Yi tuleꞌn yos tu yi yaj yi yeꞌyuj wankil
5
1 Itzun bantz yi bajeꞌn yi eꞌchk takleꞌnaꞌs, choꞌn tzun toponeꞌn Jesús junt tir Jerusalén, na at junt chikꞌej eꞌ judiy yi na icyꞌtz. 2 At tzun jun sawanil yi tapij yi at solteꞌj yi tnum Jerusalén. Yi jun sawanaꞌtz na biꞌaj Sawan Tetz Cneꞌr. Ej nin nakaꞌjil yi jun sawanaꞌtz at jun chin pilaꞌ yi at oꞌ tal neꞌẍ galer stziꞌ tetz chimuj wunak. Nin yi biꞌ yi jun pilaꞌaꞌtz iꞌtz Betesda. 3 At wiꞌnin yabiꞌẍ coylcheꞌ le eꞌchk mujaꞌtz. At moyiꞌẍ, at coꞌx, nin at yeꞌyuj chiwankil. Cyakil yi eꞌ yabiꞌẍaꞌtz na chitzan tan ẍchꞌiweꞌn yi nicyꞌ naꞌ or ẍchekꞌeꞌn tib yi aꞌ. 4 Na at na ban cuꞌnt na cuꞌ ul jun ángel tan ẍchekꞌeꞌn yi aꞌ, chij. Na i taneꞌn puntil, yi bajx yabiꞌẍ yi na pit nin tib xe aꞌ yi na ẍchekꞌeꞌn tib, yaꞌstzun yi jun yi na ul yos tuchꞌ. Quiꞌc na ban mbi jilwutz yabil na icyꞌan, na ul yos scyuchꞌ, cheꞌch. 5 Ej nin chixoꞌl yi eꞌ yabiꞌẍaꞌtz, at tzun juntz yi nsken el junak waxoklajix yob yi tocleꞌn lacꞌpuj yi yabil teꞌj. 6 Ma yi beneꞌn tilol Jesús yi jun yajaꞌtz, nin yi teleꞌn xtxum tetz yi alaꞌix tiemp yi tocleꞌnix lacꞌpuj yi yabil teꞌj, nintzun tal tetz:—¿Na peꞌ awaj yil tzꞌul yos tzawuchꞌ?
7 —Na, Taꞌ. Poro cyaꞌl nin jun na baꞌn cꞌuꞌl sweꞌj tan impitleꞌn nin xe aꞌ yi na ẍchekꞌleꞌn tib. Na yi na noꞌc tan pileꞌn tan imbeneꞌn xe aꞌ, apart junt na cuꞌ lajkeꞌl, —stzun iꞌ bantz tetz Jesús.
8 Beneꞌn tzun tlol Jesús tetz:
—Txiclijeꞌn. Toleꞌn wutz yi atxoꞌ, nin baꞌn cẍaꞌj xe acaꞌl, —stzun Jesús bantz tetz.
9 Jalcunin tzun tuleꞌn yos tu yi yaj. Nin jeꞌ tolil wutz yi xtxoꞌ. Ej nin ajeꞌn nin bantz xe caꞌl, na baꞌnt xon. Poro te yi tuleꞌn yos tu yi jun yajaꞌtz, iꞌtz jun kꞌej ujleꞌn. 10 Cyoqueꞌn tzun cobox scyeri yi eꞌ judiy yi eꞌ contr te Jesús, tan talcheꞌn nin tetz yi yaj:
—Yaj, quiꞌc cu tan beneꞌn awucyꞌal yi atxoꞌ, na yi jaluꞌ iꞌtz jun kꞌej ujleꞌn, —cheꞌch tetz.
11 —I bin yi jun yi muꞌlsan yos swuchꞌ, iꞌ maꞌlon swetz. Na je yol iꞌeꞌj: ‘Toleꞌn wutz yi atxoꞌ nin baꞌn cẍaꞌj xe acaꞌl,’ stzun iꞌ mban swetz, —chij yaj.
12 Cyoqueꞌn tzuntz tan ẍchꞌoteꞌn stziꞌ iꞌ:
—¿Naꞌ scyetz iꞌ junaꞌtz yi maꞌlon tzatz: ‘Toleꞌn wutz yi atxoꞌ, nin baꞌn cẍaꞌj xe acaꞌl’?
13 Ma yi yaj, qui el xtxum tetz yi naꞌ ulsan yos tuchꞌ, tan paj yi wiꞌnin wunak ateꞌ kale uleꞌt yos tuchꞌ. Ej nin sken icyꞌ Jesús yi toqueꞌn iꞌ tan toleꞌn yi soc. 14 Poro le junt tkuj nintz, choꞌn tzun nojeꞌn pon Jesús teꞌj le templo, nintzun taltz tetz:
—I bin jaluꞌ, na waj wal jun yol tzawetz. Ja wiꞌt ul yos tzawuchꞌ. Quiꞌt tzajuch junt tir yi awil, na qui cunin batz tzꞌul junt yabil tzaweꞌj yi mas tcuꞌn pyor, —stzun Jesús tetz.
