Yi eꞌ titzꞌun Jesús qui na cyocsaj
7
1 Itzun yi wiꞌt bnixeꞌn cyakil yi eꞌchk takleꞌneꞌj, choꞌn tzun beneꞌn lakak eꞌchk amaꞌl cwent Galilea, na nkꞌeraꞌtz tajbil iꞌ tan beneꞌn Judea, na sken tbit yi at cyocbil tan biyleꞌn iꞌ. 2 Ma yi txant tan tucumuleꞌn yi jun kꞌej yi na icyꞌ cyaꞌn yi eꞌ judiy yi na biꞌaj Scab Teꞌ, 3 nintzun cyal yi eꞌ titzꞌun Jesús tetz:—Baꞌn tcuꞌn cẍben Judea, bantz quilol yi eꞌ achusbeꞌtz yi eꞌchk milawr yi na bnix awaꞌn. 4 Na quil scꞌul yi ewun cuꞌn tzaban amunl. ¿Nxac yi ntin tzoneꞌj na cẍtzan tan banleꞌn eꞌchk milawr? Baꞌn tcuꞌn cẍben tan banleꞌn eꞌchk milawraꞌtz ẍchiwutz cyakil wunak Judea, —cheꞌch tzun bantz tetz.
5 Xcyꞌaklil tuꞌ na chiban cyen yi eꞌ titzꞌun Jesús teꞌj, na quinin cyocsaj yi mbi ekaꞌn taꞌn.
6 —Txeꞌn opon kꞌejlal tan jaleꞌn wetz inkꞌej. Ma tziwutz itetz, alchok kꞌejil yi baꞌn tan joyleꞌn itetz ikꞌej. 7 Poro qui na chiꞌch chicꞌuꞌl wunak tziteꞌj chi na chiꞌch chicꞌuꞌl sweꞌj, tan paj yi tzan lajluchaxeꞌn chipaltil waꞌn. 8 Baꞌn tcuꞌn quibeneꞌnk bin itetz, ma in wetz, quil chimben chan, na txeꞌn opon kꞌejlal tan imbeneꞌn, —stzun iꞌ scyetz.
9 Yi wiꞌt talol yi eꞌchk yolaꞌs, ntaꞌsteꞌn nin cyaj cyent le amaꞌl cwent Galilea.
Yi xaꞌkeꞌn Jesús tan tilweꞌn yi kꞌej yi na biꞌaj Scab Teꞌ
10 Itzun bantz, yi nsken chiben yi eꞌ titzꞌun Jesús tan ticyꞌseꞌn yi kꞌej, nin nchaꞌtz iꞌ nin bentz. Poro ewuꞌn cuꞌn tuꞌ toponeꞌn.
11 Ma yi eꞌ wunak, nternin na chitzan tan joyleꞌn iꞌ:
—¿Abil atit jun yajaꞌtz? —cheꞌch.
12 Na ẍchixoꞌl yi eꞌ wunak yi ateꞌ-tz tkꞌej, at wiꞌnin eꞌ yi na chitzan tan yolcheꞌn Jesús. At eꞌ yi na cyal: “Yi jun yajaꞌtz, chumbalaj nin iꞌ.” Poro nchaꞌtz at eꞌ yi na cyal: “Chin cachiꞌ nin iꞌ, na iꞌ jun subul nak,” cheꞌch.
13 Poro jasneweꞌn cuꞌn na chitzan tan yolcheꞌn Jesús, na na chixob scyetz yi eꞌ contr te Jesús.
14 Itzun te yi na nicyꞌan cunin yi kꞌej, tocomponeꞌn Jesús le templo. Nin xeꞌtijt tan chichusleꞌn wunak.
15 Ma yi eꞌ judiy yi contr teꞌj, wiꞌnin cyeleꞌn yabtz te yi yol yi na tzan tan yolcheꞌn, itzun cyaltz:
—¿Ẍeꞌn na el xtxum nocxeꞌj te wiꞌnin ajtzaꞌkl? Wech na quiꞌc ẍchusuꞌn, —cheꞌch.
