Yi ẍeꞌn cuꞌn ban yi titzꞌeꞌn Jesús
(Mt 28.1-10; Mr 16.1-8; Jn 20.1-10)
24
1 Itzun bantz tcꞌuꞌl yi bajx kꞌej te sman, chin jalchan cunin chipakxeꞌn yi eꞌ xnaꞌnaꞌtz kale oc cyent yi wankil Jesús. Cyꞌaꞌn yi tzꞌacꞌbil cyaꞌn yi wiꞌnin cꞌoꞌcal. Nchaꞌtz nin eꞌ xomnin mas xnaꞌn scyeꞌj. 2 Ma yi cyoponeꞌn te yi jul, nsken el toliꞌn yi cꞌub yi oc tan jopleꞌn tzi jul. 3 Cyoqueꞌn tzuntz tjul, poro quil yi quiꞌct yi wankil Kajcaw Jesús at. 4 Wiꞌnin cyeleꞌn yab teꞌj. Nin quiꞌt nin jal puntil cyaꞌn yi ẍeꞌn chiban. Beneꞌn tzun quilol cob yaj txiclcheꞌ chixlaj. Chin pakꞌpuch nin beꞌch cyetz. 5 Nin tan paj yi xoꞌw yi ateꞌ cuꞌnt tajeꞌn cuꞌn tzun chiwutz wuxtxꞌotxꞌ.—¿Mbi na chijoy tzajuꞌ tzoneꞌj chixoꞌl almaꞌ tan joyleꞌn jun yaj yi itzꞌ? 6 Quiꞌct teꞌtz at tzoneꞌj. Ja itzꞌij junt tir teꞌtz. Ulk txꞌakxuj ẍchicꞌuꞌluꞌ yi mbi cuꞌn xtxolnak scyeruꞌ yi at tzaj iꞌ Galilea. 7 Na talnak iꞌ: ‘Yi in wetz, yi in Bajx Cyꞌajol, chin tajweꞌn cunin chinjatxlij ẍchikꞌab yi eꞌ mal wunak. Chinquimok cyaꞌn swutz pasyon. Ma le toxiꞌn kꞌej nitzꞌok junt tir ẍchixoꞌl almaꞌ,’ chij iꞌ banak cyen, —cheꞌch yi cob yajaꞌtz bantz.
8 Kalenaꞌs tzun tuleꞌnt txꞌakxuj ẍchicꞌuꞌl yi yol Jesús yi talnak scyetz. 9 Ma yi cyajeꞌn tzaj tzi jul, choꞌn cyoponeꞌntz tan talcheꞌn stziblal scyetz yi junlaj apostl scyuchꞌ eꞌ mas ẍchusbeꞌtz. 10 Yi eꞌ xnaꞌn yi eꞌ ẍchaꞌk tzaj tan talcheꞌn stziblal scyetz yi eꞌ apostl iꞌtz Luꞌch Mat, nin Chaꞌn, tu Luꞌch yi xtxuꞌ Jacow. 11 Poro yi eꞌ apostl quinin cyocsaj chiyol yi eꞌ xnaꞌnaꞌtz, na le wutz cyetz cyajtzaꞌkl yi ja oc xyaꞌywiꞌil chiwiꞌ.
12 Poro yi Luꞌ, lajkeꞌl nin teleꞌn tzaj tan beneꞌn tan xmayeꞌn kale oc cyent Jesús. Yi toqueꞌn xmayil tul jul, jalt cuntuꞌ yi xbuꞌkwokl cyen. Tajeꞌn tzun iꞌ xe caꞌl. Wiꞌnin txumuꞌn at cuꞌnt te yi mbi cuꞌn bajij te Jesús.
