YI MBI CUꞌN BANAKEꞌ YI Eꞌ APOSTL
1
1 I bin jaluꞌ taꞌ Teófilo, tul yi bajx liwr yi ben intzꞌibal teruꞌ, yaꞌstzun kale beneꞌt intzꞌibal cyakil yi mbi cuꞌn ban Jesús, nin yi mbi cunin chusuꞌnil baj tlol. 2 Na ja cuꞌ intzꞌibaltz cyakil eꞌchk xtxolbil yi mbi cuꞌn banak Jesús jetz yi xeꞌtleꞌn iꞌ tan chichusleꞌn wunak, jalen yi tajeꞌn tcyaꞌj. Poro te yi ntaxk aj, eꞌ cyaj cyen cawul yi eꞌ tetz apostl. Tan porer yi Espíritu Sant cyaj cyen tlol cyakil yi puntil scyetz yi mbi tajweꞌn tan chibnol. 3 Na quim iꞌ, nin itzꞌij junt tir, nin ẍchaj tib ẍchiwutz yi eꞌ apostlaꞌtz. Itzꞌenleꞌn ẍchajol tib iꞌ ẍchiwutz, nin ja xcon wiꞌnin techl taꞌn tan ẍchajleꞌn yi bintzinin itzꞌ iꞌ. Na alaꞌ tir ẍchaj tib iꞌ ẍchiwutz tul caꞌwnak kꞌej. Nchaꞌtz tal iꞌ yi ẍeꞌn cuꞌn sbneꞌ Ryos tan cawuꞌn wuxtxꞌotxꞌ.4 Ej nin yi ntaxk aj iꞌ tcyaꞌj eꞌ baj cyaj cyen cawul yi eꞌ apostlaꞌtz, nin je yol iꞌeꞌj:
—Quil cxeꞌlwok Jerusalén, tajweꞌn yil tzichꞌiw yi jun yi at tulbil, yi sukiꞌnt tan Kataj, chi walnak tzitetz. 5 Na le coboxt kꞌej cxbajok bautizar tan yi porer yi Espíritu Sant, na yi jeꞌn aꞌ ẍchiwiꞌ wunak tan Waꞌn Bautist, aꞌ tuꞌ xcon taꞌn, —stzun Jesús bantz scyetz.
Yi tajeꞌn Jesús tcyaꞌj
6 Itzun yi eꞌ yi ateꞌ-tz nintzun eꞌ octz tan jakleꞌn tetz:
—I bin jaluꞌ Taꞌ, ¿i peꞌ te yi tiempeꞌj yil takꞌuꞌ amaꞌl sketz yi oꞌ aj Israel tan kacawuneꞌn? —cheꞌch tzun tetz Jesús.
7 Stzaꞌwel tzun Jesús chiyol, itzun taltz:
—Nkꞌeꞌtz tajweꞌn tan teleꞌn itxum tetz yi tonaꞌ tzꞌul yi jun tiempaꞌtz, na ntin Kataj ilol tetz, na ntin iꞌ ajcaw teꞌj. 8 Poro yil cuꞌul yi Espíritu Sant tziteꞌj, stkꞌeꞌ iꞌ yi tetz porer tzitetz. Nin tzitxoleꞌwok cyakil yi eꞌchk takleꞌn yi ja itil sweꞌj. Na cxocoponwok tetz instiw tzoneꞌj Jerusalén, tu cyakil Judea tu Samaria. Nin nchaꞌtz xconkwok tetz instiw beneꞌn tziꞌn wi munt, —chij Jesús bantz scyetz.
9 Yi wiꞌt bajeꞌn yolol Jesús yi eꞌchk yolaꞌseꞌj nintzun ajtz tcyaꞌj. Ẍchiwutz cunin yi eꞌaꞌs yi tajeꞌn iꞌ tcyaꞌj. Nin oc jopxujtz tcꞌuꞌl noc sbakꞌ.
10 Ej itzun te yi tajeꞌn iꞌ tcyaꞌj nin te yi cꞌablcheꞌ nin yi eꞌ apostl tan xmayeꞌn, chijeꞌn tzun jobtuj cob yajtz ẍchixoꞌl, sak cuꞌn beꞌch cyetz. 11 Itzun cyal yi cob yajaꞌtz:
—Axwok aj Galilea, ¿nxac na ixmaywok nin tcyaꞌj? na yi Jesúseꞌj yi mmaꞌj ticyꞌleꞌn tcyaꞌj, tzꞌult, quib yi taneꞌn iꞌ yi mmaꞌj tcyaꞌj, inin taneꞌnaꞌs yil tzꞌult, —cheꞌch cob yajaꞌtz bantz.
Yi jeꞌn txaꞌij xel Judas
12 Cyajeꞌn quen tzun yi juꞌwtzaꞌtz yi na biꞌaj Olivo cyakꞌun yi eꞌ apostl. Choꞌn tzun cyoponeꞌntz Jerusalén. Na nakaꞌj cuꞌn xoꞌl. Niꞌcuꞌn tkanil tu yi na tal yi ley yi at cu tan xoꞌmbel jun yaj le jun kꞌej ujleꞌn.