16 —Yi chusuꞌn yi cyꞌaꞌn wetz waꞌn, nkꞌeꞌtz wetz, ma na tetz yi jun yi nchinchakon tzaj. 17 Nin alchok scyetz yi na el talmaꞌ tan banleꞌn taneꞌn yi tajbil Ryos, tzꞌelepon xtxum tetz yi choꞌn nsaj teꞌtz te Ryos. Nin nkꞌeꞌtz wajtzaꞌkl cuntuꞌ yi na wal. 18 Na ko at jun yi na xcon tajtzaꞌkl taꞌn tan chichusleꞌn wunak iꞌtz jun techl yi kꞌej tuꞌ iꞌ na joy. Poro alchok scyetz yi na tal quib yi na tal yi chusul tetz, itzun iꞌaꞌtz yi cyꞌaꞌn yi chusuꞌn taꞌn yi bintzinin tetz. Na wal yi jun yoleꞌj, na yaꞌstzun wutaneꞌn wetz. Na yi inchusuꞌn choꞌn na saj te yi jun yi nchinchakon tzaj. Nkꞌeꞌtz in subul nak chi na cyaluꞌ.
19 “Poro yi eꞌ cyeruꞌ, eꞌuꞌ subul nak, na takꞌnak Moisés yi ley scyeruꞌ tan chibnoluꞌ taneꞌn, poro qui na chitzanuꞌ tan banleꞌn taneꞌn. ¿Nxac tzun na cyajuꞌ choꞌcuꞌ tan imbiyleꞌn? —chij Jesús scyetz.
20 —Aẍ loꞌ yab. ¿Naꞌ scyetz jun na taj tzꞌoc tan abiyleꞌn? —cheꞌch.
21 Stzaꞌwel tzun Jesús chiyoltz:
—Lastum ja bnix jun tal milawr waꞌn le jun kꞌej ujleꞌn, poro cyakil cuꞌn eꞌuꞌ ja chicyakaxuꞌ taꞌn. 22 Poro chitxumeꞌuꞌ yi mbi banak kꞌajtzun kamam Moisés. Iꞌ akꞌon yi ley tan chibajeꞌn circuncidar yi eꞌ niꞌ. (Poro nkꞌeꞌtz iꞌ xeꞌtzan cuꞌn yi jun xtxolbilaꞌtz, ma na i yi eꞌ mam cyen iꞌ.) Ej nin ko na noj quen yi bajeꞌn circuncidar jun niꞌ le jun kꞌej ujleꞌn, ilenin na choꞌcuꞌ il tan banleꞌn taneꞌn tal wankil iꞌ. 23 Ma jaluꞌ, ko yaꞌtz na chibanuꞌ tul jun kꞌej ujleꞌn tan qui chipajoluꞌ yi caꞌwl Moisés, ¿mbi tzuntz yi na chiꞌch chicꞌuꞌluꞌ sweꞌj tan tuꞌ yi mmuꞌl yos waꞌn te cyakil yi wankil jun yaj? 24 Quil cyakꞌ quenuꞌ yi balaj ajtzaꞌkl tetz ploj. Ma na yi na choꞌcuꞌ tan maꞌleꞌn eꞌchk ajtzaꞌkl, tajweꞌn yi puntil cuꞌn cyulejuꞌ.
Yi talol Jesús naꞌ sajeꞌt iꞌ
25 At tzun cobox aj Jerusalén, nin cyaltz:
—¿Nkꞌeraꞌtz peꞌ yi yajeꞌj yi na tzan joyleꞌn tan cweꞌn biyij? 26 Na je bin iꞌ na jilon tzoneꞌj. Nin cyaꞌl nin jun yi nak nimsaj tib tan makleꞌn wutz. Ja loꞌ cyocsaj yi eꞌ kabajxom yi iꞌ yi Cristo yi bixbaꞌnt tan tuleꞌn. 27 Poro quiꞌ loꞌ, nkꞌeꞌtz iꞌ yi Cristo, na elnak katxum tetz yi naꞌ nsiteꞌt yi yajeꞌj. Poro yil tzꞌul tzaj Cristo, cyaꞌl jun tzꞌel xtxum tetz yi naꞌ lsiteꞌt, —cheꞌch tzun squibil quib.
