Yi quicyujiꞌn yi mbajij le tnum Caná cwent Galilea
2
1 Yi teleꞌn ox kꞌej yi ticyꞌleꞌnix yi xtxolbil tetz Liꞌp tu Natanael, at tzun jun quicyujiꞌn yi bajij le tnum Caná cwent Galilea. Nin yi xtxuꞌ Jesús choꞌn at iꞌ te yi jun quicyujaꞌtz. 2 Nchaꞌtz Jesús scyuchꞌ eꞌ ẍchusbeꞌtz, nin eꞌ bentz na nin eꞌ txoclij. 3 Itzun bantz, nin baj yi win yi quicꞌaꞌ. Beneꞌn tzun tlol yi xtxuꞌ Jesús tetz:—Ja baj yi win, —stzun iꞌ tetz Jesús.
4 —¿Mbi tzun na tal tzajuꞌ swetz? na txeꞌn opon tiempil tan inlajluchaxeꞌn ẍchiwutz wunak.
5 Beneꞌn tzun tlol yi xtxuꞌ Jesús scyetz yi eꞌ ẍchakum yi taw yi jun quicyujiꞌnaꞌtz:
—Banwok taneꞌn cyakil yi mbi staleꞌ yi wal tzitetz.
6 At tzun kak cꞌul yi attz, yi cꞌub cuꞌn, yi cuꞌlbil aꞌ. Iꞌtz jun jilwutz chimaꞌcl yi eꞌ judiy yi na xcon cyaꞌn yi na chiban taneꞌn jun chicstumbr tan chixansal quib. Baꞌn na baj cuꞌn ox nka cyaj ẍchokꞌ aꞌ tul yi jujun cꞌulaꞌtz. 7 Beneꞌn tzun tlol Jesús scyetz yi eꞌ chakum:
—Nojswok cuꞌn yi eꞌchk cꞌuleꞌj tan aꞌ.
—I bin jaluꞌ, cyꞌajwok tzaj muꞌẍ, nin cyꞌajwok nin tetz yi aj calpul tan pilul iꞌ.
I nin tzun cyulejtz. 9 Jeꞌn tzun tcꞌajal aj calpul yi aꞌ yi nsken oc tetz win. Qui tzꞌicyꞌ tetz naꞌ nsajeꞌt yi winaꞌtz. Ntin yi eꞌ chakum el chitxum tetz naꞌ nsiteꞌt yi aꞌ, na eꞌ jeꞌsan tzaj tcꞌuꞌl cꞌul. Sajeꞌn tzun ẍchakol aj calpul yi yaj yi taw quicyuj, 10 nin ben tlol tetz:
—Cyakil wunak bajx na cyakꞌ yi balaj win scyetz chitxocum. Ma yi na noj chicꞌuꞌl, kalenaꞌs tzun na cyakꞌ nin yi win yi ajnak tzaj. Poro yi iluꞌ teruꞌ, wiꞌtzbil tlen ntakꞌuꞌ yi balaj win sketz. ¿Mbi tzuntz? —stzun yi aj calpul bantz.
11 Yaꞌstzun bnixeꞌt yi bajx milawr tan Jesús le tnum Caná cwent Galilea. Tan yi jun milawraꞌtz, ja ẍchaj iꞌ yi at tetz kꞌej. Ej nin tan yi jun milawraꞌtz ja cyocsaj yi eꞌ ẍchusbeꞌtz yi bintzinin iꞌ yi Cristo yi bixbaꞌnt tan tuleꞌn.
12 Itzun yi stzajeꞌn wiꞌ yi jun quicyujaꞌtz, nintzun eꞌ icyꞌtz le amaꞌlaꞌtz. Choꞌn tzun cyoponeꞌntz le tnum Capernaum. Xomij yi xtxuꞌ teꞌj scyuchꞌ eꞌ titzꞌun, nin eꞌ ẍchusbeꞌtz. Yaꞌstzun eꞌ aꞌteꞌt cobox kꞌej.
