Yi tponeꞌn Jesús swutz Pilat
(Mt 27.1-2, 11-14; Mr 15.1-5; Jn 18.28-38)
23
1 Chibaj beneꞌn tzun tan takꞌleꞌn Jesús swutz Pilat. 2 Yi cyoponeꞌntz nin eꞌ oc tan xochleꞌn quen. Itzun cyaltz:—Ma jaluꞌ Taꞌ, ja bin saj katzꞌamol yi juneꞌj yi na tzan tan joyleꞌn juꞌ tan jaleꞌn oyintziꞌ le katanum. Na tzan iꞌ tan talcheꞌn scyetz wunak yi qui tajweꞌn tan cyakꞌol yi cutxuj tetz César. Nchaꞌtz na tal yi iꞌ yi Cristo. Yi na elepont yi iꞌ jun rey taneꞌn, —cheꞌch tzun bantz.
3 —¿Aẍ peꞌ chireyil yi eꞌ judiy? —stzun Pilat bantz tetz Jesús.
—I inaꞌtz, chi na tal tzajuꞌ.
4 Jiloneꞌn tzun Pilat scyetz yi eꞌ wiꞌtz paleꞌ scyuchꞌ yi eꞌ wunak. Itzun taltz:
—Tzinwutz wetz, yi yajeꞌj quiꞌc muꞌẍ til.
5 Ma yi eꞌ cyetz, mas tcunin eꞌ octz tan talcheꞌn nin:
—Quiꞌ Taꞌ. Tan yi tetz ẍchusuꞌn na tzan tan tocseꞌn chicꞌuꞌl cyakil yi eꞌ aj Judea tan oyintziꞌ scyeꞌjuꞌ. Choꞌn xeꞌteꞌn tzaj iꞌ jalen Galilea tan tocseꞌn chicꞌuꞌl wunak. Ej nin na nin tzaneꞌt iꞌ tan banleꞌn tzoneꞌj, —cheꞌch.
Yi tponeꞌn Jesús swutz Herodes
6 Yi tbital Pilat yi xtxolbileꞌj, nin octz tan jakleꞌn ko aj Galilea Jesús. 7 Yi tbital yi aj Galilea iꞌ, nintzun ben ẍchakol swutz Herodes, na iꞌ ajcaw squibaj yi eꞌ aj Galilea. Ej nin noj quen cuꞌntz teꞌj yi choꞌn taꞌteꞌn cobox kꞌej Herodes Jerusalén. 8 Yi beneꞌn tilol Herodes wutz Jesús, wiꞌnin tzatzineꞌn. Na alaꞌix kꞌej yi yaꞌstzun tajbil iꞌ tan techal wutz. Nsken tbit yi stziblal Jesús, nin yi tajbil iꞌ iꞌtz yi nink ẍchaj Jesús jun milawr swutz cuꞌn iꞌ. 9 Wiꞌnin eꞌchk yol baj jakol tetz Jesús, poro siquier nink jun yol ben stzaꞌwel. 10 Nchaꞌtz ateꞌ yi eꞌ wiꞌtz paleꞌ, scyuchꞌ yi eꞌ txꞌolol xoꞌl yi ley Moisés. Quinin eꞌ taneꞌ tan takꞌleꞌn til Jesús. 11 Nchaꞌtz Herodes scyuchꞌ yi eꞌ sanlar nin eꞌ octz tan telseꞌn kꞌej Jesús. Nin oc cyakꞌol jun balaj beꞌch tetz jun rey teꞌj, tan chitzeꞌeneꞌn te iꞌ. Beneꞌn tzun ẍchakol Herodes junt tir swutz Pilat. 12 Te jun kꞌejaꞌtz jalt tzatzin paz ẍchixoꞌl Herodes tu Pilat, wech na chicontr quib sajleꞌn tunintz.