13 Ma yi cyoponeꞌn, chijeꞌn tzuntz le caꞌp chup kale najlcheꞌt. Ej nin yi eꞌ yi ateꞌ-tz iꞌtz: Luꞌ, Jacow, Waꞌn, Leẍ, Liꞌp, nin Maẍ. Nchaꞌtz ateꞌ Bartolomé nin Teꞌy. Nchaꞌtz at Jacow yi cyꞌajl Alfeo, tu Simón jun scyeri eꞌ yi na xom chiwiꞌ te yi partir yi na biꞌaj cananista, tu Judas yi titzꞌun Jacow. Yaꞌstzun eꞌ yi ateꞌ-tz. 14 Cyakil yi eꞌaꞌtz junit ban cyajtzaꞌkl tan nachleꞌn Kataj. Ilenin yaꞌstzun na chiban cyetz. Nin at eꞌ xnaꞌn ẍchixoꞌl. At Mariy yi xtxuꞌ Jesús scyuchꞌ yi eꞌ titzꞌun Jesús.
15 Itzun bantz yi teleꞌn cobox kꞌej nintzun eꞌ cham quib eꞌchk jun cient tu junak loꞌ kajwutz tan nachleꞌn Kataj. Jeꞌn tzun txiclok Luꞌ ẍchixoꞌl, itzun taltz scyetz:
16 “Eꞌuꞌ kajwutz, ja el cuꞌn teꞌj yi xtxolbil yi tzꞌibaꞌnt cyen yi talnak Luwiy tan porer yi Espíritu Sant. Na iꞌ aꞌlon cyen yi mbi sbajok te Judas, yi qꞌuil chibeꞌ yi eꞌ tzꞌamol tetz Jesús. 17 Yi jun Judasaꞌtz iꞌ jun kuchꞌ banak. Iꞌ kloꞌ jun apostl. Nin iꞌ kloꞌ jun skeꞌj te yi akꞌuneꞌj. 18 Poro yi iꞌ tetz ja xom te yi tetz tajbil, na ja lokꞌ jalaj txꞌotxꞌ te yi pwok yi ncambaj te yi til. Nin choꞌn quimeꞌn iꞌ tul yi jalaj txꞌotxꞌaꞌtz. Ej nin yi beneꞌn mal yi cꞌuꞌl ninin jeꞌ katz, nin el tzaj kop yi lasuꞌ wuskil. 19 Ej nin yi quibital cyakil yi eꞌ wunak yi ateꞌ, nintzun oc yi biꞌ yi jun luwaraꞌtz cyaꞌn tetz Acéldama. Yi na elepont, iꞌtz: ‘Jamel Ẍchꞌel jun yaj.’ 20 Nchaꞌtz ja el cuꞌn te yi tzꞌibaꞌnt cyen le liwr Salmos yi na tal:
‘Tajweꞌn yil numeꞌ cyen yi tetz caꞌl,
nin yi cyaꞌl jun snajank txeꞌ.’
Nchaꞌtz tzꞌibaꞌnt cyen:
‘Apart tzꞌicyꞌan nin juꞌ yi tetz munl.’
21 “Chaꞌstzun te eꞌuꞌ kajwutz tajweꞌn yil tzꞌoc xel iꞌ. Poro tajweꞌn jun scyeri eꞌ yi xomcheꞌ nin skeꞌj, te yi at tzaj Jesucristo skaxoꞌl. 22 Tajweꞌn jun yi at nin iꞌ yi jeꞌn aꞌ twiꞌ Kajcaw, jalen cuꞌn yi tajeꞌn iꞌ tcyaꞌj. Na tajweꞌn yil tzꞌoc jun scyeri yi eꞌaꞌtz tetz kuchꞌ tan xtxoleꞌn yi jun cuꞌn itzꞌnak Jesús ẍchixoꞌl almaꞌ,” stzun Luꞌ bantz scyetz.
23 Jeꞌn tzun chitxaꞌol cobtz, iꞌtz Tiꞌẍ tu Ẍep, yi nchaꞌtz na biꞌaj Barsabás, nka Justo. 24 Cyoqueꞌn tzun cyakil yi eꞌaꞌs yi ateꞌ tan nachleꞌn Kataj, itzun cyaltz: “Ma jaluꞌ Taꞌ, na tiluꞌ yi mbi na icyꞌ chicꞌuꞌl cyakil wunak. Ẍchajeꞌuꞌ bin sketz yi naꞌ scyetz jun scyeri cobaꞌtz yi ja jeꞌ xtxaꞌoluꞌ, tan toqueꞌn tetz ẍchakumuꞌ, 25 nin tan toqueꞌn tan banleꞌn yi akꞌun yi ncyaj xtxꞌakbal Judas, yi jun yi ja wiꞌt opon le tetz amaꞌl tan ẍchojleꞌn yi til yi njuch,” cheꞌch tzun bantz tul chiꞌoración.
26 Toqueꞌn tzun txꞌiluꞌntz scyeꞌj yi cobaꞌtz. Choꞌn tzun toqueꞌn lajptz te Tiꞌẍ. Nin ninin tzun oc iꞌ-tz tajlal yi coblaj apostl.