Yi chiwaneꞌn oꞌ mil wunak tan Jesús
(Mt 14.13-21; Mr 6.30-44; Lc 9.10-17)
6
1 Itzun bantz yi bajeꞌn yolol Jesús yi eꞌchk xtxolbilaꞌseꞌj, choꞌn tzun ticyꞌeꞌn jalaj icyꞌen aꞌ yi na biꞌaj Galilea, nka Tiberias. 2 Wiꞌnin tzun wunak eꞌ xom nin teꞌj, na nsken quil yi eꞌchk milawr yi mbnix taꞌn, na wiꞌnin yabiꞌẍ ul yos scyuchꞌ taꞌn.3 Itzun yi ticyꞌeꞌn poneꞌn iꞌ, nintzun ben iꞌ wi jun juꞌwtz, nin cuꞌ cꞌolchok scyuchꞌ eꞌ ẍchusbeꞌtz. 4 Ucumul tlen tuꞌ atit chikꞌej yi judiy yi na biꞌaj Pasc, yi bajeꞌn yi xtxolbileꞌj.
5 Ma yi beneꞌn tilol Jesús yi wiꞌnin cyuleꞌn eꞌ wunak teꞌj, nintzun ben tlol tetz Liꞌp:
—¿Naꞌ kabeneꞌt tan lokꞌcheꞌn chiwaꞌ jun cꞌoloj wunakeꞌj?
6 Ja xcon yi yoleꞌj tan Jesús ntin tan pileꞌn Liꞌp, na nsken el xtxum tetz yi mbi sbneꞌ iꞌ.
7 —Quil xcyeꞌ cob cient pwok pam siquierk tan takꞌleꞌn jun ẍkꞌok te jujun, —chij Liꞌp bantz.
8 At tzun junt ẍchusbeꞌtz Jesús at-tz, yi na biꞌaj Leẍ, titzꞌun Simón Luꞌ, itzun taltz;
9 —Taꞌ, at jun tal xicy at tzoneꞌj yi cyꞌaꞌn oꞌ pam yi cebada tuꞌ, nin cyꞌaꞌn cob tal cay taꞌn. Poro ¿ẍeꞌn xcyeꞌ yi muꞌẍ talaꞌtz tan chicꞌaꞌcheꞌn yi jun chin cꞌoloj wunakeꞌj?
10 —Alwok nin scyetz tan chicweꞌn cꞌolchok wi chꞌim, —chij Jesús scyetz.
Na yi amaꞌlaꞌtz kale ateꞌt, txaꞌx chꞌim cuꞌn. Ej nin at loꞌ oꞌ mil yaj eꞌ baj cꞌoleꞌ cuꞌntz.
11 Jeꞌn tzun stzꞌamol Jesús yi oꞌ tal pam. Nin yi wiꞌt tyoẍineꞌn tibaj, nintzun ben tkꞌoltz scyetz eꞌ ẍchusbeꞌtz tan beneꞌn chijatxol scyetzak cyakil wunak. Ej nin iteꞌn nin eꞌ banaꞌs tan jatxleꞌn yi cay. Nicyꞌ cuntuꞌ chicꞌuꞌl cyakil wunak tan waꞌaꞌn. 12 Ma yi baj nojeꞌn chicꞌuꞌl, beneꞌn tzun tlol Jesús scyetz yi eꞌ ẍchusbeꞌtz:
—Chamwokeꞌn yi sowril tan qui xtxꞌakxeꞌn muꞌẍ tal, —chij Jesús scyetz.
13 Chibaj beneꞌn tzuntz tan ẍchamleꞌn, nin ja chomxij coblaj moꞌtx sowril yi oꞌ tal pamaꞌtz.
14 Itzun yi quilol wunak yi jun milawraꞌtzeꞌj, yi bnix tan Jesús, ja cyal:
—Yi yajeꞌj, jun cuꞌn yol, iꞌ yi elsanl stziꞌ Ryos yi at tulbil wi munt.
15 Poro yi teleꞌn xtxum Jesús te cyajtzaꞌkl yi eꞌ wunak, yi iꞌtz tan toqueꞌn iꞌ tetz chireyil, nintzun el jatxol tib scyeꞌj. Choꞌn tzun beneꞌn iꞌ ẍchuc jalen wiꞌwtz.