Yi ẍchajol tib Jesús le beꞌ Emaús
(Mr 16.12-13)
13 Iteꞌn nin kꞌejaꞌtz cyajeꞌn cobt ẍchusbeꞌtz le tnum Emaús. Eꞌchk ox loꞌ ujlub xoꞌl tu Jerusalén. 14 Nin te yi na chixon tbeꞌ, na chijilon te yi mbi cuꞌn bajij te Jesús. 15 I cunin na chitzan tan xtxꞌolcheꞌn xoꞌl chiyol yi tponeꞌn ẍkansal tib Jesús scyeꞌj. Nin ben cyokꞌbel quibtz. 16 Poro qui nin cyech wutz yi ko iꞌtz Jesús, na jopij chiwutz tan Ryos taneꞌn.
17 Toqueꞌn tzun Jesús tan jakleꞌn scyetz:
—¿Mbi na chitzanuꞌ tan yolcheꞌn yi na chixonuꞌ tbeꞌ, nin mbi na chibislejuꞌ? —stzun Jesús scyetz.
18 Sajeꞌn tzun stzaꞌwel jun yi na biꞌaj Cleofas. Itzun ben tlol tetz Jesús:
—Quiꞌc nin jun wunak yi quiꞌk ntbit yi mbi cuꞌn bajij Jerusalén ewt cubit. ¿Ẍeꞌn ban yi quinin tbituꞌ yi xtxolbileꞌj, na choꞌn bin loꞌ atuꞌ tnum? —cheꞌch tetz Jesús.
19 —¿Poro mbi xtxolbilil? —stzun Jesús scyetz.
—I bin yi xtxolbil tetz Jesús aj Nazaret. Elsanl stziꞌ Ryos iꞌ. Wiꞌnin milawr bnix taꞌn. Ej nin chumbalaj nin iꞌ swutz Ryos. Xtxolbil cuꞌn jilon iꞌ ẍchiwutz cyakil wunak. 20 Poro yi eꞌ wiꞌtz paleꞌ scyuchꞌ eꞌ wiꞌ banl kawiꞌ ja el chijatxol tan quimeꞌn swutz pasyon. 21 Wech na sken kꞌukeꞌ ketz kacꞌuꞌl teꞌj yi ja kloꞌ koꞌ colpij yi oꞌ aj Israel taꞌn. Poro mbi nin ban, ja wiꞌt el oxix kꞌej yi quimleꞌn iꞌ swutz pasyon. 22 Poro wiꞌnin na keꞌl yab te jun xtxolbil yi nkubit, na at cobox kaxnaꞌnil yi nẍchaꞌk maꞌs jalchan kale mukxeꞌt cyen. 23 Poro quinin jal yi wankil iꞌ cyaꞌn. Nin ja chipakxij tan talcheꞌn sketz yi ja chichaj quib cob ángel ẍchiwutz, nin ja aꞌlchij scyetz yi ja itzꞌij junt tir yi Jesúsaꞌtz. 24 Nchaꞌtz at cobox kuchꞌ yi nchibentz tan xmayeꞌn. Ej nin quib taneꞌn chiyol yi xnaꞌn yi ncyal, inin taneꞌnaꞌtz yi nchocopon cyetz tjul. Poro yi Jesús, quiꞌct at. Quinin quil wutz, —cheꞌch bantz tetz Jesús.
25 Beneꞌn tzun tlol Jesús scyetz:
—Lastum yi quinin na pujxoꞌk itaꞌn. ¿Nxac qui na itocsaj cyakil yi tzꞌibaꞌnt cyen cyakꞌun eꞌ elsanl stziꞌ Ryos tentz? 26 Na tzꞌibaꞌnt cyen cyaꞌn yi ntaxk jal kꞌej yi Cristo, tajweꞌn cuꞌn tan ticyꞌeꞌn poneꞌn yi eꞌchk qꞌuixcꞌujaꞌtz taꞌn.
