Jesús tu Nicodemo
3
1 Itzun bantz, at tzun jun yaj parisey yi na biꞌaj Nicodemo. Iꞌ jun scyeri yi eꞌ ajcaw scyetz yi eꞌ judiy. 2 Beneꞌn tzun iꞌ tan xajseꞌn Jesús lakꞌbal, itzun taltz:—Taꞌ, na el katxum tetz yi chakij tzajuꞌ tan Ryos tan kachusleꞌn, na quiꞌc kloꞌ na xcyeꞌuꞌ tan banleꞌn eꞌchk milawr yi na banuꞌ yi quiꞌk xomij Ryos teꞌjuꞌ, —stzun iꞌ tetz Jesús.
3 Itzun tal Jesústz:
—Jun cuꞌn yol na wal nin teruꞌ, ko quil tzꞌitzꞌij junt tir jun yaj, quil tzꞌoc teraꞌtz jakꞌ caꞌwl Ryos.
4 —¿Poro mbi rmeril tan titzꞌeꞌn junt tir jun yaj yi ja wiꞌt tijin cꞌuꞌl? ¿Ẍeꞌn tzꞌocopon junt tir twankil xtxuꞌ tan titzꞌeꞌn junt tir? —stzun Nicodemo tetz Jesús.
5 Toqueꞌn tzun Jesús tan xtxꞌolcheꞌn xoꞌl tetz:
—Jun cuꞌn yol na wal nin teruꞌ, alchok scyetz yi quil tzꞌitzꞌij tan aꞌ tu yi Espíritu Sant, quil tzꞌoc teraꞌtz jakꞌ caꞌwl Ryos. 6 Na cyakil yi eꞌ wunak yi na chitzꞌij, quimnak quitaneꞌn swutz Ryos. Poro alchok scyetz yil xtxꞌixpuj yi tajtzaꞌkl tan yi porer yi Espíritu Sant, ja tzun itzꞌijtz swutz Ryos. 7 Chaꞌstzun te, quil tzꞌel yabuꞌ te weri inyol yi na wal nin, yi tajweꞌn tan titzꞌeꞌn junt tir jun yaj. 8 Na je jun elsawutzileꞌj: Yi cyekꞌekꞌ, qui na kil naꞌ nsajeꞌt, nin qui na kil yi naꞌ mbeneꞌt. Ntin na kubit yi na xicyꞌneꞌ. Niꞌcuꞌn tzun na bajijtz scyeꞌj yi eꞌ yi na je txꞌixp yi cyajtzaꞌkl tan porer yi Espíritu Sant, qui lajluch yi ẍeꞌn na jeꞌ txꞌixp.
9 Toqueꞌn tzun Nicodemo tan jakleꞌn junt tir tetz Jesús:
—¿Ẍeꞌn tzuntz Taꞌ? Qui na pujx waꞌn, —stzun iꞌ-tz.
10 —¿Mbi tzuntz yi qui na el xtxumuꞌ tetz yi eꞌchk takleꞌneꞌj yi na chintzan tan talcheꞌn nin teruꞌ? na iluꞌ xonl kꞌajtzun kamam Israel, nin iluꞌ aj chusunl. 11 Poro swaleꞌ nin yi mero bintzi teruꞌ. Yi oꞌ ketz, na el katxum tetz yi eꞌchk takleꞌn yi na katzan tan yolcheꞌn. Na katxol yi eꞌchk takleꞌn yi ja kil tan kawutz. Poro yi eꞌ cyeruꞌ qui na cyajuꞌ cyocsajuꞌ yi mbi cuꞌn na kal scyeruꞌ. 12 Ej nin yi na noꞌc tan xtxꞌolcheꞌn xoꞌl yi eꞌchk takleꞌn tetz tzoneꞌj wuxtxꞌotxꞌ, qui na tocsajuꞌ. ¿Ẍeꞌn tzun ltocsajuꞌ-tz kol noꞌc tan xtxꞌolcheꞌn xoꞌl yi eꞌchk xtxolbil tetz tcyaꞌj?