Yi bixeweꞌn tan cweꞌn biyij Jesús
(Mt 27.15-26; Mr 15.6-15; Jn 18.39-19.16)
13 Toqueꞌn tzun Pilat tan chichakleꞌn cyakil yi eꞌ wiꞌtz paleꞌ scyuchꞌ yi eꞌ wiꞌ banl wiꞌ nin cyakil yi eꞌ wunak. Itzun taltz scyetz:
14 —Ja ul quicyꞌaluꞌ yi yajeꞌj tzinwutz. Nin na cyaluꞌ yi na tzan iꞌ tan tocseꞌn chicꞌuꞌl wunak tan oyintziꞌ skeꞌj. Ej nin ja quibituꞌ yi nnoꞌc tan ẍchꞌoteꞌn stziꞌ iꞌ. Poro ja quiluꞌ yi quiꞌc nin til na jal waꞌn te yi eꞌchk xtxolbilaꞌtz yi ncyaluꞌ swetz. 15 Nchaꞌtz Herodes, qui loꞌ njal til taꞌn na ja bin sajt ẍchakol junt tir tzinwutz. Chitxum cunuꞌ. Quiꞌc tetz til tan cweꞌn kabiyol. 16 Ntinaꞌtz tzimbneꞌ teꞌj, swakꞌeꞌ muꞌẍ caws, nin tzꞌelepon waꞌn liwr, —stzun Pilat scyetz cyakil wunak.
17 Yaꞌstzun xtxum Pilat, na at jun cstumbr yi xom iꞌ teꞌj. Iꞌtz yi lakak lmak kꞌej na stzakplen iꞌ jun pres. 18 Poro nin eꞌ ẍchꞌin cyakil wunak:
—Qui na kaj yil tzꞌel liwr yi juneꞌj. Baꞌn tcuꞌn stzakplenuꞌ Barrabás, —cheꞌch tzun bantz.
19 Poro choꞌn at tetz Barrabás xetzeꞌ tan paj yi iꞌ jun joyol juꞌ oyintziꞌ te yi gobierum. Ej nin tan paj yi biyol nak iꞌ. 20 Poro yi tajbil tetz Pilat iꞌtz tan teleꞌn kloꞌ Jesús liwr. Toqueꞌn tzun junt tir tan yol scyetz. 21 Poro yi eꞌaꞌtz mast cunin na chiẍchꞌin:
—Jeken swutz pasyon, jeken swutz pasyon, —cheꞌch na ban nintz.
22 Toqueꞌn tzun Pilat tan yol scyetz le toxiꞌn tir:
—¿Mbi tzuntz? ¿Mbi til scyeruꞌ? Yi in wetz qui na jal til waꞌn tan cweꞌn kabiyol. Swakꞌeꞌ bin muꞌẍ caws nin tzꞌelk waꞌn liwr, —stzun Pilat scyetz.
23 Poro yi eꞌ wunak quinin eꞌ taneꞌ tan talcheꞌn yi tajweꞌn tan jeꞌn swutz pasyon. Nchaꞌtz eꞌ ban yi eꞌ wiꞌtz paleꞌ. 24 Chaꞌstzun te tkꞌol Pilat amaꞌl scyetz tan banleꞌn cyajbil. 25 Chaꞌstzun te teleꞌn stzakpul Pilat yi jun yaj yi at xetzeꞌ, yi joyol juꞌ oyintziꞌ te gobierum, nin biyol nak. Nintzun el jatxol Pilat yi Jesús ẍchikꞌab tan quicyꞌsal chicꞌuꞌl teꞌj.
Yi quimeꞌn Jesús swutz Pasyon
(Mt 27.32-44; Mr 15.21-32; Jn 19.17-27)
26 Itzun bantz yi na tzan nin ticyꞌleꞌn Jesús tan jeꞌn swutz pasyon, at tzun jun aj Cirene yi na biꞌaj Simón. Choꞌn xaꞌkeꞌn iꞌ xoꞌl wutz. Xtxꞌamxeꞌn tzuntz cyakꞌun yi eꞌ sanlar. Nin oc chipachꞌul tzakꞌ yi pasyon yi cyꞌaꞌn tan Jesús. Nintzun bajx cuꞌn Jesús swutz.
