Yi ẍchiꞌcheꞌn chicꞌuꞌl yi eꞌ parisey te Jesús
4
1-3 Itzun yi teleꞌn xtxum Jesús tetz yi nsken quibit yi eꞌ parisey yi wiꞌnin wunak xomcheꞌ teꞌj, nin wiꞌnin eꞌ yi nsken jeꞌ aꞌ ẍchiwiꞌ taꞌn, swutz yi eꞌ yi xomcheꞌ te Waꞌn, nintzun cyaj cyen tilol yi amaꞌl nin bentz Galilea. (Poro nkꞌeꞌtz Jesús yi na tzan tan jeꞌseꞌn aꞌ chiwiꞌ, ma na i yi eꞌ ẍchusbeꞌtz.) 4 Poro tan tponeꞌn Jesús Galilea, tajweꞌn cuꞌn tan ticyꞌeꞌn le amaꞌl cwent Samaria.Jesús tu yi xnaꞌn aj Samaria
5 Itzun bantz, te yi na chixon tul eꞌchk amaꞌl cwent Samaria choꞌn tzun cyoponeꞌntz nakaꞌjil jun tal neꞌẍ tnum yi na biꞌaj Sicar. Yaꞌstzun kale atiteꞌt jalaj xtxꞌotxꞌbeꞌn kꞌajtzun Jacow.a Yaꞌstzun yi jalaj txꞌotxꞌaꞌtz yi cyajnak cyen tkꞌol tkꞌab kꞌajtzun Ẍep, yi cyꞌajl.b 6 Ntaꞌtz atiteꞌt jun julil aꞌ yi na biꞌaj: Tetz Jacow. Nsken tzun kꞌeꞌxij Jesús yi tponeꞌn stziꞌ yi julil aꞌaꞌtz, nin cꞌoleꞌ cuꞌntz tibaj tan ujleꞌn. Na nsken opon chaj cuꞌn kꞌej. 7-8 Inti yi eꞌ ẍchusbeꞌtz, nsken chiben tnum tan lokꞌcheꞌn chiwaꞌ. I cunin cꞌolchij Jesús yi cweꞌn poneꞌn jun xnaꞌn aj Samaria tan ticyꞌleꞌn aꞌ. Jiloneꞌn nin tzun Jesús tetz:
—Tzawakꞌ muꞌẍ wucꞌaꞌ, —chij iꞌ ban nintz.
9 Sajeꞌn tzun stzaꞌwel yi xnaꞌntz:
—¿Mbi xac na jak tzajuꞌ aꞌ swetz? na yi iluꞌ teruꞌ iluꞌ judiy, ma in wetz in aj Samaria.
Ja tal xnaꞌn yi xtxolbilaꞌtz, na yi eꞌ judiy scyuchꞌ yi eꞌ aj Samaria wiꞌnin na chilab quib squibil quib. 10 Beneꞌn tzun tlol Jesús tetz yi xnaꞌn:
—Yi nink tzꞌel atxum tetz yi mbiꞌtz yi na tzan Ryos tan sukeꞌn. Ej nin yi nink tzꞌel atxum tetz yi naꞌ scyetz in yi na chitzan tan cꞌucheꞌn aꞌ tzatz, choꞌn kloꞌ tzajak tzaj yi aꞌ swetz. Nin yi in wetz ja kloꞌ wakꞌ jun aꞌ tzatz yi na takꞌ itzꞌajbil, —stzun Jesús tetz.
11 —Poro Taꞌ, at tzunk jun takleꞌn yi cyꞌaꞌn tanuꞌ tan jeꞌseꞌn tzaj aꞌ, na chumam nin xeꞌ yi jul. ¿Naꞌ lben tqꞌuituꞌ yi jun aꞌ yi na takꞌ itzꞌajbil tan tkꞌoluꞌ swetz? 12 Iẍkaj at tzunk mas kꞌejuꞌ swutz yi kꞌajtzun kamam Jacow na iꞌ akꞌon cyen yi aꞌeꞌj sketz. Nin ja xcon taꞌn tetz tcꞌaꞌ, nin tetz quicꞌaꞌ yi eꞌ nitxajil. Nin nchaꞌtz cyakil yi eꞌ tawun yi awnaꞌn taꞌn, ja chucꞌaꞌ teꞌj. Iẍkaj at tzunk mas kꞌejuꞌ swutz iꞌ, —stzun xnaꞌn bantz tetz Jesús.