15 Beneꞌn tzun yajtz tan talcheꞌn scyetz yi eꞌ judiy yi contr te Jesús, yi Jesús muꞌlsan yos tuchꞌ. 16 Ma yi eꞌ judiy, yi quibital yi xtxolbileꞌj, nintzun eꞌ octz tan contriꞌn te Jesús. Nintzun kloꞌ eꞌ oc tan biyleꞌn cuꞌn tan paj tuꞌ yi qui ban iꞌ taneꞌn yi jun kꞌej ujleꞌn.
17 Poro nintzun ben stzaꞌwel Jesús chiyol:
—Yi wetz Intaj, ja akꞌuj le xeꞌtzbil tzaj. Ej nin nchaꞌtz in tajweꞌn tan wakꞌujeꞌn, —stzun Jesús bantz scyetz.
18 Tan paj yi tal Jesús: “Yi Ryos yaꞌstzun wetz Intaj”, mas tcunin kloꞌ cyoqueꞌntz tan biyleꞌn, na nkꞌeꞌtz ntinaꞌtz til iꞌ yi qui ban taneꞌn yi jun kꞌej ujleꞌn, ma na tan paj yi tocsal tib iꞌ tetz Ryos.
At kꞌej yi Cyꞌajl Ryos tan cawuꞌn
19 Toqueꞌn tzun Jesús tan yol scyetz, itzun taltz:
“Jun cuꞌn yol na wal nin scyeruꞌ, yi in wetz, yi in Cyꞌajl Ryos, quiꞌc rmeril tan bnixeꞌn jun takleꞌn waꞌn yi ik wajtzaꞌkl cun tuꞌ. Ma na ntin na chintzan tan banleꞌn yi eꞌchk takleꞌn yi na ẍchaj Intaj swetz. Nin cyakil yi na ban Intaj, iteꞌn nin iꞌaꞌtz na imban wetz. 20 Na wiꞌnin na pekꞌ Intaj sweꞌj, na in yi Cyꞌajl. Nin na ẍchaj iꞌ swetz cyakil yi eꞌchk takleꞌn yi na tzan iꞌ tan banleꞌn. Ej nin ẍchajeꞌ eꞌchk takleꞌn mas chumam swutz yi jeꞌj yi chelpon yabuꞌ teꞌj. 21 Na chitzꞌij junt tir yi eꞌ almaꞌ tan Intaj. Nchaꞌtz in, yi in Cyꞌajol, swakꞌeꞌ quitzꞌajbil yi eꞌ yi na waj lwakꞌ scyetz. 22 Ej nin yi Intaj quil tzꞌoc iꞌ tan pujleꞌn xtisyaꞌ scyeꞌj wunak, na ja wiꞌt takꞌ iꞌ amaꞌl swetz tan incawuneꞌn. 23 Yaꞌstzun ntulejtz, bantz cyakꞌol wunak inkꞌej, chi na akꞌlij kꞌej iꞌ. Na alchok scyetz yi qui na takꞌ inkꞌej, yi in yi in Cyꞌajol, qui tzun na tzantz tan takꞌleꞌn kꞌej yi Intaj yi nchinchakon tzaj.
24 “Ej nin jun cuꞌn yol na wal nin scyeruꞌ: Alchok scyetz yi na oc il tan tbiteꞌn weri inyol nin yil tocsaj yi yol yi jun yi nchinchakon tzaj, ja wiꞌt cambaj teꞌtz jun itzꞌajbil yi qui bajsbeꞌn tetz. Quiꞌct tetz cawsaꞌtz, na ja wiꞌt el tzaj tkꞌab quimichil, nin ja wiꞌt cambaj yi tetz stzꞌajbil. 25 Ej nin jun cuꞌn yol na wal nin scyeruꞌ: Ja wiꞌt xeꞌtij yi tiemp tan quibital yi eꞌ yi quimnak yi cyajtzaꞌkl yi weri inchusuꞌn. Nin alchok scyetz yil tocsaj yi weri inchusuꞌn, sjalok yi itzꞌajbil taꞌn. 26 Na na xcyeꞌ Intaj tan takꞌleꞌn quitzꞌajbil yi eꞌ wunak. Ej nin iꞌ akꞌon tetz yi jun poreraꞌtz swetz tan wukꞌol quitzꞌajbil yi eꞌ wunak. 27 Ej nin nchaꞌtz, ja takꞌ iꞌ inkꞌej tan pujleꞌn xtisyaꞌ, na in bin yi Bajx Cyꞌajol. 28 Eꞌ elch yabuꞌ te xtxolbileꞌj, na tzꞌul jun kꞌej yi cyakil cuꞌn yi eꞌ quimnakeꞌ squibiteꞌ inyol, nin chijetuꞌl junt tir. 29 Nin yi eꞌ yi ocnakeꞌ cꞌulutxum tan banleꞌn yi eꞌchk takleꞌn balaj, ẍchitzꞌok junt tir tan chitzatzineꞌn te quitzꞌajbil. Ma yi eꞌ yi cachiꞌ nchiban, ẍchitzꞌok junt tir tan quibital chicaws.