27 Nchaꞌtz wiꞌnin wunak xomcheꞌ scyeꞌj. Nin at wiꞌnin xnaꞌn yi wiꞌnin cyokꞌeꞌn tan bis te Jesús. 28 Cheꞌ beneꞌn tzun xmayil Jesús nin ben tlol scyetz:
—Eꞌuꞌ xnaꞌn aj Jerusalén, quil chokꞌuꞌ sweꞌj. Baꞌn tcuꞌn chibisunkuꞌ te yi bis oꞌkl yi tzꞌul squibuꞌ nin squibaj chinitxajiluꞌ. 29 Na at tulbil chicawsuꞌ. Yil tzꞌul jun kꞌejaꞌtz scyaleꞌuꞌ: ‘Baꞌn cyeri eꞌ yi quiꞌc rmeril tan jaleꞌn chinitxaꞌ. Baꞌn cyeri yi eꞌ yi qui na cyekaj pwokil jun niꞌ. Baꞌn cyeri yi eꞌ yi quiꞌc niꞌ na txutxun scyeꞌj.’ 30 Tan paj yi chicawsuꞌ, chocoponuꞌ tan talcheꞌn: ‘Niluꞌnk tzaj yi wiꞌwtz skibaj.’ Ej nin nchaꞌtz scyaleꞌuꞌ: ‘Niluꞌnk tzaj yi eꞌchk juꞌwtz skibaj,’ cheꞌchuꞌ sbneꞌ. 31 Ma yi in wetz, ja chiꞌch chicꞌuꞌl yi eꞌ aj Roma sweꞌj, wech quiꞌc wetz wil ẍchiwutz. Ko yaꞌtz na chiban sweꞌj inin tzun pyor ẍchibneꞌ scyeꞌjuꞌ yil jal quiluꞌ ẍchiwutz, —stzun Jesús bantz scyetz.
32 Nchaꞌtz ben quicyꞌal cob mal nak tan chicweꞌn biyij tu Jesús. 33 Yi cyoponeꞌn le amaꞌl yi na biꞌaj Wi Bakil Wiꞌbaj, jeꞌn tzun Jesús cyaꞌn swutz pasyon. Nchaꞌtz eꞌ ban yi cob mal wunak. Choꞌn jeꞌn jun le sbal Jesús nin junt le max. 34 Te yi na chitzan tan jeꞌseꞌn Jesús swutz pasyon nintzun taltz:
—Taꞌ, cuyuꞌ chipaj, na quinin tzꞌicyꞌ scyetz yi mbi na chitzan tan bajeꞌn.
Ma yi eꞌ sanlar nin eꞌ oc tan txꞌiluꞌn te beꞌch tetz Jesús tan cweꞌn chijatxol ẍchiwutz. 35 Ej nin wiꞌnin wunak ateꞌ tan xmayeꞌn Jesús. Nchaꞌtz yi eꞌ ajcaw, na chixcyꞌaklin nin tetz. Itzun na cyaltz:
—Ja xcyeꞌ-x tan chicolpeꞌn wiꞌnin wunak. Ma jaluꞌ, ko bintzinin iꞌ-x yi Cristo, yi jun yi txaꞌijt tan Ryos, xcyek binaꞌs tan colpil tib, —cheꞌch tzun yi eꞌ ajcawaꞌtz squibil quib.
36 Nin iteꞌn nin eꞌ ban yi eꞌ sanlar. Na nin eꞌ oc tan xcyꞌaklil te Jesús. Na nin eꞌ ocopontz nakaꞌj tan sukeꞌn nin vinagr tetz.
37 —Ko i aẍaꞌtz yi chireyil yi eꞌ judiy, colp cuꞌn tzaj awib, —cheꞌch eꞌ sanlaraꞌtz tetz.
38 Ej nin nchaꞌtz at tzun yol yi jeꞌ tzꞌibaꞌn swiꞌeꞌn iꞌ. Ox cuꞌn jilwutz yol jeꞌ chitzꞌibal nin iꞌtz griego, latín, tu hebreo. Je tzun na tal yi jeꞌ chitzꞌibal: “Yi juneꞌj yaꞌstzun chireyil yi eꞌ judiy.”
39 Na tzun xcyꞌaklin cyꞌen jun scyeri yi eꞌ mal nak yi jeꞌ chꞌimbaꞌn xlaj iꞌ. Itzun taltz:
—Yi ko bintzinin aẍ yi Cristo, colp cuꞌn awib. Ej nin colp cuꞌn yi oꞌ ketz, —stzun iꞌ bantz.
40 Ma yi junt, nin oc tan yajleꞌn yi tuchꞌ, nin taltz tetz:
—¡Yaj! ¿qui peꞌ na awek ẍchiꞌ Ryos? na nchaꞌtz oꞌ quimich tlentuꞌ atoꞌt tan kil. 41 Colon skeꞌj ketz, na kil nin keꞌtz na katzan tan ẍchojleꞌn. Ma yi yajeꞌj, quiꞌc nin muꞌẍ tetz til njuch, —stzun yaj te tuchꞌ.
42 Itzun taltz tetz Jesús:
—Jesús, yil tzꞌocuꞌ tan cawuꞌn, nink nuꞌl txꞌakx tcꞌuꞌluꞌ, —stzun iꞌ.