13 —Bintzinin, poro cyakil yi eꞌ wunak yi na chucꞌaꞌ te yi aꞌeꞌj ẍchiquimok junt tir tan saktziꞌ. 14 Poro alchok scyetz yil tzꞌucꞌaꞌ te yi aꞌ yi na wakꞌ wetz, quiꞌt quim teraꞌtz tan saktziꞌ. Na yi aꞌ yi na wakꞌ wetz smulkꞌink te talmaꞌ iꞌ tan takꞌleꞌn stzꞌajbil tetz ben kꞌej ben sak, —stzun Jesús tetz.
15 —Taꞌ, takꞌ tzajuꞌ yi aꞌaꞌtz swetz, tan quiꞌt jaleꞌn saktziꞌ sweꞌj, nin tan quiꞌt wuleꞌn tan ticyꞌleꞌn aꞌ tzoneꞌj, —chij xnaꞌn ban.
16 —Cun chak bin awuchmil, kalenaꞌs cxuꞌltwok.
17 —Poro quiꞌc wetz wuchmil, —stzun xnaꞌn tetz.
—Bintzi na awal yi quiꞌc awuchmil, 18 na oꞌix yaj chicyaj apaxil, nin yi junt yi at jaluꞌ nkꞌeꞌtz awuchmil. Bintzi yi na awal yi quiꞌc awuchmil.
19 —¡Ah! iluꞌ bin elsanl stziꞌ Ryos. 20 Ma jaluꞌ Taꞌ, yi ketz kamam kateꞌ yi oꞌ aj Samaria, choꞌn na chibenak cyeꞌtz tan cꞌuꞌlajeꞌn Ryos wiꞌwtzeꞌj, chi na kaban ketz jaluꞌ. Poro yi eꞌ cyeruꞌ, yi eꞌuꞌ judiy, na cyaluꞌ yi nkꞌeraꞌtz yi amaꞌl tan cꞌuꞌlajeꞌn Ryos ma na jalen Jerusalén, —stzun xnaꞌn tetz.
21 —I bin jaluꞌ tajweꞌn tan awocsal yi inyol yi swaleꞌ nin tzatz. Tzꞌul jun kꞌej yi quiꞌt chiben wunak tan cꞌuꞌlajeꞌn Kataj wiꞌwtz tziꞌneꞌj, mpe ik Jerusalén. 22 Nin yi axwok itetz, yi axwok aj Samaria qui na el itxum tetz mbi na cxtzanwok tan cꞌuꞌlajeꞌn. Poro yi oꞌ ketz, yi oꞌ judiy, na el katxum tetz yi naꞌ scyetz iꞌ na katzan tan cꞌuꞌlajeꞌn. Na yi xtxolbil tan chiclaxeꞌn wunak, choꞌn njal skaxoꞌl ketz yi oꞌ judiy. 23 Ej nin ja wiꞌt xeꞌtij yi tiemp tan cyoqueꞌn yi eꞌ mero aj cꞌuꞌlanl tetz Kataj tan cꞌuꞌlajeꞌn iꞌ tetz cuꞌn cyalmaꞌ. Na yaꞌstzun yi xtxolbil yi mero bintzinin tetz, yi na tzatzin iꞌ teꞌj. 24 Na yi Kataj Ryos, nkꞌeꞌtz lamij taneꞌn, ma na cheꞌw cyekꞌekꞌ tuꞌ iꞌ. Chaꞌstzun te tajweꞌn cuꞌn tan cꞌuꞌlajeꞌn iꞌ tetz cuꞌn kalmaꞌ. Na yaꞌstzun yi mero xtxolbil yi bintzinin na tzatzin iꞌ teꞌj, —stzun Jesús.
25 —Na el intxum tetz yi at tulbil yi Cristo, yi bixbaꞌnt cyen tan Ryos tan kaclaxeꞌn. Nin yil tzꞌul tzaj, iꞌ tzꞌaꞌlon yi mero xtxolbil sketz, —stzun xnaꞌn.
26 —I bin inaꞌtz, yi na chinjilon nin tzatz, —stzun Jesús bantz tetz.