28 Nicyꞌ yi na tzan Jesús tan chichusleꞌn wunak le templo, nin yi beneꞌn tbital yi chiyolaꞌtz yi ncyal, mas tcunin jeꞌn wiꞌ iꞌ tan yol. Itzun taltz:
—¿Na ptzun el chitxumuꞌ tetz yi mbi ekaꞌn waꞌn nin naꞌ nchinsajeꞌt? Quiꞌ. Na yi in wetz nkꞌeꞌtz yi wajbil tuꞌk yi wuleꞌn tzoneꞌj, poro ja chinsaj chakij tan jun yi mero bintzinin iꞌ. Ej nin yi junaꞌtz, qui cyajskeꞌnuꞌ wutz. 29 Poro yi in wetz, wajskeꞌn wutz iꞌ, na choꞌn nchinsaj te iꞌ, —stzun iꞌ bantz scyetz.
30 Tan tuꞌ yi yol yi baj tlol, nintzun kloꞌ octz cyaꞌn pres, poro cyaꞌl nin jun nimsaj cꞌuꞌl tan stzꞌamleꞌn, na ntaxk opon yi tiempil tan xtxꞌamxeꞌn iꞌ. 31 Poro at wiꞌnin eꞌ cyocsaj yi iꞌ yi Cristo, nin cyal:
—Yi juneꞌj, yaꞌstzun yi Cristo, yi bixbaꞌnt tan Ryos. Na iẍkaj nin tzunk tzꞌul junt tan ẍchajleꞌn eꞌchk milawr mas balaj swutz yi milawr yi na kil te yajeꞌj, —cheꞌch tzun bantz.
Yi chichakxeꞌn aj ront tan beneꞌn Jesús pres
32 Yi quibital yi eꞌ parisey, scyuchꞌ yi eꞌ wiꞌtz paleꞌ yi na chitzan wunak tan takꞌleꞌn kꞌej Jesús, beneꞌn tzun chichakol yi eꞌ aj ront cwent caꞌl Ryos tan beneꞌn kloꞌ quicyꞌal pres. 33 Chaꞌstzun te beneꞌn tlol yi yoleꞌj scyetz yi eꞌ contraꞌtz:
—Quil naꞌtij mas tiemp chixoꞌluꞌ, na chimpakxok junt tir te yi jun yi nchinchakon tzaj. 34 Chocoponuꞌ tan injoyleꞌn, poro quil chinjal cyanuꞌ, na quiꞌc rmeril yil choponuꞌ kalel noponeꞌt wetz.
35 Cyoqueꞌn tzun cobox judiy tan jakleꞌn squibil quib:
—¿Naꞌ tzun beneꞌt iꞌ yi quiꞌt ljal kaꞌn? ¿Nka choꞌn tzun mben tan chichusleꞌn yi eꞌ katanum yi najlcheꞌ ẍchixoꞌl yi eꞌ awer nak? 36 Ej nin ¿mbi na elepont yi jun yolaꞌtz yi ntal iꞌ: ‘Chocoponuꞌ tan injoyleꞌn, poro quil chinjal cyanuꞌ, na quiꞌc rmeril yil choponuꞌ kalel noponeꞌt wetz’? chij iꞌ ban sketz, —cheꞌch.
Yi xtxolbil tetz yi aꞌ yi stkꞌeꞌ itzꞌajbil
37 Itzun bantz te yi wiꞌtzbil kꞌej te yi jun kꞌejaꞌtz yi na biꞌaj Scab Teꞌ, yi kꞌejaꞌtz yi mas na cyakꞌ wunak kꞌej, nintzun oc Jesús tan txoliꞌn. Nin mast cunin jeꞌn wiꞌ tan yol, itzun taltz:
—Alchok scyetz yi na quim tan saktziꞌ, sajken sweꞌj nin swakꞌeꞌ tcꞌaꞌ. 38 Na alchok scyetz yil tocsaj yi inyol, smulkꞌink jun chin aꞌ tetz talmaꞌ yi stkꞌeꞌ stzꞌajbil, na yi jun xtxolbilaꞌtz tzꞌibaꞌnt cyen, —stzun Jesús scyetz.
