos yi at quil.
Oꞌ len cuꞌn juchul il
9 I bin jaluꞌ, ¿mbi na elepont yi xtxolbilaꞌseꞌj? ¿Na peꞌ elepont yi oꞌ ketz, yi oꞌ judiy, oꞌ mas balaj ẍchiwutz yi eꞌ mas wunak wi munt? Quiꞌ. Na ja wiꞌt chinxcyeꞌ tan ẍchajleꞌn scyeruꞌ yi nchaꞌtz oꞌ oꞌ len cuꞌn juchul il. Atoꞌ len jakꞌ caꞌwl yi kil. 10 Na tzꞌibaꞌnt cyen tan jun elsanl stziꞌ Ryos tentz:
“Tzoneꞌj wuxtxꞌotxꞌ,
quiꞌc jun balaj at.
Siquierk jun.
11 Cyaꞌl jun yi nak el xtxum tetz Ryos.
Cyaꞌl jun yi najk tzan tan joyleꞌn Ryos.
12 Eꞌ len cuꞌn txꞌakxnak.
Cyaꞌl jun yi najk pekꞌ tan banleꞌn
yi eꞌchk takleꞌn balaj. Siquierk jun.c
13 Na yi eꞌchk yol yi na el le chitziꞌ,
chin cachiꞌ nin.
Niꞌcuꞌn tu xewal jun almaꞌ
yi na eltzaj juc tcꞌuꞌl jun nich.
Eꞌ len cuꞌn subul nak,
na cyakil yi eꞌchk yol yi na eltzaj le chitziꞌ,
niꞌcuꞌn tu yi wenen yi at le stziꞌ jun lubaj.d
14 Ntin eꞌchk jis na el tzaj le chitziꞌ,
tu eꞌchk cꞌaꞌlaj yol.
15 Lajkeꞌl quikan tan biyolnakiꞌn.
16 Ntin na chitzan tan chixiteꞌn wunak,
nin tan takꞌleꞌn bis oꞌkl scyetz.
17 Cyaꞌl na jaleꞌt tzatzin paz cyaꞌn.e
18 Siquier nink muꞌẍ tal najk cyek ẍchiꞌ Ryos.”
Yaꞌstzun tzꞌibaꞌnt cyen.f
19 I bin jaluꞌ tan yi xtxolbilaꞌseꞌj, na el katxum tetz yi iteꞌn nin leyaꞌtz yi na kaxom kloꞌ teꞌj, xconk tan Kataj Ryos tan takꞌleꞌn kacaws yi oꞌ judiy. Ej nin nkꞌeꞌtz ntin oꞌ, ma na cyakil jilwutz wunak, na quiꞌc rmeril yi nink tal jun yaj yi quiꞌc tetz til, na oꞌ len cuꞌn pajol caꞌwl swutz Ryos. 20 Cyaꞌl jun yi jajk jepon tan banleꞌn taneꞌn yi caꞌwl iꞌ. Chaꞌstzun te cyaꞌl jun yi jajk jal yi tetz balajil swutz Ryos tan tuꞌ yi na buch tib tan banleꞌn taneꞌn yi eꞌchk caꞌwlaꞌtz. Na cyakil yi eꞌchk caꞌwlaꞌtz yi akꞌijt cyen, ntin na xcyeꞌ tan ẍchajleꞌn yi oꞌ len cuꞌn juchul il.
Yi xtxolbil tan jaleꞌn kabalajil swutz Ryos
21 Ma jaluꞌ ja lajluchax skawutz yi apart yi xtxolbil tan jaleꞌn kabalajil swutz Ryos, nkꞌeraꞌtz tan tuꞌ banleꞌn taneꞌn yi ley Moisés. Ej nin iẍnin tzꞌibaꞌnt cyen yi jun xtxolbilaꞌtz cyakꞌun yi elsanl stziꞌ Ryos tentz. 22 Ej nin je yi xtxolbileꞌj: Iꞌtz Ryos yi na koꞌcsan tetz balaj. Na stkꞌeꞌ iꞌ chibalajil cyakil yi eꞌ yil kꞌukeꞌ chicꞌuꞌl te Jesucristo. Ej nin iꞌtz tetz kacyakil cuꞌn. Na baꞌn cyocsaj alchok scyetz jilwutz wunak, na nicyꞌnin tuꞌ oꞌ swutz Ryos.