30 “Poro quil wakꞌ chicaws yi ntaxk injak puntil tetz Intaj. Na ntin swakꞌeꞌ chicaws chi na tal iꞌ swetz. Chaꞌstzun te chin tzꞌaknak cuꞌn cyakil yi eꞌchk takleꞌn yi tzimbneꞌ, na qui na chintzan tan banleꞌn yi wetz wajbil, ma na i yi tajbil yi jun yi nchinchakon tzaj.
31 “Yi nink wal wetz yi at inkꞌej quiꞌc xeꞌ inyol. 32 Poro at jun yi na tzan tan talcheꞌn yi at inkꞌej, nin na el intxum tetz yi bintzinin na tal. Ej nin yi junaꞌtz iꞌtz Waꞌn Bautist. 33 Nin yi eꞌ cyeruꞌ ja ben chichakoluꞌ cobox chichakumuꞌ tan jakleꞌn wukanil tetz. Ej nin yi yol yi ntal iꞌ, iꞌtz yi bintzi. 34 Nkꞌeꞌtz tajweꞌn yi at jun wunak tan talcheꞌn yi at inkꞌej, poro chumbalaj nin kloꞌ yi nink ncyocsajuꞌ yi yol iꞌ tan chiclaxeꞌnuꞌ. 35 Na yi jun Waꞌnaꞌtz ja xcon chi na ban jun bocꞌoj tzaj yi na oc kꞌaꞌkl, yi wiꞌnin na txekun tetz jun rat ntziꞌ. Ej nin yi eꞌ cyeruꞌ ja chitzatzinuꞌ jun rataꞌtz te iꞌ.
36 “Poro nkꞌeꞌtz tajweꞌn yil tzꞌoc jun yaj tan incolcheꞌn, na at junt xtxolbil yi mas balaj tcuꞌn swutz yi yol Waꞌn, yi na ẍchaj yi at weri inkꞌej. Iꞌtz yi eꞌchk milawr yi na imban. Nin yaꞌstzun tajbil Intaj tan imbnol. Ej nin tan yi eꞌchk milawraꞌtz yi na imban, na ẍchaj yi iꞌtz Intaj yi nchinchakon tzaj.
37 “Nchaꞌtz weri Intaj, na tzan tan ẍchajleꞌn yi at weri inkꞌej, poro qui na cyakꞌuꞌ amaꞌl tan tbiteꞌn yi yol iꞌ. Ej nin qui na pujx cyanuꞌ yi ẍeꞌn taneꞌn iꞌ. 38 Txeꞌn nin ocopon yi ẍchusuꞌn iꞌ tetz cyalmaꞌuꞌ, na qui na cyajuꞌ cyocsajuꞌ yi choꞌn nchinsaj te Intaj tcyaꞌj. 39-40 Nternin na chisiꞌlejuꞌ yi yol yi tzꞌibaꞌnt cyen, na yi cyajbiluꞌ iꞌtz tan chicambaluꞌ yi itzꞌajbil yi qui bajsbeꞌn tetz. Poro lastum quil chicambajuꞌ, na qui na chixomuꞌ sweꞌj, wech na choꞌn na naꞌwsij intziblal tul eꞌchk liwraꞌtz.
41 “Yi in wetz qui na chintzan tan joyleꞌn inkꞌej ẍchiwutzuꞌ. 42 Na na el intxum tetz yi qui na chipekꞌuꞌ te Ryos. 43 Na yi in wetz, choꞌn nopon tzaj te Intaj. Poro qui na cyocsajuꞌ. Ma yi nink tzꞌul junt tan xtxoleꞌn yi tetz tajtzaꞌkl cuntuꞌ scyeruꞌ, jalcunin lcyocsajuꞌ yol iꞌ. 44 Na yi eꞌ cyeruꞌ, qui na chitzanuꞌ tan joyleꞌn puntil tan tzatzineꞌn Kataj Ryos. Ma na ntin na chitzanuꞌ tan joyleꞌn puntil tan cyakꞌol wunak chikꞌejuꞌ. Chaꞌstzun te quiꞌc rmeril yi nink tzꞌel chitxumuꞌ tetz yi at inkꞌej. 45 Qui tajweꞌn tan woqueꞌn tan chixochleꞌnuꞌ swutz Intaj, na iteꞌn yol Moisés yi tzꞌibaꞌnt cyen na tzan tan ẍchajleꞌn chipaltiluꞌ. Wech na yaꞌstzun yi chusuꞌn yi kꞌuklij chicꞌuꞌluꞌ teꞌj taneꞌn. 46 Yi najk cyocsajuꞌ yi mbi cuꞌn tzꞌibaꞌnt cyen tan Moisés, ja kloꞌ wiꞌt cyocsajuꞌ yi mbi ekaꞌn waꞌn, na yi xtxolbil yi cyajnak stzꞌibal Moisés na tal yi naꞌ scyetz in. 47 ¿Ẍeꞌn lcyocsajuꞌ weri inyol? na qui bin na cyocsajuꞌ yi yol yi tzꞌibaꞌnt cyen tan Moisés.