Yi xoneꞌn Jesús wi mar
(Mt 14.22-27; Mr 6.45-52)
16 Itzun yi toqueꞌn yupcan, choꞌn chibeneꞌn yi eꞌ ẍchusbeꞌtz Jesús stzi aꞌ. 17 Nin eꞌ octz tul jun barc. Choꞌn at chibembil Capernaum, yi at jalaj icyꞌen yi aꞌ. Oqueꞌn nin ban mas akaleꞌn, poro yi Jesús lolch nin na ul. Chibeneꞌn tzuntz chichuc. 18 Te yi na chixon wi aꞌ, nintzun xeꞌtij jun chin wutzileꞌn cyekꞌekꞌ. Ej nin wiꞌnin jeꞌn pakꞌbil mar tcyaꞌj. 19 Yi nsken chiben jun loꞌ ujlub tu niꞌcy wi aꞌ, beneꞌn tzun quilol yi txant tan tuleꞌn Jesús chinakaꞌjil. Poro xoꞌn cuntuꞌ taneꞌn iꞌ wi aꞌ tan tponeꞌn scyeꞌj. Wiꞌnin tzun chixobeꞌntz tetz.
20 —Quil cxobwok, i inaꞌtz, —stzun iꞌ scyetz.
21 Wiꞌnin chitzatzineꞌntz te iꞌ yi tocomponeꞌn scyeꞌj tul yi barc. Ej nin jun chin rat teꞌn nin, oponeꞌn nin eꞌ bantz le amaꞌl kale atit cyopombil.
Yi cyoqueꞌn eꞌ wunak tan joyleꞌn Jesús
22 Itzun bantz le junt eklok, cyakil yi eꞌ wunak yi eꞌ baj cyaj cyen jalaj icyꞌen aꞌ, qui nin pujx cyakꞌun naꞌ atit Jesús. Na, nin el chitxum tetz yi nsken chiben yi eꞌ ẍchusbeꞌtz Jesús tul yi jun tal barc yi at-tz, nin quiꞌc Jesús xomnintz scyeꞌj.
23 At tzun cobox barc yi choꞌn sajeꞌn Tiberias. Choꞌn tzun cyuleꞌn nakaꞌjil yi luwar kale bajeꞌt yi pam cyakꞌun wunak yi tyoẍin Kajcaw tibaj. Yi cyoponeꞌn yi eꞌchk barcaꞌtz, nintzun eꞌ oc yi eꞌ wunakaꞌtz tcꞌuꞌlak. 24 Na nsken quil yi quibeꞌt Jesús scyuchꞌ yi eꞌ ẍchusbeꞌtz le jun amaꞌlaꞌtz kale ateꞌt. Ma yi cyoqueꞌn tul eꞌchk barcaꞌtz, nintzun eꞌ icyꞌtz wi aꞌ tan cyoponeꞌn Capernaum tan joyleꞌn.
Jesús akꞌol te itzꞌajbil
25 Itzun yi quicyꞌeꞌn poneꞌntz jalaj icyꞌen aꞌ, nin eꞌ nojpontz te Jesús. Cyoqueꞌn tzuntz tan jakleꞌn tetz:
—Taꞌ, ¿mbiꞌ oril tuleꞌnuꞌ tzoneꞌj? —cheꞌch.
26 —Jun cuꞌn yol na wal nin scyeruꞌ, yi eꞌ cyeruꞌ ntin na chitzanuꞌ tan injoyleꞌn tan tuꞌ yi awten wakꞌ chiwaꞌuꞌ. Qui na chitzanuꞌ tan injoyleꞌn tan tuꞌ yi jak el chitxumuꞌ te yi mbi ekaꞌn tan eꞌchk milawr yi na bnix waꞌn ẍchixoꞌluꞌ. 27 Quil chijokcoꞌpuꞌ tan joyleꞌn yi waj yi baꞌn na sotz, ma na choꞌjkelkuꞌ tan joyleꞌn yi waꞌ yi cyalmaꞌuꞌ yi na takꞌ yi itzꞌajbil yi qui bajsbeꞌn tetz. Yaꞌstzun yi jun jilwutz waj yi swakꞌeꞌ wetz scyeruꞌ, yi in, yi in Bajx Cyꞌajol. Ej nin jun cuꞌn yol ja takꞌ Intaj yi poreraꞌtz tan banleꞌn yi jun milawraꞌtz swetz ntin tan ẍchajleꞌn yi na tzatzin iꞌ sweꞌj.
28 —¿Mbi tzun lkaban ketz tan kajeꞌn poneꞌn tan banleꞌn taneꞌn yi tajbil Ryos? —cheꞌch.