27 I cunin na chitzan tan yolcheꞌn yi xtxolbileꞌj, yi cyoponeꞌn yi eꞌ ẍchusbeꞌtz. Wiꞌnin cyeleꞌn yab teꞌj yi choꞌn na jilon cyen Jesús tetz jun xnaꞌn. Poro cyaꞌl nin jun nimsaj cꞌuꞌl tan jakleꞌn tetz yi mbi na chiyol.
28 Ma yi xnaꞌn cyaj cyen tuꞌ tilol yi ẍchokꞌ, nin bentz lajkeꞌl tnum tan talcheꞌn stziblal scyetz cyakil wunak.
29 —Or cyeruꞌ, chibenkuꞌ sweꞌj tan tilweꞌn jun yaj yi nxcyeꞌ tan talcheꞌn yi mbi cuꞌn wutaneꞌn. ¿Nkꞌeraꞌtz poloꞌ iꞌ yi Cristo yi jun yi bixbaꞌnt tan tuleꞌn? Chinch wetz iꞌ loꞌ, —stzun xnaꞌn scyetz.
30 Chibeneꞌn tzun niltz kale atiteꞌt Jesús. 31 Poro te yi ntaxk chopon yi eꞌ wunak, nintzun eꞌ oc yi eꞌ ẍchusbeꞌtz tan moxeꞌn kloꞌ Jesús tan waneꞌn kloꞌ iꞌ. Itzun cyaltz tetz:
—Taꞌ, bneꞌuꞌ jun tkan waꞌuꞌ yi ja ul kaꞌn.
32 —Quiꞌ loꞌ na ja wiꞌt chinwan wetz te junt jilwutz waj yi qui na el itxum tetz.
33 Cyoqueꞌn tzun yi eꞌ ẍchusbeꞌtz tan jakleꞌn squibil quib.
—¿Ẍeꞌn tzuntz? ¿At poloꞌ jun yi ja ulak tan takꞌleꞌn waꞌ? —cheꞌch bantz.
34 —Yi wetz inwaꞌ, iꞌtz yi banleꞌn taneꞌn yi tajbil yi jun yi nchinchakon tzaj, nin tan wiꞌtzeꞌn yi tetz takꞌun. 35 Yi axwok itetz, na italwok: ‘At cyaj xaw tan jeꞌn cosech,’ poro bitwok tzaj yi weri inyol yi swaleꞌ nin tzitetz. Ilwok nin yi ujuleꞌj. Ja wiꞌt kꞌanax, nin na taj jeꞌseꞌn. 36 Nin yi eꞌ yil choꞌc il tan jeꞌseꞌn yi jun jilwutz cosechaꞌtz, ẍchichojxok cyeraꞌtz. Ej nin yi jun cosechaꞌtz yi jepon cyaꞌn, xtxꞌajeꞌ tetz ben kꞌej ben sak. Chaꞌstzun te, ẍchitzatzink yi eꞌ awal tetz scyuchꞌ yi eꞌ jeꞌsanl cosech. 37 Na bintzinin jun yol yi na aꞌlchij. ‘Apart yi eꞌ yi na ocsan ujul ttxꞌotxꞌ. Ej nin apart yi eꞌ yi na jeꞌsan cosech.’ 38 Yi axwok itetz ja cxben inchakol tan jeꞌseꞌn jun cosech, poro nkꞌeꞌtz axwok awal tetz, na apart yi eꞌ yi nchakꞌuj cyen tan tocseꞌn. Ma axwok itetz, jalt len tuꞌ jeꞌseꞌn tzibneꞌwok, —stzun Jesús bantz scyetz.
39 Tan yi xtxolbil yi baj xtxolil xnaꞌn scyetz yi eꞌ wunak yi najlcheꞌ le jun tnumaꞌtz, at wiꞌnin eꞌ aj Samaria yi cyocsaj yi Jesús iꞌ yi Cristo. Ja cyocsaj tan tuꞌ yi yol yi tal yi xnaꞌn: “Ja xcyeꞌ tan talcheꞌn swetz cyakil yi mbi cuꞌn banakin.”