27 Toqueꞌn tzuntz tan xtxꞌolcheꞌn xoꞌl cyakil eꞌchk xtxolbil yi tzꞌibaꞌnt cyen te iꞌ. Ja xeꞌtij te eꞌchk xtxolbil yi tzꞌibaꞌnt cyen tan Moisés. Ej nin baj xtxolil cyakil yi eꞌchk xtxolbil yi tzꞌibaꞌnt cyen cyakꞌun yi eꞌ elsanl stziꞌ Ryos.
28 Ma yi cyoponeꞌn le aldey kale atit cyopombil, chij tunin Jesús yi ticyꞌeꞌn kloꞌ. 29 Poro yi eꞌ cyetz nin eꞌ octz tan moxeꞌn tan cyajeꞌn cyen scyeꞌj. Itzun cyaltz:
—Taꞌ, txant tan toqueꞌn akaleꞌn. Baꞌn tcuꞌn cyajkuꞌ skeꞌj.
Toqueꞌn tzun Jesús xe caꞌl tan cyajeꞌn cyen scyuchꞌ.
30 Nin yi nsken cꞌoleꞌ Jesús wi mes scyuchꞌ yi cob yajaꞌtz, jeꞌn tzun stzꞌamol yi pam, nin tyoẍintz tibaj. Cweꞌn tzun piẍultz nin ben tkꞌoltz scyetz. 31 Kalenaꞌs tzun cyechal wutz iꞌ, poro nin cuꞌ sotzal tib Jesús ẍchiwutz.
32 —Ah, —cheꞌch. —Bintzinin, wiꞌnin katzatzineꞌn yi njilon sketz tbeꞌ. Ej nin wiꞌnin katzatzineꞌn yi moꞌc iꞌ tan xtxꞌolcheꞌn xoꞌl yi tzꞌibaꞌnt cyen, —cheꞌch squibil quib.
33 Quiꞌt nin eꞌ cꞌoleꞌ jun rat. Jalcunin chipakxeꞌntz Jerusalén. Choꞌn tzun cyoponeꞌntz kale ateꞌt yi junlaj apostl scyuchꞌ yi eꞌ yi ateꞌ scyeꞌj.
34 Nin yi cyoponeꞌn, nintzun cyal yi eꞌ apostl scyetz yi cob yajaꞌtz:
—Jun cuꞌn yol, ja itzꞌij Kajcaw junt tir, na ja iꞌlwij wutz iꞌ tan Simón, —cheꞌch bantz.
35 Nchaꞌtz iteꞌn nin xtxolbilaꞌtz cyal yi cob yajaꞌtz. Na ja chitxol yi ẍeꞌn cuꞌn ẍchajol tib Jesús ẍchiwutz tbeꞌ. Ej nin yi ẍeꞌn cuꞌn cyechal wutz iꞌ yi cweꞌn piẍul yi pam.
Yi ẍchajol tib Jesús ẍchiwutz yi eꞌ ẍchusbeꞌtz
(Mt 28.16-20; Mr 16.14-18; Jn 20.19-23)
36 I cunin na chitzan tan yolcheꞌn yi xtxolbilaꞌseꞌj yi jeꞌn jobtuj Jesús ẍchixoꞌl. Toqueꞌn tzun iꞌ tan yol scyetz, itzun taltz:
—Quech, ¿baꞌn peꞌ iwutz?
37 Wiꞌnin chixobeꞌn, na le wutz cyetz cyajtzaꞌkl yi iꞌtz jun lab.
38 —¿Mbi na ixoꞌwlej? ¿Nxac na icabej icꞌuꞌl sweꞌj? 39 Xmaywok tzaj inkꞌab. Xmaywok tzaj wukan. I inaꞌtz. Macwok octzaj yi inwankil. Nqueꞌnwok tan xtxumleꞌn: Jun lab, quiꞌc wankil chi wutaneꞌn wetz.
40 Te yi na tzan tan xtxoleꞌn nin, na nin tzantz tan ẍchajleꞌn nin yi kꞌab tu yi tkan. 41 Poro yi eꞌ cyetz, quinin cyocsaj cunin tan paj yi tzatziꞌn yi ateꞌ cuꞌnt. Ej nin tan paj yi quinin pujx cyakꞌun. Chaꞌstzun te beneꞌn tlol Jesús scyetz:
—¿Qui pel jal jun tkan inwaꞌ tzituchꞌ?