29 —Yi tajbil Ryos, iꞌtz yil cyocsajuꞌ yi chakijchint taꞌn, —chij Jesús scyetz.
30 —¿Poro mbik jun jilwutz milawr yi baꞌn ẍchajuꞌ sketz tan kocsal yi chakij tzajuꞌ tan Ryos? 31 Na yi eꞌ kamam kateꞌ, eꞌ wan te jun jilwutz waj yi choꞌn sajeꞌn tcyaꞌj. Na yaꞌstzun tzꞌibaꞌnt cyen.
32 —Jun cuꞌn yol na wal nin scyeruꞌ. Nkꞌeꞌtz Moisés akꞌon yi jun jilwutz wajaꞌtz, ma na i yi Intaj. Iꞌ akꞌon tzaj scyetz. Nchaꞌtz taneꞌn iꞌ jaluꞌ, na tzan tan takꞌleꞌn tzaj yi mero waꞌ yi cyalmaꞌuꞌ, yi mero waj yi choꞌn na saj tcyaꞌj. 33 Na yi jun jilwutz wajaꞌtz yi na tzan Kataj Ryos tan takꞌleꞌn tzaj, iꞌtz yi in, yi choꞌn nchinsaj chakij jalen tcyaꞌj tan takꞌleꞌn quitzꞌajbil cyakil wunak, —stzun Jesús scyetz.
34 —Taꞌ, na bin kaj ketz yi ilenin ltakꞌuꞌ yi jun jilwutz wajaꞌtz sketz.
35 —I bin inaꞌtz yi waj yi na akꞌon itzꞌajbil. Alchok scyetz yil xom tzaj sweꞌj, quiꞌt quim talmaꞌ tan weꞌj. Ej nin alchok scyetz yil chin tocsaj, quiꞌt quim talmaꞌ tan saktziꞌ. 36 Jatix loꞌ tir wal yi xtxolbilaꞌtz scyeruꞌ. Poro qui na cyajuꞌ cyocsajuꞌ inyol. 37 Poro cyakil yi eꞌ yi na takꞌ Intaj amaꞌl tan cyuleꞌn sweꞌj, yaꞌstzun yi eꞌ yi chixomok sweꞌj. Ej nin cyakil yi eꞌaꞌtz yil chuꞌl sweꞌj, quil cheꞌ inlajlen. 38 Na yi insajeꞌn chakij tcyaꞌj, nkꞌeraꞌtz inmantar yi ik tan banleꞌn yi wetz wajbil, ma na i yi tajbil yi jun yi nchinchakon tzaj. 39 Ej nin yi tetz tajbil iꞌtz, yi quil txꞌakxij jun scyeri yi eꞌ yi ja wiꞌt cheꞌ takꞌ swetz. Ej nin nchaꞌtz yi tajbil iꞌ iꞌtz, yil chitzꞌij junt tir waꞌn yil tzꞌul tzaj yi wiꞌtzbil kꞌejlal. 40 Na yi tajbil yi jun yi nchinchakon tzaj iꞌtz, yi alchok scyetz yil tzꞌel xtxum te yi mbi ekaꞌn waꞌn, nin kol kꞌukeꞌ cꞌuꞌl sweꞌj, scambajeꞌ teraꞌtz yi jun itzꞌajbilaꞌtz yi qui bajsbeꞌn tetz. Ej nin le wiꞌtzbil kꞌejlal, nocopon tan jeꞌseꞌn tzaj iꞌ ẍchixoꞌl almaꞌ, —chij Jesús bantz scyetz.
41 Itzun yi eꞌ judiy, yi contr te Jesús, nintzun eꞌ octz tan yolcheꞌn tan tuꞌ yi yol yi ntal: “I bin inaꞌtz yi jun wajaꞌtz yi choꞌn nsaj tcyaꞌj.”
42 —Nkꞌeraꞌtz peꞌ Jesúseꞌj, yi cyꞌajl Ẍep. Kajskeꞌn bin wutz yi taj xtxuꞌ. ¿Mbi xac na tal iꞌ yi choꞌn nsaj tcyaꞌj? —cheꞌch tzun bantz.