Yi toqueꞌn Jesús tan chilajeꞌn len yi eꞌ aj cꞌayinl
(Mt 21.12-13; Mr 11.15-18; Lc 19.45-46)
13 Itzun bantz, nin ben Jesús jalen Jerusalén, na txant tan tucumuleꞌn yi kꞌej yi na biꞌaj Pasc. 14 Yi tocomponeꞌn wutz kꞌanil yi templo, nin ben tilol yi at wiꞌnin eꞌ yi na chitzan tan cꞌayeꞌn wacẍ, tu cneꞌr, nin plomẍ. Ej nin at eꞌ yi na chitzan tan xtxꞌexeꞌn pwok. 15 Yi beneꞌn xmayil, nin octz tan banleꞌn jun ẍcharyon. Oqueꞌn nin ban tan chilajeꞌn len cyakil yi eꞌ aj cꞌayinlaꞌtz. Cyakil cunin cyeleꞌn tu cyawun tu chiwacẍ. Ej nin nchaꞌtz yi eꞌ txꞌexunl pwok, nin baj len cꞌoxol yi chipuꞌk. Cyakil eꞌchk chem tu yi eꞌchk mes, baj jeꞌ trimpul. 16 Ej nin nchaꞌtz yi eꞌ cꞌaꞌy plomẍ, nin ben tlol scyetz:
—Cyꞌajwok len cyakil yi eꞌchk takleꞌneꞌj. Qui na waj yil tzꞌoc yi caꞌl Intaj tetz jun cꞌaybil.
17 Tuleꞌn tzun txꞌakxuj chicꞌuꞌl yi eꞌ ẍchusbeꞌtz yi xtxolbil yi tzꞌibaꞌnt cyen tcꞌuꞌl Yol Kataj yi na tal: “Na jeꞌ tzinwutz yi qui na cyakꞌ wunak kꞌej yi caꞌluꞌ.”a
18 Cyoqueꞌn tzun yi eꞌ wiꞌ banl chiwiꞌ yi eꞌ judiy tan jakleꞌn tetz:
—Alaj sketz yi mbi ekaꞌn awaꞌn yi na cẍtzan tan banleꞌn yi eꞌchk takleꞌneꞌj. ¿Mbiꞌtz jun techl tzachajeꞌ yi ko bintzinin at akꞌej? —cheꞌch tzun.
19 —Chixit cunuꞌ yi caꞌleꞌj, ej nin ox ntziꞌ kꞌej tzimbneꞌ tan xtxicbajeꞌn junt tir, —stzun Jesús bantz scyetz.
20 —¿Ẍeꞌn tzuntz? ¿Ox ntziꞌ peꞌ kꞌej xcyeweꞌt tan xtxicbajeꞌn yi caꞌleꞌj? na caꞌwnak wukak yob eꞌ banak eꞌ kamam tan banleꞌn, —cheꞌch tzun eꞌ judiy.
21 Poro yi caꞌl yi na tzan Jesús tan xtxumleꞌn, iꞌtz yi tetz wankil. 22 Ej nin yi titzꞌeꞌn junt tir Jesús chixoꞌl almaꞌ, nin ul txꞌakxuj yi yoleꞌj chicꞌuꞌl yi eꞌ ẍchusbeꞌtz, nin cyocsaj yi yol yi tzꞌibaꞌnt cyen tu yi eꞌchk yol yi bajnak quibital te Jesús.
Elnak xtxum Jesús te cyajtzaꞌkl wunak
23 Itzun te yi at Jesús Jerusalén tan ticyꞌseꞌn yi jun kꞌej Pascaꞌtz, baj quilol wunak yi eꞌchk milawr yi bnix taꞌn. Ej nin wiꞌnin eꞌ cyocsaj yi yaꞌstzun yi Cristo. 24 Poro qui kꞌukeꞌ cꞌuꞌl Jesús scyeꞌj yi eꞌaꞌtz yi cyocsaj, na nin el xtxum tetz yi cyajtzaꞌkl. 25 Na qui tajweꞌn tan toqueꞌn jun tan talcheꞌn tetz yi ẍeꞌn quitaneꞌn wunak, na elnak xtxum iꞌ tetz yi mbi na icyꞌ tkacꞌuꞌl.