39 Yi na elepont jun yolaꞌseꞌj yi ntal Jesús, iꞌtz yi tzꞌocopon yi Espíritu Sant te cyalmaꞌ yi eꞌaꞌtz yil cyocsaj. Poro ntaxk ul yi Espíritu Sant, na ntaxk quim Jesús, nin ntaxk itzꞌij junt tir tan jaleꞌn kꞌej.
Yi cweꞌn jatxol tib cyajtzaꞌkl wunak te Jesús
40 Yi quibital wunak yi yolaꞌseꞌj, at cobox yi cyal:
—Yi yajeꞌj, yaꞌstzun yi jun elsanl stziꞌ Ryos yi at tulbil.
41 Ej nin at coboxt cyal:
—Yaꞌstzun yi Cristo, yi bixbaꞌnt.
Poro at coboxt yi cyal:
—Poro quiꞌc rmeril yi choꞌnk tzꞌitzꞌij yi Cristo Galilea, 42 na tzꞌibaꞌnt cyen le tuꞌj Kataj yi choꞌn tzꞌitzꞌok yi Cristo te jun xonl kꞌajtzun rey Luwiy. Ej nin tzꞌibaꞌnt cyen yi choꞌn tzꞌitzꞌok le tnum Belén, yi tanum kꞌajtzun Luwiy, —cheꞌch tzun bantz.
43 Cuꞌ tunin jatxol tib cyajtzaꞌkl wunak te Jesús. 44 At cobox yi yaꞌstzun cyajbil tan toqueꞌn kloꞌ Jesús xetzeꞌ. Poro cyaꞌl nin jun nimsaj cꞌuꞌl tan tocseꞌn.
Yi eꞌ wiꞌ banl wiꞌ qui cyocsaj yi Jesús yaꞌstzun yi Cristo
45 Chipakxeꞌnt tzun yi eꞌ aj ront cwent caꞌl Ryos kale ateꞌt yi eꞌ parisey scyuchꞌ yi eꞌ wiꞌtz paleꞌ. Nin yi cyocomponeꞌn, nintzun eꞌ oc yi eꞌ ajcawaꞌtz tan jakleꞌn scyetz:
—¿Mbi tzun yi qui nsaj itcyꞌal? —cheꞌch bantz.
46 —Eꞌuꞌ taꞌ, cyaꞌl cunin na kubitwit yol jun yaj chi taneꞌn jilon yi jun yajaꞌtz, —cheꞌch.
47 —Nchaꞌtz axwok, ¿ja ptzun cxubsijwok taꞌn? 48 Iẍkaj atk jun skaxoꞌl ketz yi oꞌ ajcaw, nin yi oꞌ parisey yi jajk kocsaj yi iꞌ yi Cristo. 49 Quiꞌc chixac yi eꞌ wunakaꞌtz yi na xom chiwiꞌ teꞌj, na qui na el chitxum tetz yi mbi na tal yi kaley, —cheꞌch tzun bantz.
50 At tzun Nicodemo chixoꞌl yi eꞌ pariseyaꞌtz, yi jun yi xaꞌk tzaj tan xajseꞌn Jesús lakꞌbal, nintzun ben tlol scyetz:
51 —I na tal kaley, quiꞌc cu yi nink kakꞌ til jun yaj yi ntaxk kubit yi yol iꞌ. Nin quiꞌc cu yi nink kakꞌ til jun yi ntaxk el katxum tetz yi mbi na tzan tan banleꞌn, —stzun iꞌ ban scyetz.
52 —¿Iluꞌ ptzun aj Galilea teruꞌ yi na xom wiꞌuꞌ te nocxaꞌtz? Okuꞌ tan joyleꞌn tul eꞌchk liwr yi tzꞌibaꞌnt cyen, nintzun tiluꞌ-tz yi quiꞌc nin jun elsanl stziꞌ Ryos yi choꞌnk tzꞌitzꞌok le jun amaꞌl cwent Galilea, —cheꞌch tzun bantz tetz Nicodemo.
53 Chijunaleꞌn tzun cyajeꞌn xeꞌak chicaꞌl.