YI BALAJ STZIBLAL YI CYAJNAK CYEN STZꞌIBAL WAꞌN
Yi jun yi tocsaj tib wunak yi na biꞌaj Yol
1
1 Le xeꞌtzbil tzaj at jun yi at nintz yi na biꞌaj Yol. At nin iꞌ-tz tu Ryos, na iteꞌnin Ryosaꞌtz. 2 At nin iꞌ tu Ryos le xeꞌtzbil tzaj. 3 Quiꞌc nin jun takleꞌn yi nkꞌeꞌtz iꞌ bnol tetz, na tan iꞌ mbnixeꞌt cyakil yi eꞌchk takleꞌn yi at. 4 Iꞌ yi itzꞌajbil. Ej nin niꞌcuꞌn iꞌ tu jun txekbil yi na xcyeꞌ tan lajluchaxeꞌn yi bintzi ẍchiwutz cyakil wunak. 5 Ej nin na xcyeꞌ yi jun xtxolbilaꞌtz tan xiteꞌn yi tzꞌoꞌtz wutzil, na quiꞌc rmeril yi nink xcyeꞌ tzꞌoꞌtz wutzil teꞌj.6 Itzun bantz at jun yaj yi saj ẍchakol Ryos. Waꞌn biꞌ. 7 Ul iꞌ tan talcheꞌn stziblal yi at tulbil yi junaꞌtz yi txekbil taneꞌn. Ul tan talcheꞌn stziblal yi jun txekbilaꞌtz, bantz cyocsal cyakil wunak yi xtxolbil yi cyꞌaꞌn taꞌn. 8 Na yi jun Waꞌnaꞌtz, nkꞌeꞌtz iꞌ yi mero txekbil. 9 Ntinaꞌtz takꞌun iꞌ tan talcheꞌn stziblal yi at tulbil yi jun txekbilaꞌtz tzoneꞌj wi munt tan lajluchaxeꞌn yi mero bintzi ẍchiwutz cyakil wunak.
10 Yi jun yi na biꞌaj Yol, choꞌn tulakeꞌn tzoneꞌj wi munt. Ej nin iꞌ bnol tetz cyakil yi at wi munt. 11 Ja ulak iꞌ tan xajseꞌn yi tetz luwar, poro yi eꞌ wunak qui cyakꞌ amaꞌl tetz. 12 Poro cyakil yi eꞌ yi ncyakꞌ amaꞌl tetz, ja tzun takꞌ iꞌ amaꞌl scyetz tan cyoqueꞌn tetz mero meꞌl cyꞌajl Ryos. Na ja cyocsaj yi yol iꞌ. 13 Poro quinin nchoꞌc tetz nitxajil Ryos chi na ban jun tal niꞌ yi na itzꞌij. Nin quinin nchoꞌc tetz nitxajil Ryos tan tuꞌk jun okꞌbeꞌn ib. Nchaꞌtz quinin nchoꞌc tan tuꞌ tajbil jun wunak. Poro Ryos nchoꞌcsan tetz meꞌl cyꞌajl iꞌ.
14 Inti yi junaꞌtz yi na biꞌaj Yol, tocsaj tib tetz wunak, nin najeꞌ cobox kꞌej skaxoꞌl. Ej nin kil yi at tetz kꞌej, na iꞌ yi mero Cyꞌajl Ryos, yi cyꞌaꞌn yi bintzi tu yi banl Kataj taꞌn. 15 Ma yi jun Waꞌnaꞌtz, ntin xcon tan xtxoleꞌn yi balajil iꞌ. Nin je yol iꞌeꞌj: “Yi juneꞌj, yaꞌstzun yi jun yi walnak scyeruꞌ yi at tulbil. Yi in wetz, bajx witzꞌeꞌn, poro at mas kꞌej iꞌ tzinwutz wetz, na at nin iꞌ-tz yi ntaxk nitzꞌij wetz,” stzun Waꞌn.