23 Yi sajleꞌn oꞌ len cuꞌn juchul il. Na cyaꞌl jun yi jajk jepon tan banleꞌn taneꞌn yi tajbil Ryos. 24 Poro ja jal kabalajil swutz Ryos tan tuꞌ yi banl talmaꞌ iꞌ. Ej nin oy tuꞌ muꞌlij sketz, na Cristo Jesús nxcyeꞌ tan kacolpeneꞌl tzaj tkꞌab kil. 25 Na bixbaꞌnt iꞌ tan Ryos tan quimeꞌn tetz katxꞌixwatz, tan ẍchojleꞌn kil. Ja tzun jal kabalajil swutz Ryos tan tuꞌ yi nkocsaj yi ja el kojxuj yi ẍchꞌel Jesucristo tan cuyleꞌn kapaj. Nchaꞌtz yi nink ncuy tuꞌk Ryos chipaj yi eꞌ wunak tentz ja kloꞌ jal paltil iꞌ. Poro quiꞌc til teꞌj, na at swutz iꞌ yi at quimbil Cristo tan ẍchojleꞌn quil. 26 Nchaꞌtz jaluꞌ quiꞌc paltil Ryos at yi na tzaneꞌt tan cuyleꞌn yi ketz kapaj, na quimnak Cristo tan ẍchojleꞌn kil.
27 I bin jaluꞌ, tan tuꞌ yi bintzinin yi xtxolbilaꞌseꞌj yi ja quim Cristo tan ẍchojleꞌn kil, ¿mbil takꞌ sketz yi kol kal yi skaclaxok tan tuꞌ yil kaban taneꞌn yi eꞌchk ley yi nchixom yi eꞌ kamam kateꞌ teꞌj? Quiꞌc ltakꞌ, na quil kaclax tan tuꞌ yi nink kaban taneꞌn yi eꞌchk leyaꞌtz. Na bixbaꞌnt tan Ryos yi ntin ẍchiclaxok yi eꞌ yil cyocsaj yi yol iꞌ. 28 Ja bin lajluchax skawutz yi ja wiꞌt jal kabalajil swutz Ryos tan tuꞌ yi na kꞌukeꞌ kacꞌuꞌl te yi mbi banak Cristo. Quiꞌc ltaj quen banleꞌn taneꞌn eꞌchk leyaꞌtz skeꞌj.
Na pekꞌ Ryos scyeꞌj cyakil jilwutz wunak
29 Nchaꞌtz, ¿ketz cuntuꞌ peꞌ yi oꞌ judiy yi Kataj Ryos? Quiꞌ. Na nkꞌeꞌtz ntin tetz ketz, ma na nchaꞌtz cyetz yi eꞌ yi nkꞌeꞌtz eꞌ judiy. 30 Na jun ntziꞌ Ryos at. Ej nin alchok scyetz yil tocsaj Jesucristo, sclaxok taꞌn. Quiꞌc na ban yi ko circuncidado nka quiꞌ.
31 I bin jaluꞌ, tan yi xtxolbilaꞌseꞌj, ¿na peꞌ katzan tan telseꞌn kꞌej yi eꞌchk caꞌwl Kataj yi tzꞌibaꞌnt cyen? Quiꞌ, qui na katzan tan telseꞌn kꞌej, ma na na katzan tan takꞌleꞌn mas kꞌej eꞌchk caꞌwlaꞌtz.