43 —¿Nxac na chitzanuꞌ tan inyolcheꞌn? 44 Poro quiꞌc rmeril yi nink xom tzaj jun sweꞌj ko nkꞌeꞌtz moxoꞌn nsaj tan Intaj, yi jun yi nchinchakon tzaj. Ej nin yi eꞌ yil chuꞌl sweꞌj, chitzꞌok junt tir waꞌn le wiꞌtzbil kꞌejlal. 45 Na at eꞌ yi ẍchixomok sweꞌj, na je yi xtxolbileꞌj yi tzꞌibaꞌnt cyen cyakꞌun yi eꞌ elsanl stziꞌ Ryos tentz: ‘Tzꞌocopon Kataj Ryos tan chichusleꞌn.’ Ej nin cyakil yi eꞌaꞌs yil choꞌc il tan tbiteꞌn nin yil pujx cyakꞌun, yaꞌstzun yi eꞌ yi chuꞌl xomok sweꞌj.
46 “Poro tan yi yolaꞌseꞌj, qui na chintzan tan talcheꞌn yi atk wunak yi jak quil wutz Ryos, na ntinaꞌtz jun yi ja tech wutz Ryos iꞌtz yi in, yi choꞌn chinsaj te iꞌ. 47 Ej nin jun cuꞌn yol na wal nin scyeruꞌ, cyakil yi eꞌ yi na kꞌukeꞌ chicꞌuꞌl sweꞌj, ja wiꞌt chicambaj yi itzꞌajbil tetz ben kꞌej ben sak. 48 Na yi in wetz, i inaꞌtz yi waj yi na takꞌ itzꞌajbil. 49 Bintzi, yi eꞌ chimam chiteꞌuꞌ, eꞌ wan cyen te yi waj maná le amaꞌl tzꞌinunin tuꞌ, poro ilenin eꞌ quim. 50 Poro cyakil yi eꞌ yil chibajsaj yi waj yi choꞌn nsaj tcyaꞌj, quil chiquim cyeraꞌtz. 51 Na i inaꞌtz, in yi waj yi itzꞌ nin tetz, yi choꞌn chinsaj tcyaꞌj. Ej nin alchok scyetz yil bajsan yi jun wajaꞌtz, quil sotz teraꞌtz. Na yi jun wajaꞌtz, iꞌtz inwankil yi swakꞌeꞌ tan jaleꞌn quitzꞌajbil cyakil wunak wi munt, —stzun Jesús scyetz.
52 Ma yi quibital yi eꞌ judiy yi yolaꞌseꞌj, nintzun eꞌ octz tan wakꞌ ib squibil quib. At tzun eꞌ cyaltz:
—¿Mbi rmeril tan tkꞌol iꞌ yi wankil tan jeꞌn kabajsal? —cheꞌch.
53 —Jun cuꞌn yol na wal nin scyeruꞌ, tajweꞌn tan kꞌukeweꞌn chicꞌuꞌluꞌ sweꞌj, niꞌcuꞌn chi nink baj inwankil cyanuꞌ. Niꞌcuꞌn chi nink quicꞌajeꞌnuꞌ yi inẍchꞌel. Na ko quil kꞌukeꞌ chicꞌuꞌluꞌ sweꞌj, quil jal yi itzꞌajbil tetz ben kꞌej ben sak cyanuꞌ. 54 Na alchok scyetz yil bajsan inwankil, nin yil tcꞌajeꞌn inẍchꞌel, at tetz stzꞌajbil tetz ben kꞌej ben sak. Ej nin tzꞌitzꞌok junt tir waꞌn le wiꞌtzbil kꞌejlal. 55 Na yi inwankil, yaꞌstzun yi waj yi mero bintzinin tetz. Ej nin yi inẍchꞌel, yaꞌstzun yi aꞌ yi mero bintzinin tetz. 56 Cyakil yi eꞌ yi na baj inwankil cyaꞌn, nin yi na quicꞌajeꞌn yi inẍchꞌel, yaꞌstzun yi eꞌ yi junit oꞌ scyuchꞌ. 57 Na yi wetz Intaj, yi jun yi nchinchakon tzaj, iꞌ akꞌol tetz yi itzꞌajbil. Ej nin tan iꞌ itzꞌineꞌt. Ej nin nchaꞌtz quitaneꞌn yi eꞌ yi na jal yi waꞌ cyalmaꞌ sweꞌj, tan in itzꞌeꞌ. 58 Ej nin yaꞌstzun yi mero waj yi choꞌn nsaj tcyaꞌj. Yi jun jilwutz wajaꞌtz, yi na wal nin scyeruꞌ, at mas walor swutz yi maná yi bajnak cyakꞌun chimam chiteꞌuꞌ. Na bajnak cyakꞌun poro ilenin eꞌ quim. Poro alchok scyetz yil baj yi waj yi na insuk wetz, quil sotz teraꞌtz tetz ben kꞌej ben sak, —chij Jesús bantz scyetz.