40 Yi cyoponeꞌn yi eꞌ aj Samaria te Jesús, nin eꞌ octz tan moxeꞌn tan cyajeꞌn cyen iꞌ scyeꞌj. Cob tzun kꞌej cyaj Jesús scyeꞌj. 41 Ej nin mas tcunin wunak cyocsaj yi quibital yi ẍchusuꞌn iꞌ swutz yi eꞌ yi cyocsaj tan yi stziblal yi tal xnaꞌn. 42 Je tzun cyaltz tetz yi jun xnaꞌnaꞌtz:
—Yi jaluꞌ, ja kocsaj ketz, poro nkꞌeꞌtz ntin tan yi yol yi nkubit tzaweꞌj, poro nchaꞌtz tan tuꞌ yi eꞌchk xtxolbil yi ja kubit tetz iꞌ. Ja tzun kocsaj yi bintzinin iꞌ yi Cristo, yi colpinl cyetz cyakil wunak.
Yi tuleꞌn yos tu cyꞌajl jun bajxom tetz tnum
43 Itzun yi teleꞌn cob kꞌej eleꞌn nin tzun eꞌ bantz Samaria tan quicyꞌalt chibeꞌ tan cyoponeꞌn le amaꞌl cwent Galilea. 44 Na at jun yol yi talnak Jesús: “Qui na jal kꞌej jun elsanl stziꞌ Ryos le tetz tanum.”
45 Ma yi toponeꞌn le amaꞌl cwent Galilea, wiꞌnin chitzatzineꞌn wunak teꞌj, na cyajskeꞌn wutz iꞌ. Na ja ẍchaꞌk tan ticyꞌseꞌn yi jun kꞌej Pascaꞌtz yi acꞌaj chan ticyꞌleꞌn Jerusalén. Nin ja quil wutz Jesús tu cyakil eꞌchk takleꞌn yi mbaj bnol iꞌ le jun kꞌej Pascaꞌtz.
46 Pakxeꞌnt tzun Jesús Caná cwent Galilea yi luwar kale jeꞌt xtxꞌixpul iꞌ yi aꞌ tetz win. Nintzun opon jun ajcaw teꞌj, yi yabiꞌẍ yi cyꞌajl iꞌ, jalen le tnum Capernaum. 47 Na yi tbital yi ajcawaꞌtz yi nsken ul Jesús Caná nin bentz tan cuꞌswutzil tetz tan beneꞌn tan tulseꞌn yos tu yi cyꞌajl iꞌ yi at cyen xe caꞌl, na jaltnin tan quimeꞌn.
48 Beneꞌn tzun tlol Jesús tetz:
—Yi eꞌ cyeruꞌ qui na cyocsajuꞌ naꞌ scyetz in, jalen yil chajlij jun techl scyeruꞌ.
49 —Quiꞌ Taꞌ, ma na bneꞌuꞌ jun pawor swetz. Nink benuꞌ jalcuꞌn tan tulseꞌn yos tu incyꞌajl, na quimich tlentuꞌ atit.
50 —Ja wiꞌt ul yos tu cyꞌajluꞌ. Baꞌn pakxijuꞌ xe caꞌluꞌ, —stzun Jesús bantz tetz yi ajcawaꞌtz.
Tocsaj tzun yaj yi yol Jesús, nin ajtz xe caꞌl. 51 Ej nin yi txantok tan toponeꞌn xe caꞌl ja cheꞌl tzaj yi eꞌ mos iꞌ tan cꞌulcheꞌn, nin tan talcheꞌn stziblal tetz:
—Taꞌ, ja ul yos tu yi cyꞌajluꞌ.
52 —¿Mbi oril mmuꞌl yos tuchꞌ?
—Ewt bin, —cheꞌch. —Eꞌchk jun chꞌichꞌ cuꞌlbeꞌn kꞌej yaꞌstzun paxul tib yi kꞌaꞌkl, —cheꞌch mos bantz tetz.
53 Jalcunin nachoneꞌn yaj teꞌj yi iteꞌn nin oraꞌs yi talol Jesús yi yol tetz: “Ja wiꞌt ul yos tu cyꞌajluꞌ.” Cyocsaj tzun yaj tuml cyakil najal yi Jesús iꞌ yi Cristo.
54 Yaꞌstzun yi caꞌp milawr yi bnix tan Jesús le amaꞌl cwent Galilea, te yi nsken cyaj cyen tilol yi amaꞌl cwent Judea.