16 Tan iꞌ kojij tzaj tunin yi banl Kataj skibaj. 17 Yi Moisés xconak tan takꞌleꞌn yi caꞌwl. Poro yi banl Kataj tu yi mero bintzi, Jesucristo ulsan tetz. 18 Cyaꞌl jun tajskeꞌn wutz Ryos, poro ja el katxum tetz tan tuꞌ Jesucristo, na iteꞌnin Ryosaꞌtz. Na yi jun tal ẍutuj Cyꞌajl Ryos yi choꞌn najlij xlaj iꞌ, itzun iꞌaꞌtz nchajon Ryos sketz.
Yi toqueꞌn Waꞌn tan xtxoleꞌn yi balajil Jesucristo
(Mt 3.11-12; Mr 1.7-8; Lc 3.15-17)
19 Itzun yi quibital yi eꞌ judiya yi najlcheꞌ Jerusalén yi mbi na ban Waꞌn Bautist, nin ben chichakol cobox chipaleꞌil scyuchꞌ cobox chichakum yi na chibiꞌaj levita tan jakleꞌn tetz Waꞌn yi ko iꞌ yi Cristo. 20 Chin clar cunin tlol Waꞌn scyetz:
—Yi in wetz, nkꞌeꞌtz in yi Cristo,b —stzun Waꞌn scyetz.
21 Beneꞌnt tzun chijakoltz tetz:
—¿Naꞌ tzun scyetz aẍ? —cheꞌch. —¿Nkꞌeꞌtz peꞌ aẍ kꞌajtzun Elías, yi elsanl stziꞌ Ryos tentz?c
—Quiꞌ. Nkꞌeꞌtz bin in, —stzun Waꞌn.
Nin bent chijakol junt tir tetz:
—¿Nka itzun aẍaꞌtz yi jun elsanl stziꞌ Ryos yi talnak Moisés yi at tulbil?d
—Quiꞌ, —chij Waꞌn.
22 —¿Naꞌ tzun scyetz aẍ? Na chin tajweꞌn cunin tan beneꞌn kucyꞌal atziblal scyetz yi eꞌ yi nkachakon tzaj. Al tzaj sketz naꞌ scyetz aẍ.
23 —I bin inaꞌtz yi jun yi na ẍchꞌin tul yi amaꞌl tzꞌinunin tuꞌ. Nin na chintzan tan talcheꞌn yi xtxolbileꞌj: ‘Chibneꞌ list quibuꞌ tan cꞌulcheꞌn yi Ajcaw yi at tulbil. Chinuqꞌueꞌuꞌ cyajtzaꞌkluꞌ, chi na oc nucꞌleꞌn jun beꞌ yi at tulbil jun yi at kꞌej,’ chi yi cyajnak stzꞌibal Isaías jun scyeri eꞌ elsanl stziꞌ Ryos tentz.e
24 Yi eꞌaꞌtz yi eꞌ opon tan ẍchꞌoteꞌn stziꞌ Waꞌn, chakij cheꞌ cyakꞌun yi eꞌ parisey. 25 Cyoqueꞌn tzuntz tan jakleꞌn junt tir tetz iꞌ:
—Yi ko nkꞌeꞌtz aẍ yi Cristo, nin ko nkꞌeꞌtz aẍ Elías, nin yi ko nkꞌeꞌtz aẍ yi jun elsanl stziꞌ Ryos yi at tulbil, ¿nxac tzun na cẍtzantz tan jeꞌseꞌn aꞌ ẍchiwiꞌ wunak? —cheꞌch bantz tetz.
26 —Bintzi na chintzan tan jeꞌseꞌn aꞌ ẍchiwiꞌ wunak, poro at junt skaxoꞌl yi txeꞌn cyechuꞌ wutz. Nin yaꞌstzun yi jun yi at mas kꞌej. 27 Yi in wetz, bajxchin swutz, poro at mas kꞌej iꞌ tzinwutz wetz, na iẍnin at iꞌ-tz yi ntaxk nuꞌl itzꞌok wetz. Quiꞌc muꞌẍ tal wetz inkꞌej siquier tan pujleꞌn wutz yi xajab iꞌ, —stzun Waꞌn bantz scyetz.