59 Choꞌn tkꞌol Jesús yi jun chusuꞌnaꞌtz le sinagoga, Capernaum.
Yi xtxolbil yi na takꞌ itzꞌajbil
60 Ma yi quibital yi eꞌ wunakaꞌtz yi eꞌ xom te Jesús, yi jun chusuꞌnaꞌtz, itzun cyaltz squibil quib:
—Yi yol yi nkubit, at qꞌuixbel tan kocsal. Baꞌn tcuꞌn quil katxum, —cheꞌch.
61 Itzun yi nachoneꞌn Jesús te chitxumuꞌn, nin ben jakoltz scyetz:
—¿Na peꞌ cheꞌl yabuꞌ te yi chusuꞌneꞌj yi nwal? 62 Ko na cheꞌl yabuꞌ teꞌj, ¿mbil chitxumuꞌ yil naꞌjt wetz tziꞌn tcyaꞌj? 63 Nchaꞌtz quiꞌc takꞌ scyeruꞌ kol baj inwankil cyanuꞌ, na i yi Espíritu Sant yaꞌstzun yi jun yi na akꞌon quitzꞌajbil wunak. Nin jun cuꞌn yol, yi chusuꞌn yi ja wiꞌt wal scyeruꞌ, yaꞌstzun yi na takꞌ itzꞌajbil, nin yaꞌstzun yi mero bintzi. 64 Poro at eꞌ ẍchixoꞌluꞌ yi qui na cyocsaj inyol.
Tal Jesús yi yolaꞌtz, na sken el xtxum scyetz yi eꞌ yi qui eꞌ xom te yi tetz ẍchusuꞌn. Ej nin el xtxum tetz yi naꞌ scyetz iꞌ yi jun yi tzꞌocopon tan jatxleꞌn nin ẍchikꞌab eꞌ contr.
65 Nchaꞌtz tal Jesús:
—At wiꞌnin eꞌuꞌ yi qui na cyocsajuꞌ inyol. Chaꞌstzun te yi ja wal yi jun xtxolbilaꞌtz scyeruꞌ: Quiꞌc rmeril tan xomeꞌn jun sweꞌj ko quil takꞌ Intaj amaꞌl tetz, —stzun Jesús bantz scyetz.
66 Yi talol Jesús yi xtxolbileꞌj, at wiꞌnin eꞌ yi xomcheꞌ teꞌj yi el chijatxol quib. Quiꞌt eꞌ xom teꞌj. 67 Beneꞌn tzun tlol Jesús scyetz yi eꞌ ẍchusbeꞌtz:
—¿Nchaꞌtz peꞌ axwok itetz, na peꞌ itajwok chin itil cyen, chi nchiban yi eꞌ wunakeꞌj?
68 —Quiꞌc rmeril Taꞌ, —stzun Simón Luꞌ— na ¿naꞌ scyetz junt kaxom nint teꞌj? Na yi yol yi na taluꞌ, yaꞌstzun yi yol yi na akꞌon kutzꞌajbil tetz ben kꞌej ben sak. 69 Na yi oꞌ ketz, ja wiꞌt kocsaj cuꞌn yi i iluꞌaꞌtz yi Cristo, yi bixbaꞌnt tan tuleꞌn. Ej nin na kocsaj ketz yi i iluꞌaꞌtz, iluꞌ yi Cyꞌajl Kataj Ryos, yi Ryos yi itzꞌ nin tetz, —stzun Luꞌ bantz tetz.
70 —Yi in wetz ja jeꞌ intxaꞌol coblaj ixoneꞌn. Poro ilenin at jun tzixoꞌlwok yi niꞌcuꞌn tajtzaꞌkl tu yi tajtzaꞌkl Baybaꞌn, —stzun Jesús bantz scyetz.
71 Tan yi yoleꞌj, na tzan Jesús tan talcheꞌn yi xtxolbil tetz Judas Iscariot, yi cyꞌajl Simón. Yaꞌstzun yi Judas yi at tocbil tan jatxleꞌn Jesús ẍchikꞌab eꞌ contr. Wech yi jun yajaꞌtz, iꞌ jun scyeri coblaj ẍchusbeꞌtz Jesús.