13 “Cyaꞌl nin jun yi jak xaꞌk tzaj tcyaꞌj, nin cyaꞌl nin jun yi choꞌnk mpon tzaj tcyaꞌj. Ntin yi in, yi in Bajx Cyꞌajol. 14 Ej nin je jun xtxolbileꞌj: ¿Qui peꞌ na tbituꞌ yi xtxolbil yi ẍeꞌn ban yi jeꞌn ẍchꞌimbal Moisés yi lubaj yi chꞌichꞌ cuꞌn tcyaꞌj tul amaꞌl yi tzꞌinunin tuꞌ? Iteꞌn ninaꞌtz sbajok sweꞌj, yi in yi in Bajx Cyꞌajol. Tajweꞌn tan injeꞌn chꞌimbaꞌn. 15 Yaꞌstzun sbajoktz sweꞌj tan chiclaxeꞌn cyakil wunak, na alchok scyetz yil kꞌukeꞌ cꞌuꞌl sweꞌj, nkꞌeꞌtz sotzel wutz sbneꞌ, ma na scambaj yi itzꞌajbil yi quinin bajsbeꞌn tetz.
Yi ẍeꞌn cuꞌn na pekꞌ Kataj Ryos scyeꞌj wunak
16 “Yaꞌstzun sbajok na wiꞌnin na pekꞌ Ryos scyeꞌj cyakil yi eꞌ wunak yi ateꞌ wi munt. Chaꞌstzun te sajeꞌn ẍchakol yi jun tal ẍutuj Cyꞌajl tzoneꞌj. Nin alchok scyetz yil kꞌukeꞌ cꞌuꞌl te yi jun tal ẍutuj Cyꞌajl Ryosaꞌtz, nkꞌeꞌtz sotzel wutz sbneꞌ, ma na scambajeꞌ yi itzꞌajbil yi qui bajsbeꞌn tetz. 17 Qui saj ẍchakol Ryos yi Cyꞌajl tan takꞌleꞌn chicaws wunak, ma na saj ẍchakol tan chicolpeꞌn tkꞌab il cꞌol.
18 “Alchok scyetz yil kꞌukeꞌ cꞌuꞌl te yi Cyꞌajl Ryos, quiꞌc tetz cawsaꞌtz. Poro cyakil yi eꞌ yi qui na kꞌukeꞌ chicꞌuꞌl teꞌj, banijt cyetz chicawsaꞌtz, na qui na cyaj kꞌukeꞌ chicꞌuꞌl te yi jun tal ẍutuj Cyꞌajl Ryos. 19 Banijt chicaws yi eꞌ yi qui na kꞌukeꞌ chicꞌuꞌl teꞌj, na ja ulak wi munt chi jun txekbil taneꞌn. Poro yi eꞌ wunak, mas tcuꞌn na chipekꞌ te yi il cꞌol. Mas na chipekꞌ tan banleꞌn yi yab ajtzaꞌkl. 20 Na cyakil yi eꞌ yi na chijuch quil, qui na chipekꞌ te jun txekbilaꞌtz yi ulak wi munt. Qui na cyaj chixom teꞌj, na qui na cyaj yil lajluchax yi chipaltil. 21 Ma yi eꞌ yi na chitzan tan banleꞌn taneꞌn yi tajbil Kajcaw, na chijoy puntil tan tocomponeꞌn chiẍkansal quib te yi jun txekbilaꞌtz. Na yi cyetz cyajbil iꞌtz yil lajluchax ẍchiwutz mas wunak yi bintzinin xomcheꞌ te tajbil Ryos.
Yi toqueꞌnt Waꞌn Bautist tan xtxoleꞌn yi balajil Jesús
22 Itzun bantz, yi bajeꞌn yi eꞌchk takleꞌneꞌj, icyꞌeꞌn nin ban Jesús scyuchꞌ yi eꞌ ẍchusbeꞌtz. Choꞌn tzun chibeneꞌn le eꞌchk amaꞌl cwent Judea. Yaꞌstzun eꞌ aꞌteꞌt cobox kꞌejtz tan jeseꞌn aꞌ ẍchiwiꞌ wunak. 23 Ma yi Waꞌn, choꞌn at iꞌ jalen Enón, nakaꞌjil yi tnum Salim. Yaꞌstzun na tzaneꞌt tan jeseꞌn aꞌ ẍchiwiꞌ yi eꞌ yi xomcheꞌ te iꞌ, na at wiꞌnin aꞌ le amaꞌlaꞌtz. 24 Cyakil yi eꞌchk xtxolbileꞌj bnix, te yi ntaxk oc Waꞌn xetzeꞌ.