28 Cyakil yi eꞌchk takleꞌneꞌj, choꞌn bajeꞌn lilen Betania, jalaj icyꞌen yi aꞌ Jordán, kale oqueꞌnt Waꞌn tan jeꞌseꞌn aꞌ ẍchiwiꞌ wunak.
Yi katxꞌixwatz yi ntakꞌ Ryos sketz
29 Itzun bantz le junt eklok, beneꞌn tzun tilol Waꞌntz yi txant tan tuleꞌn Jesús teꞌj, nintzun taltz:
—Chixmay ninuꞌ yi yaj yi tzꞌuleꞌj. Ryos nchakon tzaj tan xconeꞌn tetz katxꞌixwatz. 30 Chinachonkuꞌ te yi xtxolbil yi walnak scyeruꞌ: ‘Yi in wetz, bajx witzꞌeꞌn, poro at mas kꞌej yi jun yi at tulbil tzinwutz wetz, na iẍnin at iꞌ yi ntaxk nitzꞌij,’ chinch ban scyeruꞌ. 31 Nchaꞌtz in, qui wajskeꞌn wutz iꞌ, poro yi weri inmunl iꞌtz tan jeꞌseꞌn aꞌ ẍchiwiꞌuꞌ, bantz cyechaluꞌ wutz iꞌ.
32 Nchaꞌtz tal Waꞌn scyetz:
—Wilnak yi sajeꞌn yi Espíritu Sant tcyaꞌj. I cunin plomẍ taneꞌn yi cweꞌn muleꞌn. Choꞌn cyajeꞌn cyen teꞌj. 33 Yi ntaxk ẍchaj tib yi eꞌchk takleꞌnaꞌtz tzinwutz, nchaꞌtz in, qui el intxum tetz naꞌ scyetz iꞌ. Poro yi jun yi nchinchakon tzaj tan jeꞌseꞌn aꞌ ẍchiwiꞌuꞌ, yaꞌstzun yi jun yi aꞌlon yi xtxolbil swetz: ‘Yil tzawil nin yi Espíritu Sant yil cuꞌul tibaj jun yaj, nin lcyaj cyen teꞌj, yaꞌstzun yi jun yi tzꞌocopon tan chibanleꞌn bautizar yi eꞌ wunak tan yi Espíritu Sant,’ stzun iꞌ ban swetz. 34 Yi in wetz ja wiꞌt wil yi xtxolbileꞌj. Chaꞌstzun te na walnin scyeruꞌ: Yi juneꞌj, iꞌ yi Cyꞌajl Ryos, —stzun Waꞌn bantz scyetz.
Yi eꞌ bajx ẍchusbeꞌtz Jesús
35 Itzun bantz le junt eklok, at nin Waꞌntz le amaꞌl kale atiteꞌt, nin nchaꞌtz ateꞌ cobt yaj yi xomcheꞌ nin teꞌj. 36 Yi beneꞌn tilol Waꞌn yi ticyꞌeꞌn cuꞌn Jesús, nintzun ben tloltz scyetz yi cob yajaꞌtz:
—Quilninuꞌ yi jun yajeꞌj yi ja icyꞌ tzineꞌj, yaꞌstzun katxꞌixwatz yi ntakꞌ Ryos sketz.
37 Yi quibital yi cob yajaꞌtz yi xomcheꞌ te Waꞌn, nintzun eꞌ ben xomok wutz coc Jesús. 38 Ma yi ticyꞌeꞌn xmayil Jesús wutz coc, xomcheꞌ yi cob ẍchusbeꞌtz Waꞌn wutz coc iꞌ. Beneꞌn tzun jakol scyetz:
—¿Mbi na chijoyuꞌ?
—Na kaj kajskej naꞌ najleꞌtuꞌ, —cheꞌch bantz tetz.
39 —Or cyeruꞌ, tzinchajeꞌ scyeruꞌ, —chij Jesús bantz scyetz.