42 Nintzun saj cyakꞌol jun piẍ cay tetz, yi boxijt, tu jun letxaj tꞌaꞌal cabil wunak txuc. 43 Sajeꞌn tzun stzꞌamol iꞌ, nin ẍchiwutz cuꞌn yi toqueꞌn tan bajseꞌn. 44 Itzun taltz scyetz:
—Ma jaluꞌ, cyakil yi xtxolbilaꞌtz yi mbajij sweꞌj, alijt waꞌn tzitetz, yi chin tajweꞌn cuꞌn tan teleꞌn cuꞌn teꞌj. Na chin tajweꞌn cunin tan teleꞌn cuꞌn te cyakil yi eꞌchk xtxolbil yi tzꞌibaꞌnt cyen tan Moisés, scyuchꞌ yi eꞌ elsanl stziꞌ Ryos, tu cyakil yi tzꞌibaꞌnt cyen le liwr Salmos,a —stzun Jesús scyetz.
45 Toqueꞌn tzun iꞌ-tz tan xtxꞌolcheꞌn xoꞌl cyakil yi yol yi tzꞌibaꞌnt cyen, tan teleꞌn pacx wutz cyajtzaꞌkl.
46 —Ilwok cuꞌneꞌj, —chij. —Tzꞌibaꞌnt cyen yi chin tajweꞌn cunin tan inquimeꞌn, na i inaꞌtz in Cristo. Ej nin alijt cyen yi nitzꞌokt junt tir le toxiꞌn kꞌej ẍchixoꞌl almaꞌ. 47 Ej nin nchaꞌtz, tzꞌibaꞌnt cyen yi chin tajweꞌn cunin tan xtxoleꞌn intziblal scyetzak cyakil jilwutz wunak beneꞌn tziꞌn wi munt. Choꞌn xeꞌtok le tnum Jerusalén. Ej nin yi xtxolbil yi tzitxoleꞌ, iꞌtz yi chin tajweꞌn cunin tan chitxꞌixpul wunak cyajtzaꞌkl,b bantz jaleꞌn cuybil chipaj. 48 Ma jaluꞌ yi axwok itetz, axwok stiw te cyakil yi mbi cuꞌn mbajij, na ja itil. 49 Ej nin tzinchakeꞌ tzaj yi jun yi alijt cyen tan Intaj yi at tulbil. Poro chin tajweꞌn cunin tan icyajeꞌn cyen tzoneꞌj Jerusalén tan ẍchꞌiweꞌn jalen cuꞌn yil cuꞌul yi porer Kataj tziteꞌj, —stzun Jesús bantz scyetz.
Yi tajeꞌn Jesús tcyaꞌj
(Mr 16.19-20)
50 Cheꞌ beneꞌn tzun tcyꞌal Jesús solteꞌj len tnum. Choꞌn tzun cyoponeꞌntz Betania. Jeꞌn tzun tkꞌol yi kꞌabtz squibaj tan tkꞌol yi banl squibaj. 51 Yi wiꞌt tkꞌol iꞌ yi banl scyetz, nin el jatxol tibtz scyeꞌj. Ajeꞌn nin ban ticyꞌleꞌn iꞌ-tz tcyaꞌj. 52 Cyoqueꞌn tzun yi eꞌ ẍchusbeꞌtz tan cꞌuꞌlajeꞌn iꞌ. Ma stzajeꞌn wiꞌ, nintzun eꞌ pakxij jalen Jerusalén. Wiꞌnin chitzatzineꞌn yi chipakxeꞌnt. 53 Nin ateꞌ cuntunintz le templo cyakil kꞌej tan takꞌleꞌn chikꞌajsbil tetz Kataj Ryos. Amén.