25 Cyoqueꞌn tzun cobox ẍchusbeꞌtz Waꞌn tan wakꞌ ib scyuchꞌ coboxt judiy yi qui xom chiwiꞌ scyeꞌj. Eꞌ oc tan wakꞌ ib te yi ẍeꞌn sban jun yaj tan xansal tib. 26 Yi stzajeꞌn wiꞌ yi wakꞌ ibaꞌtz, nintzun eꞌ opon yi eꞌ ẍchusbeꞌtz Waꞌn teꞌj. Itzun cyaltz tetz:
—Taꞌ, —cheꞌch, —¿ja peꞌ tbituꞌ stziblal yi jun yaj yi ja kil jalaj icyꞌen yi aꞌ Jordán, yi jun yi ẍchajnakuꞌ sketz? I bin jaluꞌ, wiꞌnin wunak xomcheꞌ teꞌj nin na tzan iꞌ tan jeseꞌn aꞌ ẍchiwiꞌ, —cheꞌch bantz tetz Waꞌn.
27 Beneꞌn tzun tlol Waꞌn scyetz:
—Baꞌn atit, na quiꞌc rmeril tan jaleꞌn kꞌej jun yaj ko quil takꞌ Ryos amaꞌl tetz. 28 ¿Qui peꞌ na chinachonuꞌ te yi inyol yi walnak scyeruꞌ? Yi in wetz, nkꞌeꞌtz in yi Cristo, ma na in tuꞌ jun yubsanl beꞌ iꞌ. Na yi in wetz bajxchin tan talcheꞌn stziblal iꞌ. 29 Quibit tzajuꞌ jun elsawutzileꞌj: Yi na bajij jun quicyuj, iꞌtz yi xicy yi na kꞌukeꞌ cꞌuꞌl te yi xun, ma yi aj calpul, ntin na tzatzin teꞌtz teꞌj yi ko baꞌn atit chiyol yi xicy tu xun. Niꞌcuꞌn tzun wutaneꞌn wetz chi jun aj calpul. Wiꞌnin na chintzatzin te yi stziblal yi wiꞌnin wunak xomcheꞌ te Jesús. 30 Yi iꞌ tetz, tajweꞌn tan jaleꞌn mas tetz kꞌej, ma yi in wetz, tajweꞌn tan teleꞌn inkꞌej.
Yi jun yi choꞌn tponeꞌn tzaj tcyaꞌj
31 Na yi jun yi opon tzaj tcyaꞌj, at mas tetz kꞌej swutz alchok scyetz wunakil. Yi eꞌ yi choꞌn na chitzꞌij tzoneꞌj wuxtxꞌotxꞌ, ntin na chiyolbej yi eꞌchk takleꞌn tetz tzoneꞌj. Poro yi jun yi choꞌn toponeꞌn tzaj tcyaꞌj, at mas kꞌej iꞌ swutz alchok jilwutz wunak. 32 Na na xtxol yi eꞌchk takleꞌn yi bitaꞌnt taꞌn, nin yi ilijt taꞌn tcyaꞌj. Lastum coboxeꞌn tal yi eꞌ yi na cyocsaj yol iꞌ. 33 Poro yi cobox tal oꞌ ketz yi na kocsaj, bintzinin taneꞌn yol Ryos skawutz. 34 Na na kocsaj yi Ryos nchakon tzaj Jesús, nin na kocsaj yi iꞌtz yi tajbil Ryos yi na tzan iꞌ tan xtxoleꞌn, na Ryos mmakꞌon tzaj yi Espíritu Sant tetz. 35 Wiꞌnin na pekꞌ Kataj te yi jun Cyꞌajl iꞌaꞌtz. Chaꞌstzun te ja takꞌ iꞌ kꞌej tan cawuneꞌn. 36 Alchok scyetz yi na tocsaj yi yol yi jun Cyꞌajl Ryosaꞌtz, ja wiꞌt cambaj teꞌtz yi itzꞌajbil yi qui bajsbeꞌn tetz. Poro yi eꞌ yi qui na cyek ẍchiꞌ iꞌ, quil cyetzaj yi jun itzꞌajbil yi qui bajsbeꞌn tetz, na wiꞌnin na chiꞌch cꞌuꞌl Ryos scyeꞌj.