Chibeneꞌn tzun kale najleꞌt. Nin ntaꞌtz nin eꞌ cyaj cyent, na nsken loꞌ opon cyaj chꞌichꞌ cuꞌlbeꞌn kꞌej. 40 Leẍ biꞌ jun scyeri yi cobaꞌtz yi eꞌ xom nin te Jesús, nin iꞌ yi titzꞌun Simón Luꞌ. 41 Ej nin yi ntaxk oc iꞌ tan xtxumleꞌn jun takleꞌn, nin ben lajkeꞌl tan joyleꞌn Simón yi stzicy. Itzun taltz tetz:
—Ja jal yi Mesías kaꞌn. (Yi na elepont yi yol Mesías, iꞌtz yi Cristo, yi bixbaꞌnt tan Kataj.)
42 Beneꞌn tzun tcyꞌal Leẍ yi Simóntz swutz Jesús. Nin yi tilol Jesús yi Simón, itzun taltz tetz:
—I aẍaꞌtz aẍ Simón, yi cyꞌajl Jonás. Poro yi jaluꞌ tzintxꞌixpeꞌ yi abiꞌ. Tzꞌocopon tetz Cefas, —stzun Jesús bantz tetz. (Yi biꞌaj Cefas, na elepont Luꞌ.)
Yi beneꞌn moxol Jesús yi Liꞌp tu Natanael
43 Itzun bantz le junt eklok, nin cu xtxumul Jesús tan beneꞌn le amaꞌl yi na biꞌaj Galilea. Yi tponeꞌn, nintzun noj quen iꞌ-tz te Liꞌp. Itzun taltz tetz:
—Or awetz, xom nin sweꞌj, —stzun Jesús tetz.
44 Yi jun Liꞌpaꞌtz, choꞌn najlij le jun tnum yi na biꞌaj Betsaida, kale najlcheꞌt Leẍ tu Luꞌ. 45 Beneꞌn tzun iꞌ tan joyleꞌn junt yaj yi na biꞌaj Natanael, nintzun taltz:
—Ja wiꞌt kech wutz yi jun yi talnak Moisés scyuchꞌ yi eꞌ elsanl stziꞌ Ryos tentz yi at tulbil. Iꞌtz Jesús yi cyꞌajl Ẍep yi aj Nazaret.
46 —¿Ẍeꞌn tzuntz? —chij Natanael. —Iẍkaj at tzunk rmeril tan jaleꞌn jun balaj yaj ẍchixoꞌl yi eꞌ aj Nazaret.
—Or awetz, quin kaxmayeꞌ, —stzun Liꞌp bantz tetz.
47 Yi tilol Jesús yi txant tan tuleꞌn Natanael te iꞌ, nintzun ben tloltz:
—Je jun yajeꞌj yi tzꞌul tziꞌneꞌj. Iꞌ jun mero xonl Israel, na nkꞌeꞌtz subulnak iꞌ, —stzun Jesús.
48 —¿Ẍeꞌn mmeꞌl xtxumuꞌ swetz? na qui tajskeꞌn tib kawutz tuchꞌuꞌ, —stzun Natanael tetz Jesús.
—Te yi atiẍ jakꞌ yi jun wiꞌ ibẍ, ej nin yi ntaxk xaꞌk Liꞌp tan achakleꞌn, nsken wajskej awutz, —stzun Jesús bantz tetz.
49 —Taꞌ, —chij Natanael. —Iluꞌ bin yi mero Cyꞌajl Ryos. Iluꞌ kareyil, yi oꞌ xonl kꞌajtzun kamam Israel.
50 —¿Ja peꞌ chin awocsaj tan tuꞌ yi nwal tzatz, yi choꞌn atiẍ xe jun wiꞌ ibẍ? Poro tzantzaj tzawileꞌ eꞌchk takleꞌn yi cẍelepon yab teꞌj.
51 Beneꞌn tzun tlol Jesús tetz:
—Jun cuꞌn yol na wal nin tzitetz. Tzitileꞌwok yi sjakxok yi puertil tcyaꞌj, nin tzitileꞌ yi eꞌ ángel tetz Ryos yil chuꞌl ajeꞌn sweꞌj, yi in wetz yi in yi Bajx Cyꞌajol.