43 Tlol tzun Jesús tetz:
—Jun cuꞌn yol swaleꞌ nin tzatz, ninin jaluꞌ cẍopon sweꞌj tul jun balaj amaꞌl, —stzun Jesús tetz.
Yi quimeꞌn Jesús
(Mt 27.45-56; Mr 15.33-41; Jn 19.28-30)
44 Yi tponeꞌn chajcuꞌn kꞌej, tzꞌoꞌtz nin tunin ban wuxtxꞌotxꞌ. Jalen cuꞌn tponeꞌn ox chꞌichꞌ cuꞌlbeꞌn kꞌej. Kalenaꞌs tzun skilineꞌn. 45 Quinin txekun kꞌej te jun rataꞌtz. Ej nin yi xbuꞌk yi at le templo tan jopleꞌn yi luwar yi chin xan nin, ninin katz. Cob cuntuꞌ el. 46 Chin wiꞌ nin tzun Jesús bantz tan yol, itzun taltz:
—Taꞌ, wabnaj walmaꞌ tkꞌabuꞌ.
Watok cunin saj tlol yi yolaꞌtz yi quimeꞌn.
47 Ma yi tilol yi capitán mbi cuꞌn bajij, nin octz tan takꞌleꞌn kꞌajsbil tetz Ryos:
—Bintzinin, yi yajeꞌj quiꞌc til, —stzun iꞌ bantz.
48 Ma cyakil yi eꞌ wunak yi eꞌ ẍchaꞌk tan xmayiꞌn, wiꞌnin chitxakꞌol wutz cyeml tan paj bis yi chipakxeꞌn. 49 Ma yi eꞌ tamiw Jesús scyuchꞌ yi eꞌ xnaꞌn yi choꞌn chisajeꞌn xomok teꞌj, cyakil cunin eꞌ, eꞌ cyaj joylaj len tan xmayeꞌn yi mbi cuꞌn na bajij.
Yi mukxeꞌn Jesús
(Mt 27.57-61; Mr 15.42-47; Jn 19.38-42)
50 At tzun jun yaj yi na biꞌaj Ẍep. Chumbalaj nin iꞌ. Chin cꞌulutxum nin iꞌ swutz Ryos. Aj Arimatea iꞌ. Yi Arimatea iꞌtz jun tnum yi choꞌn at cwent Judea. Nin iꞌ jun scyeri yi eꞌ wiꞌ banl chiwiꞌ yi eꞌ judiy. 51 Nternin na tzan iꞌ tan ẍchꞌiweꞌn yi tiemp yi at tulbil Ryos tan cawuꞌn. Quinin xom wiꞌ iꞌ te cyajtzaꞌkl yi eꞌ mas wiꞌ banl wiꞌ yi cuꞌ chitxumul te Jesús. 52 Nintzun ben iꞌ-tz tan yol tetz Pilat tan jakleꞌn yi wankil Jesús. Nin cujijtz. 53 Ma yi cweꞌn tzaj yi wankil Jesús taꞌn, choꞌn cweꞌn taꞌn tul jun xbuꞌk, nin oc tkꞌoltz tul jun nich. Yi nichaꞌtz choꞌn kopij cyen swutz cꞌub. Ntaxk cunin oc jun almaꞌ tcꞌuꞌl. 54 Nin noj cyen cuꞌntz te jun kꞌej yi na nucꞌx cyen chiwaꞌ tetz eklok tan banleꞌn taneꞌn yi jun kꞌej ujleꞌn. Chaꞌstzun te quiꞌc mas tamaꞌlil scyetz, na txant tan toqueꞌn akaleꞌn tan xeꞌteꞌn yi jun kꞌejaꞌtz.
55 Ma yi eꞌ xnaꞌn yi eꞌ saj xomok te Jesús jalen Galilea, nin eꞌ bentz tan cyajskel yi nich, nin tan xmayeꞌn yi ẍeꞌn cuꞌn ban wankil Jesús yi toqueꞌn cyen tjul. 56 Ma yi chipakxeꞌn tnum nin eꞌ baj octz tan nucꞌleꞌn cyen yi pomada tu yi tzꞌacꞌbil yi wiꞌnin cꞌoꞌcal yi at tocbil cyaꞌn te wankil Jesús. Ujeweꞌn nin eꞌ bantz te jun kꞌej ujleꞌnaꞌtz chi taneꞌn yi chicstumbr.